Atrás PDF
¿Daveres que güei, n'Asturies, son "ellos" los verdaderos y únicos herederos políticos de Don Licinio de la Fuente?.
Nel mes de xunetu de 1978, ante’l Plenu del Congreso de los Diputaos, nel que s’aldericaba’l futuru testu constitucional, don Licinio de la Fuente, en nome del grupu d’Alianza Popular, pidía que se camudare la redaición del artículu 3.2 (“Les demás llingües españoles sedrán tamién oficiales nes respeutives Comunidaes Autónomes acordies colos sos Estatutos”) poniendo “podrán ser” onde se dicía -y sigue diciéndose- “sedrán”, pa qu’asina foren los estremaos Estatutos d’Autonomía los que determinaren si la llingua propia diba o non ser declarada oficial. Amosaba d’esa miente’l diputáu conservador el so “desalcuerdu cola constitucionalización obligatoria de la oficialidá de toles llingües d’España”, afitándose nos argumentos que darréu se resumen: que sedría mui costosa; que les llingües rexonales falábales mui poca xente; qu’habría que deprendeles a costa del inglés o francés; que yeren una barrera pente españoles; y qu’obligaben a los que nun querían sabeles.
Retrucó-y, con non mui bonos modos, Don Gregorio Peces-Barba Martínez, defendiendo’l testu de la Comisión y afitando que les pallabres de don Licio refiertaben-y a les vieyes lleis nes que nun artículu primeru proclamábse un drechu pa, de siguió, nun artículu segundu torgalu.
Votóse y don Licinio perdió por 283 a 26 (hebio 5 abstenciones).
La voluntá del llexisllador quedaba clara: la Constitución Española establecía la oficialidá de les demás llingües, arriendes de la del Estáu, el castellán. Pero por si entá daquién duldaba don Ricardo de la Cierva y Hoces, falando pal Senáu en nome de la Comisión Constitucional zarraba dafechu l’alderique: “Un señor senador tien pidío que les demás llingües seyan tamién oficiales, y eso ye justamente lo que diz el separtáu 2 del artículu 3”.
Día 12 de payares de 2006. El Secretariu Xeneral del PSOE n’Asturies, nunes declaraciones periodístiques y col envís de que se sepa que tan escontra la reconocencia de la oficialidá de la llingua asturiana, fai de so los más de los argumentos que don Licinio de la Fuente espardiere ventiocho años enantes nel Congresu de los Diputaos.
Pol contrariu, nel mesmu día y n’otru periódicu, el Secretariu Xeneral del PP n’Asturies manifiéstase dimpuestu a finar col conflictu llingüísticu asturianu cumpliendo dafechu cola llegalidá constitucional.
Asina les coses y magar seya como pa plasmar y nun creyelo ye casique obligao l’entrugase ¿daveres que güei, n’Asturies, son ”ellos” los verdaderos y únicos herederos políticos de don Licio de la Fuente?.