Atrás     PDF

Un añu más la celebración del Día de les Lletres Asturianes ye un bon momentu pa la reflexón sobre l'acción del movimientu de reivindicación llingüística, que vive un momentu especialmente importante al tar abierta una reforma estatutaria na que se nagua porque se recueya un derechu reclamáu insistente y continuamente dende va trenta años: la oficialidá de la llingua asturiana y del gallego-asturianu. Nel ámbitu políticu la pelota ta nel teyáu del PP: ye'l momentu de que se materialice'l compromisu pa col asturianu amosáu en declaraciones de dellos de los sos dirixentes. La organización liderada por Ovidio Sánchez tien la oportunidá de garra-y la delantera a la FSA, allancada nun discursu obsoletu que namás comparten Mariano Rajoy y la ex socialista Rosa Díez a nivel estatal, mentes los líderes populares nes autonomíes con llingua propia son quien a falala con fluidez, y asina lo fixo'l mesmu Manuel Fraga pa ponese na primer fila en Galicia.

La decisión sobre'l futuru del idioma ye política, lo que nun quita pa que se pongan en funcionamientu tolos mecanismos que faigan que s'escuche con fuerza'l sentir social que reclama la igualdá de derechos llingüísticos col restu de comunidaes y ente la propia ciudadanía. Anque nesti procesu l'escepticismu y el pesimismu sían una tentación na que cayer xustificando la inacción al dar la derrota por cuasi segura, nada diba prestar más a quien nagua por «quitar esti problema de delantre», la cúpula dirixente de la FSA, pensando que desque tea ciarráu l'Estatutu va aselar una reivindicación que tien claro que'l final ye la recuperación y la supervivencia del asturianu y del gallego-asturianu en condiciones dignes, pa lo que la oficialidá ye un preséu necesariu. El camín hasta ella puede ser llargu o curtiu, eso tovía ta por ver, pero lo que sí ta claro ye que se trata d'una sienda que se constrúi de la que s'avanza per ella. Construir ye ganar en representación y simpatía social; construir ye siguir de cerca les polítiques llingüístiques, dando la bienvenida a lo qu'efectivamente ta bien fecho y denunciando les carencies nuna acción pública qu'había ser ambiciosa nos oxetivos y na so aplicación; construir ye dar a conocer fuera la situación del nuestru idioma, non pa externalizar el problema y que nos lu arreglen, sinón pa que s'evidencie dientro la trescendencia d'un conflictu que ye dalgo más qu'un «asuntu domésticu»; construir ye convertise en «normalizadores» na vida privada y pública del usu de la llingua asturiana, enanchando'l compromisu con esti patrimoniu a l'acción diaria, en cuenta de «cubrir l'expediente» cola asistencia a manifestaciones puntuales. Nesti últimu puntu, échase en falta davezu l'impulsu que bien de xente en puestos privilexaos pola so influencia o poder -na política, na empresa, na universidá o nos medios de comunicación- podía dar al idioma, al que s'arrequexa como una aficción privada al marxe de la so dedicación principal. Con too y con eso, el camín de la oficialidá, curtiu o llargu, ta construyéndose y equí la crisis ye'l puntu de partida de l'aceleración.