Faltosa discriminación llingüística na Casa-Conceyu de Xixón

Xurde Blanco Puente
Aconceyamientu de Xuristes pol Asturianu
DATA: 15/01/10

L’Aconceyamientu de Xuristes pol Asturianu, pente medies de la denuncia d’un casu concretu, vien de desixi-y a l’alcaldesa de Xixón que corte pela freba cola discriminación llingüística que vienen careciendo los ciudadanos asturfalantes nos sos trámites burocráticos na casa-conceyu. L’escritu de denuncia,  rexistráu’l once del mes qu’andamos, ye’l darréu:

A L’ALCALDESA DE GIJÓN/XIXÓN

Xosé María Estrada Janariz, ciudadán titular del DNI númberu (...), na so condición de Presidente del Aconceyamientu de Xuristes pol Asturianu (AXA), asitiáu a efeutos de notificaciones nel (...), d'Uviéu, preséntase y DIZ:

Primeru.-  Nel nuesu Serviciu d’Orientación Xurídica pa la Defensa de los Derechos Llingüísticos (SOX), recibióse denuncia de don (...) per los fechos de los  que darréu se fai resume:

El día 28 d’avientu de 2009 personóse l’afectáu nes oficines municipales pa notificar un cambéu de domiciliu dientro’l conceyu, solicitando impresu al efeutu redactáu n’asturianu.

Como-y dixeron que nun había impresu más qu’en castellán hebo de conformase con ello y cumplimentalu, non ensin cayer na cuenta de que’l topónimu llegal de la ciudá Gijón/Xixón, nun yera l’emplegáu nel impresu sinón el derogáu de Gijón.

Presentáu’l documentu a la funcionaria que lu “atendió” plasmó’l nuesu comunicante cuando ella españó a rir tres lleer que nel impresu cumplimentáu figuraben les pallabres “fíu” ya “Inaciu”, pasando de la risa a aneciar en correxir Inaciu per Ignacio, magar que nel DNI que se-y amuesó figuraba’l nome d’Inaciu como propiu del so fíu.

Hebo d’intervenir la superior xerárquica de la funcionaria pa finar colos malos modales y les burlles y permitir que’l ciudadán pudiere presentar la comunicación de cambéu de domiciliu.

Segundu.- Con tales fechos l’Ayuntamientu vulnera tres derechos del maltratáu ciudadán xixonés:

1u. El so derechu a empobinase n’asturianu a l’Alministración municipal, reconocíu nel artículu 4 de la Llei 1/1998 y nos artículos 3 y 4 de la Ordenanza Municipal d’Usu del Asturianu, porque difícilmente un ciudadán va poder exercer el so derechu  a “rellacionase col Ayuntamientu y l’Alministración Municipal, mesmu n’asturianu qu’en castellán, oralmente o per escritu” ensín ser oxetu de “discriminación en forma dala por razón del so idioma”, si los impresos d’usu obligatoriu tan escritos en castellán.

2u. El so derechu a que l’Alministración Municipal cumpla les normes llegales na so actuación, nesti casu el Decretu 105/2006, pel que se determinen los topónimos oficiales del conceyu, siendo’l de la capital el de Gijón/Xixón, que non Gijón.

3u. El so derechu a recibir un tratu dignu nel intre de facer un trámite dientro d’una oficina municipal que ye pal funcionariu un deber (artículu 54.1, de la Llei 7/2007, Estatutu Básicu del Emplegáu Públicu) qu’apareya falta grave’l so incumplimientu (artículu 92.b de la Llei d’Ordenación de la Función Pública del Principáu d’Asturies, al qu’espresamente empobina l’artículu 74 del Alcuerdu sobre Condiciones de Trabayu, 2008-2011, d’esi Ayuntamientu).

Poro

ENCAMIENTO-Y: Que darréu dea les instrucciones afayadices pa cortar pela freba colos despropósitos burocráticos denunciaos pete medies de:

a) Ordenar la impresión billigüe de los impresos normalizaos.

b) Controlar qu’en toles dependencies alministratives s’empleguen los topónimos llegalmente establecíos.

c) Abrir espediente informativu pa comprobar el tratu desconsideráu pa col ciudadán comunicante al que tien de siguir l’adopción de les midíes oportunes pa que fechos d’esta triba nun se repitan.

En Gijón/Xixón, a once de xineru de dos mil diez.

Arriba    Atrás    PDF