Atrás PDF
1.
DECLARACIÓN DE LA XUNTA XESTORA.
Ye intención d'esta Xunta Xestora, que somete a la opinión de los asociaos, unviar l'escritu darréu a los grupos políticos firmantes del “Plan pa la normalización social del asturianu, 2005-2007” y medios de comunicación social, amás d’al so destinatariu:
AL SEÑOR
PRESIDENTE DEL GOBIERNU DEL PRINCIPÁU D'ASTURIES
Xosé María
Estrada Janariz, ciudadán titular del DNI númberu (...), no so condición de
Presidente del Aconceyamientu de Xuristes pol Asturianu (AXA), asitiáu a
efeutos de notificaciones nel séptimu pisu, del númberu 22, cai Pérez de la
Sala, d'Uviéu, tres someter el testu a tolos miembros del conceyu, preséntase
y DIZ:
Primeru.-
Nel pasáu añu 2005 la Xunta Xeneral del Principáu apautó y el Conseyu de
Gobiernu que vusté preside fizo de so, un "Plan pa la normalización
social del asturianu 2005-2007", qu'asoleyó y repartió, en formatu de
llibru, la Conseyería de Cultura, Comunicación Social y Turismu. N'elli, y
dientro de la nomada "llinia d'actuación n'Alministración y Órganos del
Principaú d'Asturies", el Conseyu de Gobiernu oblígase, de magar l'añu
2005, a facilitar a los trabayadores del Principáu "la conocencia y usu de
la llingua asturianu y, nel so ámbitu, del gallego-asturianu" (acción númberu
8).
Segundu.-
Ye verdá que denguna aición positiva al respeutu vieno tomando'l
Gobiernu d'entós p'aco -por más que dalgunos trabayadores del Principáu,
funcionarios y llaborales, entamaren a facilita-y el cumplimientu de los sos
compromisos, emplegando la llingua asturiana nel desendolcu de les tarees
propies del so puestu de trabayu- pero tamién lo ye que fasta hai menos d'un
mes tampoco se xeneraron actos represivos escontra l'emplegu de la llingua
asturiana dientro de l'Alministración del Pruncipáu.
Pero va pa
un mes, aprosimao, entamaron a tomase represiones escontra l'emplegu del
asturianu na Direición Xeneral de Relaciones Institucionales y del Serviciu Xurídicu.
Primeru fonon les maniobres pa torgar la rotulación de dos puestos de trabayu
n'asturianu, autorizada pol correspondiente serviciu de patrimoniu y a pidíu de
los funcionarios imteresaos, col amparu de les aiciones 4 y 50 del mentáu Plan.
Siguió-y la negativa a tramitar el pidimientu, n'asturianu, pa camudar les
feches de vacaciones d'un funcionariu. Vieno dempués una orde vergoñosa -que
se dio de pallabra, a los funcionarios del rexistru- pa nun dar trámite a los
escritos presentaos n'asturianu. Al cabu, el señor Cabaleiro Tejeiro, Direutor
Xeneral de Relaciones Institucionales y del Serviciu Xurídicu, impartió al
Xefe del Serviciu Xurídicu la instrucción de que "todo
el personal de la Dirección General, y específicamente los letrados del
Servicio Jurídico, utilicen de forma obligatoria los modelos de impresos y
escritos oficiales, que -como es obvio- su redacción es en castellano".
Terceru.-
La foscura pa cola llingua asturiana dientro de la Conseyería de la Presidencia
tien otres manifestaciones. Asina, ye la única -pente diez- qu'impón l'emplegu
de modelos escritos en castellán nos procesos de contratación, torgando a los
ciudadanos la posibilidá d'exercitar un drechu reconocíu nel artículu 4 de la
Llei 1/98: el de dirixise a l'Alministración n'asturianu, si asina-yos peta.
D'otra
miente vien amuesando una clara actitú de rebeldía escontra el conteniu de los
diez Decretos polos que se determinen los topónimos oficiales d'otros tantos
conceyos, al estremu qu'un abogáu uvieín tien plantegada una demanda ante'l
Tribunal Superior de Xusticia d'Asturies desixendo-y respetu y acatu a tales
normes.
Poro,
ENCAMENTÁMOS-Y:
Que de secute ordene la adopción de les midíes afayadices pal restablecimientu
del respetu a la llei y al cumplimientu lleal de los pautos roblaos por Conseyu
de Gobiernu, dientro de la Conseyería de la Presidencia.
Ye xusto.
N'Uviéu, a (...)
2. PROPUESTES.
PRIMERA.- Denunciábemos nel pasáu conceyu incumplimientos -que calificábemos como insumisión llegal- por parte de les Alministraciones, pente otros el que frente al derechu que tou ciudadán tien de dirixise a elles n'asturianu, reconocíu nel artículu 4 de la Llei 1/1998, viñaben les resoluciones alministratives que lu obliguen a emplegar formularios redautaos dafechu y namás en castellán, colo que l'alministráu o arrenunciaba a rellacionase cola Alministración (a pidir la sovención, presentase a la oposición, concursar pa facer una obra, por exemplu) o al so drechu a emplegar la llingua asturiana.
A tal efeutu, la Xunta Xestora proponía entamar un seguimientu de les estremaes alministraciones asitiaes n'Asturies y denunciar por escritu ante'l respeutivu titular, toles irregularidaes qu'atopáremos y, d'entrada, dirixir tres escritos, reclamando respetu a la llei, al Conseyu Consultivu (que la incumpliere na so primera resolución de 23 de mayu de 2006, BOPA de 8 de xunu, convocando concursu pa tres places de Lletráu), la Conseyería de la Presidencia (que ye la única que sigue incumpliéndola en materia de contratación) y la Conseyería de Xusticia (que la incumplió en delles convocatories de sovenciones).
La rempuesta fue bien estremada:
El Conseyu Consultivu (de xuru que perocupáu como ta n'iguar, a la midida, informes sociolóxicos, económicos, llingüísticos y psicolóxicos, nun tien tiempu pa perder en caxilines xurídiques) calló como un afogáu.
La Conseyería de la Presidencia ná nun dixo, pero les obres yá fonon detallaes nel escritu precedente.
El Conseyeru de Xusticia unvió-y al Presidente d'AXA la carta que se trescribe: