Informe-denuncia sobre la situación de la llingua asturiana empobináu a la Secretaria Xeneral de Multillingüismu del Conseyu d'Europa

Xurde Blanco Puente
Aconceyamientu de Xuristes pol Asturianu
DATA: 19/11/07

L'Aconceyamientu de Xuristes pol Asturianu vien de presentar un informe-denuncia énte'l Conseyu d'Europa por incumplimientu n'Asturies de la Carta Europea de les Llingües Rexonales o Minoritaries.

Tres d'afitar nél qu'en bien d'ocasiones los poderes públicos traten a la diversidá llingüística española más como un abegosu problema pa la imposición d'una identidá xeneral y escluyente que como una bayura cultural, manifiéstase qu'asina, na práutica, una llingua rexonal n'España o tien reconocida espresamente la condición de cooficial o ta condergada a muerte, poniendo como preba d'ello:

1. L'escaecimientu cásique dafechu de la llingua asturiana (la única española propia y tradicional d'una comunidá autónoma a la que nun se-y quixo entá reconocer la condición de cooficial) nos informes que fai'l Gobiernu Español al Conseyu d'Europa sobre'l cumplimientu n'España de la Carta Europea de les Llingües Rexonales o Minoritaries; al estremu que, nel caberu del añu 2006, a lo llargo de les 506 páxines qu'ocupa l'informe, namás se faen dos curties referencies a la llingua de los asturianos: la primera, na páxina 12, pa sofitar que "El procesu de normalización y codificación del asturianu nun ta afitáu dafechu" y la segunda, páxina 41, p'afirmar que "Respeutu al bable o asturianu, nun se dispón de nuevos datos respeutu a los axuntaos nel primer informe, presentáu en 2002, polo que se vuelven a mandar los datos suministraos pola Encuesta d'Usu Llingüísticu fecha en 1991".

2. La discriminación dafechu que se fai a la llingua asturiana nes 84 normes estatales de toa triba (dende lleis orgániques a resoluciones) que l'Estáu español presenta al Conseyu d'Europa como desendolcu de la Carta Europea de les Llingües Rexonales o Minoritaries n'España. De tales 84 normes discriminatories pa col asturianu, estudiaes y denunciaes, 27 cinquen al sistema educativu y les demás repártense pente l'emplegu xudicial (9), alministrativu (34), nos medios de comunicación (11) y n'otres estayes (4). Poro, conclúise que la llingua asturiana, despreciada polos partidos políticos mayoritarios n'Asturies y ensin más valedores que flebes y voluntaristes movimientos ciudadanos, ensin una intervención decidida y urxente de les instituciones comunitarias, pasará a ser la primera llingua europea que s'esmuz a les puertes del Conseyu d'Europa.

> Informe-denuncia: L'agonía d'una llingua europea.

Arriba    Atrás    PDF