Currículum de Llingua Asturiana y Lliteratura. Educación Primaria

Atrás    PDF   (ES)

BOPA N^u (...). (...).

Ente los oxetivos de la Educación Primaria, como estaya del desarrollu completu y armónicu de los aspeutos intelectuales, afeutivos y sociales de la persona, la educación llingüística tien un llugar cabezaleru. A lo llargo d'esta estaya los neños y neñes tienen d'entamar a adquirir un saber reflexivu sobre les práutiques comunicatives que faen falta pa vivir na sociedá del sieglu XXI.

Les árees llingüístiques son ámbitos privilexaos p'algamar esos cumales anque toles árees, al emplegar el llinguax como mediu de comunicación, adquisición y tresmisión del conocimientu, son responsables del desarrollu de la competencia en comunicación llingüística.

Deprender una llingua nun ye namás facer propiu un sistema de signos, sinón tamién los significaos culturales qu'éstos tresmiten y, con estos significaos, les maneres nes que les persones del entornu entienden ya interpreten la realidá. El llinguax contribúi d'esti mou a construir una representación del mundu socialmente compartida y comunicable ya la integración social y cultural de les persones.

La llingua forma parte del currículum d'Educación Primaria acordies colo afitao nel Estatutu d'Autonomía del Principáu d'Asturies, nel so artículu 4 diz que "El bable ha gociar de protección. Promoveráse'l so usu, el so esparcimientu nos medios de comunicación y el so enseñu, respetando en tou casu les variantes locales y la voluntariedá del so deprendimientu". La Llei 1/98 de 23 de marzu d'usu y promoción del Bable/Asturianu afita nel so artículu 10. El currículum: "Nel exerciciu de les 505 competencies, el Principáu d'Asturies ha garantizar I'enseñu del bable/asturianu en tolos niveles y graos, respetando sicasí la voluntariedá del so aprendimientu".

L'aprendimientu de la Llingua Asturiana permite'l desarrollu de la competencia llingüística del alumnáu de Primaria al posibilitar escoyer d'un mou consciente la llingua o la variante na que quier espresase, sintiéndose igualmente capaz de facelo en caúna d'elles. Asina mesmo, l'área de Llingua Asturiana contribúi al desarrollu de los oxetivos de la estaya al facilitar que los neños y neñes conozan y valoren el patrimoniu llingüísticu y cultural del Principáu d'Asturies, y tamién respeten los valores interculturales como'l pluralismu, la tolerancia y el diálogu, que contribúin a la construcción de la so identidá personal y coleutiva como ciudadanos y ciudadanes d'Europa.

El Conseyu d'Europa nel Marcu común européu de referencia pa les llingües: aprendimientu, enseñanza, evaluación, afita les llinies tanto pal deprendimientu de les llingües como pa la valoración de la competencia nes diferentes llingües del falante. Estes pautes foron un referente perimportante pa la ellaboración d'esti currículu.

El Marcu común européu conseña les diferentes etapes nel desarrollu de la competencia comunicativa nuna llingua determinada, en función de la capacidá del alumnáu pa facer un conxuntu de xeres comunicatives que desixen aiciones pal cumplimientu d'una finalidá comunicativa concreta nun contestu específicu. Una actividá comunicativa concreta necesita del usu del llinguax oral y escritu, asina como l'usu de recursos y estratexes de comunicación, llingüístiques y non llingüístiques, afayaes al contestu nel que tien llugar.

Asina l'enseñu y l'aprendimientu nesti área tien Como oxetivu'l desarrollu de les habilidaes llingüístiques: falar, escuchar y charrar, lleer y escribir en llingua asturiana, Conociendo y respetando les 505 variantes. Asina mesmo, y de mou específicu, quier averar a 105 neños y les neñes a la llectura y comprensión de testos lliterarios, y qu'entamen cola reflexón sobre l'usu normal de la Ilingua, pa que seyan a pescanciar que la llingua ye un mediu p'averase al patrimoniu cultural asturianu, y tamién una amuesa de la so riqueza y diversidá.

Los conteníos del área de Llingua Asturiana preséntense xuntos en cinco bloques:

El bloque 1, escuchar, falar, charrar, con especial procuru na llingua oral como encontu pa toa mena de xeres comunicatives, orales y escrites, reales o simulaes nes qu'entren tolos rexistros y variantes.

El segundu bloque, lleer y escribir, quier desarrollar y afitar la comprensión de testos escritos p'algamar un dominiu instrumental de la llectura y la escritura y entamar cola apropiación y producción de testos más ricos y abegosos cada vuelta.

El tercer bloque, la educación lliteraria, quier afondar na llectura personal, la interpretación y el disfrute de les manifestaciones más cencielles de la lliteratura asturiana al tiempu que propón les estratexes pa la recreación de testos lliterarios orales y escritos a partir del contautu llúdicu colos mesmos.

El bloque 4, conocimientu de la llingua, parte d'una reflexón empobinada al funcionamientu de la llingua asturiana en situaciones de comunicación, faciendo propios d'un mou progresivu les regularidaes estructurales, usándoles d'un mou consciente na meyora de les producciones orales y escrites.

Nel bloque 5, aspeutos socioculturales, recuéyense los conteníos venceyaos a la valoración del patrimoniu cultural y llingüístícu del Principáu d'Asturies y el desarrollu d'actitúes positives hacia la llingua asturiana y el respetu a la pluralidá y riqueza de les sos variantes.

Tien de conseñase pa finar, qu'esti currículum tien en cuenta delles realidaes llingüístiques y socioeducatives d'Asturies y permite, poro, una adautación a les necesidaes de la enseñanza del gallegu-asturianu na fastera onde s'asitia esta variedá llingüística. Pa ello, namás hai qu'entender "gallegu-asturianu" onde se refier esti documentu a "asturianu" o "llingua asturiana".

Contribución del área al desarrollu de les competencies básiques.

L'enseñu de la Llingua Asturiana na estaya d'Educación primaria contribúi al desarrollu de les competencies básiques y, sobremanera, al desarrollu de la comunicación llingüística, yá que l'aprendimientu y l'emplegu de la llingua asturiana da-y nueves perspeutives y matices qu'arriquecen esta competencia. El conocimientu de la llingua asturiana ufierta la posibilidá, al tratase d'una llingua ambiental, de comunicase darréu en contestos reales y funcionales de comunicación.

El llinguax ye'l principal vehículu del pensamientu humanu, la ferramienta más potente pa la interpretación y representación de la realidá y el preséu de deprendimientu más importante. D'ehí que l'área, na midida que contribúi a la meyora de la capacidá comunicativa global, fai lo mesmo cola competencia pa deprender a deprender, perfeicionando les habilidaes xenerales del alumnáu, facilitando'l desarrollu de los procesos sicolóxicos superiores y l'accesu al pensamientu formal.

L'aprendimientu de la llingua asturiana rentabilízase sobremanera al incluyir los conteníos rellacionaos con estratexes de compresión oral y escrita, y cola reflexón sobre'l propiu aprendimientu y los mecanismos d'usu de la llingua. Al tiempu, les decisiones que xenera esa reflexón favorecen l'autonomía y, nesi sen, pue afirmase que la llingua asturiana contribúi tamién al desarrollu de l'autonomía ya iniciativa personal. Al empar, la posibilidá de los falantes billingües d'emplegar dellos rexistros llingüísticos afayaos a la situación de comunicación o a los sos deseos, favorez esta competencia.

Estes competencies tán anguaño direutamente venceyaes cola competencia nel tratamientu de la información y competencia dixital. Les teunoloxíes de la información y la comunicación ufierten la posibilidá de comunicase en tiempu real con cualesquier parte del mundu, asina como la oportunidá d'entrar d'un mou cenciellu ya inmediatu na información en llingua asturiana presente en dellos medios de comunicación.

Esti área contribúi sobremanera al desarrollu de la competencia social y ciudadana. Les llingües, amás de vali-yos a los falantes pa comunicase socialmente en contestos estremaos, son ferramientes de comunicación y tresmisión cultural. Poro, esti área collabora tamién nel desarrollu de la competencia artística y cultural, yá que los modelos llingüísticos y lliterarios que s'usen tienen, pesie a les torgues propies de la estaya, un fuerte componente cultural. Deprender la llingua asturiana implica, tanto'l conocimientu d'una de les carauterístiques culturales que más rescamplen nel Principáu d'Asturies, como qu'esti aprendimientu, bien orientáu dende la escuela, camude tamién nel interés por conocer y valorar el patrimoniu y la diversidá llingüística y cultural de la nuestra tierra.

Orientaciones metodolóxiques.

Les llingües que s'enseñen y deprenden na Educación primaria comparten l'oxetivu xeneral de permitir que l'alumnáu algame una competencia plena na comunicación oral y escrita, como encontu p'afitar y desarrollar el pensamientu y como mediu de realización personal y social.

Como pa deprender una llingua s'aprovechen los conocimientos y les habilidaes algamaes n'otres llingües, y toes elles contribúin al desarrollu de les mesmes competencies básiques, ye perimportante un tratamientu curricular y didáutlcu integráu de les árees llingüístiques, que consiste n'armonizar los sos oxetivos y conteníos, plantegamientos metodolóxicos, terminoloxía llingüística, procedimientos ya instrumentos d'evaluación.

Un instrumentu afayadizu pa encariar d'un mou integráu l'enseñu de la llingua, pue ser el desarrollu de proyeutos llingüísticos de centru, nos que l'equipu docente estableza les actuaciones globales necesaries empobinaes al desarrollu, por parte de neños y neñes, del vezu de la llectura y les competencies llingüístiques básiques, tratamientu de la información y competencia dixital, y el "deprender a deprender". Pa ello, el profesoráu tien d'incluir nes programaciones de toles árees actuaciones que faigan por desarrollar les mentaes competencies y teneles en cuenta pa valorar lo que consiguió aprender .

Asitiar la llingua asturiana nel tarrén de los enfoques comunicativos de la enseñanza de les llingües propuesta poi Marcu européu de referencia, implica integrar el conocimientu formal ya instrumental del llinguax y centrase nel dominiu de les habilidaes de comunicación oral y escrita como mou d'algamar el dominiu de la competencia comunicativa del alumnáu.

Organizar les xeres de la das pa que tea acordies col enfoque comunicativu supón facer del aula un espaciu nel que l'oxetivu cimeru seya a desarrollar xeres significatives qu'impliquen l'usu de la llingua asturiana como vehículu real de comunicación.

L'aprendimientu va ser más significativu pa neños y neñes na midida que les propuestes didáutiques y la so presentación tean estructuraes al rodiu de temes rellacionaos con cuestiones del so interés: problemes reales, situaciones o vivencies cotidianes. Pue facilitase la interdisciplinaridá pente medies de la realización d'actividaes que tengan conexón con otres árees rellacionaes d'un mou más direutu cola cultura y la llingua asturiana, presentando materiales que motiven y resultes prestosos, algamando la integración y equilibriu de los conteníos que tienen de llegar a toles capacidaes que s'enuncien nos oxetivos y criterios d'evaluación y cuntando con alternatives pal alumnáu qu'alcuentra más torgues poi aprendimientu.

El llinguax oral constitúyese nun elementu perimportante pal desarrollu del pensamientu y como puntu d'aniciu de la llingua escrita. El dominiu de la comprensión y la espresión oral va tener un llugar cabezaleru na planificación d'actividaes al traviés de la realización de meses redondes, alderiques y esposiciones del propiu alumnáu. Un ambiente en clase que favoreza les charres y el diálogu, amestando y equilibrando les manifestaciones espontánees con otres nes que predomine la esposición organizada d'idees, deprendiendo a escuchar respetando al restu, va ayudar a los neños y neñes a comunicase con mayor correición cola xente de la so edá.

L'usu de los testos de tradición oral como una actividá de xuegu (cosadielles, xuegos de pallabres, cuentos, refranes, poemes y lleendes) va desarrollar la capacidá espresiva favoreciendo la discriminación fonética y la meyora de l'articulación, pronunciación y entonación.

La llectura y escritura desixe un enseñu sistemáticu, planificáu y empobináu a la creación de situaciones de comunicación nes que l'alumnáu alcuentre un sentíu al esfuerciu que fai, nun contestu que faiga interesante y necesario l'usu del llinguax escritu. Esti aprendimientu va entamar d'un mou paralelu a les habilidaes de comunicación oral, rellacionaes coles sos esperiencies, y que va trabayar pasu ente pasu y cola fondura que permita'l desarrollu evolutivu y los conocimientos previos del alumnáu.

L'adquisición del vezu llector ye ún de los oxetivos cimeros de la estaya, básicu pal desarrollu de l'autonomía nel procesu d'enseñu-aprendimientu. Va favorecese l'averamientu a la llectura como una esperiencia prestosa, como mediu d'entretenimientu y diversión y al tiempu ferramienta de formación ya información sobre los temes d'interés del alumnáu o sobre los que ta trabayando en clas. Pa xenerar nuevos vezos llectores ye fundamental da-y continuidá a les actividaes de llectura nel entornu cercanu, poro, la escuela fomentará y favorecerá, na midida que pueda, la collaboración de les families.

Lleer pa deprender significa usar les estratexes llectores que meyor s'afayen a les xeres d'aprendimientu, en función de les carauterístiques de cada situación y cada materia. Promover, poro, l'adquisición pasu ente pasu de téuniques que faciliten la llectura comprensiva ye perimportante pa ufierta-yos a los neños y neñes una de les ferramientes básiques pa llegar a un deprendimientu autónomu.

La producción de testos escritos va tar motivada poles esperiencies llectores prestoses y va necesitar que'l profesoráu ellabore estratexes variaes como'l xuegu de pallabres, la escritura de testos coleutivos, los cuentos llibres o suxeríos, l'ampliación, resume o tresformación de testos, etc. Van planificase los escritos na clas d'un mou individual o coleutivu, con ayuda del maestru o maestra, usando modelos, acostumando a los neños y neñes a revisar los propios testos. Esta práutica, tanto individual como coleutiva, ye imprescindible pa correxir y meyorar les producciones propies y l'intercambiu comunicativu.

Asoleyar los testos ellaboraos polos neños y neñes ye una motivación pa qu'espresen les sos idees y vivencies y descubran que la comunicación ye, en resultes, l'oxetivu cimeru de la espresión escrita. La biblioteca d'aula y escuela, los cartelos, el periódicu escolar, la creación guiada de páxines web, el corréu escolar, puen ser medios que faciliten esta xera.

Pue ser mui positivo dedicar un espaciu del aula pa una pequeña biblioteca, y pa otros recursos didáuticos como ficheros de vocabulariu y ortografía, xuegos, ordenador, material audiovisual, etc. Asina mesmo, tienen d'aprovechase tolos recursos y posibilidaes que, dientro la escuela y fuera d'ella, puedan valinos: contar con otres persones de la comunidá pa facer delles actividaes, programar animaciones, llectures dramatizaes o dramatizaciones feches por otros compañeros del centru, personal non docente, padres, xente del barriu, etc.

La biblioteca escolar, camentada como centru de recursos bibliográficos y multimedia, amuésase como un espaciu especialmente importante pal desarrollu del vezu llector y la competencia comunicativa que favorez el procesu d'enseñu-aprendimientu. Pa ello tienen d'aprovechase los recursos de la biblioteca del centru, que los neños y neñes tienen de conocer y usar de mou progresivu y autónomu.

Les teunoloxíes de la información y la comunicación (prensa, radio, televisión, anuncies, cartelos, internet, teléfonos móviles...) preséntense como poderoses ferramientes que faciliten l'aprendimientu, poro, entamar col descubrimientu de les posibilidaes comunicatives y espresives del alumnáu, averándolu al usu críticu de los mesmos, tien de ser una prioridá.

Al ser un área opcional y dada la desigual distribución xeográfica de la población que tien l'asturianu bien como una llingua materna, bien como llingua ambiental, les situaciones coles qu'entama l'alumnáu no que cinca al conocimientu de la lliteratura y llingua asturiana (dende quien conoz la llingua asturiana hasta quien s'avera a ella por primer vegada) son tan estremaes qu'aconseyen partir d'un fondu analís que tenga en cuenta los conocimientos y esperiencies anteriores del alumnáu. La organización de los bloques de conteníu permite que los conteníos del área centraos na comunicación oral y escrita, puedan trabayase en cualesquier estaya educativa, garantizando asina'l so tratamientu gradual, cíclicu y sistemáticu a lo llargo tola etapa, dando rempuesta asina a les dixebraes situaciones de les que parte l'alumnáu.

Ye importante tener en cuenta que deprender una llingua ye deprender a usala, y que nesti usu tien un papel mui señaláu la efectividá y la motivación. Les carauterístiques de la situación del asturianu, reclamen un especial curiáu de los aspeutos, que puedan reforciar la motivación del alumnáu pal aprendimientu, al tratase d'un área opcional. Poro, ye importante que los primeros contautos cola llingua seyan prestosos pal alumnáu pa contribuir a afitar los encontes que fomenten el deséu de siguir deprendiendo. Usaráse la llingua asturiana en contestos y pente medies d'esperiencies y xeres que se correspuendan colos petites y motivaciones del alumnáu, favoreciendo la so espresión oral y escrita, ya inxertando la llingua n'esperiencies comunicatives nes que puea vese la so funcionalidá.

Xenerando nel aula un ambiente comunicativu relaxáu, ufiertando modelos llingüísticos afayadizos, un apoyu contestual bayurosu y refuerzos positivos que pongan especial procuru nos llogros de neños y neñes, pente medies d'actividaes de calter llúdicu como xuegos, cantares, creaciones plástiques o dramatizaciones, testos de creación llibre, o la realización de pequeñes xeres o proyeutos, nes que l'usu de la llingua tenga llugar d'un mou indireutu, natural ya insconsciente, tarán poniéndose en marcha los procesos que faciliten l'adquisición de la llingua.

Oxetivos.

La enseñanza de la Llingua asturiana nesta esta ya va tener como oxetivu'l desarrollu de les siguientes capacidaes:

1. Algamar la competencia comunicativa oral y escrita bastante pa desenvolver n'asturianu les situaciones de comunicación que se dan davezu nel entornu del alumnáu.

2. Cooperar nel desarrollu de les interacciones comunicatives respetando los sentimientos, idees, opiniones y conocimientos de los demás, asina como los sos usos llingüísticos concretos.

3. Espresase con correición oralmente y per escrito curiando los aspeutos normativos de la llingua y usándola correutamente pa buscar, recoyer y procesar información.

4. Consiguir vezos llectores y avanzar pasu ente pasu na comprensión del testu escritu nos sos aspeutos lliterarios, d'información y aprendimientu.

5. Usar la llectura como fonte de placer y arriquecimientu personal, y averase a obres importantes de la tradición lliteraria pa desarrollar vezos de llectura y entamar col conocimientu de les convenciones especifiques del llinguax lliterariu.

6. Usar los medios de comunicación social y les teunoloxíes de la información y la comunicación, pa llograr, interpretar y valorar informaciones y opiniones dixebraes, y como instrumentu de meyora del aprendimientu y de les habilidaes sociales.

7. Buscar les posibilidaes espresives orales y escrites de la llingua asturiana pa desarrollar la sensibilidá estética, alcontrando caminos de comunicación creativos nel usu autónomu y personal del llinguax.

8. Aniciar la reflexón progresiva sobre los usos, estructures básiques y funcionamientu de la llingua afitando les rellaciones ente los aspeutos formales y los contestos ya intenciones comunicatives a les que respuenden pa meyorar l'usu personal del llinguaxe.

9. Valorar la llingua asturiana como mediu de comunicación y reconocer, apreciar y valorar positivamente la diversidá llingüística d'Asturies como un elementu cultural arriquecedor.

10. Descubrir nel llinguax un mediu pa conocer el patrimoniu cultural propiu y d'apertura y descubrimientu d'otres realidaes y cultures.

11. Reflexonar sobre la bayura d'usos sociales de les llingües pa evitar los estereotipos llingüísticos que suponen xuicios de valor y prexuicios clasicistes, racistes, sexistes y xenófobos.

Bloque 1. Falar, charrar y escuchar.

• Comprensión y espresión de mensaxes orales cenciellos de carauterístiques xebraes onde s'usen articuladamente sistemes de comunicación verbal y non verbal y nos que predominen la repetición y la ordenación lóxica de secuencies (saludos, fórmules de cortesía).

• Adquisición del vocabulariu nel nivel léxicu-referencial más cercanu y motivador pal alumnáu (nomes de persona, rellaciones de parentescu y amistá, l'entornu natural, el tiempu, les partes del día, les estaciones).

• Usu de les estructures llingüístiques básiques pa resolver oralmente les situaciones de comunicación que davezu se dan nes interacciones del alumnáu.

• Intercambios informativos dixebraos, curtios y cenciellos qu'usen la narración y la descripción pa la llocalización de persones, fechos y coses.

• Identificación, reconocimientu y usu de loS soníos, ritmos y entonaciones carauterístiques de la llingua asturiana en cualesquier de les sos variantes.

• Disposición favoratible a espresase oralmente en llingua asturiana ya interés por participar davezu n'actividaes comunicatives respetando'l turnu de pallabra, curiando la intervención y el pieslle.

• Avezase a sentir con procuru na escucha de los demás, interesándose polos sos gustos, opiniones y conocimientos.

Bloque 2. Lleer y escribir.

• Comprensión d'información xeneral y xebrada de testos cenciellos que vengan del entornu inmediatu.

• Vocabulariu y estructures llingüístiques básiques pa resolver per escrito situaciones comunicatives cencielles.

• Esploración y apropiación del significáu de les pallabres n'asturianu pasando del vocabulariu visual al descriptivu y entamando a remanar los diccionarios.

• Llectura (tamién n'alto) de testos curtios y significativos, entendiendo'l so sentíu global (cola ayuda de la llectura d'imáxenes y de los marcadores testuales) y comprendiendo aspeutos significativos.

• Usu dirixíu de la biblioteca y de les teunoloxíes de la información y comunicación.

• Composición llibre o dirixida de frases y testos curtios sobre vivencies, intereses personales y otros tipos de temes trabayaos.

• Gustu por espresase per escrito en llingua asturiana.

• Procuru na presentación, orde y llimpieza de los testos escritos propios, ayudándose no posible de los procesadores de testos.

Bloque 3. Educación lliteraria.

• Escucha activa y reproducción comprensiva de cantares, pequeños poemes y cuentos tradicionales o que venga de la creación lliteraria d'anguaño: cuentos, lleendes, poemes, xuegos de pallabres, cosadielles...

• Llectura guiada de retayos o testos completos que seyan afayadizos pa la so edá.

• Sentir y lleer de mou creativu testos, anticipando soluciones personales a situaciones emotives, avanzando hipótesis a les actuaciones de los personaxes o imaxinando soluciones dixebraes.

• Comentarios orales, individuales o coleutivos, empobinaos a los aspeutos concretos de determinaos testos, poniendo procuru nos personaxes principales asina como nel entamu, desarrollu y final de delles actuaciones.

• Interés por sentir y lleer testos lliterarios y disposición a espresar opiniones sobre l'audición y llectura.

• Valoración del patrimoniu lliterariu de tradición oral.

• Dramatización de testos adautaos a la edá y carauterístiques del alumnáu.

• Usu dirixíu de les biblioteques como fonte d'estímulos lliterarios.

Bloque 4. Conocimientu de la llingua.

• Conocimientu de la correspondencia ente fonemes y grafíes del abecedariu asturianu.

• Discriminación perceutivu-auditiva de pallabres, sílabes y soníos na secuencia falada y la so correspondencia visual na secuencia escrita.

• Interés por reproducir correutamente los fonemes más carauterísticos de la llingua asturiana.

• Respetu ya interés pola aplicación de les normes d'ortografía natural y desarrollu del vezu de consultar la escritura de pallabres nueves, difíciles o duldoses.

• Xuntura de les families de pallabres más usaes: la familia, la casa, los animales, les plantes, el tiempu atmosféricu, los xuegos.

• Usu de los términos que permiten referise a delles regularidaes de la llingua como orde de les pallabres, nomes propios y comunes, xéneru masculín y femenín, el númberu singular y plural y el papel del verbu.

Bloque 5. Aspeutos socioculturales.

• Espresiones mímiques, xestos de complicidá y ciñu nes rellaciones cotidianes.

• Reproducción de los xiros, llocuciones, frases feches y refranes más conocíos y carauterísticos.

• Interés por conocer los velos y costumes asturianes y por participar nelles al traviés de la práutica de xuegos infantiles afayaos a la edá, nos que rescamplen la repetición de pallabres, aiciones y xestos.

• Actitú receutiva hacia les persones que falen asturianu nel entornu y en cualesquier de les sos variantes.

Criterios d'evaluación.

1. Participar d'un mou activu nos intercambios comunicativos espontáneos o planificaos dientro l'aula.

Con esti criteriu quier valorase la capacidá pa participar n'intercambios comunicativos orales colos interllocuciones habituales sobre temes conocíos, rellacionaos coles necesidaes de comunicación inmediata, usando correutamente les formes básiques d'interaición social. Pa ello, va valorase si'l neñu o la neña ye a:

• Caltener el contautu ocular;
• Controlar el tonu de voz y los biecos; saludar y despidise;
• Retrucar a entrugues cencielles;
• Intercambiar informaciones breves y cencielles;
• Intervenir correutamente axustándose al tema del que se fala;
• Sentir y respetar les opiniones de les y los demás.

2. Entender el sentíu global de testos orales qu'use davezu nel so entornu ya identificar la información más relevante.

Con esti criteriu va valorase la capacidá pa sacar información importante d'intervenciones curties d'otres persones rellacionaes coles actividaes cotidianes. Nesti sen, los neños y les neñes serán a:

• Espresar la idea global de testos orales;
• Identificar y recordar dalgunes pallabres clave;
• Retrucar a entrugues que cinquen a los detalles más relevantes;
• Tresformar n'aiciones mensaxes cencielles.

3. Espresase oralmente al traviés d'intervenciones que presenten de mou organizáu techos y vivencies.

Pente medies d'esti criteriu va evaluase la capacidá pa comunicar en pequeñes esposiciones orales, con ayuda de los adultos, techos y vivencies a otres persones, valorando si'l neñu o la neña ye a:

• Espresase con traza emplegando los elementos non verbales (xestualidá y modulación de la voz);
• ellatar fechos n'orde cronolóxicu;
• Conseñar dalgunos de los fechos más importantes d'aiciones siguiendo un orde lóxicu, refiriéndose a los participantes o llugares ya indicando la so intervención nos fechos;
• Retrucar con xeitu y precisión a cuestiones cencielles sobre l'entornu más cercanu;
• Comentar si pescancia o non pescancia daqué;
• Espresar impresiones, sentimientos o vivencies propies.

4. Entender el sentíu global de los testos escritos que s'usen davezu y dar cola información más significativa.

Cola aplicación d'esti criteriu va comprobase si'l llector o llectora pue, con ayuda de les ilustraciones, de los marcadores testuales, de los colores y, si fai falta, les indicaciones de los adultos, algamar información global y sacar información mui significativa de pequeños testos escritos habituales nel so entornu (avisos, anuncies, pequeñes informaciones o testos escolares). Aplicando esti criteriu, los neños y les neñes serán a:

• Identificar la idea global ente del les propuestes;
• Llocalizar informaciones esplícites pa retrucar a les entrugues concretes y direutes;
• Esplicar detalles mui relevantes.

5. Escribir por sigo mesmu o a suxerencia de los demás, pequeños testos con un envís determináu.

Con esti criteriu trátase d'evaluar la capacidá pa escribir o reescribir, cola collaboración d'otres persones y l'ayuda de modelos, series de pallabres, frases y pequeños testos, pa sigo mesmu o pa otros, con un fin comunicativu: llistes, avisos, notes, postales o felicitaciones. Va valorase si'l neñu o la neña ye a:

• Escribir d'un mou claru y lexible;
• Apuntar lo previsto con orde;
• Espresar cada idea con una frase;
• Emplegar con soltura la ortograña natural.

6. Sentir y lleer testos lliterarios de la tradición oral y de la lliteratura infantil afayaos al ciclu y emplegalos como modelu pa componer testos mui cenciellos pa espresar petites, vivencies personales o les coses nueves que-yos pasen a los personaxes conocíos.

Con esti criteriu trátase d'evaluar la capacidá pa sentir y lleer testos lliterarios de tradición oral asturiana y lliteratura infantil, afayaos al ciclu (cantares, refranes, cosadielles, xuegos llingüísticos...). Asina mesmo quier valorase la escritura de pequeños testos con intención creativa nos que s'espresen petites y vivencies personales, a partir de modelos daos, y cola ayuda necesaria. Pa ello, va valorase si'l neñu o la neña ye a:

• Lleer colos sofitos necesarios testos lliterarios disponibles na biblioteca del aula o del centru;
• Siguir hasta'l final una pequeña historia oral o escrita;
• Reconocer dalgunos recursos lliterarios mui cenciellos como la rima;
• Garrar y espresar la idea xeneral de la historia;
• Identificar y emplegar elementos d'estructures narratives mui cencielles como l'entamu de l'aición, ónde se desarrolla y cómo fina;
• Reconocer cómo son los personaxes principales;
• Parafrasiar un pequeñu testu;
• Usar un modelu dau pa cuntar un fechu diferente;
• Combinar pallabres, enternecer frases y facer los axustes que faiga falta.

7. Reproducir y representar pequeños testos.

Con esti criteriu evalúase la capacidá del alumnáu pa imitar patrones vocálicos, col ritmu, pronunciación y entonación afayadizos, pente medies de la reproducción comprensiva de pequeños xuegos verbales del patrimoniu y la tradición oral, la escenificación de pequeñes producciones o la Ilectura de testos curtios y cenciellos rellacionaos con situaciones de comunicación. Pa ello, va valorase si'l neñu o la neña ye a:

• Pronunciar correutamente los fonemes propios del asturianu;
• Lleer en voz alta pequeños testos mui significativos cola entonación y pauses que faigan falta;
• Reproducir el patrón de ritmu y entonación del modelu.

8. Identificar de forma guiada dellos cambios que dan nes pallabres y usar términos gramaticales básicos pa falar con ellos.

Con esti criteriu trátase de valorar la capacidá pa refacer oralmente o per escrito y con ayuda del profesoráu pallabres, frases contestualizaes o testos curtios, estableciendo les concordancies ente'l nome colos demás elementos de la oración y emplegando los términos gramaticales afayadizos pa desplicar los axustes que se faigan. Pa ello, va valorase si'l neñu o la neña ye a:

• Reconocer les unidaes delllinguax (pallabres, sílabes y fonemes);
• Dixebrar les pallabres dientro la frase;
• Dividir en sílabes pallabres cencielles que tengan sílabes direutes o inverses;
• Ordenar alfabéticamente, aisllando'l primer fonema;
• Separtar pente medies de puntos les frases del testu, identificándoles como unidaes de sentíu;
• Ver y reconocer de forma guiada los efeutos que producen en pallabres y frases los cambios nel orde, les segmentaciones, les supresiones y les inserciones;
• Reformular oralmente o per escrito pallabres en frases contestualizaes; establecer les concordancies que faigan falta ente'l nome y los demás elementos de la oración;
• Emplegar los términos gramaticales básicos nes actividaes que se faen na clas (denomaciones de los testos, enunciáu, pallabra y sílaba; nome común y nome propiu; singular y plural; masculín y femenín).

9. Reconocer y valorar positivamente la diversidá Ilingüística que los arrodia.

Al traviés d'esti criteriu va evaluase la capacidá pa identificar la esistencia de, a lo menos, dos códigos llingüísticos nel so ambiente más cercanu, valorando que'l neñu ola neñaseya:

• Reconocer en qué códigu se comuniquen dos interllocutores;
• Espresar nún d'ellos, a escoyer, conteníos paecíos sobre sigo mesmu, los sos estaos d'ánímu, gustos y preterencies; 
• Reconocer les tradiciones propies del entornu llíngüísticu y cultural; amosar curiosidá y respetu pa los que quieren falar otres llingües o delles variantes de la llingua asturiana.

Bloque 1. Escuchar, falar y charrar.

• Comprensión y espresión de mensaxes orales con delles intenciones comunicatives nos que s'amuese la opinión, la necesidá, la solicitú d'información, l'agradecimientu, el pidir escuses, l'alcuerdu o non alcuerdu, el contentu o descontentu.

• Adquisición y emplegu del vocabulariu nel nivel léxicu-referencial necesariu pa comunicase n'avezaos contestos temáticos: la escuela, la casa, la comida, el vistir, la salú, el consumu, les persones diferentes, l'esparcimientu.

• Comprensión y producción de mensaxes qu'usen d'un mou articuláu sistemes de comunicación verbal y non verbal, pente medies de la dramatización de producciones propies y testos orales adautaos a la edá.

• Usu de dellos intercambios informativos nos que s’usen la narración, la descripción y el diálogu, espresando la opinión propia y respetando l’ayena.

• Identificación, comprensión y usu de les estructures de dellos tipos de testos orales pa entamar cola esposición y argumentación de conocimientos, idees, pensamientos y deseos.

• Identificación, comprensión y usu de les estratexes verbales y non verbales que meyoren la comunicación (la escucha activa, les diferencies d'entonación, la paráfrasis, la mímica y los xestos) al interesase polos gustos, opiniones y conocimientu de los demás.

• Interés por participar n'actividaes comunicatives de más persones y disposición favoratible a superar les torgues que puean surdir na comunicación, respetando les riegles básiques de la interacción oral y los conocimientos, opiniones y esperiencies de los demás.

• Valoración de la llingua asturiana como instrumentu pa comunicase oralmente en cualesquier de les sos variantes.

Bloque 2. Lleer y escribir.

• Comprensión y espresión de mensaxes escritos con distinta intención comunicativa nos que se manifiesten los conocimientos, les esperiencies, la opinión y les necesidaes.

• Vocabulariu y estructures llingüístiques necesaries pa espresar per escrito conocimientos, idees, esperiencies, sentimientos y petites.

• Apropiación del significáu de les pallabres remanando dellos tipos de diccionarios pa escoyer l'aceición más afayadiza al contestu.

• Práutica de la llectura personal de testos completos adautaos a la edá y llectura n'alto de testos curtios y prestosos, con entonación afayada al contestu y pronunciación clara y correuta; como fonte de gustu y conocimientu.

• Comprensión del sentíu global de dellos testos, identificando les idees principales.

• Usu guiáu de la biblioteca y de les teunoloxíes de la información y comunicación.

• Estratexes y normes pa la composición llibre o dirixida, amás del emplegu de medios informáticos, de testos curtios con dellos fines comunicativos: murales, cartelos publicitarios, prensa escolar ya tebeos.

• Procuru por espresase per escrito en llingua asturiana.

• Procuru na presentación de los testos escritos propios, col sofitu de medios informáticos pa meyorar tanto los aspeutos formales como'l conteníu.

• Gustu pola calidá de los testos propios y ayenos como mediu p'asegurar la comunicación suelta y clara.

Bloque 3. Educación lliteraria.

• Audición y reproducción de cuentos, cantares y pequeños poemes, tradicionales o resultáu de la creación lliteraria d'anguaño.

• Llectura d'obres completes o retayos en prosa o en versu, adautaes a la edá ya intereses del alumnáu.

• Llectura creativa de testos, en prosa o versu, anticipando soluciones personales o situaciones emotives, avanzando hipótesis d'actuaciones de los personaxes o maxinando dixebraos finales.

• Desplicaciones guiaes de testos lliterarios con especial procuru na diversidá de personaxes, la bayura de llugares onde se desarrollen les aiciones, los detalles, motivaciones y consecuencies d'éstes.

• Procuru por espresar les impresiones producíes pola audición o llectura de testos lliterarios.

• Interés por esplorar les posibilidaes espresives de la llingua asturiana en composiciones llibres o dirixíes, col emplegu de medios informáticos y de pequeños testos con envís lliterariu.

• Gustu pola calidá de los testos lliterarios propios y ayenos.

• Usu guiáu de les biblioteques como fonte d'estímulos lliterarios.

Bloque 4. Conocimientu de la llingua.

• Correspondencia ente la llingua oral y la escrita: les xuntures fonétiques y la so representación gráfica.

• Separtación perceutivu-auditiva de les pallabres, sílabes tóniques y átones, y soníos na secuencia talada.

• Comparación de los soníos, ritmos y entonaciones carauterísticos de la llingua asturiana colos de les otres llingües que s'estudien nel centru ya interés por reproducir correutamente los fonemes más carauterísticos de la llingua asturiana.

• Respetu ya interés pala aplicación de les regles ortográfiques básiques de la llingua y desarrollu del vezu de consultar la escritura de pallabres nueves, difíciles o duldoses.

• Usu de les estratexes básiques de comunicación pa l'ampliación del vocabulariu y la resolución de duldes: comprobación del significáu d'una pallabra en dixebraos contestos, usu de sinónimos, antónimos y pallabres polisémiques, ...

• Contestualización del significáu de les pallabres y formación de les families de pallabres propies de los ámbitos d'interaición del alumnáu.

• Manexu de los términos que faen falta pa poder falar del grupu nominal, el verbu y les sos variantes, asina como les regularidaes morfolóxiques, sintáutiques y ortográfiques que permiten espresar la posesión, la llocalización, la cantidá, les cualidaes y la so comparación.

• Ellaboracián d'hipótesis p'afitar les riegles que despliquen les variaciones de xéneru, númberu, les concordancies, ...

Bloque 5. Aspeutos socioculturales.

• Entonación, mímica y biecos de complicidá y afeutu qu'acompañen a la espresión oral n'asturianu.

• Reproducción y desplicación de xiros, llocuciones, frases feches y refranes más conocíos.

• Reconocimientu de los velos y les celebraciones rellacionaes coles costumes asturianes nes qu'apaeza la llingua.

• Curiosidá por conocer los aspeutos más relevantes de la cultura asturiana ya interés por atropar y compartir materiales llingüísticu-culturales que vengan del rodiu cercanu.

• Interés por comunicase coles persones que falen n'asturianu en cualesquiera de les sos variantes.

• Valoración positiva de la diversidá llingüística y cultural d'Asturies y del restu de comunidaes autónomes como elementos arriquecedores.

Criterios d'evaluación.

1. Participar activamente n'intercambios comunicativos espontáneos o planificaos dientro y fuera del aula.

Pente medies d'esti criteriu, trátase d'evaluar en situaciones de comunicación reales o simulaes el dominiu de les distintes habilidaes qu'intervienen nos intercambios orales con un receutor presente o distante. N'ámbitos diferentes como les xeres cotidianes de la clas, les salíes y xeres fuera de la clas, va valorase si'l neñu o la neña ye a:

• Caltener el contautu visual y auditivu col receutor;
• Amestar el tonu de voz y los becos;
• Usar d'un mou afayadizu les formes que se dan davezu d'interaición social;
• Intervenir correutamente y con traza respetando les normes básiques de los intercambios comunicativos;
• Cntrase nel tema ;
• Respetar les opiniones de les y los demás;
• Comentar lo que sabe o pue facer.

2. Pescanciar el sentíu global, les idees principales y los detalles relevantes de testos orales qu'usen davezu.

Con esti criteriu trátase d'evaluar si'l neñu o la neña tien la información verbal y non verbal de del les fontes orales (que vienen del aula, del entornu familiar o de dellos medios de comunicación) y si dixebra la información relevante de la non relevante pa un oxetivu determináu. Pa ello, va valorase si'l neñu o la neña son a:

• Espresar la idea global d'un testu oral;
• Señalar delles de les idees principales del testu;
• Identificar les pallabres clave;
• Dixebrar los fechos fundamentales de los detalles;
• Siguir instrucciones pa facer una xera cenciella;
• Facer entrugues afayadices pa solicitar desplicaciones o aclaraciones.

3. Espresase oralmente pente medies de discursos que presenten d'un mou organizáu techos y vivencies.

Con esti criteriu evaluase la capacidá pa comunicar oralmente fechos y vivencies a otres persones en pequeñes esposiciones que tean preparaes primero con ayuda d'adultos, espresándose de forma clara y concreta acordies cola situación de comunicación y usando'l léxicu, les fórmules llingüístiques, la entonación y la pronunciación afayadices. Nesti casu, va valorase si'l neñu o la neña ye a:

• Emplegar los marcadores habituales d'aniciu y fin;
• Inxertar nel discursu los elementos non verbales que faigan falta (biecos, modulación de la voz, posición del cuerpu);
• Ordenar lóxicamente y rellacionar los fechos; venceyar les causes y les consecuencies;
• Describir actos y vivencies y les sensaciones que-yos producen.

4. Entender la idea xeneral y dellos rasgos esenciales d'un testu escritu y facer inferencies direutes dende'l mesmu.

Con esti criteriu va evaluase la capacidá del alumnáu pa llegar a la información relevante de diferentes testos escritos (anuncies publicitaries, titulares y noticies periodístiques, enciclopedies, producciones multimedia, programes d'actividaes culturales y deportives) cola ayuda de los gráficos, de la tipografía y de los marcadores testuales. Va valorase si'l neñu o neña ye a:

• Espresar la idea xeneral del testu ;
• Identificar otres idees importantes y presentales con orde;
• Dar coles informaciones concretes;
• Sorrayar les pallabres más importantes d'un párrafu;
• Facer inferencies direutes;
• Atalantar el significáu de delles pallabres pol contestu;
• Facer un resume del testu.

5. Escribir, con o ensin ayuda de medios informáticos, testos curtios y con xacíu con dixebraes finalidaes comunicatives:

Con esti criteriu trátase d'evaluar la capacidá pa ellaborar pequeños testos, pa ún mesmu o pa los demás, con una enclín comunicativu: espresar un deséu o vivencia personal, tresmitir conocimientos o xustificar opiniones. Buscando les ayudes que faigan falta pa escribir cartes familiares, facer pequeños informes y redactar anuncies, los neños y les neñes serán a:

• Escoyer el modelu afayadizu pal so envís comunicativu;
• Escribir d'un mou claru y entendible;
• Esponer llinialmente los fechos;
• Xuntar les frases de manera correuta;
• Emplegar les principales riegles ortográfiques.

6. Conocer testos lliterarios que seyan de lliteratura infantil de tradición oral o escrita adautaos al ciclu col oxetivu d'animar a la llectura y la reescritura de los mesmos o d'emplegalos pa la espresión de les querencies y vivencies personales.

Con esti criteriu preténdese evaluar la capacidá de disfrutar autónomamente de la llectura de los testos lliterarios de la tradición oral asturiana y de la lliteratura infantil adautaos a la edá y los petites del alumnáu y de valorar el conocimientu y l'usu perbásicu de delles convenciones del llinguax lliterariu. Pa ello, va valorase si'l neñu o neña ye a:

• Lleer d'un mou sistemáticu testos lliterarios adautaos de manera más autónoma;
• Siguir la llinia argumental d'una historia;
• Pescanciar la idea xeneral y dixebrala de los detalles;
• Atalantar si ye un testu en prosa o en versu;
• Dixebrar los personaxes principales y secundarios;
• Desplicar detalles de l'aición y los elementos que lleven al desenllaz;
• Entamar cola ellaboración de pequeños resúmenes, anque copie parte del testu;
• Escribir un cuentu sobre un modelu concretu, maxinando otros posibles personaxes, delles motivaciones, actuaciones o desenllaces;
• Escribir un testu pequeñu de forma creativa pa espresar petites o vivencies personales.

7. Interpretar testos curtios y significativos.

Con esti criteriu va evaluase la capacidá pa reproducir los patrones rítmicos y d'entonación carauterísticos de la llingua asturiana, y pa interpretar o dramatizar dempués del tiempu de preparación que faiga falta, pequeños xuegos verbales (xuegos de pallabres cenciellos, cosadielles), poemes que vengan de la tradición oral adautaos al ciclu o producciones propies. Pa ello, va valorase que’l neñu o neña seya a :

• Pronunciar los fonemes asturianos con claridá y caltener una dicción correuta;
• Reproducir cola voz pautes d'entonación y ritmu anteriormente trabayaes;
• Lleer en voz alta testos mui significativos cola entonación y pauses afayadices;
• Interpretar el testu y da-y, al tiempu, un ritmu personal al tiempu que lu avere al auditoriu;
• Coordinar les palabres, colos xestos y movimientos afayadizos.

8. Remanar intuitivamente les riegles gramaticales básiques del asturianu y usar los términos llingüísticos elementales pa falar con elles.

Con esti criteriu quier comprobase la capacidá del alumnáu pa identificar d'un mou guiáu dellos cambios que se producen nes pallabres y usar los términos llingüísticos y gramaticales elementales pa falar d'ellos, facer les concordancies y axustes que faigan falta ente los grupos nominales y verbales. Tanto na producción autónoma de testos orales o escritos como na reformulación de frases daes, va valorase si'l neñu o neña ye a:

• Cambiar el puntu de vista del observador u observadora (presente, pasáu o futuru), la persona que cuenta los fechos (primera, segunda o tercera del singular o del plural);
• Facer los axustes que faigan falta pa garantizar la correición gramatical al reordenar les pallabres;
• Ordenar alfabéticamente pallabres y buscar el so significáu nel diccionariu;
• Emplegar sinónimos pa evitar repeticiones;
• Usar antónimos pa sintetizar;
• Usar los términos gramaticales elementales pa falar sobre'l funcionamientu de la llingua y como apoyu pa reflexonar y esplicar los recursos qu'usa.

9. Reconocer y valorar positivamente la diversidá llingüística del entornu.

Pente medies d'esti criteriu va evaluase la capacidá pa identificar los dixebraos códigos llingüísticos y los sos correspondientes variantes nel entornu más cercanu, asina como la traza pa entender y espresar en caún d'ellos conteníos asemeyaos sobre sigo mesmu, los sos estaos d'ánimu, gustos y preferencies. Pa ello, va valorase si'l neñu o la neña ye a:

• Identificar qu'esisten polo menos dos códigos llingüísticos nel so entornu más cercanu;
• Espresar nún d'ellos, el que quiera, pero siendo consciente del qu'usa, conteníos paecíos sobre sigo mesmu, los sos estaos d'ánimu, gustos y preferencies;
• Reconocer les más importantes tradiciones propies del entornu llingüístícu y cultural;
• Reconocer les diferencies llingüístiques como un fechu cultural arriquecedor;
• Amosar respetu polos que falen una llingua o una variante llingüística diferente de la suya.

Bloque 1. Escuchar, falar y charrar.

• Comprensión y espresión de mensaxes orales con diferente intención comunicativa nos que s'amuese la opinión, la solicitú d'información, la ufierta o pidíu d'escusa, la necesidá, l'agradecimientu, l'alcuerdu o non alcuerdu, el gustu o disgustu, l'allegría, la tristura.

• Adquisición y emplegu sistemáticu del vocabulariu nel nivel léxicu- referencial afayadizu pa comunicase en dellos contestos temáticos habituales: la escuela, la vivienda, la comida, el vistir, la salú, el consumu, les persones diferentes, l'esparcimientu, los xuegos y deportes, los tresportes, los actos sociales, la llingua de la clas.

• Comprensión y producción de mensaxes qu'usen articuladamente sistemes de comunicación verbal y non verbal, asumiendo y carauterizando dellos roles.

• Dellos intercambios informativos nos que s'usen la narración, la descripción, el diálogu, la encuesta y la entrevista, espresando la opinión de so y respetando la ayena sobre cuentos, fechos cotidianos, acontecimientos, actividaes de xuegu.

• Identificación, comprensión y usu de les estratexes verbales y non verbales que meyoren la comunicación y el reconocimientu de les idees non esplícites: la escucha activa, les diferencies d'entonación, la paráfrasis, la vuelta a formular lo espresao, la xesticulación, la espresión facial y corporal.

• Realización d'esposiciones orales, charres y alderiques, en grupu pequeñu y grande, sobre temes daos o suxeríos, prestosos ya interesantes, emitiendo y respetando xuicios personales y les riegles básiques d'interaición oral.

• Interpretación crítica y constructiva de mensaxes non esplícitos en testos informativos y publicitarios.

• Interés por participar nos dixebraos foros de comunicación d'un mou receptivu, constructivu y respetuosu y disposición favoratible pa superar les torgues que puedan surdir na comunicación.

• Valoración de la llingua asturiana como instrumentu de comunicación y disposición favoratible a comunicase oralmente en cualesquiera de les variantes del asturianu davezu.

Bloque 2. Lleer y escribir.

• Comprensión y espresión de mensaxes escritos con distinta intención comunicativa nos que se manifiesten los conocimientos, esperiencies, opinión y necesidaes.

• Vocabulariu y estructures llingüístiques afayadices pa espresar per escrito conocimientos, idees, esperiencies, sentimientos y deseos, al traviés de dellos testos y tipos de discursu na comunicación escrita n'asturianu con dixebraes intenciones comunicatives (informar , convencer, conmover...).

• Apropiación del significáu de les pallabres remanando dellos tipos de diccionarios pa escoyer l'aceución más afayada alcontestu.

• Prauticar la llectura personal de testos variaos, diferenciando les idees principales de les secundaries y comprendiendo aspeutos específicos de los mesmos.

• Usu progresivu y autónomu de dellos tipos de testos escritos informativos o publicitarios, y refugar a los que tienen estereotipos discriminatorios o conteníos violentos.

• Interés por lleer y escribir en llingua asturiana en cualesquiera de les sos variantes.

• Procuru na presentación de los propios escritos, ayudándose de les teunoloxíes de la información y comunicación pa meyorar tanto los aspeutos formales como d'estructura y conteníu.

• Gustu pola calidá de los testos propios y ayenos como mediu p'asegurar una comunicación suelta y clara.

Bloque 3. Educación lliteraria.

• Sentir y reproducir testos significativos orales y escritos, tradicionales o resultáu de la creación lliteraria d'anguaño, que formen parte del patrimoniu lliterariu asturianu.

• Práutica de la llectura lliteraria autónoma de testos completos adautaos a la edá, como fonte de disfrute personal valorando les obres lliteraries escrites n'asturianu.

• Llectura creativa de testos, en prosa y versu, anticipando soluciones personales a situaciones emotives, sacando hipótesis d'actuaciones de los personaxes, valorando les motivaciones y consecuencies de les mesmes, y maxinando nueves soluciones pa los problemes presentaos.

• Desplicaciones y comentarios dirixíos de testos lliterarios en dellos soportes, poniendo especial procuru na forma na que los personaxes, los ambientes y les aiciones contribuyen a la tresmisión de les idees del autor o l'autora.

• Intercambios informativos diversos nos que s'usen la narración, la descripción y el diálogu (con especial procuru nos tipos de personaxes), espresando la opinión propia y respetando la ayena sobre cuentos, poemes, dramatizaciones y otres actividaes lliteraries y de xuegu.

• Procuru por formar, espresar y contrastar criterios personales de llectura.

• Composición llibre o dirixida, incluyendo l'emplegu de medios informáticos, de poemes, pequeños cuentos y pequeñes obres falaes.

• Valoración oxetiva de la calidá de los testos lliterarios propios y ayenos.

• Valoración de la lliteratura oral y escrita n'asturianu, y de los elementos culturales tradicionales espeyaos nella.

• Usu autónomu de les biblioteques como fonte d'estímulos lliterarios.

Bloque 4. Conocimientu de la llingua.

• Discriminación de los fonemes propios del asturianu y correspondencia ente les agrupaciones fóniques y la so representación gráfica.

• Rellación ente los soníos, ritmos y entonaciones carauterístiques de la llingua asturiana colos de les otres llingües que s'estudien nel centru.

• Respetu ya interés pola aplicación de les riegles ortográfiques xenerales de la llingua y usu d'estratexes que permitan resolver les duldes na escritura d'una determinada pallabra.

• La formación de les pallabres n'asturianu (prefixos y sufixos propios) aplicada a la construcción de families de pallabres y campos léxicos propios de los ámbitos d'interaición col alumnáu.

• La contestualización del significáu de les pallabres pente medies del usu de les estratexes básiques de comunicación pa l'ampliación del vocabulariu y la resolución de duldes: comprobación del significáu d'una pallabra en distintos contestos, usu de sinónimos, antónimos y pallabres polisémiques

• Emplegu de los términos básicos necesarios pa falar de les regularidaes morfolóxiques, sintáutiques y ortográfiques que permiten espresar: les variaciones del nome: la sustitución nominal; la posesión, l'asitiamientu y la cantidá; les cualidaes y la so comparación; la diversidá de les aiciones verbales y la so rellación lóxica; les circunstancies de l'aición; l'afirmación, la negación y la dulda.

• La significación del verbu n'asturianu: formes y tiempos.

• Los pronomes y la so rellación col verbu.

• Identificación, reconocimientu y usu de les formes gramaticales que nos dexen comprender y espresar con traza les intenciones comunicatives.

• Diversidá y unidá llingüística asturiana.

• Gustu y valoración de la utilidá de la reflexón sobre la llingua pal so meyor usu.

Bloque 5. Aspeutos socioculturales.

• Entonación, mímica y biecos de complicidá y ciñu qu'acompañen a la espresión oral n'asturianu.

• Reproducción y desplicación de cosadielles, comparaciones, xiros, llocuciones, frases feches y refranes.

• Esploración del vocabulariu que fala de los usos, costumes, vezos y formes d'organización, entretenimientu y comunicación tradicionales.

• Comparación de les manifestaciones llingüístico-culturales asturianes coles d'otres comunidaes y países al traviés de l'audición o llectura de cantares, cuentos, lleendes, mitos, etc.

• Curiosidá por conocer los aspeutos que rescamplen nel patrimoniu cultural y sociollingüísticu asturianu ya interés por atropar y compartir materiales llingüístico-culturales que vienen del entornu cercanu.

• Interés por comunicase coles persones que falen asturianu en cualesquiera de les sos variantes.

• Reconocimientu de la diversidá y unidá llingüística asturiana.

• Valoración positiva de la diversidá llingüística y cultural d'Asturies y de les demás comunidaes autónomes como elementos arriquecedores.

• Sensibilidá pa coles realidaes distintes de la propia espeyaes al traviés de la diversidá llingüística y cultural.

Criterios d'evaluación.

1. Participar activamente n'intercambios comunicativos espontáneos o planificaos dientro o fuera del aula.

Con esti criteriu quier valorase la capacidá pa comunicase, d’un mou real o simuláu, en dellos contestos como xeres cotidianes, alderiques y charres organizaes dientro la clas, o les salíes y actividaes que se faen fuera l'aula, inda la práutica de xuegos y deportes. Pa ello, va valorase si'l neñu o la neña ye a:

• Escuchar activamente, solicitando que se repita o esclarie dalgo de lo entendío;

• Atrapiar y caltener l'atención del receutor o receutores falando con él de xemes de cuando p'asegurase de qu'escucha;

• Modular el tonu de voz en función de la intervención;

• Usar afayadizamente les formes xenerales d'interaición social;

• Espresase cola soltura, precisión y coordinación afayadices pa delles interaiciones comunicatives;

• Respetar los turnos d'intervención al tiempu que se faen referencies a les opiniones de les y los demás;

• Cooperar nel desarrollu de la comunicación manifestando que se sigue’l discursu, ufiertando pallabres que'l falante nun atopa o suxiriendo dalguna posible conclusión.

2. Pescanciar el sentíu xeneral y los detalles a los testos orales, reconociendo les idees principales y les secundaries.

Con esti criteriu evaluase si una neña o un neñu ye a remanar información, verbal y non verbal, xeneral y específica que vien de delles fontes orales (l'aula, l'entornu familiar o los medios de comunicación), ponela n'orde d'importancia y separtar lo importante de lo non importante pa un oxetivu determináu. Va valorase si'l neñu o la neña ye a:

• Adautar les estratexes d'escucha a los oxetivos que tengan afitao primero: atrapiar el sentíu xeneral, llocalizar la información, desplicar detalles o xustificar conclusiones;

• Reconocer y espresar la idea xeneral d'un discursu;

• Identificar les idees principales;

• Señalar les idees secundaries y dellos detalles relevantes;

• Identificar les pallabres clave;

• Distinguir los fechos de les opiniones;

• Facer inferencies;

• Tomar dalgunes notes pa intervenir nel discursu o resumilu.

3. Espresase de mou oral pente medies de discursos que presenten con orde fechos, procesos y vivencies.

Con esti criteriu va evaluase la capacidá pa comunicar oralmente fechos y vivencies a otres persones o al grupu de clas en pequeñes esposiciones que tengan preparao primero individualmente o en grupu pequeñu. Nes sos intervenciones, va valorase si'l neñu o la neña ve a:

• Facer y usar un guión previu pa organizar correutamente la información;

• Emplegar les fórmules afayadices d'entamu y pieslle de la esposición;

• Integrar nel discursu los elementos non verbales que faigan falta (xestualidá, modulación de la voz, espresividá corporal);

• Esponer n'orde les idees, rellacionándoles y estableciendo les correllaciones ente les causes y les consecuencies;

• Espresase con traza, ensin tatexar nin dexar espacios vacíos;

• Emplegar el léxicu con propiedá, evitando l'emplegu de coletiyes, tópicos y pallabres comodín;

• Usar les estructures llingüístiques afayadices pa la correición gramatical y la coherencia nel discursu;

• Comentar lo que tán faciendo, cómo se sienten o los progresos algamaos.

4. Pescanciar la idea xeneral, separtar les idees principales y secundaries, dar cuenta de dalgunos de los rasgos importantes d'un testu escritu y facer inferencies a partir del mesmu.

Con esti criteriu evalúase la capacidá pa lleer diferentes testos emplegando estratexes básiques de comprensión escrita y l'usu autónomu del llinguax como instrumentu d'aprendímientu, planificación y realización de xeres complexes. Asina mesmo, preténdese valorar l'usu de delles fontes d'información (biblioteca del centru, biblioteca pública y les teunoloxíes de la información y la comunicación) y l'algame, xerarquización, almacenamientu y presentación de la información en bayura de soportes. Pa ello, va valorase que'l neñu o la neña seya a:

• Emplegar distintes estratexes de llectura: intensiva, estensiva, pa retener información, pa dar cuenta de lo lleío, pa ver si interesa siguir lleendo;

• Sirvise de los elementos contestuales del testu pa llocalizar información relevante;

• Dar col significáu de del les pallabres pol contestu;

• Desplicar la idea xeneral del testu;

• Dixebrar ente les idees principales y secundaries y presentales n'orde d'importancia;

• Dixebrar los fechos de les opiniones;

• Facer inferencies;

• Tomar y escribir ordenadamente notes pa facer un pequeñu resume de testu.

5. Producir, con o ensin ayuda de medios informáticos, testos escritos con envís comunicativu y cada vuelta más ellaboraos.

Con esti criteriu evaluase la capacidá pa escribir, usando notes previes (y cada vegada con menos ayuda d'adultos), testos claros, detallaos y ordenaos lóxicamente, pa espresar con propiedá y correición petites y vivencies personales, tresmitir conocimientos o xustificar opiniones, teniendo en cuenta tanto los matices de les sos aportaciones como les rempuestes y opiniones de los receutores. Pa ello, va valorase si'l neñu o la neña ye a:

• Escoyer el tipu de testu y la so estructura acordies col envís comunicativu previstu;

• Facer un pequeñu guión;

• Distribuir afayadizamente los párrafos, pa que caún d'ellos tenga una idea relevante;

• Disponer visualmente'l productu; remanar la ortografía básica;

• Revisar la correición de lo escrito;

• Desplicar el procesu siguíu pa crear y correxir el testu.

6. Conocer testos lliterarios que pertenezan a la lliteratura infantil de tradición oral o escrita afayaos al ciclu cola fin d'entamar cola reflexón y usu de los recursos estéticos de la llingua.

Con esti criteriu quier evaluase la capacidá de gociar, de forma cada vuelta más autónoma, de la llectura de los testos lliterarios de la tradición oral asturiana y de la lliteratura infantil afayaos a la edá ya intereses del alumnáu. Asina mesmo, va valorase l'usu elemental de dalgunes de les convenciones del llinguax Iliterariu y la capacidá pa esplorar los recursos espresivos y creativos en testos propios. Pa ello, va valorase si'l neñu o la neña ye a:

• Prauticar d'un mou sistemáticu la llectura con autonomía ya iniciativa;

• Identificar y espresar la idea xeneral del testu y les idees más relevantes;

• Carauterizar los personaxes principales y secundarios;

• Describir les razones y consecuencies de los fechos;

• Esplicar dellos de los detalles de l'aición y los elementos que lleven a la resolución;

• Siguir y resumir llinies argumentales complexes;

• Facer un pequeñu resume usando'l menor númberu d'oraciones y evitando parafrasiar el testu orixinal;

• Poner procuru nos rasgos non esplícitos del testu y deducir otros significaos de les pallabres, distintos de los conocíos;

• Reconocer dellos recursos o convenciones lliteraries como los tipos de rellatos, los temes recurrentes, los personaxes típicos, la estructura de la narración, la midida y la comparación;

• Identificar dalgunos de los rasgos culturales y tradiciones propies o d'otros pueblos y países qu'apaecen nos testos lliterarios y describir les diferencies y los paecíos;

• Recrear o componer nuevos rellatos y poemes usando pautes y modelos daos;

• Emplegar estratexes y procedimientos pa la composición y creación lliteraria talos como la repetición, la comparación, la enumeración o les estructures paraleles.

7. Representar pequeños testos Iliterarios.

Con esti criteriu amosaráse la capacidá del alumnáu pa reproducir los esquemes rítmicos y d'entonación de la llingua asturiana, d'aumentar y afitar la cantidá de xuegos verbales y la so habilidá pa interpretar y dramatizar, dempués de los ensayos que faigan falta, xuegos de pallabres, cosadielles, rimes, poemes, narraciones y pequeñes pieces teatrales afayaes al ciclu. Pa ello, va valorase que'l neñu o la neña seya a:

• Pronunciar los fonemes asturianos con claridá y precisión y mantener una dicción correuta;

• Lleer en voz alta un testu curtiu con ritmu, entonación y les correutes pauses;

• Recrear comprensivamente pequeños xuegos verbales y poemes o contar histories tradicionales;

• Pescanciar y reproducir les pautes d'entonación y ritmu d'un testu;

• Coordinar les pallabres colos biecos y movimientos, amosando comprensión y espresividá personal;

• Reflexonar sobre los mecanismos lóxicos y llingüísticos de los xuegos verbales.

Arriba     Atrás    PDF   (ES)