¡Agora, Llanera!

Xurde Blanco Puente
Aconceyamientu de Xuristes pol Asturianu
DATA: 11/02/10

SEGUNDA DENUNCIA PER DISCRIMINACIÓN LLINGÜÍSTICA FALTONA NUNA CASA-CONCEYU, LA DE LLANERA , NESTI CASU

L’Aconceyamientu de Xuristes pol Asturianu, tres denunciar un fechu asemeyáu en Xixón, nun fizo’l mes, tien agora que desixi-y al Alcalde de Llanera que corte pela freba cola discriminación llingüística que vienen careciendo los ciudadanos asturfalantes nos sos trámites burocráticos. L’escritu,  rexistráu’l día 11 del mes qu’andamos, ye’l darréu:

AL ALCALDE DE LLANERA

Xosé María Estrada Janariz, ciudadán titular del DNI númberu (...), na so condición de Presidente del Aconceyamientu de Xuristes pol Asturianu (AXA), asitiáu a efeutos de notificaciones nel (...), d'Uviéu, preséntase y DIZ:

Primeru.-  Nel nuesu Serviciu d’Orientación Xurídica pa la Defensa de los Derechos Llingüísticos (SOX), recibióse denuncia de l’asociación “FAI!” pelos fechos de los  que darréu se fai resume:

El día 25 de xineru del añu qu’andamos, la vocera de la mentada asociación solicitó per escrito l’usu d’una sala de la Casa Cultura de Posada pal día 13 de febreru, recibiendo contestación, datada al día 28 de xineru, nos términos lliterales que siguen:

“En relación con su escrito con fecha en el Registro General de Entrada en este Ayuntamiento de 25 de Enero de 2010 y nº 367, en el que solicita el uso de una sala de la Casa de Cultura de Posada para el próximo 13 de febrero de 2010, por la presente le comunico que dicho escrito debe presentarlo en Castellano. Lo que comunico para su conocimiento y a los efectos oportunos” (Los escesos tipográficos pa solliñar la pallabra castellano tan asina nel testu municipal)

Nin que dicir tien que la Conceyala de Cultura y Muyer, Belén Rodríguez López, que ye quien robla esta ayalga, entendió, de la cabeza al rau, lo que se-y encamentaba (l’usu d’una sala de la Casa Cultura pal día 13 de febreru de 2010), polo que la esixencia de presentación del escritu en castellán ye, de mano, un actu cerriscu, intolerable nun cargu públicu d’una Alministración democrática. 

Segundu.- Arriendes d’ello, con estos fechos l’Ayuntamientu vulnera gravemente cuatro derechos de la ciudadanía:

1u. El derechu a nun ser discrimináu per razón de la llingua, proclamáu nos artículos 2 de la Declaración Universal de los Derechos Humanos y 14 de la Constitución española, porque la Conceyala entendió dafechu lo que se-y pidía, talu que lo acredita la rempuesta que dio, polo qu’ésta, nos sos términos, nun pue tener otru oxetivu que la discriminación llingüística.

2u. El derechu al emplegu na vida pública de la so llingua rexonal, dientro del territoriu del que ye propia y tradicional, calificáu como “derechu imprescriptible, acordies colos principios conteníos nel Pautu Internacional de Derechos Civiles y Políticos de les Naciones Xuníes y col espíritu del Conveniu del Conseyu d’Europa pa la Proteición de los Derechos Humanos”, pela Carta Europea de les Llingües Rexonales o Minoritaries, que lu proclama nos  sos artículos 7.1.a) y 10.2.a). Esti Conveniu Internacional foi ratificáu per España  (BOE de 15/09/2001), gobernando’l  Partíu Popular que tamién lo fai guei en Llanera.

3u. El derechu a empobinase n’asturianu a l’Alministración municipal, reconocíu nos artículos 3, lliterales a) y d), 4 y 8 de la Llei 1/1998, de 23 de marzu, d’usu y promoción del bable/asturianu y nel artículu 36.2 de la Llei 30/1992, de 26 de payares, de réxime xurídicu de les Alministraciones Públiques y del procedimientu alministrativu común.

4u. El derechu a ser tratáu con respetu peles autoridaes y funcionarios, obligaos a facilita-y l’exerciciu de los sos derechos, acordies col mandáu  conteníu nel artículu 35.I) de la mentada Llei 30/1992.

Al cabu, dende l’Aconceyamientu de Xuristes pol Asturianu entendemos que la mentada autoridad llocal actuó como si entá tuviere vixencia’l Decretu 2929/1975, testu aprobáu pela dictadura franquista pa regular (torgar más bien) l’usu de les llingües rexonales españoles.

Poro

ENCAMIENTO-Y: Que darréu tome les midíes afayadices pa cortar pela freba colos despropósitos burocráticos denunciaos pente medies de:

a) Ordenar darréu’l trámite y resolución del pidimientu.

b) Retirar la delegación de competencies a quien nun sabe facer un emplegu axustáu a derechu, tolerante y democráticu de les mesmes.

En Llanera, a once de febreru de dos mil diez.

> Escritu del Ayuntamientu Llanera requiriendo escritu en castellán (PDF).

Arriba    Atrás    PDF