Atrás     PDF

En marzu del añu 2007, un funcionariu de l’Alministración asturiana, don Xurde Blanco, presentó un escritu énte los sos superiores pidiendo un permisu pa una prueba médica. La solicitú diba escrita n’asturianu, porque asina foi la voluntá del demandante y porque entendía que lo amparaba, pa ello, la Llei 1/1998, de 23 de marzu. El Gobiernu del PSOE y IU nun almitió l’escritu, precisamente por tar redactáu na llingua patria. El ciudadanu allegó a los tribunales d’Uviéu al entender que se frayaba’l so derechu a dirixise a l’Alministración del Principáu n’asturianu «per escrito o oralmente», tal como reza l’artículu 4.2. de la Llei d’Usu y Promoción del Bable/Asturianu. El xuez correspondiente, el del Xulgáu númberu 3 de lo Contencioso-Alministrativo, entendió que’l citáu artículu podía dir más allá de los derechos reconocíos nel Estatutu d’Autonomía y, poro, al plantegar una especie de cooficialidá pela puerta d’atras, ser inconstitucional. Con un votu particular, n’autu de 25 de febreru de 2010, el Constitucional entendió que nun hubiera llugar a la cuestión.

La decisión del Tribunal (l’actu mesmu y la doctrina) vien a ratificar delles coses. De primeres, la razón, siempres desoyida, que teníemos nel PAS al afirmar que, nel estrechu ámbitu xurídicu en que mos movemos, la Llei d’Usu, promovida y impulsada por nós frente a la oposición frontal del PSOE y la reticencia de la mayoría del PP (namás salvada pola presencia nel Gobiernu de don Sergio Marqués y los nuestros pactos con él), yera y ye’l máximu que se podía algamar. Coles mesmes, que la llei aprovecha a la llende los recovecos llegales p’averase a una especie de paracooficialidá (y tengo equí que volver reconocer públicamente la capacidá y sabencia xurídica de Xesús Cañedo Valle, secretariu xeneral del PAS, pa filar tan hábilmente esa trama).

(Quiciabes convenga señalar, al respectu, que’l puxu y l’aprobación de la única llei que tutela la llingua nacional -y la única onde se-y da al asturianu la consideranza de «llingua»- ye precisamente la Llei d’Usu. Con éses, el puxu y aprobación de la llei, tan dificultosu, valió la incomprensión de munchos sectores asturianistas, una desaforada campaña d’IU na nuestra contra y la defección de los más febles o cobardes d’ente los nuestros, impresionaos por aquella campaña fecha a base d’inorancia, necedá y mala fe. N’otres palabres: la única tutela llegal desenvolvida del asturianu esistente güei -la otra, ensin desenvolver, la del Estatutu, ye míu tamién- nos costara la nuestra presencia nel Parllamentu asturianu. Güei, 12 años dempués, yel’l testu llegal qu’invoquen tirios y troyanos pa defender los derechos llingüísticos de los ciudadanos).

De segundes, y volviendo a los efectos y considerances que provoca la sentencia, ha anotase, tal como vinimos repitiendo dende fai trés lustros, que’l camín de la cooficialidá namás ye unu: el que pasa pola so declaración nel Estatutu d’Autonomía (como nel so día intentamos, tanto pela vía directa, como plea indirecta de la cooficialidá diferida, intentu ésti, el de la cooficialidá diferida, que, una vegada más, recibió tamién nel so día la incomprensión xeneralizada de los teóricamente más interesaos nello), y que nun hai más cooficialidá qu’aquella que confier validez xurídica plena a los actos realizaos nuna llingua. Colateralmente, l’autu del Tribunal demuestra, como denunciamos tantes vegaes, el camelu de tantes pseudodeclaraciones d’oficialidá impulsaes por IU, feches sólo pa engañar a incautos o a adictos al autoengañu. Pseudodeclaraciones de cooficialidá que movilizar munchos esfuercios escontra la nada y que, a la llarga, cuando se ven los sos nulos efectos (sacantes el votu de los incautos o de los que quieren dexase engañar), provoquen desmoralización y cansanciu ente los ciudadanos.

Finalmente, y en el planu pragmáticu, la sentencia vien amosar, una vegada más, la enemistá permanente de PSOE y PP frente a toles seña d’identidá asturianes (toes, hasta les de la piedres y los horros: miren si non l’estáu del arte asturianu o prerrománicu) y, bien especialmente, la llingua. Si d’ellos dependiera, nun habría artículu 4º del Estatutu (debe, recordase que se debe al qu’esto escribe), nin Academia, nin Llei d’Usu (impulsada y llevada a puertu, repito, por nós). Si d’ellos dependiera, nun se punxeran en marcha nin una sola de les midíes conteníes na Llei d’Usu, como asocedió a lo llargo de tantos años y sigue asocediendo, nel Principáu y nos conceyos. Si d’ellos depende, como tienen yá urdío pa la próxima reforma estatutaria, se cargarán toles meyores que la Llei d’Usu representa y torgarán que nunca vuelva habeles. Piensen esaniciar los efectos de meyora del artículu 4º del Estatutu que na Llei 1/1998 introduximos al conceptuala como «llingua tradicional» y ensobiase ente sigo por mediu d’un quórum especial («amarraditos los dos, espumas y terciopelo») por que nengún partíu minoritariu los fuercie a ameyorar l’estatus del asturianu n’Asturies. (Debe recordase, a éstes que l’actual artículu 4 del Estatutu, que salió escontra Madrid con estos términos: «El bable, como llingua específico d’Asturies, gociará de protección…», foi pasáu a cuchiellu, nun 2 de mayu centralista, nesi sintagma específicu, «como llingua específica d’Asturies», polos mamelucos del PSOE, los húsares d’UCD, los coraceros de AP y los granaderos del PCE).

Constitúi un sarcasmu pensar, como dalgunos faen, que l’ausencia de conflictos graves n’Asturies polos asuntos llingüísticos ye pola mor de los partíos madrilanistes, PP y PSOE. Tolo contrario: si na so mano tuviera’l faelo con facilidá, yá liquidaran l’asturianu y tou esquiciu del mesmu. Ye más, nun segreguen a los sos falantes y-yos prohiben votar porque piensen, a la manera como Vespasiano dicía al so fíu Tito a propósitu del impuestu sobre les agües fecales de la Cloaca Máxima, que «votus non olet».

(A éstes anque aparentemente IU nun paez sitiase en primera fila del antiasturianismu, hai que pregunta-y pola so responsabilidá en toa esta situación, dexando ataques a los derechos de los falantes -como asocedió nel casu de Xurde Blanco- nun gobiernu nel que participa o siendo sociu cooperante nesa política llingüística negadora de derechos y cicatera, tanto nel Gobiernu autonómicu como en dellos gobiernos municipales. Medite’l llector).

¿Soluciones y meyores? Yo creo que ye claro que’l combate o partíu se dilucida en trés frentes: nel cívicu, col usu de la llingua na cai; nel xurídicu, cola cooficialidá, y nel políticu, pente medies de la normalización social de la llingua (pa esti fin, basta cola Llei d’Usu y un Gobiernu que quiera realizalo). Nengún d’estes dos últimes cuestiones se soluciona si nun se barre nes urnes a unos partíos que non sólo nun tienen nengún interés poles señes d’identidá asturianes, sinón que son manifiestamente contrarios a les mesmes porque-yos anoxen fondamente.

De cuenta que, estimáu llector, «De te fabula narratur»: ye una hestoria tuya, non de los políticos.