Atrás     PDF

Si nun toi enquivocáu, delles corrientes anarquistes refugaron siempre la violencia porque dicíen qu’alimentaba’l sistema en cuenta de valtalu, dao que xustificaba ideolóxicamente la criminalización de la disidencia. Sólo por eso, pémeque los que se tán dedicando a insultar y amenazar a Fernández de Castro diben facer bien en pensar meyor lo que faen. Arriendes hai consideraciones de calter éticu, moral y hasta de bon gustu que nun tienen por qué s’escaecer. Paezme miserable aventa-y a esti home’l pasáu golpista qu’atribúin al so padre, ente otres coses porque naide tien culpa de lo que ficieren o dexaren de facer los sos pás. Tamién me paez ser poco paisanu entrar d’esmenu nel so despachu a pidí-y cuentes por defender na so facultá una propuesta que, acordies colos procedimientos democráticos de la institución, trunfó y torgó l’espoxigue de la filoloxía asturiana. A min tampoco me presta un res esa propuesta, nin comparto los argumentos de Fernández de Castro. Pero qué-y vamos facer: nun habiendo oficialidá -y ésta ye una decisión política que namás puen tomar los gobiernos asturianos- pasen ese coses. Claro que ye llacerioso que n’Asturies nun s’arme una filoloxía asturiana en condiciones, y claro que ye llamentable que se sigan apurriendo argumentos cincaos nos tópicos de los bables o los modismos del falaxe asturianu. Sicasí’l profesor amenazáu nun ye’l diañu, y pamidea queden-y dalgo grandes pallabres como “fascista” o “represor”, por nun dicir “fíu de puta”. Magar que nun teo tratu personal con él, da la casualidá de que me dio clase va cerca de venti años y, dende llueu, el mio recuerdu de la so docencia nun ye precisamente malu nin s’asemeya al de lo que yo entiendo por un fíu de puta.

Atalanto que la griesca tien que dase con otros xeitos y, de mano, n’otres fasteres. La oficialidá, que nun ye condición bastante pa que sobreviva la llingua, sí ye una condición necesaria pa que nun pasen coses como la que pasó na xunta de la facultá de filoloxía. Ensin oficialidá ¿de qué mos asustamos si un profesor universitariu, a títulu particular, presenta una moción que-y ñega al asturianu’l rangu de llingua de primera y esa moción trunfa por mayoría?. Ensin un sofitu llegal mínimu, la llingua ta albentestate pa sufrir eses y otres mancadures. Puxar pa que la llingua asturiana medre pue facese d’abondes maneres, y bien d’elles busquen un apoyu social que, n’efeutu, ye imprescindible. Pero fataes como les d’esos qu’amenacen a un profesor que nun fexo otro que manifestar una opinión cola que -gústenos o non- nun ta solu n’Asturies, non sólo nun valen pa defender la llingua sinón que críen ente la xente -y con razón- una rocea fondera pa con “los del bable”, y nun digamos pa colos nacionaliegos.

Nun val dicir que Fernández de Castro ye un verdugu qu’agora quier dir de víctima, porque los planos nos qu’actuaron unos y otros nun son equivalentes. Él defendió unes idees coles que munchos discrepamos, pero que foron argumentaes y que -por desgracia- esporpollaron nuna xunta de facultá. Otros, d’un mou anónimu, quixeron más actuar como (para)militares que como militantes de la llingua. Creyeron que s’algama más amedranando a persones concretes qu’argumentando escontra les sos idees y llantando la griesca nel terrén políticu y sociocultural, que ye au tien que se llantar. Ye fácil buscar culpables con nomes propios y naguar por sopelexar les sos cabeces al pueblu cuando ésti se decate d’una verdá que, entrín y non, ta nes manes d’unos aventaos que nun soporten qu’un profesorucu piense distinto y consideren llexítimo mete-y mieu pa que nun vuelva a facelo o pa qu’otros escarmienten en tiesta ayena.

Finalmente, pétame referime a un analís políticu posible qu’a min, la verdá, dame un poco de voltura. Consiste en dicir que les amenaces a Fernández de Castro nun hai que les apoyar pero que son normales o naturales por aciu de la situación de desaniciu cultural, llingüísticu, económicu ya identitariu que carez Asturies. Los qu’unvien anónimos a esti home, los probes, son bobos y nun saben reaccionar meyor a esa situación -que ye real, sí, y que yo mesmu tengo denunciao modestamente en dellos escritos-. Los comportamientos d’esos puntos son como efeutos mecánicos d’una coxuntura sociopolítica perronera que los causa. Son cuasi boles de billar emburriaes por otres boles de billar nes que ta pintada la cara de los responsables de la llaceria asturiana. Poro, estos responsables han saber que, si nun envereden, van tener qu’atenese a les consecuencies y sufrir los efeutos -seique un aquello violentos, vaya por Dios- de les causes qu’ellos mesmos entamaron.

Énte les actitúes que s’escuenden darrera d’un analís como esi, que nun sé si tienen más de cinismu o d’hipocresía, yo siempre m’alcuerdo d’aquel chiste nel qu’un serenu atopa unu que ta matando a otru na cai y, cuando-y diz que pare de mete-y puñalaes, el del cuchiellu retruca: “¡Pues que dexe de llamame asesín!”.