Atrás     PDF

En La Nueva España del pasáu día 16 sal un artículu de J. A. de la Pienda sobre l`asturianu y los asturianistes. L`artículu ta escritu con respetu, cosa que, a estes altures, ye d`agradecer, y nun tien mayor interés por nun ser más qu`una llista de vieyos prexuicios; l´asturianu ye un inventu y non un idioma, nun ye ferramienta p`andar pol mundu, alloria los guah.es hasta falar mal castellán y nengún ingles… Lo dicho, nada nuevo, y sí muncho vieyo y, diría qu`abondo superao.

Sicasí, la mio reflexón vién a cuentu d`otru vieyu argumentu que parez interesadamente non superáu por dellos; l`asturianu ye un sacaperres, la oficialidá mui cara, y esti país en ruina tien otres necesidaes. Nunca entendí esti cantar por dos razones.

La primera, porque parez partir de que los de la oficialidá nun pagamos impuestos, cosa que nun ye verdá. Sépase d`una vez que somos munchos, que tamién pagamos impuestos y que tampoco nun nos presten munches de les coses nes que se gasten les nueses perres.

Pero la segunda razón abulta más importante por chocante. Siendo l´Asturies d`anguaño como ye, nunca se ven estes firmes dando cuenta de tales o cuales espilfarros, nin denunciando otres ayudes o malos vezos, nin apuntando cola mesma bravura ónde meter la tixera y ónde gastar meyor les perres.

Namás hai columnistes arreando-y al asturianu porque, intereses aparte, ye fácil, sal gratis, y retumba como´l home tambor. Pa metese notros temes hai qu`atar los machos y, de siempres, lo facil ye ser abusón.