Atrás PDF (ES)
BOPA Nu 234. 07/10/04.
Pente medies del Decretu 70/2002, de 23 de mayu, afitóse la ordenación y definición del currículum del Bachilleratu nel Principáu d’Asturies.
Col envís de que la materia del Bachilleratu, con unos conteníos que falen del asturianu y del gallego-asturianu nes zones onde tien el calter de modalidá llingüística propia, reciba una única denominación en toles etapes educatives que s’imparten nos estremaos centros docentes del Principáu d’Asturies, dexa llugar a cambiar la denominación enantes establecida nel yá mentáu Decretu 70/2002, de 23 de mayu.
Ente los principios educativos qu’inspiren el yá mentáu Decretu 70/2002, de 23 de mayu, contemplase afondar na conocencia y valoración del patrimoniu llingüísticu, del Principáu d’Asturies, como tamién afalar l’usu de la llingua asturiana d’acordies colo que señala la Llei 1/1998, de 23 de marzu, d’Usu y Promoción del Bable/Asturianu.
La yá mentada Llei d’Usu y Promoción del Bable/Asturianu, nel so artículu 11, dispón que'l Principáu d’Asturies establecerá’l currículum d’estes enseñances nos distintos niveles educativos, polo que ye posible aprobar el currículum de la materia optativa Llingua Asturiana y Lliteratura.
Acordies con ello, dempués d’un informe del Conseyu Escolar del Principáu d’Asturies, a propuesta del Conseyeru d’Educación y Ciencia y dempués d’un alcuerdu del Conseyu de Gobiernu, na xunta del 16 de setiembre de 2004,
DEXO AFITAO
Artículu únicu.- Modificación del Decretu 70/2002, de 23 de mayu, pol que s’establez la ordenación y definición del currículum de Bachilleratu nel Principáu d’Asturies.
Modifícase’l Decretu 70/2002, de 23 de mayu, col que s’establez la ordenación y definición del currículum de Bachilleratu nel Principáu d’Asturies, nos siguientes términos:
1.- L’apartáu 3.a) del artículu 13 queda redactáu del mou que vien darréu:
“3.a) Materies optatives pa toles modalidaes de Bachilleratu:
- Segunda llingua estranxera, Llingua Asturiana y Lliteratura, Ciencia, Teunoloxía y Sociedá y Comunicación audiovisual y multimedia.”
2.- l’apartáu 6 del mentáu artículu queda redactáu de la siguiente forma:
“6. La Conseyería competente en materia d’Educación afitará’l currículum de les materies optatives mentaes nos apartaos 3.a) y 3.b) del presente artículu, sacante’l currículum de la materia de Llingua Asturiana y Lliteratura, que va ser l’establecíu nel anexu IV del presente Decretu.
D’igual mou, va poder modificar el catálogu de materies optatives y definir los correspondientes currícula.”
3.- Amiéstase un apartáu 7 al artículu 13 cola siguiente redaición:
“7. La ufierta de la materia optativa Llingua Asturiana y Lliteratura fadráse del siguiente mou: el primer nivel nel primer cursu y el segundu nivel nel segundu cursu. Por cuenta del calter cíclicu d’esta materia, nun podrá ufiertase’l primer nivel d’esta materia nel segundu cursu.”
4.- Amiéstase un anexu IV al Decretu 70/2002, de 23 de mayu, con denominación y conteníu que figuren nel anexu d’esti Decretu.
Disposición derogatoria única.- Derogación normativa.
Queden derogaes toles disposiciones d’igual o menor rangu que s’ opongan a lo afitao nesti Decretu.
Disposiciones finales
Primera.- Autorización.
Autorízase al titular de la Conseyería competente en materia d’Educación pa dictar les disposiciones que faigan falta pa l’aplicación y execución de lo dispuesto nesti Decretu.
Segunda.- Entrada en vigor.
Esti Decretu va entrar en vigor el día dempués de la so publicación nel BOLETÍN OFICIAL del Principáu d’Asturies.
N’Uviéu, el 16 de setiembre de 2004.
El Presidente del Principáu Vicente Alvarez Areces.
El Conseyeru d’Educación y Ciencia, José Luis Iglesias Riopedre.
ANEXU
CURRÍCULUM DE LLINGUA ASTURIANA Y LLITERATURA PA BACHILLERATU
I.- Entamu.
El desenvolvimientu de la competencia comunicativa de los alumnos tien falta d’una actividá continuada a lo llargo de les socesives etapes educatives, acordies colos distintos oxetivos afitaos pa caúna d’elles. Poro, los plantegamientos curriculares d’esta materia nel Bachilleratu han entendese como una continuación lóxica de lo afitao pa les etapes anteriores y, de mou especial, pa la Educación Secundaria Obligatoria. Quier ello dicir que los oxetivos de la Llingua Asturiana y Lliteratura nel Bachilleratu nun puen obviar, de nengún mou la contribución al afitamientu de les habilidaes rellacionaes cola llingua oral y escrita, na so doble vertiente de comprensión y espresión, como tamién a la conocencia de la lliteratura y al desenvolvimientu de la sensibilidá y creatividá lliteraries.
Al empar, el Bachilleratu tien qu’ufiertar a los alumnos la posibilidá d’afondar na reflexón y na conocencia de los estremaos conteníos llingüísticos, lliterarios y sociollingüísticos que, coles sos peculiaridaes y aspeutos compartíos, conformen la realidá de la nuestra llingua.
D’esta miente, la so enseñanza y deprendimientu tienen que ser una contribución decidida non solo a l’afitamientu d’esa plena competencia comunicativa n’asturianu, sinón tamién al afianzamientu nel alumnáu de la capacidá d’observación atenta y d’análisis de los fenómenos llingüísticos en xeneral.
La materia Llingua Asturiana y Lliteratura tien, entós, qu’insistir dafechu nel llogru y sistematización d’habilidaes no tocante a la capacidá de comprensión ya interpretación de discursos ayenos, orales o escritos, con distintes intenciones y carauterístiques, como a la de producción d’otros con inspiración y conteníos personales.
Pero, al tratase d’una etapa educativa que representa, na mayoría de los casos, la fin d’un procesu regláu y sistemáticu d’enseñanza de los conteníos que-y son propios, resulta que fai falta que la tipoloxía testual pal deprendimientu respuenda dafechu a les carauterístiques llingüístiques d’una gramática normativa, que faiga posible la conocencia y usu de les estremaes variedaes internes de la llingua pente medies d’estructures discursives, en gran midida, complexes y formalizaes.
Nesti sen, adquieren una especial relevancia les posibilidaes de planificación intelectual de l’aición y d’estructuración del pensamientu que toa llingua incorpora.
Per otra parte, l’alumnáu d’esta etapa habrá tener especial atención cola conocencia del sistema llingüísticu, de mou que conoza y manexe con correición la normativa ortográfica y gramatical y sepa usar la terminoloxía científica básica pa dar cuenta del funcionamientu de la llingua n’estremaos contestos.
La valoración de la comunicación interpersonal, como tamién l’apreciu y respetu pola diversidá llingüística y cultural d’Asturies y d’España, constitúin ensin dulda, otros de los aspectos relevantes de la enseñanza del asturianu nesti nivel. Pente medies de les llingües dase bien d’información cola que los alumnos van poder comprobar qu’esisten otres formes distintes d’atalantar y codificar la realidá, igual de válides y respetables.
Hai que destacar, tamién, la otra finalidá básica d’esta materia de Llingua Asturiana y Lliteratura nesta etapa educativa, que ye la formación lliteraria y l’afitamientu d’unos niveles razonables y suficientes de competencia llingüístico-lliteraria. L’análisis, usu y producción de testos resulten equí fundamentales. Pero tamién la conocencia de la lliteratura popular de tradición oral (cantares y coples, cuentos y lleendes, esconxuros y oraciones, etc.), anterior y posterior al sieglu XVII, asina como tamién de testos y documentos históricos relevantes (fueros, donaciones, cartes...); y, por supuesto, la evolución histórica de la lliteratura en llingua asturiana, per aciu del estudiu de los distintos xéneros, períodos, movimientos y autores que, dende’l sieglu XVII hasta los nuestros díes, vienen faciendo una realidá cultural d’innegable importancia estética y simbólica pa tolos asturianos.
La exercitación d’una práutica llectora intencional y l’afitamientu del vezu d'escribir constitúin, en tou casu, estratexes fundamentales a la hora de contribuyir a la formación lliteraria del alumnáu.
Dende’l puntu de les pautes metodolóxiques aplicables, si, como diximos, la enseñanza de la llingua y de la lliteratura asturianes nesta etapa ha mirar pol afitamientu de la competencia comunicativa de los alumnos pente medies de l’atención a usos llingüísticos y rexistros más formales, a los llinguaxes específicos, a los testos de mayor complexidá al desendolcu de téuniques y destreces d’análisis y comentariu, ye lóxico, entós, que la metodoloxía utilizada habrá ser afayadiza pa esti envís y, en consecuencia, adoptar enfoques inequívocamente comunicativos, ello ye, llinies d’actuación que tengan como fin cimeru’l llogru d’esa suficiencia comunicativa.
Va facer falta, en primer llugar, partir de los usos llingüísticos y de les capacidaes comunicatives que presenten los alumnos y alumnes, como tamién del so nivel p’analizar producciones verbales y non verbales y ellaborar xuicios críticos sobre elles. Los principios metodolóxicos adoptaos habrán garantizar el percorríu dende los usos más venceyaos a situaciones cotidianes de comunicación hasta los usos más formales y relevantes na vida social y los propios del ámbitu académicu. Al mesmu tiempu la organización de les actividaes del deprendimientu debe mirar pol desendolcu de la capacidá de trabayu autónomu, pente medies del usu de conocimientos, habilidaes y estratexes de planificación que pide cada tipu de testu o cada situación comunicativa. El trabayu didáuticu, en resumíes cuentes, va suponer tamién la iniciación en procesos d’indagación ya investigación, pente medies del usu d’información, recursos y procedimientos cada vez más complexos.
Acordies con estos principios, la enseñanza de la materia bable/asturianu en Bachilleratu tien que da-y puxu sobre tou en meyorar la capacidá espresiva oral de los alumnos y alumnes pa que, tamién valorando la importancia de los rexistros coloquiales o informales, adquieran la capacidá d’utilización d’otros, gramatical y léxicamente más ellaboraos y formalizaos.
Ello implica, como ye lóxico, una cierta práutica de la planificación discursiva, asina como’l respetu de regles y convenciones comunicatives bien establecíes.
Nesta etapa, la producción de testos escritos ha tar venceyada a otres xeres de deprendimientu. Los alumnos tendrán de facer testos complexos, con sentíu completu, coherentes, cohesionaos, correutos y bien estructuraos, que supongan la busca, seleición y validación de la información, asina como la planificación testual, acordies colos oxetivos y la naturaleza del documentu. La comprensión de testos, el so análisis y comentariu, constitúin tamién destreces básiques que los alumnos y alumnes deben adquirir. Trátase d’actividaes que deben orientase a la busca del significáu global del testu y a la identificación del so sentíu, dientro del contestu comunicativu onde se produz y se recibe.
Otros análisis, morfolóxicos, sintáuticos, semánticos, testuales, etc., deben quedar subordinaos a esa comprensión del sentíu global del testu, polo que tienen poca utilidá didáutica si nun tán al serviciu d'esa fin principal.
Dende’l puntu de vista de la capacidá de reflexón sociollingüística qu’esti currículum suxer, l’alumnáu habrá apropiase d’un mínimu repertoriu de conceutos teóricos, apurríos tanto pola macrosociollingüística como pola microsociollingüística, como pasu primeru pa la so aplicación na interpretación de los fenómenos que se dan nuna sociedá como l’asturiana, sobre manera rica y complexa dende’l puntu de vista de la diversidá llingüística y cultural.
No tocante a los aspeutos lliterarios y a la creatividá lliteraria, anque nun hai que descartar daqué de sistematización teórica, l’averamientu investigador pue ser metodolóxicamente pereficaz: busca de materiales, indagación al rodiu de les fontes, manipulación y esperimentación, etc. Trátase, en tou casu, de facilitar que l’alumnáu entienda la importancia y relevancia d’una lliteratura multisecular qu’algama, xusto nos nuestros díes, el mayor desenvolvimientu social y cultural. Esti allegamientu a la nuestra tradición y actualidá lliteraria tien que valir, paralelamente, pa orientar y encalzar les propies producciones de los alumnos y alumnes y pa enanchar les posibilidaes d’utilización de los sos recursos creativos y estéticos.
Nesti sen, la llectura y comentariu d’obres enteres de la lliteratura asturiana y de fragmentos representativos d’obres de distintos autores han constituir, al empar de la producción de testos d’intención lliteraria, l’exe de la enseñanza de la lliteratura, y alredor d’ello tien sentíu l’estudiu de los distintos xéneros lliterarios y el de los principales movimientos de la historia de la lliteratura en llingua asturiana.
Debe señalase, finalmente, la importancia que representa l’usu de testos y documentos auténticos a la hora de poner en práutica una metodoloxía como la qu’equí se suxer. N’efeutu, l’emplegu de materiales llingüísticos que nel so orixe nun tienen una aplicación pedagóxica (llibros, periódicos, revistes, discos, grabaciones de programes de radio y televisión, Internet, etc.) ye ún de los pegollos básicos de los enfoques comunicativos y constitúi, nel casu del asturianu, una ferramienta de primer orde pa trabayar didáuticamente les habilidaes llingüístiques; pa contrastar, paralelamente, les posibilidaes espresives y comunicatives de la nuestra llingua, conocer la influyencia de los medios de comunicación, los usos espresivos de los sos códigos icono- verbales y, nun estremu caberu, pa valorar na so xusta midida’l llogru del procesu de recuperación llingüística n’Asturies.
En fin, esti currículum mira poles distintes variedaes y realidaes sociollingüístiques d’Asturies y permite, poro, una perfeuta adaptación a les necesidaes curriculares de la enseñanza del gallego-asturianu na zona onde esta variedá llingüística ta asitiada. Pa ello, solo fai falta entender gallego-asturianu en toles menciones onde’l documentu fai referencia a la llingua asturiana.
LLINGUA ASTURIANA Y LLITERATURA I
a) Oxetivos.
La enseñanza de la Llingua Asturiana y Lliteratura nel primer cursu de Bachilleratu va tener como oxetu ayudar a desarrollar nos alumnos y alumnes les siguientes capacidaes:
1. Valorar la llingua asturiana como mediu d’accesu a una cultura y como vehículu de comunicación y entendimientu nun mundu pluricultural.
2. Comprender testos orales y escritos de distinta naturaleza, reconociendo les estremaes finalidaes y situaciones de comunicación onde se producen, y amosando una actitú crítica y de respetu delantre’l discursu ayenu.
3. Espresase, oralmente y per escrito, con correición y precisión, emplegando los recursos afayadizos a cada situación y necesidá comunicativa, afitando pasu ente pasu un estilu espresivu propiu y enseñando nos testos escritos el máximu respetu p’hacia los aspeutos normativos del discursu.
4. Conocer y analizar les normes de la llingua asturiana y el so funcionamientu internu, col envís d’ameyorar les producciones propies y optimizar la comprensión de les ayenes, refugando los usos qu’apurran, fomenten o reforcen cualquier clase de discursu discriminatoriu.
5. Conocer les variedaes internes del asturianu (xeográfiques, sociales y d’estilu), superando prexuicios y estereotipos sociollingüísticos y afalando actitúes de respetu y consideración hacia eses formes naturales de comunicación.
6. Atalantar y analizar los usos llingüísticos de los diversos medios de comunicación, cola idea d’enanchar les destreces comunicatives propies y desenvolver una actitú crítica delantre los sos mensaxes.
7. Utilizar la llingua asturiana como instrumentu d’adquisición de nueves conocencies, pa favorecer el desendolcu del pensamientu, incorporando téuniques y destreces propies del manexu de la información.
8. Usar la llectura y la escritura como actividaes formatives individuales, descubriendo los xéneros, estilos y testos que mayor interés y satisfaición personal espierten.
9. Conocer y comprender la producción lliteraria, oral y escrita, en llingua asturiana, a lo llargo de les distintes etapes de la historia de la lliteratura, hasta’l sieglu XIX, analizando, nel so contestu, obres, autores, formes, xéneros, movimientos y tradiciones orales, pente medies de la llectura d’obres completes y fragmentos representativos.
10. Analizar y producir testos orales y escritos de distintu tipu: lliterarios, históricos, xurídicos, científicos, téunicos, etcétera, con enfotu críticu y con conocimientu de les estructures formales básiques, p’adaptase a elles o usales convenientemente na construcción d’un estilu propiu.
b) Conteníos.
Acordies colos oxetivos xenerales afitaos pa esta materia nel primer cursu de Bachilleratu, establécense los siguientes conteníos, agrupaos en cinco bloques:
1. La llingua oral.
La comunicación oral: elementos, finalidaes y situaciones comunicatives. Funciones del llinguaxe.
Formes de comunicación oral: monologaes o singulares y dialogaes o plurales.
Rasgos específicos.
El llinguaxe oral nos medios de comunicación: carauterístiques básiques. Los testos periodísticos.
La variación llingüística: norma estándar y variedaes internes de la llingua.
Análisis ya interpretación de testos orales de distinta naturaleza, mirando polos sos elementos formales y de conteníu.
Planificación y producción de testos orales variaos, afayadizos a les distintes situaciones ya intenciones educatives.
Busca y organización d’información pa la producción de testos orales variaos, acordies col ámbitu académicu del alumnáu.
Identificación, respetu ya interés poles variedaes internes propies de la llingua asturiana.
Respetu poles normes básiques que rixen los intercambios comunicativos.
Interés pola producción de testos orales de cierta estensión y complexidá, amosando una actitú crítica delantre d’espresiones o estereotipos que denoten cualquier tipu de discriminación.
Receición activa y actitú crítica delantre los mensaxes de los medios de comunicación de mases.
2. La llingua escrita.
Comunicación escrita: xéneros y carauterístiques principales de caún d’ellos: narración, descripción, diálogu, esposición y argumentación.
Normativa ortográfica de la llingua asturiana: fonoloxía, morfoloxía y sintaxis.
Variedaes internes de la llingua asturiana: diatópiques, diafásiques y diastrátiques.
La llingua escrita nos medios de comunicación: testos periodísticos. Valoración crítica del so mensaxe.
Análisis, interpretación y comentariu de testos escritos distintos, mirando poles carauterístiques principales del xéneru o esquema testual a que pertenecen.
Planificación y producción de testos escritos de distintu xéneru, acordies cola normativa ortográfica académica, respetando les carauterístiques básiques de cada xéneru y afitando pasu ente pasu un estilu espresivu propiu.
Reconocencia y valoración del papel de los medios de comunicación na normalización social de la llingua asturiana.
3. La llingua y el so funcionamientu.
Llingua estándar y variedaes internes. Normativa ortográfica de la llingua asturiana: soníos, grafíes y fonemes; vocales y consonantes; acentuación, apostrofación y contraiciones; morfoloxía y sintaxis.
Clases de pallabres: les categoríes gramaticales.
Funciones y rellaciones sintáutiques. Funciones oracionales y suboracionales. Tipos d’oraciones.
La oración simple: elementos constitutivos. La so utilización como recursu espresivu.
Les oraciones compuestes por yustaposición y coordinación.
El testu como unidá comunicativa: estructura y conteníos.
El significáu de les pallabres: rellaciones ente significaos. Los campos semánticos.
Análisis y comentariu morfosintáuticu de testos escritos según les normes ortográfiques y gramaticales de la llingua asturiana.
Producción de testos acordies cola normativa ortográfica y gramatical de la llingua asturiana, utilizando los recursos llingüísticos más afayadizos pa la situación, contestu ya intencionalidá comunicativa.
Usu de diccionarios y repertorios lexicográficos que faigan posible la reflexón del asturianu y los sos distintos usos y variables.
Reconocencia y diferenciación de les distintes categoríes gramaticales y funcionales que se dan nel marcu de les oraciones simples y compuestes por yustaposición o coordinación.
Aceptación y respetu pola precisión llingüística y l’usu correutu de la normativa ortográfica de la llingua estándar.
4. La llingua na lliteratura.
La lliteratura popular asturiana de tradición oral: cuentos y lleendes, coples y cantares, esconxuros y oraciones, dichos y cosadielles.
Orixe y evolución de los distintos xéneros lliterarios: llírica, narrativa, teatru y ensayu.
Los períodos lliterarios y la so evolución histórica dende’l sieglu XVII al XIX: el barrocu, la ilustración, romanticismu, el realismu y el costumismu. Obres y autores más representativos.
Llectura y análisis d’obres y testos lliterarios de distintos xéneros, pertenecientes a autores representativos de cada época o periodu lliterariu.
Producción de testos d’intención lliteraria onde apaezan sentimientos, idees, pensamientos o emociones, etc., y onde s’utilicen recursos orixinales de calter estéticocreativu.
Análisis, comentariu ya interpretación de testos lliterarios, orales y escritos, de distintos autores, époques y xéneros. Actitú crítica delantre de conteníos qu’impliquen cualquier forma de discriminación.
5. La llingua y los aspeutos socioculturales y non verbales.
La variación llingüística. Variedaes internes de la llingua asturiana: diatópiques o xeográfiques, diafásiques o d’estilu y diastrátiques o sociales.
Contautu de llingües: billingüismu y diglosia.
La llingua asturiana na sociedá: conocencia, usos, actitúes y espectatives sociales.
Elementos non verbales na comunicación humana y estratexes básiques de comunicación non verbal en llingua asturiana.
Los aspeutos non verbales nos medios de comunicación de mases.
Análisis y comentariu de testos orales y escritos onde se reconozan les variantes internes poles diferencies xeográfiques, sociales o de situación.
Producción de testos orales y escritos que respuendan a estremaes situaciones ya intenciones comunicatives onde se pongan de manifiestu dellos elementos carauterísticos de la cultura asturiana y onde, paralelamente, se constate la presencia d’elementos non verbales que maticen el conteníu esplícitu del mensaxe.
Reconocencia del valor intrínsecu, comunicativu y cultural que tienen toles llingües y de les sos idéntiques potencialidaes a la hora de contribuir al afitamientu de la identidá individual y coleutiva de les persones.
Valoración de la diversidá llingüística d’Asturies y d’España como un fechu culturalmente enriquecedor.
c) Criterios d’evaluación.
Los criterios d’evaluación que, no tocante a oxetivos plantegaos, s’establecen pal primer cursu de Bachilleratu son los siguientes:
1. Resumir oralmente y per escrito’l significáu y sentíu de testos de distinta naturaleza y nivel de formalización, estremando les idees principales de les secundaries, asina como la so intencionalidá comunicativa.
Con ello búscase valorar la capacidá de comprender la organización d’un testu a partir del so análisis formal y de conteníu, y de facer un resume oral o escritu del mesmu.
2. Facer esposiciones orales al rodiu d’un tema concretu, con claridá, precisión, coherencia y cola correición propia de caún de los niveles llingüísticos establecíos (fónicu, léxicu, morfolóxicu y sintáuticu), adoptando la estratexa comunicativa que más cuadre col contestu o situación de comunicación.
Trátase de demostrar la capacidá d’esponer con coherencia, correición, pertinencia y fluyidez datos y opiniones sobre un asuntu determináu.
3. Participar nun alderique d’un tema pautáu, afitando una llinia espositiva y argumentativa propia y respetando les regles que rixen la interacción comunicativa y el diálogu.
Con esti criteriu lo que se quier ye valorar l’habilidá nel usu de les estratexes comunicatives.
4. Consultar estremaes fontes d’información y ellaborar un testu de síntesis qu’espeye les idees esenciales, les distintes perspeutives y la opinión crítica sobre’l conteníu, valorando especialmente la correición formal, la precisión de los datos y la coherencia na esposición y na argumentación.
L’enfotu d’esti criteriu ye comprobar la capacidá de sintetizar idees vinientes de diferentes medios y de manifestar les opiniones propies de mou razonáu.
5. Producir testos de distinta estructura, naturaleza y conteníu (narrativos, descriptivos, espositivos y argumentativos), afayadizos a cada situación comunicativa y acordies cola normativa ortográfica académica.
La idea ye demostrar la capacidá d’aplicar a les producciones propies los conocimientos al rodiu de la organización testual, dotando esos testos d’una estructura pertinente claramente identificable.
6. Facer trabayos d’investigación propios del mundu académicu, seleicionando y tratando de mou afayadizu la información, con ayuda de les nueves teunoloxíes de la información y la comunicación.
Se busca asina comprobar la capacidá del alumnáu pa poner en práutica los conocimientos ya instrumentos d’análisis sobre los que se reflexonó.
7. Identificar y esplicar les variedaes internes de llingua (xeográfiques, sociales y d’estilu), señalando les peculiaridaes d’estremaos usos llingüísticos, por cuenta de los variaos tipos d’interaición que se dan dientro d’una mesma llingua, de les distintes situaciones y de los distintos llugares xeográficos onde se desarrollen.
Trátase de comprobar si l’alumnáu ye consciente de que la llingua estándar tien múltiples realizaciones, que varien en función del espaciu, la situación, la clase social, la edá, etc. Al mesmu tiempu, fai por valorar la so actitú de respetu y apreciu hacia les distintes maneres en que se fala la llingua asturiana.
8. Reconocer les carauterístiques básiques del llinguaxe nos medios de comunicación social, asina como les funciones sociales qu’éstos faen, analizando críticamente testos periodísticos, valorando los sos recursos espresivos, identificando les aportaciones de los llinguaxes verbales y no verbales y adoptando una posición crítica delantre de los sos mensaxes.
Preténdese comprobar si l’alumnáu identifica los recursos espresivos y comunicativos presentes nos medios de comunicación, asina como la so capacidá d’adoptar actitúes crítiques énte esos medios, al empar que llograr l’ameyoramientu y ampliación de les sos destreces comunicatives.
9. Conocer y aplicar téuniques d’análisis y comentariu de testos de distintu tipu.
Preténdese verificar si l’alumnáu conoz y aplica les téuniques qu'afayen l’análisis y comentariu d’un testu como esponente de la configuración del criteriu propiu y que ponen en rellación los deprendimientos fechos.
10. Analizar los aspeutos ortográficos, fónicos, morfosintáuticos y léxico-semánticos d’un testu utilizando una terminoloxía concreta y demostrando la capacidá de facer les operaciones llingüístiques necesaries, tales como la conmutación, la clasificación, la segmentación, etc.
Se quier comprobar si, nel análisis de los testos, l’alumnáu reconoz les distintes categoríes gramaticales, los distintos tipos de funciones sintáutiques que se dan ente les distintes magnitúes de la oración simple, les rellaciones léxiques y semántiques, etc.
11. Afitar rellaciones ente obres, autores, movimientos relevantes de la historia de la lliteratura asturiana de los sieglos XVII, XVIII y XIX y los elementos más destacaos del contestu cultural, social ya históricu al que pertenecen.
Trátase de valorar la capacidá de l’alumnáu pa reconocer el marcu onde surden autores y obres significatives de la lliteratura asturiana d’estos períodos, como tamién les rellaciones ente los distintos elementos qu’integren el testu lliterariu: forma, conteníu, estructura, etc.
12. Comprender la idea central de testos, fragmentos y obres lliteraries completes de distintos autores d’esa época, identificar el xéneru al que pertenecen y reconocer los sos elementos estructurales básicos, asina como los recursos utilizaos.
Trátase de valorar la capacidá d’afitar les rellaciones afayadices ente los componentes de los testos al analizalos (espresiones, estructures, estereotipos, recursos estilísticos o otros).
13. Comprender el calter estéticu de les obres y testos lliterarios, identificando los componentes que determinen la so naturaleza artística, rellacionándolos con otros llinguaxes y conociendo les tresformaciones históriques del so xéneru.
Preténdese comprobar si l’alumnáu ye quien a definir o identificar los elementos que carautericen una producción artística y d’esplicar el procesu evolutivu de les formes lliteraries estudiaes.
14. Producir testos con intención lliteraria.
Trátase de valorar la capacidá p’encarar la comprensión y la esplicación d’esperiencies vitales propies pente medies del llinguaxe, imitando, adoptando y adaptando téuniques y modelos estilísticos o comunicativos yá analizaos.
LLINGUA ASTURIANA Y LLITERATURA II
a) Oxetivos.
La enseñanza de la Llingua Asturiana y Lliteratura nel segundu cursu de Bachilleratu va tener como oxetu contribuyir a desenvolver nos alumnos/es les capacidaes que vienen darréu:
1. Valorar y apreciar la llingua asturiana como mediu d’accesu a una cultura y como vehículu de comunicación y entendimientu nun mundu pluricultural, favoreciendo’l so emplegu en tolos ámbitos sociales d’interaición.
2. Atalantar testos orales y escritos d’estremada naturaleza, con especial atención a los de conteníu históricu, filosóficu, lliterariu y periodísticu, reconociendo les estremaes finalidaes y situaciones de comunicación onde se producen, amosando una actitú crítica y de respetu delantre d’un discursu ayenu.
3. Espresase, oralmente y per escrito, con correición y precisión, emplegando los recursos afayadizos pa cada situación y necesidá comunicativa, dexando bien afitáu un estilu espresivu propiu y amosando nos testos producíos el mayor respetu p’hacia les regles y convenciones comunicatives establecíes una actitú crítica delantre de los sos mensaxes.
4. Conocer y valorar l'estándar llingüísticu, ortográficu y gramatical, del asturianu, de mou que se garantice l’usu de rexistros gramatical y lléxicamente más formalizaos, afayando la producción de discursos propios afayadizos a cada situación comunicativa y optimizando la comprensión de les formulaciones ayenes.
5. Conocer la realidá plurillingüe d’Asturies y d’España, superando prexuicios y estereotipos sociollingüísticos, y faciendo analís de les situaciones que xeneren les llingües en contautu, valorando la riqueza qu’esa variedá representa.
6. Comprender y analizar los usos llingüísticos y carauterístiques de los estremaos medios y nueves redes de comunicación, col fin d’ampliar les destreces comunicatives propies y desendolcar una actitú crítica delantre de los sos mensaxes.
7. Utilizar la llingua asturiana como preséu p’adquirir nuevos conocimientos, pa favorecer el desenvolvimietu del pensamientu, incorporando téuniques y destreces propies del remanamientu de la información tanto en soportes tradicionales como nos ufiertaos poles nueves teunoloxíes de la información y de la comunicación.
8. Utilizar la llectura y la escritura como actividaes formatives individuales, descubriendo los xéneros, estilos y testos que mayor interés y satisfaición personal espierten.
9. Conocer y atalantar la producción lliteraria, oral y escrita, n’asturianu, dende l’entamu del sieglu XX hasta los nuestros díes, analizando, nel so contestu, obres, autores, formes, xéneros, movimientos y tradiciones orales, pente medies de la llectura d’obres completes y fragmentos representativos.
10. Analizar y producir testos complexos, orales y escritos, de distintu tipu, que seyan una busca, seleición y validación de la información, como tamién planificación testual, acordies colos fines y naturaleza del conteníu.
b) Conteníos.
Acordies colos oxetivos xenerales afitaos pa esta materia nel segundu cursu de Bachilleratu, establécense los siguientes conteníos, agrupaos en cinco bloques:
1. La llingua oral.
La llingua asturiana como vehículu de comunicación y entendimientu nun mundu pluricultural.
La comunicación oral: situación ya intención comunicativa. Xéneros de la comunicación oral y rasgos específicos de caún.
El llinguaxe oral nos medios y redes de comunicación: rasgos específicos. Los testos publicitarios: usos llingüísticos y visuales.
La diversidá llingüística d’Asturies y d’España. Fenómenos derivaos del contautu de llingües.
Análisis ya interpretación de testos orales de distintu tipu, reconociendo les estremaes finalidaes y situaciones comunicatives onde se producen y amosando una actitú crítica y de respetu delantre del discursu ayenu.
Producción de testos orales de distinta naturaleza, afayadizos a les estremaes situaciones ya intenciones comunicatives, perafitando un estilu espresivu propiu, correutu, coherente y precisu.
Desenvolvimientu de vezos de trabayu rigurosos na busca, tratamientu, organización y ellaboración de la información viniente de distintes fontes.
Reconocencia de les interferencies llingüístiques ya interés por evitales, col envís d'afitar una total competencia comunicativa n’asturianu.
Valoración, respetu ya interés pola diversidá llingüística d’Asturies como resultáu de la evolución histórica, social y cultural d’esta comunidá.
2. La llingua escrita.
Elementos d’estructuración del testu escritu: coherencia, cohesión, adecuación y correición.
Normativa ortográfica y gramatical de la llingua asturiana. La conxugación verbal. Ortografía de los nomes de llugar.
La diversidá llingüística d’Asturies y d’España: normalización y normativización de la llingua asturiana.
La llingua escrita nos medios de comunicación. Los testos publicitarios: elementos llingüísticos y non llingüísticos. Usos de la llingua nes nueves teunoloxíes.
Análisis, interpretación y comentariu de dalgunos testos, con especial atención a los de conteníu científicu, xurídico-alministrativu, históricu, filosóficu, lliterariu, periodísticu y publicitariu.
Planificación y producción de testos escritos de distintu xéneru y naturaleza, afayadizos a les distintes situaciones ya intenciones, aplicando correutamente la normativa ortográfica, como tamién los recursos formales y estilísticos propios de cada xéneru o tipoloxía testual.
Desenvolvimientu de vezos de trabayu rigurosos na busca, seleición y tratamientu de la información.
3. La llingua y el so funcionamientu.
La llingua como sistema. L’estándar llingüísticu: normativa ortográfica y gramatical de la llingua asturiana. La conxugación verbal. Ortografía de los nomes de llugar.
Categoríes gramaticales y funciones sintáutiques. El conceutu de tresposición sintáutica.
La oración complexa: subordinaes sustantives, axetives y alverbiales. El so usu como recursu espresivu.
El testu como unidá comunicativa funcional: procedimientos de coherencia y cohesión testual.
Lexicografía y semántica: procedimientos de creación y tresformación del léxicu. Neoloxismos y estranxerismos.
Análisis morfosintáuticu y comentariu críticu de testos comunes, escritos acordies cola normativa ortográfica y gramatical de la llingua asturiana.
Producción de testos complexos de distinta naturaleza, acordies cola normativa afitada y según los principios d’adecuación, coherencia y cohesión testual.
Reconocencia y diferenciación de les estremaes categoríes gramaticales y funcionales que se dan nel marcu de les oraciones complexes.
Análisis y valoración crítica del emplegu de la llingua asturiana nos medios y redes de comunicación.
Usu permanente d’estremaos tipos de diccionarios de la llingua asturiana con especial atención nos repertorios lexicográficos que contienen variantes diatópiques o dialeutales de la propia llingua.
Aceutación y respetu pola precisión llingüística y l’usu correutu de la normativa ortográfica y gramatical de la llingua estándar.
4. La llingua na lliteratura.
La lliteratura popular asturiana de tradición oral: cuentos, lleendes, romances y cantares.
Evolución de los distintos xéneros lliterarios (narrativa, ensayu, llírica y teatru) a lo llargo del sieglu XX.
Los períodos lliterarios y la so evolución a lo llargo del sieglu XX: El Rexonalismu, La Xeneración de los Años Venti, La Xeneración de Posguerra, El Surdimientu. Últimes tendencies. Obres y autores más representativos.
Llectura y análisis d’obres y testos lliterarios de distintos xéneros, pertenecientes a autores representativos de cada época o periodu lliterariu.
Producción de testos d’intención lliteraria onde apaezan sentimientos, idees, pensamientos o emociones, etc. y onde s’utilicen recursos orixinales de calter estéticocreativu.
Análisis, comentariu ya interpretación de testos lliterarios, orales y escritos, d’estremaos autores, époques y xéneros. Actitú crítica en conteníos qu’impliquen toa forma de discriminación.
La lliteratura asturiana d’anguaño como elementu de referencia na normalización llingüística y social del asturianu.
5. La llingua y los aspeutos socioculturales y non verbales.
Orixe y desenvolvimientu de llingua asturiana y les otres llingües peninsulares.
Situación actual de la llingua asturiana: normalización y normativización. Les demás llingües del Estáu Español.
Identificación y análisis de los códigos non verbales d’estremaos llinguaxes audiovisuales: cómics, dibuxos animaos, vídeoclips, etc.
Interaición ente’l llinguaxe verbal y otros tipos de llinguaxe: musical, artísticu, corporal, etc.
Reconocencia del valor intrínsecu, comunicativu y cultural, que lleven toles llingües y de les sos idéntiques potencialidaes a la hora de contribuyir a la conformación de la identidá individual y coleutiva de les persones.
Análisis y comentariu de testos orales y escritos onde se reconoza la realidá plurillingüe d’Asturies y les interferencies llingüístiques qu’esti fechu provoca.
Producción de testos orales y escritos que respuendan a distintes situaciones ya intenciones comunicatives onde se faigan bultables dellos elementos carauterísticos de la cultura asturiana y onde, al empar, se constate la presencia d’elementos non verbales que maticen el conteníu esplícitu del mensaxe.
Identificación de la estensión del asturianu y les demás llingües falaes n’Asturies.
Valoración de la diversidá llingüística d’Asturies y d’España como un fechu culturalmente enriquecedor.
c) Criterios d’evaluación.
Los criterios d’evaluación que, en rellación colos oxetivos plantegaos, s’afiten pal segundu cursu de Bachilleratu son los que vienen darréu:
1. Sintetizar oralmente y per escrito’l significáu y sentíu de testos de distinta naturaleza y nivel de formalización, preferentemente de conteníu históricu, filosóficu, lliterariu y periodísticu, estremando les idees principales de les secundaries, como tamién la so intencionalidá comunicativa.
Búscase con ello valorar la capacidá del alumnáu pa comprender la organización d’un testu dende’l so análisis formal y de conteníu, y pa facer un resume oral o escritu d’ésti.
2. Facer esposiciones orales de temes concretos, con claridá, precisión, coherencia y cola correición propia de caún de los niveles llingüísticos establecíos (fónicu, léxicu, morfolóxicu y sintáuticu, testual), adoptando estratexes comunicatives que meyor-y vayan al contestu o situación de comunicación.
Trátase de demostrar la capacidá d’esponer con coherencia, correición, pertinencia y fluyidez datos y opiniones al rodiu d’un asuntu determináu.
3. Producir testos de distinta estructura, naturaleza y conteníu (narrativos, descriptivos, espositivos y argumentativos), afayadizos pa cada situación comunicativa y acordies cola normativa estándar, ortográfica y gramatical, del asturianu.
Se quier demostrar la capacidá d’aplicar a les producciones propies los conocimientos sobre la organización testual, dotando esos testos d’una estructura pertinente identificable dafechu.
4. Conocer y aplicar téuniques d’análisis y comentariu críticu de testos de distintu calter.
Trátase de saber si l’alumnáu conoz y aplica les téuniques qu'afayen l’análisis y comentariu d’un testu como esponente de la configuración del criteriu propiu y que ponen en rellación los deprendimientos fechos.
El comentariu críticu tien que midir la capacidá del alumnu pa comprender un testu y producir (como respuesta a ésti) otru de carauterístiques asemeyaes.
Desíxese-y qu’analice’l conteníu del testu, integre la información d’ésti cola de so y ellabore otru testu.
5. Ellaborar trabayos y documentos complexos, habituales nos procesos de deprendimientu, con sentíu completu, coherentes y cohesionaos, correutos y bien estructuraos, cola ayuda de les nueves teunoloxíes de la información y de la comunicación.
Trátase de comprobar si los alumnos producen de mou afayadizu testos propios pente medies de les sos xeres académiques, esbillando y sintetizando la información necesaria, afitando nesti nivel un estilu propiu y amosando’l máximu respetu p’hacia les regles y convenciones comunicatives establecíes.
6. Consultar distintes fontes d’información y ellaborar testos de síntesis qu’espeyen les idees esenciales, les distintes perspeutives y la opinión crítica al rodiu del conteníu, valorando sobre manera la correición formal, la precisión de los datos y la coherencia na esposición y na argumentación.
La intención d’esti criteriu ye comprobar la capacidá de sintetizar idees vinientes de distintos medios y de manifestar les opiniones propies de forma razonada.
7. Reconocer la pluralidá llingüística d’Asturies y d’España, dende’l so orixe hasta los nuestros díes, valorando esa diversidá como espresión d’una riqueza cultural.
Esti criteriu fai por valorar los conocimientos y actitúes del alumnáu sobre la situación de les llingües d’España y, en particular, d’Asturies, y sobre los fenómenos de contautu ya interferencies que se producen nesta comunidá autónoma.
8. Analizar los aspeutos fónicos, morfosintáuticos, léxico- semánticos y estructurales d’un testu faciendo usu d’una terminoloxía precisa y demostrando la capacidá de facer les operaciones llingüístiques necesaries, como la conmutación, la clasificación, la segmentación, etc.
Quier comprobase si, nel análisis de los testos, l’alumnáu reconoz les estremaes categoríes gramaticales, los estremaos tipos de funciones sintáutiques que se dan ente les diferentes magnitúes de la oración simple, les rellaciones léxiques y semántiques, etc.
9. Utilizar correutamente les normes ortográfiques, gramaticales y d’usu del asturianu estándar actual, produciendo rexistros afayadizos a la situación comunicativa desixida.
Trátase de valorar la conocencia y dominiu del alumnáu al rodiu de la normativa académica de la llingua asturiana y la so capacidá pa escoyer el rexistru afayadizu pa cada situación de comunicación.
10. Reconocer les carauterístiques de los medios de comunicación social, analizando críticamente testos periodísticos y, sobre manera, publicitarios, valorando los sos recursos espresivos, identificando les aportaciones de los llinguaxes verbales y non verbales y adoptando una posición crítica no tocante a los sos mensaxes.
Con esti criteriu mírase por comprobar la consecución per parte del alumnáu d’actitúes crítiques delantre los medios de comunicación, al tiempu que llograr la meyora y enanchamientu de les sos destreces comunicatives.
11. Afitar rellaciones ente obres, autores, movimientos relevantes de la historia de la lliteratura asturiana del sieglu XX y los elementos más destacaos del contestu cultural, social ya históricu al que pertenecen.
Trátase de valorar la capacidá de los alumnos pa reconocer el marcu onde surden autores y obres significatives de la lliteratura asturiana d’esi periodu, como tamién les rellaciones ente los distintos elementos qu’integren el testu lliterariu: forma, conteníu, estructura, etc.
12. Atalantar la idea central de testos, fragmentos y obres lliteraries completes d’estremaos autores del sieglu XX, identificar el xéneru al que pertenecen y reconocer los sos elementos estructurales básicos, como tamién recursos usaos.
Trátase de valorar la capacidá d’afitar les rellaciones afayadices ente los componentes de los testos al analizase (espresiones, estructures, estereotipos, recursos estilísticos o otros).
13. Comprender el calter estéticu de les obres y testos lliterarios, identificando los componentes que determinen la so naturaleza artística, rellacionándolos con otros llinguaxes y conociendo les tresformaciones históriques del so xéneru.
Preténdese comprobar si l’alumnáu ye quien a definir o identificar los elementos que carautericen una producción artística y d’esplicar el procesu evolutivu de les formes lliteraries estudiaes.
14. Producir testos con intención lliteraria.
Trátase de valorar la capacidá de comprensión y d’esplicación de les esperiencies vitales propies al traviés del llinguaxe, imitando, adoptando y adaptando téuniques y modelos estilísticos o comunicativos yá analizaos.