La proteición de la costa al debalu
Xabiel Álvarez Villa
Aconceyamientu de Xuristes pol Asturianu
Les
Noticies, 07-03-08. Pp. 14
Atrás PDF
Cada vez que se dan voces d'alarma dende organizaciones ecoloxistes y movimientos ciudadanos por una planificación urbanística que va macizar la costa asturiana nos años vinientes -asina, nel documentu de Greenpeace tituláu «Destrucción a toda costa 2007», onde se calculen más de 30.000 nueves edificaciones previstes nos planes xenerales sólo nos conceyos de Ribedeva, Llanes, Ribesella, Caravia y Colunga, cuando en xunto nun sumen más de 26.000 vecinos-, la respuesta gubernamental amplificada pelos medios de difusión masiva siempre tira de les mesmes coartaes: tenemos el tramu de costa meyor conserváu del Estáu y el xorrecimientu constructivu que se denuncia ye esparatáu y falsu.
Con ello, la clas político-empresarial asturiana quier danos a entender que merez tol enfotu porque foi gracies a les aiciones que caltuvo nel pasáu polo que tendríamos güei un litoral perbién protexíu y porque sigue tando en condiciones d'aguantar les presiones de los poderes del lladriyu coles nueves normes tan perfeches acabantes d'aprobar. Pero ye evidente que la hestoria pasada nun afita la realidá presente nin la futura, y que ye más seguro fiase de lo que yá ta viéndose sobre'l tarrén y de lo que ta escrito nos planes urbanísticos de los conceyos que de les «bones lleis», ente otres coses, porque -tracamundiando a Marx- nun son les normes xurídiques les que determinen la realidá, sinón la realidá la que determina'l conteníu de les normes.
Faigamos un curtiu exercicu de memoria. Na década de los 80 Asturies yera una comunidá política en decadencia, según los analistes económicos más sesudos, que calandriaben como los principales indicadores taben toos per baxo de los valores medios estatales: renta, emplegu, productividá, población. Foi nesti marcu socioeconómicu onde surdió la primera norma urbanística d'aplicación xeneral pa tol suelu non urbanizable asturianu, col enclín de caltener los valores paisaxísticos y naturales, protexer les edificaciones y conxuntos con notables valores tradicionales y estéticos y ordenar de forma afayadiza los usos del territoriu rural -industriales, edificatorios, turísticos, etc.- cola ferramienta de la calificación del suelu en dalguna de les estremaes categoríes que se creen y que debíen dir inxertándose nes nueves normes urbanístiques de cadún de los conceyos. Tamos refiriéndonos a les seminales «Normes Urbanístiques Rexonales nel Mediu Rural», asoleyaes nel Boletín Oficial del Principáu d'Asturies del 31 de xineru de 1984, con influyencia conceutual, que llega dafechu hasta güei, nes qu'apaez per primera vegada -ente otres- la categoría de Suelu Non Urbanizable de Costes, como un espaciu d'aprovechamientu urbanísticu dalu y d'estensión variable, nel que los usos permitíos taben práuticamente acutaos a los agrícoles y ganaderos.
La necesidá de protexer un territoriu feble y bayurosu n'elementos naturales, paisaxísticos y culturales, como ye la faza litoral asturiana, yá entraba entós en rellación dialéutica col impulsu de midíes de xorrecimientu económicu y con una inicial, magar qu'intensa, presión edificatoria pa la construcción de segundes viviendes, de residencies turístiques y d'actividaes d'ociu complementaries, que pronto allumarán dalgunes urbanizaciones desgraciaes como la del Rinconín en Xixón, Peroño en Lluanco, conocía popularmente como «los nichos» pola so apariencia de cementeriu, o normes urbanístiques especulatives dafechu como les del conceyu de Llanes.
Nel añu 1990 el gobiernu socialista de la Comunidá Autónoma dio-y rangu llegal a la regulación de les edificaciones y usos nel mediu rural, per aciu de la Llei 6/90, del 20 d'avientu, que yera una norma percurtia y blandia que nun amestaba nada nuevo de valir al réxime xurídicu de les Normes Urbanístiques Rexonales nel Mediu Rural espublizaes nel 1984. Más bien, la Llei va suponer un atrasu manifiestu cola incorporación de mecanismos d'estrozu de los asentamientos tradicionales de población, como yeren la posibilidá de edificación de viviendes agrupaes dientro de los núcleos rurales ensin tope máximu dengún, que xenerará urbanizaciones xabaces de xalés adosaos como les d'Andrín, La Pereda o Quintana nel conceyu de Llanes, por poner tres exemplos significativos; o la llaceriosa vía p'autorizar usos industriales en suelos non urbanizables pente medies de planes especiales «ad hoc», que va ser un camín amañosu p'asitiar polígonos industriales en zones con valores ambientales incompatibles con esos usos.
Pero los primeros años 90 sedrán el periodu clave p'asentar la futura ocupación masiva de la costa asturiana, sobre too porque ye nesa dómina na que van tomase decisiones sobre les principales infraestructures de comunicación del país, que s'albidren por entós como un factor de desarrollu económicu imprescindible pa sofitar una economía competitiva, na que la facilidá d'accesu vese como elementu básicu d'atraición d'empreses.
Si'l Plan Director d'Infraestructures del Estáu 1993-2007 foi'l documentu públicu de planificación nel que se contemplaba la construcción d'una autovía llibre ente Santander y l'aria central d'Asturies, la elección del trazáu d'esa exa de comunicación pela costa, siguiendo la llinia de la carretera nacional 632, frente a la otra alternativa posible, que yera la del interior -pela traza de la acional 634-, supunxo la opción política definitiva por un modelu de desarrollu económicu y territorial vinculáu a la ocupación residencial de la costa y, polo tanto, al sector de la construcción y del turismu masivu. Como diz nidiamente l'informe de Greenpeace «Destrucción a toda costa 2007», «l'avance de l'autovía del Cantábricu señala'l camín del eanchamientu de los planes urbanísticos n'Asturies».
Va bien poco que'l que fuere conseyeru d'urbanismu nos años 80, l'arquiteutu Arturo Gutiérrez de Terán, confirmaba estos estremos declarando que «siempre fui defensor de que l'Autovía del Cantábricu se realizara pel interior nel so mayor percorríu, siguiendo la vieya N-634. Ún de los argumentos sólidos ye que diba crear una gran demanda na costa y díbemos a tener que lluchar escontra la mesma. Sabíase qu'esa demanda diba ser de xente de dientro pero sobre too de xente de fuera. Y toda demanda esixe respuestes razonables, hai que reconducila, de lo contrario, la cosa termina por esplotar... Si se facilita l'accesu a la costa, tamién se ta estimulando a que s'urbanice. Y urbanizar la costa con criterios d'ocupación y desarrollu indiscrimináu ta reñío cola sostenibilidá de la mesma» (Revista Fusión, suplementu Asturies, ochobre 2006).
Si bien ye cierto que nel añu 1993 aprobáronse unes Directrices Subrexonales d'Ordenación del Territoriu pa la Franxa Costera qu'acuten una zona de Suelu Non Urbanizable de Costes de 500 metros de profundidá a cuntar dende la llende de la ribera del mar, pa la cual dispónse un réxime d'usos permitíos perrestrictivu, con prohibición de les edificaciones, tamién ye nidio qu'esti ye'l «cantu del cisne» de la normativa de proteición de la costa asturiana, que tien el puntu cimeru de dexeneración na Llei de Réxime del Suelu y Ordenación Urbanística, aprobada pola Xunta Xeneral del Principáu d'Asturies n'abril de 2002.
Esta norma malapenes conocida -por razones que son de suponer- va abrir los dos portones afayadizos pa la llegalización dafechu de la ocupación edificatoria del Suelu Non Urbanizable de Costes. El primeru, ya la posibilidá d'ampliar los núcleos rurales dientro de la franxa de 500 metros y, polo tanto, d'edificar viviendes nueves col únicu cuidáu de que nun se faiga na direición al mar, lo que na práutica permite estensiones continues en proyeición horizontal del suelu edificable.
Y el segundu, el más dañín y seriu, ye l'amparu llegal de les ampliaciones de los suelos urbanos yá esistentes dientro de los primeros 500 metros, al traviés de la calificación como suelos urbanizables de los espacios llindantes colos mesmos que pue convertir la costa asturiana col pasu'l tiempu nuna rasa uniforme de cementu. Llevántase d'esta mena la veda pa operaciones d'urbanización masiva de grnades aries de tarrén nel litoral, próximes a les villes y núcleos urbanos asturianos o de urbanizaciones aisllaes.
Ye'l casu de La Talá, onde ta prevista la construcción de 500 viviendes nel interior de la franxa de 500 metros a la llinia de costa; d'otra urbanización en Barru con otres 500 viviendes, o d'otres actuaciones previstes en más conceyos.
Mentanto, pa distrayer al personal, el Gobiernu del Principáu d'Asturies aprobó un denomáu Plan d'Ordenación del Litoral (POLA) nel mes de mayu de 2005, oxetu d'una abultada campaña de propaganda, premios incluyíos, que nun fadrá más qu'encuriosar los accesos y aparcamientos nes playes, construyir una rede de sendes y caminos, permitir los campos de golf y, en xeneral, ordenar los equipamientos imprescindibles p'asegurar el tiempu de folganza de los miles de nuevos residentes temporales de la costa asturiana.
La deriva na proteición de la costa ye un fechu bien ciertu, como saben de sobra los movimientos vecinales que vienen denunciando incansablemente esti llaceriosu procesu.