El respetu a la verdá y a les minoríes

Xosé Mª Estrada Janáriz
Aconceyamientu de Xuristes pol Asturianu
DATA: 22/06/09

El día 27 d’abril del añu qu’andamos, tolos medios de comunicación daben-y bien d’espaciu a una rueda de prensa qu’en xunto ficieren la Conseyera de Cultura y la Direutora Xeneral de Política Llingüística anunciando la creación, per alcuerdu del Conseyu de Gobiernu de data 18 de marzu, d’una Unidá de Traducción que calificaben de “departamentu áxil, eficaz y rigorosu” al que-y “correspuende garantizar la exactitú y la equivalencia xurídica de les traducciones ente’l bable/asturianu y el castellán”. Por si daquién nun s’enterare, emprentaron y espardieron un bayurosu cartón desplicando les escelencies, competencies y normes de furrulamientu del talu “departamentu”. (Archivu 1 axuntáu).

Nel Aconceyamientu de Xuristes pol Asturianu nun mos casaba lo que se cacarexaba colo que’l BOPA ponía, asina que, tres estudiar con procuru l’asuntu, iguamos un comunicáu esplicando que lo que s’espardía nun yera verdá; que’l Gobiernu del Principáu nun creare nengún muérganu de traducción; y que de too ello nun había más cosa real que l’alloriante pretensión de “carga-y la torna de los testos asturianu-castellán a un funcionariu al que nun se-y desixe la conocencia de la llingua asturiana pal accesu al puestu de trabayu”. (Archivu 2).

Como hebo medios de comunicación que nun mos creyeron, buscamos la llaga pa que pudieren meter los deos y, a nun tardar, atopémosla: la Xefa del Secretariáu del Gobiernu del Principáu, vien de certificar que “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo”. (Archivu 3).

Ye la segunda vegada, en poco más de seyes meses, que l’Aconceyamientu de Xuristes pol Asturianu atrapa a la Direutora Xeneral de Política Llingüística afitando públicamente lo que nun ye (la otra foi alrodiu de la resolución del Conseyu d’Europa sobro l’aplicación n’Asturies de la Carta Europea de les Llingües Rexonales o Minoritaries). Nun país onde braeramente se respete a la verdá y a les minoríes (nesti casu llingüístiques), dos de los pegollos nos que se sofita -sine qua nom- el sistema democráticu, yera de sobra pa ser cesada darréu.

N’Uviéu a venti de xunu de dos mil nueve.

Pola Xunta Direutiva del Aconceyamientu de Xuristes pol Asturianu, robla’l so Presidente,
Xosé María Estrada Janáriz.

> ARCHIVU 1. Dípticu de la Direición Xeneral de Política Llingüística presentando la Unidá de Traducción. (PDF)
> ARCHIVU 2. Nota de prensa d'AXA de fecha 28/05/09, denunciando la falsedá de l'anuncia fecha dende la DXPLL (PDF)
> ARCHIVU 3. Certificación de la Xefatura del Secretariáu del Gobiernu del Principáu (PDF)

Arriba    Atrás    PDF