Atrás     PDF

Siempre me fadiaron los que dividíen el mundu ente dos barricaes enfrentaes. Fadiáronme a mi y a la humanidá entera: la mayor parte de les grandes traxedies universales débense a esos desastres de la inxeniería xenético que dalgún dios chapuceru creó nun despiste. Quien te diz que tas con él o tas contra él ta a puntu de date una puñalada trapera. Ye namás cuestión de tiempu que te la dea (si puede). Tardará muncho si t'asities na trinchera d'enfrente, poco si decides quedar pel mediu ensin face-y casu y un aquello más si t'asities xunto a él na trinchera. La puñalada va dátela (en pudiendo): ye namás cosa de tiempu.

La tentación de dividir el mundu en trincheres acompaña a los seres humanos dende siempre. Un conservador pudiera definiles como una entrañable institución antropolóxica, pero yo más bien pienso, como apunté más arriba, que son productu d'un dislate xenéticu. El complexu d'inferioridá, incluso la inferioridá comprobada, xeneró nesti mundu munchos Napoleones.

Nes asturianismu, como en tantos otros movimientos que van de fracasu en fracasu hasta la victoria final, nun faltó la vocación de trinchera con toles consecuencies. La coxuntura histórica, la ideoloxía dominante, los errores propios y ayenos, aliáronse pa que la trinchera del asturianu se convirtiera en ghetto. Nel ghetto, por definición, la vida resulta insoportable, afogadiza. La desesperación lleva a acusar al d'al llau de traidor. Nun hai quien falte, por tochura que pareza, que pida carné d'autenticidá pal qu'asista a una manifestación en defensa de la llingua asturiana.

La única manera de superar un conflictu llingüísticu, yo polo menos nun conozo otra, ye llegar a un alcuerdu llingüísticu. Hailu que vive meyor na pretendida pureza del desalcuerdu perpetuu y que ye meyor nun llegar a nengún pautu que permita, cuando menos, dexar en meyor posición un patrimoniu, l'asturianu, que nun ye de los asturianistes (puros o impuros) sinón de tola humanidá. Haber, hai de too.