N’alcordanza de Xulio Diego González Campos y la llingua asturiana

Xosé Mª Estrada Janáriz
Aconceyamientu de Xuristes pol Asturianu
DATA: 22/11/07

El día 20 del mes qu’andamos morrió en Madrid el que fuera miembru'l Tribunal Constitucional y Caderalgu de Derechu Internacional Públicu de la Universidá d’Uviéu allá pelos años 70, D. Xulio Diego González Campos.

Dende l'Aconceyamientu de Xuristes pol Asturianu queremos dexar constancia d’esta pergrande perda y remembrar que foi elli, xunto con otros dos Maxistraos d’esi Tribunal, el que dixo na primera Sentencia sobre’l casu "Andecha Astur" (AA) y nun votu particular, que la llingua asturiana yera una llingua bien afitada n’Asturies; y nuna segunda Sentencia, dába-y la razón a esi mesmu partíu políticu, otorgando l’amparu pidíu y fallando nel sen d'entender que AA podía presentar la so candidatura a les Eleiciones Xenerales n’asturianu.

Que sepamos, hasta agora, el Tribunal Constitucional per boca del Maxistráu Sr. González Campos, ye l’únicu poder públicu que fizo una interpretación de la Constitución, del Estatutu d’Autonomía y de la Llei d’Usu y promoción del bable/asturianu, bonal y favoratible a la so aplicación cola mayor amplitú dable. Nesta dómina na que vivimos d’acometimientu a la nuestra llingua dende toles estayes del poder (Gobiernu, Xudicatura, Conseyu Consultivu, Partíos políticos centraliegos y un etcétera d’un llargor que nun cabe nesta nota), cuidamos ye ésti un bon momentu pa facer alcordanza d’esti malagueñu y llamentar que yá nun tea ente nosotros. Xente como’l profesor González Campos ye la que nos afala a siguir nel camín de da-y puxu a la nuestra llingua y sacala del "folklorismu" nel que s’enfoten otros en metela.

Dalgunos de los que tamos nesti Aconceyamientu nun queremos, amás, escaecenos de que'l profesor González Campos foi ún de los nuestros mayestros cabezaleros na carrera de Derechu y de la so clara posición escontra del réxime políticu qu’había d’aquella.

En nome del Aconceyamientu de Xuristes pol Asturianu, robla

Xosé María Estrada Janáriz, Presidente.

> STC de 15-02-96 en Recursu d'Amparu 553/96. Presentación de candidatures eleutorales n'asturianu. 

Arriba    Atrás    PDF