Atrás PDF
AL
SEÑOR PRESIDENTE DEL GOBIERNU DEL PRINCIPÁU D'ASTURIES
Xosé
María Estrada Janariz, ciudadán titular del DNI númberu (...), na so condición
de Presidente del Aconceyamientu de Xuristes pol Asturianu (AXA), asitiáu a
efeutos de notificaciones nel séptimu pisu, del númberu 22, cai Pérez de la
Sala, d'Uviéu, tres someter el testu viniente a tolos miembros del conceyu,
preséntase y DIZ:
Primeru.-
Nel pasáu añu 2005, la Xunta Xeneral del Principáu apautó y el Conseyu de
Gobiernu que vusté preside fizo de so, un "Plan pa la normalización
social del asturianu, 2005-2007", qu'asoleyó y repartió, en formatu de
llibru, la Conseyería de Cultura, Comunicación Social y Turismu. N'elli,
dientro de la nomada "llinia d'actuación n'Alministración y Órganos del
Principaú d'Asturies", el Conseyu de Gobiernu oblígase, de magar l'añu
2005, a facilitar a los trabayadores del Principáu "la conocencia y usu de
la llingua asturianu y, nel so ámbitu, del gallego-asturianu" (acción númberu
8).
Segundu.-
Ye verdá que denguna aición positiva al respeutu vieno tomando'l
so Gobiernu d'entós p'acó -por más que dalgunos trabayadores entamaren
a facilita-y el cumplimientu de los sos compromisos, emplegando la llingua
asturiana nel desendolcu de les tarees propies del so puestu de trabayu- pero
tamién lo ye que fasta hai menos d'un mes tampoco se xeneraron actos represivos
escontra l'emplegu del asturianu dientro de l'Alministración del Principáu.
Pero
va pa un mes, aprosimao, escomencipianon les represiones na Direición Xeneral
de Relaciones Institucionales y del Serviciu Xurídicu. Primeru fonon les
maniobres pa torgar la rotulación de dos puestos de trabayu n'asturianu,
autorizada pol correspondiente serviciu de patrimoniu y a pidíu de los
funcionarios interesaos, col amparu de les aiciones 4 y 50 del mentáu Plan.
Siguió-y la negativa a tramitar un pidimientu, n'asturianu, pa camudar les
feches de vacaciones d'un funcionariu. Vieno dempués una orde vergoñosa -que
se dio de pallabra, a los funcionarios del rexistru- pa nun dar trámite a los
escritos presentaos n'asturianu. Al cabu, el señor Cabaleiro Tejeiro, Direutor
Xeneral de Relaciones Institucionales y del Serviciu Xurídicu, impartió al
Xefe del Serviciu Xurídicu la instrucción de que "todo
el personal de la Dirección General, y específicamente los letrados del
Servicio Jurídico, utilicen de forma obligatoria los modelos de impresos y
escritos oficiales, que -como es obvio- su redacción es en castellano".
Terceru.-
La foscura pa cola llingua asturiana dientro de la Conseyería de la Presidencia
tien otres manifestaciones. Asina, ye la única -pente diez- qu'impón l'emplegu
de modelos escritos en castellán nos procesos de contratación, torgando a los
ciudadanos la posibilidá d'exercitar un drechu reconocíu nel artículu 4 de la
Llei 1/98: el de dirixise a l'Alministración n'asturianu, si asina-yos peta.
D'otra
miente vien amuesando una clara actitú de rebeldía escontra el conteniu de los
diez Decretos polos que se determinen los topónimos oficiales d'otros tantos
conceyos, al estremu qu'un abogáu uvieín tien plantegada una demanda ante'l
Tribunal Superior de Xusticia d'Asturies desixendo-y respetu y acatu a tales
normes.
Cuartu.-
Nun podemos por menos que refierta-y el fechu de que’l señor Cabaleiro
Tejeiro, Director Xeneral de Relaciones Institucionales y del Serviciu Xurídicu,
nun sólo ye l’autor direutu de los actos denunciaos sinon –casualidá o
escarniu- l’encargáu pol so Gobiernu de preparar el Tercer Congresu Mundial
d’Asturianía.
Poro,
ENCAMENTÁMOS-Y:
Que de secute ordene la adopción de les midíes afayadices pal restablecimientu
del respetu a la llei y al cumplimientu lleal de los pautos roblaos por Conseyu
de Gobiernu, no que cinca al emplegu de la llingua asturiana dientro de la
Conseyería de la Presidencia, en xeneral, y de la Dirección Xeneral de
Relaciones Institucionales y del Serviciu Xurídicu, en particular.
Ye
xusto.
N'Uviéu,
a dieciocho de xunetu de dos mil seyes.