Atrás PDF
A LA DIREUTORA XENERAL DE PROMOCIÓN CULTURAL Y POLÍTICA LLINGÜÍSTICA DE LA CONSEYERÍA DE CULTURA Y TURISMU PRINCIPÁU D'ASTURIES
Sra. Direutora Xeneral:
Va unos díes llei qu’ente les coses que tien pensao facer una d’elles ye ver cómo foi l’aplicación del Plan pa la Normalización Social del Asturianu.
Anque polo que se fizo nun
m’abulta ser un llabor difícil, nun quiero dexar d’echa-y una gabita, como
ciudadanu y como funcionariu, no tocante a los oxetivos del Plan que por ser
eses dos coses (ciudadanu y funcionariu) meyor conozo.
Como ciudadanu:
Oxetivu I.
- Naguo por oyer al Sr. Presidente o a dalgunu de los Conseyeros y otros altos
cargos emplegar l’asturianu na cai, na Xunta Xeneral, nes radios y nes
televisiones.
- Toi esperando a lleer nel BOPA dalguna llei o reglamentu n’asturianu y que
los modelos qu’apaecen pa pidir subvenciones etcétera vengan tamién
n’asturianu.
- El portal Princast, al abrilu, lo primero que vemos ye lo que ta en castellanu
y cuando pinches pa velo n’asturianu, en cuantes que pases p’allá del
primer escalón, ye casi imposible alcontrar dalgo na nuestra llingua.
- Lo de los logotipos. Nun se ven más de diez en too Uviéu y onde los había,
antigua Conseyería de Xusticia, en cuanto aportó la Sra. Ramos, quitáronse.
¿Sábese de dalgún lletreru billingüe nel edificiu "La Ñocla"
(Calatrava) o nel EASMU? De lo que faen l’Alministración de Xusticia y la del
Estáu, ¡pa que vamos falar!. Pa esos, l’asturianu, nin esiste. ¿Sabe, Sra.
Direutora, de d’algún lletreru, nun yá n’asturianu sinón billingüe, na
Delegación del Gobiernu del Sr. Trevín, n’algún Xulgáu, quitando’l de la
entrada del Tribunal Superior de Xusticia d’Asturies? Y eso hasta que la Sra.
Ramos o Cavaleiro manden quitalos.
Oxetivu III.
- Nos medios de comunicación, quitando Radio Sele y el selmanariu Les Noticies,
sólo s’emplega l’asturianu a migayines y pa coses "folklóriques";
nin n’editoriales, nin en noticies xenerales, nin en telediarios, nin
n’otros informativos, nin en "magazines" ye posible oyer o lleer
dalguna cosa n’asturianu. Claro, que si tan esperando poles bases de les que
fala'l Plan… ¿Tan en dalgún sitiu pa poder veles?.
Oxetivu V.
- La toponimia nun la empleguen nin los Conceyos nin el Principáu (Sra.
Direutora, garre cualquier día cualquier BOPA y vealo, si ye que nun lo vio yá).
Na prensa escrita sólo la emplega La Nueva España.
Oxetivu VI.
- Taría bien dici-yos a los cabezaleros de la FSA, el PP ya IX, anque a estos
caberos igual un poco menos, a les Conseyeres y a los Conseyeros lo de "les
actitúes positives" alredor de la llingua de les que fala'l Plan nesti
Oxetivu VI. Nun sé que toos ellos ficieren nada p’afalar l’usu del
asturianu, pues esti Plan, que podía valir pa ello, nin siquiera son a cumplilu
bonalmente.
De los otros oxetivos del Plan lo único que-y digo ye que nunca oyi dicir nin
facer nada tocante a ellos.
Como funcionariu:
Oxetivu I.
-Toi esperando nesti caberu añu del Plan que nun me pongan toles torgues del
mundu pal so usu, porque de lo de facilitar el so emplegu, nin un res. Na
Conseyería na que trabayo aportóse a prohibir que nos oficios, informes etcétera
s’emplegase'l nome de la Conseyería n’asturianu.
¿Qué-y paez que la convocatoria pa la Xefatura de la Oficina de Política
Llingüística sólo ta en castellanu?.
Oxetivu V.
- Tovía me falta ver el primer informe, proyeutu téunicu, resolución o lo que
seya cola toponimia oficial.
Oxetivu VI.
Les actitúes de los mios Xefes tocante al asturianu nun son positives y muncho
menos m’afalen al so emplegu. Nesti campu nun se-y escaeza qu’Usté nun foi
capaz a escribir un oficiu n’asturianu pa mandar una torna al castellanu
d’un informe de mio (cosa que sí fizo'l Sr. D’Andrés).
P’acabar, dos cosines. Una, convídola a
qu’escriba (si-y fai falta) al Sr. Rabanal pa que-y diga que fizo no tocante
al Oxetivu I, aición 8, del Plan y a los titulares de les Secretaríes
Xenerales Téuniques pa entruga-yos que cuando s’alcontraron con funcionarios
que quixeron usar l’asturianu si fueron favoratibles a ello o si, escontra lo
que diz el Plan, torgáronlo tolo
que pudieron. Y otra, que cuide cómo pue salir p’alantre un Plan que nun
s’asoleyó nel BOPA nin s’espardió en sitiu afayadizu dalgunu (yo entéreme
qu’esistía por que lu vi un día nel ventanu del Rexistru d’esa Conseyería).
Col enfotu de qu’estes llinies-y valgan pal so llabor.
Xosé María Estrada Janáriz
Lletráu del Principáu d’Asturies