Atrás     PDF

Préstame deprender de los amigos. D'un tiempu a esta parte, de Ramón d'Andrés toi deprendiendo en qué consiste eso de la oficialidá. Hai que ver; trenta años persiguiendo una idea y tovía nun tenemos claro toles implicaciones que trai. Nin tolos costes. Pero, claro, si nosotros nun lo sabemos, calculen la empanada mental de los responsables políticos que tienen que tomar una decisión.

Decidir nunca resultó fácil. Pero cuando, pa enriba, nun sabes bien lo que tas decidiendo, la reacción más humana ye quedar igual. Nun dar un pasu. Por eso tenemos que siguir explicando toles implicaciones. Hai que quitar los mieos y por nosotros nun va quedar.

De mano, nesta cuestión de la oficialidá, hai dos puntos de vista: el de l'alministración y el de los ciudadanos. Con diferencia, la parte más importante, ye la última; la de los ciudadanos. Y dientro d'ella, tenemos que diferenciar dos conceptos. Ún, la validez a tolos efectos. Y dos, el derechu d'usu. Y, otra vuelta, la parte más importante vuelve ser esta última: la del derechu al usu. Eso ye lo primero: nun reprimir nengún usu cotidianu del nuestru idioma. Nun acomplexar a la xente por «falar mal». Nun obligar a guardar la nuestra llingua en desván. Que'l bable nun se pierda. Supónse que neso tamos tol mundu d'alcuerdu. Bueno, pues pa eso ye imprescindible (anque non suficiente) el derechu al usu.

Siguiendo p'atrás colo que dicíemos, topámonos cola validez xurídica a tolos efectos d'esi usu. Eso tamién ye un derechu ciudadanu. Y nun hai más. Quiero dicir que, pa los ciudadanos, la oficialidá nun trai muncho más qu'esos dos derechos. Y deberes mui pocos tamién: namás el respetu y la tolerancia.

Dende'l puntu de vista de l'alministración, hai tamién dos implicaciones. Que son: facer del asturianu llingua de xestión y facela llingua de comunicación. Vamos empezar pola más importante: pola última. La idea ye cenciella: hai que facer qu'un porcentaxe mínimu de los funcionarios que tán cara al públicu seyan a comunicase n'asturianu. Namás qu'eso. Porcentaxe de funcionarios que, por cierto, yá existe. Lo único que falta ye reconoce-yos esa habilidá y dexar facer. ¿Coste? Cero. Bueno, implica tamién renovar en condiciones la señalética y cuatro obviedaes más. Pero, en definitiva, más voluntá que nada.

Y queda lo último: llingua de xestión. Ello ye, que dientro l'alministración, el papeléu internu se faiga efectivamente n'asturianu. ¿Importa muncho eso? Pues, comparáu con tolo anterior, non. Y yá ta; nun queda muncho más (la escolarización o la toponimia tán dientro de tolo dicho). Por eso ye fundamental siguir explicando. Porque tenemos munchu que ganar y poco que perder.