Atrás     PDF

Nel aconceyamientu de la Xunta Direutiva cellebráu en día 13 d’avientu apautóse:

Primero.- Que’l vocal Xosé Lluis del Río Fernández, iguador de la páxina ueb, se responsabilice de la so direición y espardimientu. L’accesu a la mesma ye www.xuristes.as 

Segundo.- L’estatutu del Aconceyamientu de Xuristes pol Asturianu determina que la so finalidá ye la de “contribuyir, ensin afán dengún de beneficiu o llucru, al desaniciu dafechu de les torgues qu´apilanquen l´emplegu de la llingua asturiana na actividá profesional de los xuristes”, desendolcando pa ello “actividaes informatives, formatives y vindicatives, asina como cualesquier delles otres axustaes col so oxetivu”. Poro, ye propio d’elli’l collaborar con toles instituciones, organizaciones y, mesmamente, persones, que quieran trabayar na dignificación de la llingua asturiana. Nesi sen, yá ufiertamos la pareya pa echar la gavita cuando-yos faiga falta a la ciudadanía en xeneral (al traviés del serviciu sox), organizaciones cíviques (Academia de la Llingua Asturiana, Coleutivu Abiertu pola Oficialidá, Xunta pola Defensa de la Llingua, Asociación de los Trabayadores de los Servicios de Normalización Llingüística, Algamar…), sindicatos y partidos políticos (Andecha Astur, IAS, Izquierda Unida, PAS, PCPE, UNIDÁ), pero entá nun tuviéremos ocasión de facelo col PSOE ni’l PP.

Pero too llega y asina, como nunes declaraciones  públiques la Conseyera de Cultura, per un llau, y el voceru del PP na Xunta Xeneral del Principáu y l’alcalde d’Uviéu, pel otru, amosaron un desnortie dafechu respeutu al camín a siguir pa la normalización de la llingua propia del país, a la Xunta Direutiva faltó-y tiempu pa pidi-y al Presidente que-yos ufiertare’l brazu pa salir del llamorgal. Axúntense entrambos convides. El que se fai a la Conseyera de Cultura va per vía rexistru y ensin publicidá porque abúltamos que l’esmolecimientu ye de mentira; el del PP, que tien pinta de ser más de verdá, mándase a los medios de comunicación.

Tercero.- Aprovechando esti tiempu d’alloriu, pastores y panderos, alcordóse da-y fuelgu al trabayu p’afuera y aprovechalu p’arreglar un poco la casa (secretaría y ayalguería). Asina va facese una campañina d’información direuta con dellos xuristes, pa entainar col crecimientu de l’asociación, y tamién tentar de poner al día’l cobru de les cuotes 2006 y 2007 y los ingresos polos llibriquinos repartíos, que fonon les úniques fontes de financiación nestos dos años de vida. Poro, con tolos qu’entá nun rellenaron la solicitú p’asentase; nun abonaron les cuotes (6 euros per añu); o nun recibieron o nun ingresaron l’importe de los llibrinos (6 euros por llibru qu’a razón de tres llibros por xurista faen en xunto 18 euros), vamos ponemos en contautu darréu.