Atrás     PDF

Lo que voi a dicir ye mui duro: quiero que piesllen la Facultá de Filoloxía. Nun entiendo que l'Estáu dea un duru de los mios impuestos pa financiar el sueldu d'una asamblea que decide que la mio llingua -que ye la llingua d'un bon puñáu de "clientes" d'esa entidá docente- nun ye digna d'estudiu y respetu. Pidiría tamién el pieslle de la facultá de Xeografía y de la de Xeolóxiques si dixeran -y pa más inri votaran-- que la tierra ye plana; o la de Medicina, Bioloxía o Filosofía, si negaran la teoría de la evolución de les especies de Darwin. Una comunidá que niega por motivos políticos que la tierra ye redonda y achaplada pelos polos nun ye una comunidá científica, por munchos estudios científicos que desenvuelvan; una comunidá que niega -por motivos políticos- l'amor pola llingua, quier dicise, la filoloxía, nun ye una comunidá de filólogos. ¿Por qué los mios impuestos van pa financiar el mou y manera d'estos suplantadores?.

Ana Cano, filóloga correcta y ex decana d'esa Facultá, merecedora de mui bien delles alabances, ta acabante dimitir de la so condición porque'l claustru de profesores -por cuatro votos-escluyó los estudios de llingua asturiana del so programa. Ye un xestu que la honra, que merez simpatía y apoyu, y que nun almite más que muestres d'apreciu: la coherencia va volviéndose nesta tierra más rara qu'un cuervu blancu y convién saludala cuando aparez pa que polo menos nun te confundan col turdeburde de mediocres qu'espolleten na provincia. Dimite la señora Cano y dexa desanubiertu'l baleru de la ignonimia: a los qu'una vez más, por motivos políticos, échense al monte de la selvatiquez y nun reconocen más patria que la propia y, nel camín, niéguense hasta'l propiu ser.

Mui española esta zuna, ensin dulda; a mi duelme de manera porque soi republicanu de la cuerda de don Antonio Machado y de don Miguel de Unamuno, y llevo años rispiendo porque Asturies tenga un sitiu dientro de la Hispanidá. Si nun lo tien ehí, porque nos echen los arribistes de la nada, buscarélu ayundes, onde lu haiga. Munchos de los mios compatriotes, que marchen cada vez más a procurase vida fuera, y a estudiar filoloxía onde'l prexuiciu nun se dea como boliche, yá abrieron camín. De momentu, la mio opinión: una universidá que se reduz a lo cerril nun ye universal. Yo nun doi un duru más pa un paletu que nun sabe conciliar el lícitu amor que tien polo suyo col amor -naturalmente lícitu- que tienen los demás polo d'ellos.