Presencia necesaria del Asturianu na Escuela Universitaria de Maxisteriu

Ramón d'Andrés Díaz, Álvaro Arias-Cachero Cabal, Teresa Fernández Lorences
Roberto González-Quevedo González y Xulio Viejo Fernández
Profesores de Llingua Asturiana de la Universidá d'Uviéu
En: Asturies.com. Opinión, 10/03/09

Como profesores universitarios de Llingua Asturiana, qu'impartimos docencia d'esa materia na Facultá de Filoloxía y na Escuela Universitaria de Maxisteriu, nun podemos dexar d'espresar la nuestra esmolición ante la posibilidá de que l'Asturianu quede escluíu de les nueves titulaciones de Maestru. N'efectu, nestos momentos decisivos nun sería a entendese que la Llingua Asturiana quedare al marxe, por variaes razones:

• La enseñanza de la Llingua Asturiana na Educación Primaria ye una realidá irretrucable desque s'implantó oficialmente y con calter voluntariu nel cursu 1984-85, y con ufierta xeneralizada en tolos centros dende l'añu 1997. Los alumnos escueyen esta materia en proporciones que superen siempre'l cincuenta por cientu, y de va venticinco años son munchos los maestros y maestres que se dediquen a esta enseñanza.

• Esta docencia, lóxicamente, precisa d'enseñantes preparaos con traza, y esta preparación tien que ser competencia de le Escuela Universitaria de Maxisteriu. La propuesta de que l'Asturianu entre na enseñanza reglada de Maxisteriu ye bien razonable, dando asina fin a la provisionalidá que supón
  sofitar esta formación nos estudios non reglaos vixentes na actualidá.

• El Departamentu de Filoloxía Española, del que dependen les enseñances de Llingua Asturiana na Universidá d'Uviéu, pronuncióse por unanimidá a favor d'implantar una Mención d'Asturianu (30 creitos) nel futuru títulu d'Educación Primaria. Esa propuesta, unviada a la Escuela de Maxisteriu pol Director del Departamentu, diz lliteralmente: «Mención en Lengua Asturiana. Se propone la inclusión de una mención de Lengua Asturiana. Dicha mención se ve reforzada por el hecho de que la Orden ministerial plantea como objetivos de los estudiantes de Magisterio "Abordar con eficacia situaciones de aprendizaje de lenguas en contextos multiculturales y plurilingües". La Orden además dentro del "Bloque de Contenidos Didácticos y Disciplinares" plantea que los estudiantes adquieran las competencias de "Conocer el currículo escolar de las lenguas y la literatura y afrontar situaciones de aprendizaje de lenguas en contextos multilingües". Dicha mención sería, pues, la que capacitaría al profesorado de Lengua Asturiana en Educación Primaria».

• Nun hai qu'escaecer que la Escuela de Maxisteriu foi, dientro la Universidá d'Uviéu, el centru pioneru na implantación d'enseñances oficiales de Llingua Asturiana. Dende'l cursu 1985-86, de magar s'implantó la primer asignatura optativa impartida pol profesor D'Andrés, l'asturianu tien tenío una presencia continuada na ufierta d'optatives del centru.

• En resultes, paeznos inconcebible que, como resultáu del actual procesu d'anovación docente y pedagóxica, la Escuela de Maxisteriu escluya dalgún tipu d'enseñanza reglada de Llingua Asturiana, rompiendo asina la so propia tradición y dexando albentestate la formación de los maestros na materia.

Too ello, amás, encartiaría perpoco cola vixente llexislación del Principáu d'Asturies en materia llingüística: Estatutu d'Autonomía d'Asturies nel so artículu 4 y Llei d'Usu y Promoción del Asturianu nel so capítulu III (artículos 9, 10 y 11).

En resultes, compartimos el lóxicu esmolecimientu de profesores y estudiantes, y manifestando'l nuestru respetu a toles opiniones y a la xestión de les autoridaes de la Escuela de Maxisteriu, espresamos el nuestru deséu de que la Mención de Llingua Asturiana s'apruebe en Plan d'Estudios d'esi centru, porque ye l'únicu camín de normalidá posible.

Arriba    Atrás    PDF