Delles instituciones xurídiques asturianes venceyaes al derechu de propiedá
Ignacio Arias Díaz
Lletráu
de la Xunta Xeneral del Principáu d’Asturies
asoleyaos en Les
Noticies, nel añu 2000. Aconceyamientu de Xuristes pol Asturianu
Atrás PDF
L’ANTOXANA.
L’antoxana
(del llatín ante ostiana, énte la
puerta) ya la pequeña zona de tarrén lisu y llanu asitiada inmediatamente
delantre de la puerta y de la corte de la casa campesina.
La
so finalidá ye la de facilitar la realización de los llabores propios de la
vida campesina: poner los frutos a secar, cortar y depositar lleña, preparar el
carru, xuncir el ganáu, asina como dar pasu a les distintes dependencies y
anexos de la casería.
Ye
opinión xeneralizada que namás puede recibir el nome d’antoxana’l
tarrén que ta énte la casa, y eso si nun tien cerca. Con cerca llámase corralada,
y si ye pequeña, corrada. Tamién muriáu. Si s’estiende a los llaos y detrás de la casa, recibe el
nome de rodeos o arrodeos.
L’auténtica
antoxana ye la que conserva’l so
calter particular, la privada, yá que si forma una verdadera plaza tendrá’l
calter de pública. Mentes l’antoxana
cumple los sos esenciales cometíos rurales como pertenencia de la casa, col
efectu xurídicu fundamental de siguir la so suerte, nun plantea nengún
problema en drechu. La so propiedá pertenez al dueñu de la casa. Los problemes
surden cuando por sucesión o venta a persones distintes se fragmenta, divídese
la casa, pasando a constituyir dos o más propiedaes independientes con salida a
l’antoxana orixinaria.
La
xurisprudencia de los tribunales asturianos vieno ocupándose ensin solución de
continuidá de los problemes xurídicos que plantea l’antoxana,
non solo cuando la casa matriz ye oxetu de división, sinón el propiu usu de
l’antoxana, atemperando les sos
resoluciones a la propia evolución d’esta institución.
Ello
evidencia la so vixencia, asina como los contornos de la so realidá actual.
Asina,
consideróse un usu normal de l’antoxana’l
tránsitu de tractores o automóviles, frutu del dinamismu operáu nel usu de la
maquinaria agrícola, asina como de la mecanización. Al contrariu, considérase
un usu anormal el depósitu de cuchu y escombros pola molestia y insalubridá
que supón n’actualidá tener a la vista tales materiales.
L’ARRENDAMIENTU
Y LES SOS VARIEDAES.
El
contratu d’arrendamientu surde nel campu asturianu simultániamente a la
decadencia del foru. El pagu de la renta taba determináu pola costume o por
escrito y podía ser en perres o en frutu.
La
estabilidá del arrendatariu asturianu provenía de que, por aplicación de la
costume local, taba protexíu contra’l desahuciu inxustificáu si la tierra
taba bien cultivada y nun tenía atrasos nes rentes.
Venía
almitiendo diverses variedaes.
L’arrendamientu
d’herba:
Almite, al empar, dos modalidaes, la venta d’un determináu númberu de carros
d’herba que’l comprador estrai de la finca, seca y almacena pela so cuenta;
o la venta de la producción del prau, tanto de la herba como de la denominada pación,
esto ye, el pastu, col consiguiente derechu de entrada del ganáu na finca pa
pacer nel añu agrícola.
L’arrendamientu
«a corre para»:
Traduzse nel cambiu d’estayes que cada determinaos años facíen ente sí dos
o más llevadores d’un mesmu arrendador, col oxetu de rotar los cultivos pa
obtener una meyor productividá.
La
propiedá a «monte y villa»:
Comprende tanto los tarrenos incultos como los cultivaos. Taba integrada polos
elementos que vienen darréu: términos bravos, términos vareables y propiedá
absolutamente individualizada.
La
llexislación d’arrendamientos rústicos fai continua referencia a los usos y
vezos locales.
Ye
ésta una materia de gran importancia nel caltenimientu de les estructures
rurales asturianes que tien que ser oxetu d’una especial atención pol
llexislador.
EL
BISTECHU O PINGU.
Esta
institución traduzla la palabra «alero» y por estensión ye l’espaciu de
tarrén que cubre’l bistechu. Xurídicamente tien l’algame de delimitar la
propiedá y constitúi una presunción «iuris tantum», de manera que, en tantu
nun haiga prueba de lo contrario, el tarrén énte la peré del edificiu y la llínia
de caída del agua pluvial pertenecerá al dueñu del edificiu, seya casa, horru
o payar.
Recibe
diversos nomes sigún la zona d’Asturies de que se trate, siendo’l más
conocíu, amás de bistechu, el de pingos,
na zona de Pravia y Salas. Como tuvo ocasión de recoyer Rodríguez Castellano
na so obra «Contribución al vocabulariu del bable occidental», “de las mias pringueras pa dientro todo yía miou”.
LA
CONCENTRACIÓN PARCELARIA.
Ye
una figura que tuvo siempre presente nel campu asturianu y que caltién la so
vixencia actual.
El
so entecedente xurídicu hai que buscalu na Ordenanza Xeneral del Principáu
d’Asturies de 1781, qu’establecía que «polo muncho que convién a la
agricultura que se tengan les podencies xuníes, y les costoses dimensiones
qu’ocasiona la mezcla d’estayes pertenecientes a distintos dueños, ordénase
que pueda obligase a cambios, cuando a xuiciu de la Xunta d’Agricultura fora o
mui necesario o mui conveniente al que los intente y de poco perxuiciu al suxetu
dueñu de la estaya que se solicita cambiar...».
Al
momentu actual, la Llei del principáu d’Asturies 4/1989, de 21 de xunetu,
d’Ordenación Agraria y Desenvolvimientu Rural, ocúpase de la concentración
parcelaria, a la que atribúi como fin «la constitución y caltenimientu
d’esplotaciones d’estructura y dimensiones afayadices que permitan el so
meyor aprovechamientu n’atención al so destín agrícola, ganaderu o
forestal, cualquiera que sía la titularidá del so dominiu, posesión o esfrute».
La
filosofía qu’inspira esta figura na so regulación actual xira alredol
d’estos criterios: alxudicar a cada propietariu, en cotu redondu o nel menor númberu
posible de finques de reemplazu, una superficie equivalente en clas de tierra y
valor a lo aportao; alxudicar contigües les finques integraes nuna mesma
esplotación, anque pertenezan a distintos propietarios; suprimir les
esplotaciones que resulten antieconómiques o aumentar no posible la so
superficie, al oxetu de que les esplotaciones agraries constituíes tengan una
dimensión igual o superior a la económicamente viable prevista pa la zona y
los estayos tengan una superficie superior a la unidá mínima de cultivu;
emplazar les nueves finques de manera que pueda ser atendida de la meyor manera
la so esplotación dende’l sitiu en que radique la quintana o la finca más
importante; y por últimu, dar a les nueves finques accesu directu a les víes
de comunicación, pa lo que se modificarán los caminos que faigan falta.
LA
FACERÍA.
Ye
l’aprovechamientu común y recíprocu, especialmente de pastos, ente pueblos
limítrofes. El ganáu llevábase «a palu
en cuellu» o «a rexa vuelta»,
espresiones que significaben que teníen que sacalo de los términos ayenos el
mesmu día, ensin que-yos tuviese permitío dormur ellí. «A
palu en cuellu», comprendía el drechu a afalar el ganáu hasta les llendes
de la so propia demarcación, dexándolu en completa llibertá; «a
rexa vuelta», cuando, colocáu’l ganáu en la llinia divisoria, amenábenlu
pa qu’entrara a pacer nos terrenos colindantes.
La
desaparición de la facería vien a coincidir cola desamortización, yá que al
entregase la propiedá a particulares, munchos de los tarrenos sometíos a esta
modalidá, aquellos impidieron el so beneficiu poles comunidaes vecinales.
LOS FOROS.
Tiense
muncho discutío del so orixe. La opinión más xeneralizada, ye la de que’l
foru respuende a una fórmula contractual –especie d’arriendu hereditariu-
que posibilitaba’l non desprendese totalmente de la propiedá de tierres
incultes y ermes. Tresmitíase asina únicamente’l dominiu útil mediante la
percepción d’un preciu inferior al de la utilidá real de la tierra
tresmitida, pero conservándose’l dominiu sobre la mesma y, por ello, la
posibilidá de recuperar les tierres cuando éstes, yá cultivaes, alquieran col
trescursu del tiempu un mayor valor.
Realmente’l
foru convertía al colonu en cuasi propietariu, y asina lo evidenciaba’l refrán
«El qu’afora, viende», favoreciendo la consolidación de la familia rural a
la so dedicación esclusiva de los llabores agrícoles.
La
finalidá principal del foru foi, nos sos nicios, el de poner en cultivu les
estensísimes superficies ermes en propiedá de los monasterios y de la nobleza
p’asina aumentar la riqueza del país y poblar el territoriu, yá que yera
obligación esencial nel contratu de foru meyorar les finques.
Dicía
Xovellanos que «los antiguos monasterios rompíen y cultivaben por sí dalguna
parte de les sos tierres y daben en foru les demás a persones que les
derrompieren y les cultivaren. Otru tantu facíen les ilesies y los señores
empleaos de contino na guerra. Por esti mediu foi estableciéndose la primer
división de les tierres d’Asturies».
El
pagu del contratu de foru facíase na modalidá de pensión o canon anual. La
pensión del foru facíase,normalmente, n’especie: centén, trigu, escanda,
miel, congrios, castañes, mantega, xatos, carneros, quesos salaos, pites, etcétera.
El canon en cera yera frecuente pol so consumu na lliturxa de los monasterios.
El
contratu de foru empieza la so decadencia a partir del momentu nel qu’aumenta
la mano d’obra n’agricultura, yá que a partir d’entós nun se fai
necesario ufiertar grandes ventayes a los cultivadores, aumentando notoriamente
el canon del contratu, qu’empieza a facese proporcional al valor del tarrén.
Coincidente
con esta circunstancia, el réxime d’arrendamientos va desplazando al réxime
de los foros y sustetuyéndolu cuasi dafechu.
En
tou casu hai que reconocer al foru l’importante papel que desempeñó como
pieza integradora de la propiedá rústica que permitió la tresmisión de les
caseríes indivises de xeneración en xeneración.
EL FORU FRUMENTARIU.
Recibía’l
nome de foru o censu frumentariu la modalidá de contratu en virtú de la
cuala’l propietariu que necesitaba perres tresmitía la so finca al
prestamista, y esti devolvía-yla en conceptu de foru, reservándose’l drechu
a una pensión en frutos como pan, vinu, aceite, lleña, tocín, pites, etcétera.
Denominábense
tamién «rentes en sacu», quiciabes
porque l’acreedor de tales rentes acudía con un sacu al domiciliu de los
deldores pa recoyeles.
LA GUARIZA.
Yera
costume xeneralizada n’Asturies de cotar ciertos pastos específicos
p’alimentar meyor a los gües.
Estos
sitios cotaos teníen que tar lo más prósimos posibles a les aldees, de manera
que peles nueches los güés pudieran ser recoyíos na corte, cola fin de llevar
y traer el ganáu ensin emplear demasiáu tiempu nello, yá que n’ocasiones
facíase diariamente.
LA
MAMPOSTERÍA.
Sigún
la opinión más xeneralizada, el términu mampostería
remanez de manum ponere y significa
acción de poder o autoridá pa llantar en terrén ayenu.
Constitúi
una variedá de l’aparcería (dir a la parte), y fai referencia al cultivu de
la mazana.
En
virtú d’esta figura concédese una tierra pa derrompela y depués llantala
d’esta fruta, recibiendo xeneralmente’l dueñu la metada de lo que se
produza y el llantador la otra metada. Estínguese’l contratu cola muerte del
arbolíu, plazu que, por términu mediu, abarca unos trenta años.
Prieto
Bances ye de la opinión de qu’esta triba de contratu de plantación a comuña
nació, espresa o tácitamente, de la costume esistente n’Asturies pola que
les partes demediaben lo llantao a bona fe, y mesmo a mala fe si
s’algamaba’l perdón, solucionando d’una forma armónica y equilibrada la
pugna ente’l principiu de la propiedá y el principiu de trabayu, ente’l
derechu romanu clásicu, que recoyía’l principiu de l’accesión nel dominiu
de los árboles y el drechu xermánicu que concibía a árboles y suelos como
suxetos diferentes y por ello susceptibles de pertenecer a persones distintes.
Testimonios
de la esistencia d’esta figura pueden recoyese en Galicia y tamién en Cataluña,
si bien nesta última recibe’l nome de plantación «a rabassa morta», anque’l cultivu yera de recimares y per plazu
de cincuenta años.
El
contratu de mampostería, gracies al cual s’intensificó n’Asturies el
cultivu del mazanar, alcuéntrase anguaño prácticamente estinguíu.
Quiciás
ún de los medios d’intensificar la producción del nuesu productu agrícola típicu
por escelencia fuera’l restablecimientu d’esta mena de contratu.
LES
MARMES.
Costume
xurídica semeyable a les derrotes (la
derrota consistía en permitir a tol armentíu del pueblu la entrada en cotos o
eríes determinaos onde la propiedá se dividía en parceles, collechaos yá los
cereales, pa pastar y aprovechar comunalmente herba y roza), qu’esistió na
zona de La Pola de Siero, hasta tiempos rellativamente recientes.
Consistía
na obligación de los vecinos del llugar de realizar anualmente la llimpia de
sebes y la igua de muries, ciarros y portielles, arróu del derechu al
aprovechamientu de los pastos en segándose les faces respectives.
EL
MEDEIRU.
Ye’l
sitiu qu’ocupa la denominada meda o
montón de fexes de trigu o centén, que s’apiñen al aire llibre nel tiempu
de mayar, apilaes unes sobre otres enriba d’unos maderos que les aisllen del
suelu. Amuesa una planta circular y cónica que preserva al trigu de la lluvia.
La planta radial suel midir de 2,50 a 3 metros de diámetru, y l’altor llogra
los 4 o 5 metros.
Si
ye d’herba, llámenla facina, bálagu o balagar.
LOS
MONTES.
Los
montes tienen una importancia extraordinaria n’Asturies, desque tán arreyaos
a la nacencia y desarrollu de los nuclios urbanos.
Sin
necesidá de retrotraese a tiempos más remotos, puede afirmase qu’entornu al
monte surdieron nel so día les Entidaes Locales, antecedente más prósimu
n’Asturies de les Parroquies Asturianes actuales.
L’artículu
2 de la Llei del Principáu 11/1986, de 20 de payares, pola que se reconoz la
personalidá xurídica de la Parroquia Rural, esixe pa la constatación d’esta
la esistencia d’un nucliu vecinal definíu, separáu de los que s’integren
nel Conceyu, nel que concurran intereses propios, distintos de los xenerales de
la entidá municipal o l’esfrute comunitariu de bienes patrimoniales non
municipales, anque nun s’afayen sometíos al réxime de «montes vecinales en
mano común». Pero puede afiramase y asina lo constatemos personalmente nos
trabayos de campo que perfiximos por cuenta de la Comisión de Drechu
Consuetudinariu del Parlamentu Asturianu, que l’elementu que xustifica y da
vida a la Parroquia Rural como tal ye, cuasi esclusivamente, la propiedá d’un
monte y la so esplotación consiguiente.
Los
órganos de gobiernu de la Parroquia Rural tienen a cargu la propiedá del monte
y l’aplicación de los beneficios de la esplotación maderera a les necesidaes
esclusives de la Parroquia Rural. La interposición de la personalidá xurídica
de la Parroquia Rural como entidá inframunicipal evita asina l’efectu de que
l’aprovechamientu del monte pol Conceyu se diversifique en nuclios distintos a
los que conformen la propia parroquia.
Ún
de los mayores problemes que se presenten n’Asturies en relación colos montes
ye’l de la denominación atendiendo a la vinculación xurídica.
Nel
trabayu de campo que desarrollemos hasta agora pudimos comprobar que se fala de
montes comunales, propios, patrimoniales, vecinales en mano común, catalogaos y
con conveniu, ensin saber mui bien de qué se ta falando. Por ello vamos
establecer una tipoloxía mui elemental que nos permita saber en cada casu en
presencia de qué clas de monte nos alcontramos.
A
los efectos que nos interesen podemos asitiar una primera distinción atendiendo
al suxetu propietariu y, asina, en sintonía cola Llei de Montes, podemos
estremar ente montes pertenecientes al Estáu, entidaes locales, entidaes públiques
o privaes non territoriales y particulares.
Centrándonos
nos montes de les entidaes locales podemos distinguir, acordies col Reglamentu
de Bienes de les Corporaciones Locales, ente bienes de dominiu públicu y bienes
patrimoniales. Dientro de los de dominiu públicu resérvase la denominación de
comunales p’aquellos qu’ha d’aprovechar el común de los vecinos,
precisando qu’éstos sólo podrán pertenecer a los municipios y a les
entidaes locales menores.
Al
empar, el Reglamentu mentáu puntualiza que los patrimoniales, a los que tamién
denomina «propios», son aquellos que, nun tando destianaos a usu públicu nin
afectaos a un serviciu públicu, pueden constituir fonte d’ingresos pal erariu
de la entidá.
No
que se refier a los montes vecinales en comuña, podemos considerar como talos a
los que pertenecen a agrupaciones vecinales en calidá de grupos sociales y non
como entidaes alministratives cuando vengan aprovechándose consuetudinariamente
polos miembros d’aquelles en condición de vecinos. La so titularidá
correspuende ensin asignación de cuotes a los vecinos qu’integren en cada
momentu’l grupu comunitariu que se trate, o lo que ye lo mesmo, a los que
tengan «casa abierta con fumo».
Dao
que la situación del puntu de vista de la titularidá de la propiedá ye la que
quedó descrita y, simplificando muncho, nos permite distinguir a los efectos
qu’interesen ente montes comunales –propiedá d’una entidá con bas
territorial- y montes vecinales en comuña –propiedá d’una agrupación
vecinal, non como entidá alministrativa-, ye posible efectuar una clasificación
según el mou d’esplotación del monte. Clasificación tala, qu’amuesa gran
interés na práctica, posibilita diferenciar, siempre dientro de los montes
pertenecientes a una entidá pública, ente montes catalogaos como d’utilidá
pública y montes non catalogaos.
La
distinción ente unos y otros hai que la fecer según el grau d’intervención
del órganu competente n’agricultura pol réxime d’esplotación del monte.
Nos
montes catalogaos d’utilidá pública, la entidá propietaria del monte queda
obligada a constituyir en calidá de fondu d’ameyora, y a favor del dichu órganu,
un 15% del importe de los aprovechamientos de monte pa invertir
n’ameyoramientos forestales.
El
mesmu criteriu s’aplica a aquellos montes non catalogaos como d’utilidá pública
a los que la entidá propietaria somete al réxime de catálogu pola suscripción
d’un conveniu col órganu competente en materia d’agricultura.
Nos
montes que nun aparecen catalogaos como d’utilidá pública la entidá
propietaria dispón de la totalidá del aprovechamientu forestal pa usar del mou
más acionáu.
Pero
ye que nos trabayos de campo se constató qu’en delles parroquies rurales
llamen «propios» a los montes comunales con un términu que, masque abulta
antitéticu, fai evidenciar que, siendo’l monte propiedá de la Parroquia
Rural, el so aprovechamientu nun ta afectáu a un usu determináu, sinón a lo
que disponga en cada intre l’órganu de gobiernu de la Parroquia. Lo que ye lo
mesmo: el 15% del aprovechamientu nun ta afectáu al so ingresu y disposición
por parte del órganu competente en materia d’agricultura.
Cabo
les clasificaciones mentaes, ye dable distinguir, dientro de lo que se venía
denominando «propiedaes a monte y villa» -que ye una especie de propiedá
comunitaria con atribución de cuotes y non condicionada a la cualidá de
vecinos, sinón hereditaria- ente términos bravos, términos vareables y
propiedá individualizada.
Los
«términos bravos» yeren estensiones pergrandes de terrenos
incultos, con llendes abegoses, formaos por llombes de zona montañosa que
pertenecíen a dellos copropietarios por cuotes indivises. Dientro d’ellos
enclavábense determinaes finques particulares llamaes «acantaes», esto ye, non zarraes, sinón delimitaes por fitos.
El
gociu d’estos términos, suxetu a los pactos que los condóminos alcuerden,
nun ta determináu por cuenta de la vecindá o de pertenencia a la collectividá
parroquial o municipal, anque la mayoría de los partícipes son vecinos. Talo
ye que pueden ser copropietarios vecinos d’otros pueblos y hasta persones
estrañes al municipiu onde s’ubiquen. Lo determinante ye ser propietariu, non
vecín.
Los
«términos vareables» son los mesmos que los bravos, cola
diferencia de que, encuenta de ser esfrutaos en comuña, se derrompíen periódicamente
cada veinticinco o trenta años, asignándose por mayoría lotes qu’añalmente
cultiva cadún de los condóminos en proporción a la so cuota.
La
«propiedá individualizao» afecta a les finques de cultivu
permanente y a los edificios que la esplotación agraria fixo preciso elevar,
siguiendo un procesu evolutivu que determinó la desmembración del condominiu
primitivu y fixo remanecer dientro d’él propiedaes individualizaes.
LOS
MOYONES.
Son
señales estables, ensin forma nin tamañu determináu, utilizaes pa delimitar
los llinderos de los caminos, finques y heredaes, al envís d’evitar la
confusión coles tierres vecines.
N’Asturies
reciben diverses denominaciones: moyones,
finxos, marcos, muñones, sebes, sucos, cárcaves, llendes, fitos, doiros,
derregos y xantos.
Caún
d’ellos tien el so propiu conteníu y significáu. Los fitos,
moyones, finxos, marcos o muñones, son, xeneralmente, piedres calices o de
regodón, cantos rodaos ensin tamañu determinaú. Baxo ellos, y pa estremalos,
pónense como testigos unos trozos de teya qu’aseguren la so certeza como
consecuencia de los cultivos.
Les
sebes son cercaos vexetales que tienen la doble función de señal y
defensa circundado dafechu los terrenos que se quieren guardar; los xantos
son llábanes de pizarra qu’enterraes sobresalen hasta l’altor d’un metru
y ciarren los llaos de finques que dan sobre camín públicu. Los derregos
tienen un pie d’anchor y sitúense nes finques llanes cubriendo la distancia
ente marcos, y el llaviegu tien que
los respetar escrupulosamente, pues como diz el refrán: «ente marcu y marcu nun hai arcu»; los doiros o sucos son talúes o bancales non cultivaos d’un metru
d’anchor ente dos finques de distintu nivel en terrenos pendientes que, al
empar qu’eviten los corrimientos de tierres sirven de llende, perteneciendo
siempre a la finca del planu superior. Les cárcaves
utilizábense pa zarrar los montes, de manera que siguiendo tol perímetru o
solo la parte collendante coles otres propiedaes, s’abría una zanxa «caldera»
de media vara d’anchor por otro tanto de fondura, y colos tapinos que se
sacaben construyíase pela parte interior una muria hasta algamar un altor
suficiente.
Sobre’l
tema de les llendes esistía la creencia de que yeren coses sagraes que nun se
podíen manipular, hasta’l puntu de que se pensaba que’l que mudaba una
llende, y más en concreto un marcu o finxu, nun podía descansar nel otru mundu
y tenía que volver a la tierra pa restituyilu al so sitiu.
Ello
ye prueba evidente del respetu y el calter d’intocables de que gocien estes señales,
culquiera que fuera la so manifestación esterna, como prueba definitiva
d’identificación del dominiu.
LA
PARROQUIA RURAL.
Ye
la forma tradicional de convivencia y asentamientu de determinaos núcleos de
población asturiana, y tien un ámbitu inframunicipal dientro del territoriu de
los conceyos.
Asina
lo reconoz l’artículu 6 del estatutu d’Autonomía del Principáu
d’Asturies, qu’encamienta al conseyu de gobiernu a reconocer la personalidá
xurídica de la parroquia rural.
N’execución
d’esti mandatu publícase la Llei 11/1986, de 20 de payares, pola que se
reconoz la personalidá xurídica de la parroquia rural.
Nella
establécense como requisitos de tal reconocimientu los que vienen darréu: la
esistencia d’un núcliu vecinal definíu separáu de los que s’integren nel
conceyu nel que concurran intereses propios distintos de los xenerales de la
entidá municipal; o l’esfrute comunitariu de bienes patrimoniales non
municipales anque nun tean sometíos al réxime de montes vecinales en mano común.
A
partir de los trabayos de campu que se tán realizando, puede afirmase que
ye’l segundu de los requisitos el que normalmente concurre na parroquia rural;
la propiedá d’un monte y la so esplotación pa invertir los beneficios de la
mesma n’obres d’interés de la parroquia.
Anque
ye obvio, convién puntualizar que nada tien que ver la parroquia rural cola
parroquia eclesiástica. La parroquia rural, como yá quedó dicho, ye una forma
d’asentamientu tradicional de determinaos núclios de población n’Asturies;
la parroquia eclesiástica ye la ilesia de referencia de determinaos núclios de
población, onde s’efectúen les inscripciones de nacimientu, les de
matrimoniu y les de defunción, y suel estender la so xurisdicción a varies
parroquies rurales.
Sigún
información facilitada pola Conseyería de la Presidencia del Principáu
d’Asturies, les parroquies rurales reconocíes son éstes: Samartín del
valledor (Ayande); Santa María de Llas (Cabrales); Pandenes (Cabranes); Bueres,
Nieves y Gobezanes (Casu); Caliáu (Casu); Orllé (Casu); Vallouta (Cuideiru);
Los Corollos, La Fenosa, Villeirín y Orderias (Cuideiru); Faéu (Cuideiru);
Llamuñu, Salamir y Artéu (Cuideiru); Bumayor y Beiciella (Cuideiru); San Cosme
(Cuideiru); San Xuan de Piñera (Cuideiru); La Tabla (Cuideiru); Zarréu (Degaña);
Xío (Eilao); Villamayor (Piloña); Sobrefoz (Ponga); Agones (Pravia); Bances
(Pravia); Cabos (Pravia); Escoréu (Pravia); Folgueres (Pravia); Somáu
(Pravia); Freisnéu (Teberga); Parmu (Teberga); Barcia y L.leixán (Valdés);
Trevías (Valdés); Busmente, Erías y La Muria (Villayón); y Taxa (Teberga).
LOS
PASTOS, EL PASTOR, EL RIXIDOR Y LA PRINDA DE GANAO.
Anque
la ordenación de los pastos ye una competencia municipal, aplícase
supletoriamente la Llei del Principáu 4/1989, d’Ordenación Agraria y
Desarrollu Rural, con un artículu 114 que vieno a establecer la obligación de
la Conseyería d’Agricultura d’ellaborar una ordenanza de pastos col calter
de conteníu mínimu obligatoriu pa los conceyos que procedan a regular los
pastos de la so competencia.
N’aplicación
d’esta previsión llegal, el Principáu d’Asturies ellaboró una
ordenanza-tipu reguladora de los pastos titularidá de la Comunidá Autónoma na
que se regulen los muérganos de dirección y xestión del aprovechamientu de
pastos y se prevé la creación de xuntes ganaderes, regulando la so composición.
Cada
xunta ganadera noma un pastor que s’encarga del curiáu y vixilancia del ganao
de tolos vecinos na época en que los reses permanecen nos pastos comunales.
Pa
ser escoyíu ha axuntar los requisitos siguientes: exercer l’actividá agraria
a títulu principal, ser vecín del llugar y poseer una cabaña nel monte.
La
Conseyería d’Agricultura, anguaño, concede ayudes a la figura del pastor
(Reglamentu CEE 2078/1992) pa fomentar métodos de producción agraria
compatibles coles esixencies de la protección del mediambiente y la conservación
del espaciu natural. El pastor nun ta vinculáu a la xunta por un contratu
llaboral, sinón que percibe la so remuneración en forma de sobrepreciu na
cuota que-y correspuende llevar de l’Alministración, como subvención a los
sos reses propios.
El
Rixidor de pastos ye’l coordinador de
los pastores
Namás
nos consta la so esistencia como muérganu con característiques propies, na
montaña de Cuadonga. La so regulación ta contenida na Ordenanza pal
aprovechamientu y meyora de los pastos comunales de la Montaña de Cuadonga
aprobada pol Plenu del ayuntamientu de Cangues d’Onís en sesiones plenaries
de 19 d’avientu de 1991 y 7 de mayu de 1992.
El
Rixidor de Pastos constitúi, xuntamente col Conceyu de Pastores y la Xunta de
Pastos, los muérganos de dirección y xestión pal aprovechamientu de los
pastos comunales de la Montaña de Cuadonga.
Cadún
d’estos muérganos tien competencies propies.
Asina,
al Conceyu de Pastores correspuénde-y
asesorar al ayuntamientu de tolo rellativo a los aprovechamientos, proponer el réxime
de la siguiente campaña ganadera y señalar les prestaciones y meyores que
foren necesaries.
La
Xunta de Pastores decide les compensaciones, aprovechamientos y
meyores de los pastos y vela pol cumplimientu de la Ordenanza, resolviendo los
problemes y incidencies que pueda plantear la observancia de los preceptos
conteníos na mesma.
El
Rixidor de Pastos preside el Conceyu de Pastores y tien como función
treslladar al ayuntamientu les sos iniciatives y deseos y coordinar el llabor de
los celadores escoyíos por cadún de los doce distritos qu’integren les dos
zones, alta y baxa, en que se dixebren los pastos.
El
Rixidor de Pastos tien a les sos inmediates órdenes a los Guardes de Pastos.
El
Rixidor de Pastos escuéyenlu’l día 25 de xunetu de cada añu, en sesión
conxunta que cellebren l’ayuntamientu de Cangues d’Onís y el Conceyu de
Pastores na Montaña de Cuadonga.
El
procedimientu d’elección ye ésti: 1) Podrán votar namás los celadores. 2)
Serán candidatos tolos celadores. 3) La votación va ser secreta y resultará
escoyíu’l Celador qu’algame mayor númberu de votos. Casu d’empate
resultará nomáu’l de mayor edá. 4) Los Celadores y el propiu Rixidor
recibirán nesta sesión les credenciales acreditatives de los sos cargos.
El
Rixidor dirime con votu de calidá los empates que puedan producise nes sesiones
cellebraes pol Conceyu de Pastores, que se dirimen por mayoría de votos.
Igualmente,
el Rixidor de Pastos tien la obligación de treslladar al ayuntamientu los
alcuerdos adoptaos pol citáu Conceyu de Pastores p’adoptar les midides que se
deriven de los mesmos y que resulten pertinentes.
Prindar
ganao
ye retener los ganaos qu’invadieron finques ayenes.
Ye
una figura de gran raigañu n’Asturies de la que podemos alcontrar
antecedentes en documentos de 1624 y 1814, alusivos a la delimitación de los
territorios de los conceyos d’Onís y Cangues d’Onís, nos que se nos fala
de normes reguladores de pastos y ganao rellatives al «usu y aprovechamientu en
pacer y dormir», «prindada de los ganaos qu’entren a pala y pastor», «puertos
altos y baxos», «límite de pastos y limitaciones pa ciertos tipos de ganaos».
La
costume de prindar ganao pasó a xustificase mediante la so incorporación a
distintes disposiciones remanecíes del Principáu d’Asturies. Pasó de ser
fonte secundaria del ordenamientu xurídicu que requier ser alegada y probada en
xuiciu pa la so aplicación, a fonte primaria.
Asina,
l’artículu 118 de la Llei del Principáu 4/1989, de 21 de xunetu,
d’ordenación agraria y desarrollu rural, apodera a los ayuntamientos y al
personal de la Conseyería d’Agricultura pa prindar el ganao que s’alcuentre
en pastos de cualquier naturaleza y titularidá, nos que’l dueñu nun seya
conocíu, y a depositalos en llugar idoniu. La referida aprehensión será fecha
pública mediante anuncia nel ayuntamientu respectivu, nel Boletín Oficial del
Principáu y nun diariu rexonal, pudiendo facese cargu del mesmu’l
qu’acredite ser el so propietariu nel plazu de venti díes.
Pal
supuestu de que trescurra dichu plazu ensin que naide lo reclame, y siempre
que’l ganao cumpla coles condiciones sanitaries adecuaes, procederáse a la so
enayenación mediante subasta pública ente ganaderos del llugar.
L’ayuntamientu será’l que perciba’l beneficiu que s’obtenga de la
subasta y la so cuantía destinaráse a financiar obres y servicios municipales,
revirtiendo a la Conseyería d’Agricultura l’importe de los gastos
ocasionaos pola retirada y manutención del ganao.
Pal
supuestu de que’l ganao nun cumpla coles condiciones sanitaries debíes y fora
imposible’l so saneamientu, inda adoptaes toles midides necesaries, procederáse
al so sacrificiu inmediatu. Si d’esti sacrificiu se deriva dalgún beneficiu
económicu, revertirá, en primer llugar, a la Conseyería d’Agricultura pa
sufragar los gastos ocasionaos a la mesma, y l’escesu, si lu hubiera, al
ayuntamientu.
Esta
prevención llegal tuvo la so tresllación a les Ordenances Municipales
reguladores del usu y esfrute de montes y pastos, pudiendo citase como puntu de
referencia l’aprobada pola Parroquia Rural de Saliencia de 11 de mayu de 1990,
que dedica’l so artículu 10 a la prenda de ganao, y que trescribimos
lliteralmente pola espresividá que s’obtién de la so llectura:
«a)
Siguiendo l’enraigonada costume del llugar y pa evitar l’usu y esfrute de
los pastos y aprovechamientu por parte de les persones non empadronaes na
Parroquia, con residencia mínima de seis meses al añu y alta nel réxime
especial agrariu de la Seguridá Social, o que reuniendo estes condiciones nun
paguen la tasa d'’provechamientu establecida, la Xunta de la Parroquia queda
espresamente facultada pa ordenar a ún o varios vecinos de la Parroquia que,
cola presencia del guarda forestal o funcionariu análogu de la Conseyería
d'’gricultura y Pescal, procedan a retener (prindar), recoyer y empobinar a
llugar seguru que la Xunta señale, tol ganao y reses que, en tales condiciones,
faigan usus de los montes propiedá de la Parroquia.
Nel
llugar señaláu pola Xunta, tales reses serán rigurosamente rexistraes pol
veterinariu municipal.
El
Presidente de la Xunta, o quien legalmente lu sustituya, requerirá polos medios
qu’estime procedentes al propietariu o propietarios de los reses reteníos, si
foren conocíos.
Si
nun lo foran, pondrálo en conocimientu de la Guardia Civil, indicando les
circunstancies identificatives de les reses reteníes.
b)
Identificáu y personáu l’infractor, esixiráse-y l’abonu de los daños y
perxuicios causaos, en conceptu de frutos o pastos consumíos, gastos de
tresporte, alimentación del ganao na retención y honorarios del veterinariu
pol reconocimientu de los ganaos tantu nel momentu de la retención como nel de
la so entrega al propietariu.
Estos
daños, perxuicios y gastos, serán fixaos, prudencialmente, pola Xunta de la
Parroquia.
c)
Con independencia de los daños, perxuicios y gastos del apartáu anterior,
l’infractor o infractores vendrán obligaos a pagar una multa de 500 pesetes
por cada cabeza de ganáu.
Será
condición indispensable pa poder retirar el ganao retenío que se faigan
efectivos los daños, perxuicios y gastos, asina como la multa impuesta.
La
Xunta de la Parroquia, podrá facer efectivos l’importe de los daños,
perxuicios y gastos y la multa, pela vía d’apremiu».
La
prinda de ganao, aparte de la so regulación llegal, dase na vida ordinaria
d’Asturies, bastando pa contrastar esta circunstancia la llectura de los
diarios rexonales. Son famosos pola so difusión nos medios de comunicación los
pleitos que sistemáticamente caltienen los ayuntamientos de Quirós, Morcín,
Riosa y L.lena, que s’acusen mutuamente d’articular campañes de prindaxes
na sierra del Aramu y d’interpretar de forma peculiar los alcuerdos establecíos
sobre los aprovechamientos de pastizales.
Conozse
col nome de pía el drechu
consuetudinariu que se tien a la recoyida y aprovechamientu de los frutos cayíos
de mou natural del árbol ayenu, siempre que tean en tarrén d’aprovechamientu
común.
Esti
drechu nun protexe l’apropiación de frutos que, anque cayíos
espontaniamente, lo faen dientro de propiedaes privaes, nin tampoco el de los
dimíos del árbol masque caigan en terrén comunal.
El
términu «pía» recibe otres
denominaciónes según la zona. Na zona occidental denomínenlu «soutelo»,
y ta referíu a la cueya de castañes que caen espontaniamente de los oricios
que maurecen primero. Llámase en Ribeseya «gandaya»
o «gueta», y en Piloña «bolenga»
o «bugayu».
Mentes
la pía, belonga, soutelo, gandaya, gueta y bugayu se refieren sólo a los
frutos d’árboles, contamos cola variedá del «rebuscu»,
que comprende non sólo los frutos de los árboles, sinón tamién los de les
plantes de colleches.
Esta
institución de drechu consuetudinariu ta fundada nel principiu de solidaridá
vecinal que s’estableció pa qu’asina se beneficiara eficazmente a los
llugareños más humildes.
L’ámbitu
de les servidumes ye igual el que más necesitáu s’alcuentra d’una actuación
que puenga fin a la problemática y a les reñelles que suscita la so vixencia.
Les
servidumes son fonte d’enfrentamientos, de disputa, y la so esistencia, nun
siendo que fora adquirida mediante prueba testifical, através de la cual la
balanza s’inclina a favor d’ún de los contendientes, cola consiguiente
perturbación de los vecinos intervinientes que, normalmente, desemboca
n’enemistá de la parte perdedora.
Siempre
hubo n’Asturies mui bien de pleitos por servidumes, si bien nos últimos años
foron menos quiciabes como consecuencia del descensu de l’actividá agrícola.
Por
ello, yá sía mediante una regulación llegal de les esistentes, yá sía
mediante la creación de un rexistru alministrativu nel que quede constancia de
los gravámenes que pesen sobre les finques cuando s’adquieran, que pueda ser
utilizáu como prueba cuando nel so casu surda la controversia, l’actividá
que se ta desplegando através de la Comisión de Drechu Consuetudinariu, y que
va permitir afrontar esta problemática col realismu que resulte de los trabayos
de campu que se tán realizando.
La
servidume, según el Códigu Civil, ye un gravame que s’establez sobre una
finca, sobre un inmueble, en beneficiu d’otra o otru perteneciente a distintu
dueñu. La finca o inmueble pa la que se constitúi la servidume llámase prediu
dominante; el que la sufre, prediu
sirviente.
Les
servidumes pueden ser de distintes clases: d’agües, de pasu, de medianería,
de lluces y vistes y de desagüe d’edificios. N’Asturies hai servidumes
singulares enraigoñaes con costumes ancestrales. Asina, la recoyida d’ocle,
sobremanera nel oriente d’Asturies, xeneró la denominada servidume de polea,
inda vixente en delles zones, como más alantre comentamos.
Ye
la que grava los predios o finques inferiores
que tán obligaos a recibir les agües que naturalmente y ensin obra del
home desciendan de los predios superiores, asina como la tierra o piedra
qu’arrastren nel so cursu.
Nun
son específiques d’Asturies, sinon que son comunes en toles comunidaes nes
que l’abundancia d’agua crea recursos naturales.
Tamién
tán gravaes con estes servidumes les riberes de los ríos en tola so estensión
y los márxenes nuna zona de tres metros, pa usu públicu n’interés xeneral
de la navegación, la flotación, la pesca y el salvamentu.
Tamién
los predios contiguos a les riberes de los ríos navegables o flotables tán
suxetes a los que se llama servidume de
camín de sirga.
La
servidume de pasu ta mui enraigonada n’Asturies debío, fundamentalmente, a la
escesiva división de la propiedá rústica, qu’obliga a estableceles pa
posibilitar asina l’accesu a les finques más apartaes de los caminos públicos.
N’Asturies
les servidumes de pasu tienen varies modalidaes. Hailes de pasu de persones, de
pasu de carru, y de pasu de ganao. Ta claro la so naturaleza.
Hailes
tamién permanentes y temporales, siendo de destacar, no que diz respecto a les
temporales, qu’en determinaes zones d’Asturies –por exemplu, el conceyu de
Piloña- s’enamplen notablemente na so duración cuando la propietaria del
prediu o finca dominante ye una vilda.
Ente
les más interesantes pueden citase les siguientes:
-
La guarida o toba, que ye la
servidume de pasu temporal peles propiedaes ayenes pa la recoyida de colleches
nes eríes, siempre que se mantuviera ensin relación dende tiempu inmemorial.
-
El carreru, que ye una servidume de carácter continuu y aparente, que
consiste nuna franxa de tarrén d’unos trenta centímetros d’anchor, que
bordea les estayes cultivaes y non zarraes, pela que pueden pasar a pie los dueños
de les otres estayes que vuelen nel mesmu llugar.
-
El tornagüé, que ye una servidume que grava finques collindantes y en
base a la cual los propietarios utilicen recíprocamente el prediu ayenu pa dar
la vuelta colos gües, vaques o mula que tira del llabiegu, siempre y cuando’l
prediu sirviente inda nun tea semáu o yá se pañara la collecha. Anguaño, y
en función de la mecanización que tán sufriendo los llabores agrícoles, la
servidume del tornagüé tresformóse en tornatractor.
Ye
la que grava les paredes divisories de los edificios contiguos hasta’l puntu
común de la elevación; les paredes divisories de los xardinos o corrales
asitiaes nel llugar o nel campu; y los cierros, vallaos y sebes que dixebren los
predios rústicos.
La
reparación y construcción de toos estos elementos tienen que pagase por tolos
dueños de les finques que tengan al so favor la medianería, en proporción al
derechu de cadún.
Ye
esta una servidume xeneral esistente non solo n’Asturies sinon nel restu del
territoriu sometíu al Drechu Civil español.
Ye
una figura típicamente asturiana, de la que namás conocemos un niciu na playa
de Las Güelgas, en Llanes, onde inda se puede apreciar, y sigue usándose.
Consiste nel gravame que pesa sobre los predios asitiaos nos cantiles
colindantes col mar que tienen que soportar la instalación de les polees
necesaries pa facilitar l’izáu delocle collechao na mar.
Na citada playa de Las Güelgas puede apreciase cómo conviven les antigües polees de madera coles nueves de fierro forxao. Tamién puede apreciase ente los meses d’ochobre a avientu cómo se siguen utilizando les polees pa izar l’ocle dende les embarcaciones.
Más información:
§ "Costumes
xurídiques asturianes"
§
"Delles
formes de facese cola tierra"
(aspeutos etnográficos)