Atrás PDF
A LA CONSEYERA DE CULTURA Y TURISMU PRINCIPÁU D'ASTURIES
Sra. Conseyera:
Nun va muncho dixo usté que dende la so Conseyería qu’ agora que ta pa finar el plazu pal que se ficiera'l del Plan de Normalización Social del Asturianu, diba a facese una valoración de la so execución.
Los que de milagru lu conocemos (porque un día alcontrámoslu nun llibrín nel ventanu del Rexistru de la Conseyería) vamos echa-y una gabita, anque creyemos que pa lo que se fizo, esi llabor nun-y va llevar muncho.
Oxetivu I.
- Tamos naguando por oyer al Sr. Presidente o a dalgunu de los Conseyeros y otros altos cargos emplegar l’asturianu na cai, na Xunta Xeneral, nes radios y nes televisiones.
- Tamos esperando a lleer nel BOPA dalguna llei o reglamentu n’asturianu y que los modelos qu’apaecen pa pidir subvenciones, etcétera, vengan tamién n’asturianu.
- El portal Princast, al abrilu, lo primero que vemos ye lo que ta en castellanu y cuando pinches pa velo n’asturianu, en cuantes que pases p’allá del primer escalón, ye casi imposible alcontrar dalgo na nuestra llingua.
- Lo de los logotipos. Nun se ven más de diez en too Uviéu y onde los había, antigua Conseyería de Xusticia, en cuanto aportó la Sra. Ramos, quitáronse. ¿Sábese de dalgún lletreru billingüe nel edificiu <<La Ñocla>> (Calatrava) o nel EASMU? De lo que faen l’Alministración de Xusticia y la del Estáu, ¡pa que vamos falar!. Pa esos, l’asturianu, nin esiste. ¿Sabe, Sra. Conseyera, de d’algún lletreru, nun yá n’asturianu sinón billingüe, na Delegación del Gobiernu del Sr. Trevín, n’algún Xulgáu, quitando’l de la entrada del Tribunal Superior de Xusticia d’Asturies? Y eso hasta que la Sra. Ramos o Cavaleiro manden quitalos.
-Tamos esperando, nesti caberu añu del Plan, que nun pongan toles torgues del mundu pal so usu polos funcionarios, porque de lo de facilitar el so emplegu, nin un res.
Na Conseyería de la Presidencia, enantes, y agora na d’Alministraciones Públiques Voz del Gobiernu aportóse a torgar dafechu que nos oficios, informes etcétera s’emplegase'l nome de la Conseyería n’asturianu.
Por falar de la so Conseyería ¿qué-y paez que la convocatoria pa la Xefatura de la Oficina de Política Llingüística sólo ta en castellanu?.
Oxetivu III.
- Nos medios de comunicación, quitando Radio Sele y el selmanariu Les Noticies, sólo s’emplega l’asturianu a migayines y pa coses <<folklóriques>>; nin n’editoriales, nin en noticies xenerales, nin en telediarios, nin n’otros informativos, nin en <<magazines>> ye posible oyer o lleer dalguna cosa n’asturianu. Claro, que si tan esperando poles bases de les que fala'l Plan… ¿Tan en dalgún sitiu pa poder veles?.
Oxetivu V.
- La toponimia nun la empleguen nin los Conceyos nin el Principáu (Sra. Conseyera, garre cualquier día cualquier BOPA y vealo, si ye que nun lo vio yá). Na prensa escrita, quitando Les Noticies, sólo la emplega La Nueva España.
Oxetivu VI.
- Taría bien dici-yos a los cabezaleros de la FSA, el PP ya IX, anque a estos caberos igual un poco menos, a les Conseyeres y a los Conseyeros lo <<de les actitúes positives>> alredor de la llingua de les que fala'l Plan nesti Oxetivu VI. Nun sabemos que toos ellos ficieren nada p’afalar l’usu del asturianu, pues esti Plan, que podía valir pa ello, nin siquiera son a cumplilu bonalmente.
- Tocante a les actitúes de los Altos Cargos, hai que dici-y que nun son positives y muncho menos afalen al emplegu del asturianu. Al aviesu, el que fai'l so trabayu diariu n’asturianu, tien el castigu de tener de tornalu al castellán.
De los otros oxetivos del Plan lo único que-y dicimos ye que nunca oyimos dicir nin facer nada tocante a ellos.
Agora anuncien que van facer otru Plan. Dende esti Aconceyamientu de Xuristes pol Asturianu, y dando-y al entamu del so llabor tola confianza que merez, queremos aforra-y el trabayu de facelu. Diga-yos a los sos collacios del Conseyu de Gobiernu y digáse a usté mesma que lo que tien de facese ye cumplir colo que diz el que ta pa finar, camuden-y les feches y ya tienen el Plan nuevu. Pero esta vegada, cúmplanlu.
Xosé María Estrada Janáriz,
Presidente del Aconceyamientu de Xuristes pol Asturianu.