Xabiel Álvarez Villa
Aconceyamientu de Xuristes pol Asturianu
Les
Noticies, 17-02-08. Pp. 14
Atrás PDF
Una maniobra especulativa a lo grande, como la entaramingada nos solares de Buenavista, El Vascu, Xeneral Elorza y San Llázaru namás ye posible nun sistema nel que la economía y la política tean dafechamente amestaes. Los cuerpos xuncíos de la esquierda y la derecha asturianes alcuéntrense mecigayaos nos cimientos de formigón del monstruu de Calatrava y denguna de les dos (y cuartu) tán p'abrir la boca, porque si la derecha uvieína punxo'l tarrén de Buenavista y d'El Vascu y venti millones d'euros pal espoxigue de los negocios privaos, el «gobiernu plural de la esquierda» robló'l tratu apoquinando cincuenta y ocho millones d'euros pa oficines a traviés de la empresa pública SEDES que, a cambéu, pue construir dos torres pa vivienda llibre na estaya del antiguu institutu de San Llázaru y más pisos nes sedes vieyes de les conseyeríes de Salú y Bienestar Social na cai Xeneral Elorza.
Magarque la «Ñocla» seya un edificiu incompatible con cualquier serviciu públicu afayadizu pal ciudadanu y qu'agora asoma de calón l'últimu coneyu escondíu nel chapín, cola construcción de trescientos pisos de luxu n'El Vascu pa les clases de postín, onde nun va muncho prometíase un palaciu de Belles Artes, y otra montonera más en San Llázaru -mentes la xente mozo nagua por una vivienda digna- ¿qué fuerza política ta en condiciones de denunciar cuála ye la trama y a quien beneficia?.
Si antaño l'esmoronamientu y la nueva construcción de la plaza del Fontán y d'una bona parte del caseríu del cascu antigu d'Uviéu, fízose pela cenciella operación de camuda-y el nome pol de «rehabilitación» -y, de pasu, «reapropiase» d'un espaciu d'escomanáu valor monetariu, atropellando a la población más vieyo y probe pente medies d'unes declaraciones de ruina que finaron colos sos contratos d'alquiler- anguaño, los beneficiarios del multimillonariu negociu de Buenavista y El Vascu albidren que'l pelotazu de los trescientos pisos y tolos choyos rellacionaos col Calatrava, tamién sedrán fácilmente amazcaraos col encaloráu discutiniu mediáticu qu'acaben d'amagostar sobre la forma y altor de les torres trillices dibuxaes de sópitu pol maestru. Mentanto, el diariu rexonal de mayor tirada sigue dedicándo-y lo meyor de la so información a la temporada d'ópera, los socesos relixosos de la diócesis y les comedies de Gabino, Mortera, Paloma y compaña.
L'asuntu de los «antiguos palacios» ye paradigmáticu pola notoriedá de l'arquitectura del embobamientu na sociedá de consumu y el so usu como adormidera de mases y cobertoria de timadores. Sicasí, otros casos cercanos de menor rellumón exemplifiquen igualmente la identidá sustancial ente mercadores y políticos.
En Cellagú, el negociu nun pasaba per construir nada direutamente, sinón por desfacer un castru que pa l'Academia de la Hestoria ye (yera) «ún de los más completos de tola Europa Occidental» y «una muestra escepcional de la cultura castreña asturiana, imprescindible pa entender la evolución de la sociedá de la Iberia prerromana», col envís de permitir l'avance d'una cantera caliar. Una multinacional del seutor de los áridos, dempués d'esfrayase escontra cinco sentencies xudiciales siguíes (cuatro del Tribunal Superior de Xusticia d'Asturies y una cabera del Tribunal Supremu de 28 d'avientu de 2005) que-y valtaron l'afoguín de tresformar el castiellu en cementu y formigón, finó ganando la guerra cola robla d'un «pautu de caballeros» col Conceyu d'Uviéu y cola Conseyería de Cultura, pa emburriar los restos del monumental estorbu a unos praos de la zona (daquella yá taba nel Gobiernu de coalición una esquierda que nun facía tanto esgañitábase pa denunciar el magnicidiu cultural y que dempués quedó muda). Cuntábemos con que la máxima siciliana de «que'l que tien dineru y amigos rise de la Xusticia» aplícase en dellos casos nel Estáu de Derechu, pero nun camentábemos que fuera posible tanta risión dempués de dar abondu trabayu a los xueces.
Nel diariu El Comercio del 2 de xunetu de 2006, el decanu de la Facultá de Xeolóxiques de la Universidá d'Uviéu fue perclaru nes razones poles qu'estimaba un aciertu políticu'l determín de treslladar el castru -taba refiriéndose al so estrozu dafechu: «Tienen que permitise les canteres que necesita'l xorrecimientu d'Asturies. Sinón tienes áridos y el seutor de la construcción tien que traelos d'otru llau, va haber un sobrecostu, sedrá insostenible». Dalgo que yá cuntaba'l Partíu Popular d'Uviéu na so páxina web con ocasión de la cellebración na capital de l'asamblea de l'Asociación Nacional de Empresarios Fabricantes de Áridos (Anefa) nel añu 2002, onde informaba a los sos afiliaos y simpatizantes de la importancia económica de la cantera de Cellagú, que producía nesos momentos mil tonelaes a la hora y suministraba material pa les obres d'ampliación del Puertu del Musel, la variante de Payares y l'Autovía del Cantábricu.
Esi brutal atentáu escontra la memoria hestórica del pueblu asturianu nun podía tener una cellebración más grotesca que la entrega al Direutor Xeneral de Patrimoniu del Gobiernu asturianu nun chigre de Llatores y cola presencia del cabezaleru de la patronal de la construcción, del premiu «castro de oro» pola so defensa del castru de Cellagú. El diariu La Nueva España del 28 d'ochobre de 2007, ponía na boca del agraciáu les siguientes pallabres:«Ye una hestoria enllena d'errores. Falló l'alderique ente les partes implicaes: científicos, la empresa qu'esplotaba la cantera y l'Alministración». A eses altures, cualquiera que supiera dalgo del tema tenía perclaro que Cellagú morrió por sobredosis de charranes.
Otros asuntos que puen resultar lluminosos pa dase cuenta de quién manda realmente nesti país, son comenientemente desactivaos pel mediu d'un tratamientu informativu en presente continu que desenriestra los fechos sucesivos rellacionaos o da-yos amañosamente la vuelta. Nel conceyu de Llanes les dos normes urbanístiques aprobaes nos quince caberos años foron anulaes pola Xusticia, provocando un allugamientu de clandestinidá edificatoria ensin precedentes, magar que tolos estamentos oficiales escuendan el bultu y entamen una abegosa fuga p'alantre; en Cuideiru, una porretada de llicencies d'obres del conceyu foron recurríes en vía xudicial pol gobiernu rexonal, de la mesma ideoloxía política, nun tiempu récord, proyectando una solombra d'illegalidá urbanística xeneralizada que se tapez ante la opinión pública cola cortina de fumu de los «defectos de forma»; y el descomanáu ataque mediuambiental y paisaxísticu de les mines d'oru de Miranda parez güei un asuntu de la prehistoria política asturiana (por poner tres exemplos perseñalaos).
D'otros proyeutos disparataos como la inversión de más de diecisiete millones de euros nun estación d'esquí nun espaciu natural d'altu valor onde nun ñeva, como ye Fuentes d'Iviernu, a la escontra de les alvertencies de los entendíos, tienen que denunciase na prensa madrileña (El País del 28 de xineru de 2008), porque los medios de formación de mases asturianos nun alcuentren sección p'asoleyar los grandes proyeutos averiaos patrocinaos pol gobiernu col sofitu de los axentes sociales.
Agora, el plan de neocolonización del territoriu asturianu como provincia productora de llectricidá pal esterior, al serviciu esclusivu de los intereses de los xigantes de la enerxía, qu'aportarán toles ganancies, va llenar el «paraísu natural» de más fumu, residuos, chatarra y riesgos pa la salú de la xente: una planta regasificadora a la vera d'una ciudá de casi 300.000 habitantes, una montonera de nueves centrales térmiques de ciclu combináu y redes de tresporte d'alta tensión trazaes pel mediu d'espacios naturales protexíos, preséntense poles sucursales polítiques de l'autonomía como aniciu de desarrollu económicu y de criación de emplegu, cuando nun son más que la preba de la esplotación d'un país cola collaboración de políticos doblegaos a les órdenes del poder económicu, que ye l'únicu que saca tayada d'esti estrozu.
Los políticos-empresarios y los empresarios-políticos saben bien que la rialidá pue volvese del revés con tal de qu'asina lo digan los periódicos. «De lo que nun se fala nun esiste» dexó yá de ser un lema de conspiradores alloriaos pa ocupar el frontispiciu de les facultaes de Ciencies de la Información. Anque lo que se oculte seya velenu alministráu indiscriminadamente al conxuntu de la población, como se documenta nun informe asoleyáu na seronda de 2007 pol Ministeriu de Mediu Ambiente español sobre la calidá del aire nes grandes ciudaes, que pasó desapercibíu n'Asturies, como si nun fuera con nós. El trabayu, que recueye datos del periodu 2001-2005, espeya que les ciudaes d'Uviéu y Xixón superaron el valor llímite de concentración media anual de micropartícules (PM 10) y en Xixón tamién s'incumplieron los llímites diarios; n'Uviéu rexistráronse concentraciones de dióxidu d'azufre (SO2) diaries penriba del valor llímite dende l'añu 2003 a 2005, y en Xixón los niveles de concentración de dióxidu de nitróxenu (NO2) pa la media anual superaron el llímite fixáu nel períodu 2002 a 2004. Toes estes sustancies contaminantes producen enfermedaes cardiovasculares, respiratories y muertes, como vien señalando nos sos informes la Organización Mundial de la Salú, ente otres organizaciones. ¿Qué facer entós pa que les decisiones qu'afecten a los intereses xenerales de los ciudadanos nun queden nes manes del poder económicu?. ¿Cómo torgar que la clas política seya la marioneta del gran capital?. Magar qu'anecien en negalo conservadores, socialdemócrates y arrimaos, la democracia económica ye posible, como demuestren, por exemplu, los modelos analizaos por John E. Roemer en «Un futuru pal socialismu» (Crítica, 1995).