Atrás     PDF

1. DECLARACIÓN DE LA XUNTA XESTORA.

El 25 de mayu, día perseñaláu pa los asturianos, cola firma del acta fundacional y la solicitú d´asentamientu nel Rexistu d´Asociaciones del Principáu d´Asturies, constituyóse formalmente l´Aconceyamientu de Xuristes pol Asturianu (AXA).

El muérganu provisional de gobiernu confórmenlu les persones que vienen darréu:

- Xosé María Estrada Janariz, Lletráu del Serviciu Xurídicu del Principáu d´Asturies, como Presidente.
- Xurde Blanco Puente, Lletráu del Serviciu Xurídicu del Principáu d´Asturies, Secretariu-Alministrador
- Xesús Xabiel Álvarez Villa,  Xefe del Serviciu de Xusticia del Menor, Vocal-Tesoreru

Ye enfotu d´esta xunta xestora llamar a un prósimu Conceyu Xeneral col envís de nomar la Xunta Direutiva -con mandáu pa cuatro años, acordies col artículu 9 de los estatutos-, y mentantu, arriendes de convidar a integrase na asociación a los más de los xuristes posibles, entamar a cumplir cola finalidá pa la que foi fundada -el desaniciu de les torgues que tien l´emplegu de la llingua asturiana na nuesa activida profesional- dende les presuposiciones siguientes:

1ª. La dignidá institucional d´Asturies, la dignidá, al cabu, de tolos asturianos, desixe que la so llingua reciba´l mesmu tratu que les llingües propies d´otres comunidaes autónomes.

2ª. Tolos poderes públicos, pente ellos los asturianos, tan obligaos a cumplir llealmente colos mandaos recoyíos nos artículos 3.2, 9.2 y 14 de la Constitución Española y nel 2 de la Declaración Universal de los Drechos Humanos, a la lluz de los trataos, convenios, pautos, convenciones, resoluciones, informes, declaraciones y sentencies que los interpreten.

3ª. Tolos poderes públicos asitiaos n´Asturies tan obligaos a cumplir llealmente colos mandaos recoyíos nel artículu 4 del Estatutu d´Autonomía y na Llei 1/1998, de 23 de marzu, d´usu y promoción del bable/asturianu.

4ª. Los firmantes del "Plan pa la normalización social del asturianu, 2005-2007", tan obligaos a cumplir llealmente los sos compromisos.

2. PROPUESTES. 

PRIMERA.- Axúntase modelu n'asturianu de llamáu a conciliación p'ante l'UMAC (PDF), qu'aporta un miembru d'AXA, col envís de recoyer opiniones y suxerencies sobro la comenencia o non de recomendar dende l'Asociación el so usu.

SEGUNDA.- Sométese al xacíu de tolos asociaos, l'emplegu dafechu, en toles sos intervenciones profesionales, escrites o verbales, de los topónimos asturianos, d'otra miente oficializaos pa los conceyos darreú:

     - Carreño, El Franco y Llanes (BOPA, de 6-5.2005 y de 13-6-2005).

     - Gozón y Llangréu* (BOPA de 25-7-2005).

     - L.lena* (BOPA DE 26-7-2005).

     - Villaviciosa, Sariegu*, Bimenes y Cabranes (BOPA de 2-12-2005 y 12-1-2006).

* Los respeutivos Decretos, empléguen el nome castellanizáu del conceyu, lo que de xuru tien de ser o un erru o una incongruencia (como exemplu: la capital nómaríase Llangréu y el conceyu Langreo) o una mazcayada (como exemplu: permítese l'asturianu pa nomar caseríes, quintanes, aldegues y, como muncho, villes pero, d'ehí p'arriba, conceyos y comunidá autónoma, mesmamente, namás el castellán).

3. ANUNCIES.

3.1. Testos recomendaos.

- Plan pa la normalización social del asturianu, 2005-2007. Conseyería de Cultura, Comunicación Social y Turismu. Gobiernu del Principáu d´Asturies.

- Cartafueyos Normativos. Academia de la Llingua Asturiana.

• Númberu 1: Constitución Española y Estatutu d'Autonomía del Principáu d'Asturies (edición billingüe)

• Númberu 2: Delles propuestes pa Nomes de Persona (talu que se diz nel so entamu trátase d'un "niciu o amuesa de los nomes emplegaos como nomes de persona polos homes y muyeres d'Asturies")

• Númberu 3: La llingua na Alministración y otros documentos (inxer modelos n'asturianu d'instancies, solicitúes, contratos, pautos, recursos, etc.

3.2. Cursos de branu. Añu XXIV. Ye´l camín más rápidu y fiable p´algamar la conocencia de la nuesa llingua. Esti añu cellebraránse en Santantolín d´Ibias, del 31 de xunetu al 11 d´agostu. La reserva d´aloxamientu (el réxime ye d´internáu), recoyida d´información, programes, materiales y matrícula, tien de facese n´Academia de la Llingua Asturiana, cai Marqués de Santa Cruz, 6-2u pisu, d´Uviéu, tléfomu 985211837.

4. CONTAUTOS.

Miembros de la xunta xestora:

Pepe Estrada, Xurde Blanco, Xabiel A. Villa

Corréu lletrónicu xeneral