Atrás     PDF

Hai persones a les que nun se-yos entiende lo que dicen. Igual tienen les idees bien clares en maxín, pero nun hai cuentu, resulta imposible atopar la clave que les descifre. Nun ye'l casu (yá lo tenemos dicho otres veces) de Javier Fernández, secretariu de la FSA; a él entiéndese-y tolo que diz. Será porque fala poques veces y sabiendo lo que nos quier dicir. Será por eso.

Ye bona llástima tener que gastar más trabayu en falar del idioma asturianu cola bayura de temes qu'ufierta l'actualidá y prometo nun volver a facelo hasta depués de Reis: cambiu de ciclu económicu, enguedeyos xudiciales, Museles que s'espurren por ensalmu, repartu de cargos enantes de les elecciones, corrupciones municipales, balances fiscales Pero la recién manifestación del CAO (un ésitu la mesma convocatoria y participación), l'asistencia del conceyal Arias-Cachero y'l verbu enigmáticu de Gabino de Lorenzo abultáron-y abondo al otru día a Javier Fernández pa sentenciar. La doctrina del cabezaleru de los socialistes asturianos ye, según información de EL COMERCIO (25-11-07), que «preservar la lengua asturiana está bien, pero glorificarla no, porque las raíces de la intolerancia están hincadas en la sobrevaloración de lo propio», y que los defensores de la oficialidá del asturianu «piensan menos en la lengua como instrumento de comunicación que como instrumento ideológico». Estos pegollos argumentales axúntense a lo otro, más esplícito, de que la cooficialidá «abre les puertes al nacionalismu». Acabáramos, home. Yá nos podía ilustrar más a tiempu'l señor Fernández. Al él nun-y esmolez otra cosa desemeyada que la qu'ataca a los que nieguen conceder derechos a los ciudadanos porque tarrecen que depués los exerzan y hasta que piensen ellos solos, y que, de pasu, con suerte y paciencia, vaigan esmoronando'l castiellu de poder y privilexos nel que'l poder vive agospiáu. Ye la vieya receta del autócrata paternalista que nos recomienda tener amarrada la llibertá, que depués a saber pa qué la vamos querer utilizar.

Pero Javier Fernández nun tendría que tener vergoña por pensar eso, nin sobosquiase nes obligaciones que, como'l cielu enriba les nuestres cabeces, nos pueden cayer ensin culpa cola oficilidá, nin calificar a los socialistes de 'cosmopolitas' (sic) cuando nun hai pitición de parte pa facelo. Hai qu'asumir con gayola esa condición, don Javier, y espurrir l'argumentu hasta da-y cuerpu dafechu. Por exemplu, los qu'exercen la llibertá sindical nun miren, en realidá, polos derechos de los trabayadores, qu'anden pensando más n'usar la chequera pa facer ganar les elecciones al partíu de sos amores pa que-yos caltenga'l 'statu quo'. O, como bien glaya la derecha-lliberal-relixosa, el derechu al matrimoniu homosexual nun sirve pa entamar vides en común de persones que se quieren, qu'ellos tán pensando n'argayar los valores de la sociedá tradicional col so exemplu sodomita. O nun digamos nada de los derechos que nun algamen la categoría d'humanos o fundamentales, los que llamamos sociales. Ehí la doctrina Fernández tien bon asientu. Porque eses families que reciben perres del Estáu pola so condición socioeconómica nun quieren un gavitu del restu de la sociedá pa sobrellevar una vida más curiosa, lo que quieren ye vivir ensin trabayar a costa fecha. Acabáramos, home. Yá nos podía ilustrar más a tiempu'l señor Fernández.

La flecha de Javier Fernández ta bien afilada y apunta certera a la diana. A él nun-y diba doler gota conceder el derechu a los asturianos pa usar la so llingua, pero emburriar a los nacionalistes pa que «glorificando l'idioma» «sobrevaloren lo propio» y «medre la intolerancia», eso non. Lo meyor ye que denigremos l'idioma, sobrevaloremos lo ayeno y, asina, medre la tolerancia. Amás, el secretariu de la FSA ta convencíu de qu'una conspiración de fuerces poderoses ximielguen l'asturianu pa «poner en marcha el motor de un nacionalismo ideológico en esta región», lo mesmo que, acertadamente, pensaben y piensen Pinochet del derechu a la vida, Fidel Castro del derechu a la llibertá d'espresión, la Xunta Militar birmana del derechu de manifestación o la dinastía d'Arabia Saudí de la igualdá ante la llei d'homes y muyeres. Hai derechos humanos que nun son otra cosa que «motores ideolóxicos» que quieren baltar a los que gobiernen lexítimamente en beneficiu de los ciudadanos y la doctrina Fernández, aplicada al casu asturianu, avísanos del peligru del nacionalismu. Por eso, lo que toca ye facer pa que «todo el mundo la conozca» (la llingua), pero refugando «la imposición que supone la oficialidad». Lo mesmo qu'enseñamos l'arte prehistóricu nun muséu, pero nun obligamos a vivir en cueves a la xente, asina podremos dar cursos de bable, pagar llibros de poetes afectos (non nacionalistes) y reínos n'asturianu na televisión autonómica, pero más nada. La doctrina Javier Fernández, menuda ayalga.