Atrás     PDF

Nun queden tan lloñe aquellos díes nos qu`IX punxo ente les bases del so programa pa les eleiciones la oficialidá del Asturianu y un estatutu con bon xeitu. Vistes les postures de PP y PSOE, ye verdá que naide pensaba qu’eso pudiera algamase, pero sí yera importante que polo menos un de los partíos de la Xunta punxera’l tema enriba la mesa.

Anduvo’l tiempu y IX, fuera como fuera, caltuvo -esta vegada sí- la mesma postura nel pautu de gobiernu primero, y nel estatutu dempués.

Xusto agora, cuando paecía qu’el tema nun daba más de sí, apaez un pautu de gobiernu col que nun se contaba nin pol momentu, nin poles formes o, más bien, la falta d’elles.

El casu ye que, o nun lo expliquen bien, o dalgunos nun somos a entendelo, pero tal paez que primero éntrase nel gobiernu y llueu ya veremos –o yá verá’l que manda- ónde, cómo y pa qué. Dalgo asemeyao a los casorios "de conveniencia".

Dalguién dirá que puen facese más coses dientro que fuera, y nun-y faltará razón, pero pa mi qu’esto nun ye lo acordao con bona parte de la xente que los votó.

L’arreglu nun tien bona pinta pa naide, pa munchos ye una rindición, oxalá que nada más temporal, y pa IX pue significar facese entá más difícil d’entender pa della xente.

Pero lo peor del asuntu igual ta por venir; pue tar malcriándose al pá la rapaza, que pal día siguiente a les próximes eleiciones contará con que l’agua seya manso y si non, yá sabrá qu’amansa solo.