Atrás     PDF

XUNTA XENERAL 2010

1. DETERMÍN DE NUN FACER UNA XUNTA PRESENCIAL.

Porque a los más de los compañeros consultaos nun-yos pintaba bien l’asistencia al actu por razones de trabayu, de residencia y otres; porque l’informe llega meyor per escritu qu’oral; porque la posibilidá d’intervenir nun se torga, yá que la secretaría unviará les intervenciones recibíes a tolos aconceyaos y, casu de discrepancies, presentaráse a votu; porque nun hai anunciada más qu’una candidatura onde tan tolos que s’ufiertaron pa ello; y, al cabu, pa torgar gastos, xestiones y molesties de ganes, la Xunta Direutiva tomó’l determín de facer la xunta xeneral añal pente medies del ordenador.

2. INFORME DE L’AYALGUERÍA.

2.1. CUENTES 2009.

PERIODU.

De 1 de xineru fasta’l 31 d’avientu de 2009.

SALDU D’ANICIU A DATA 31-12-2008 .................... 471,23 €

INGRESOS ........................................................ 162,00 €

Correspuenden a 27 cuotes.

GASTOS .........................................................  459,15 € 

Mantenimientu de cuenta corriente.....................     26,61 €
Páxina web.....................................................   163,56 €
Rexistru Xunta Direutiva....................................     18,98 €
Procuradora pleitu Universidá.............................    250,00 €

SALDU BANCARIU AL 31 D’AVIENTU DE 2008...........  174,08 €

INGRESOS PENDIENTES....................................... 132,00 €

Correspuenden a 22 cuotes impagaes nos años 2008 y 2009.

GASTOS PENDIENTES.

Nengún.

2.2. PRESUPUESTU 2010.

Proponse caltener la mesma cuota de 6 euros/añu y, casu necesidá, facer derrames estraordinaries.

3. XERA.

   3.1. Espublizáronse los testos darréu:

- ¡Que naide s'engañe! (16-12-09)
- Rexistru de la Discriminación Llingüística n'Asturies (07-12-09)
- Mofla (30-10-09)
- Arbitrariedá provocatible y faltona escontra la ciudadanía asturfalante (14-07-09)
- ¡Respetu a la llegalidá, Señora Conseyera de Cultura! (27-06-09)
- El respetu a la verdá y a les minoríes (19-06-09)
- Un testu xurídicu vergoñosu: Reglamentu de presentación d’escritos n’asturianu énte’l Rexistru de la Universidá d’Uviéu (01-06-09)
- El Gobiernu del Principáu nun creó dengún Muérganu de Traducción (28-05-09)
- A los Conseyeros d'IU (04-05-09)
- Per Llei, lo horros centenarios tan llibres del Impuestu de Bienes Inmuebles (23-02-09)
- Interpretación del Instrumentu de Ratificación por España de la Carta Europea de les llingües Rexonales o Minoritaries (20-02-09)
- A la gueta los mentirosos (07-02-09)
- Una discriminación incalificable (15-01-09)

3.2. Unvióse al Conseyu d’Europa el V informe (“Interpretación del Instrumentu de Ratificación por España de la Carta Europea de les Llingües Rexonales o Minoritaries”).

   3.3. Caltuvimos un recursu d’amparu y una cuestión d’inconstitucionalidá énte’l Tribunal Constitucional. Entamemos recursu escontra’l Reglamentu de presentación d’escritos n’asturianu énte’l Rexistru de la Universidá d’Uviéu énte’l Tribunal Superior de Xusticia d’Asturies.

   3.4. Escomencipióse la igua del Rexistru de la Discriminación Llingüística n’Asturies.

   3.5. Caltiense la páxina web. 

4. PROPUESTA DE NUEVA XUNTA DIREUTIVA.

Propónse la repetición de tolos miembros de la Xunta Direutiva :

Presidente: Xosé María Estrada Janáriz.
Vicepresidente: Xosé Lluis del Río Fernández.
Ayalgueru: Xilbertu Maire Fernández.
Secretaríu: Xurde Blanco Puente.
Vocal: Yolanda González Huergo.
Vocal: Xabiel Álvarez Villa.
Vocal: Iván Menéndez Fernández.

5. PROYEUTU DE TRABAYU.

Arriendes de tar sollertes a l’actualidá pa unviar comunicaos de prensa y asesorar xurídicamente a quien mos lo pide al traviés del serviciu SOX, vamos intentar nesti añu:

- Poner en marcha el Rexistru de la Discriminación Llingüística n’Asturies, actualizáu dende’l mes d’avientu de 2009, pa dir atropando nelli años pasaos (yá tan preparaos 1982, 1983 y 1984 y entamaos otros). Sedría un bon oxetivu tener 14 años p’atrás al cabu d’esti 2010. Si dalguién quier char la gabita pa facese cargu de dalgún añu vendría mui bien. La media d’asuntos recoyíos ye d’unos 12 al mes, anguañu.

- Rematar, cola Xunta Pola Defensa de la Llingua , la campaña entamada escontra l’incumplimientu pel Estáu español de los mandaos del Conseyu d’Europa no que cinca al ameyoramientu, acordies colos falantes asturianos, de la proteición de la llingua nel Estatutu d’Autonomía (separtáu 4 de la Recomendación RecCh (2008) del Comité de Ministros del Conseyu d’Europa).

- Iguar un sestu informe al Conseyu d’Europa nel que se recueya la práctica xudicial nel Estáu español en materia de proteición de la llingua asturiana y un complementu al III y IV, p’actualizalos.

- Presentar un recursu énte’l Tribunal Européu de los Drechos Humanos, enantes del mes de setiembre.

- Sofitar los dos pleitos que tenemos activos.

- Afondar nes denuncies a autoridaes y medios de comunicación por el desacatu a los decretos de toponimia. Esta xera ta pernecesitada d’un coordinador porque hai bien d’iniciatives en marcha pero que van caúna pel so llau. Si daquién s’anima podría, con el trabayu d’una o dos hores selmanales, facer un bon llabor.

N’Uviéu, a 2 de mayu de 2010.