Atrás     PDF

Nun hai selmana sin muestres varies de la probetaya política, de l`alministración en xeneral y de dellos partìos políticos en particular, no tocante al patrimoniu cultural y les señes d`identidá d´Asturies.

Dempués d`echar les manes a la cabeza polos horros valtiaos en San Andrés, venimos de ver a les clares, que l`alministración nun solo nun pon interés nengún na conservación d`estes construcciones, sinon que fai polítiques que directa o indirectamente son dañines pa elles.

Esi ye`l casu de dellos concejos nos que se ta pasando a los propietarios inxustificaes notificaciones pal pagu del Impuestu sobro Bienes Inmuebles, lo que, en munchos casos, vien a ser lo mesmo qu`afalagar pa la so destruición como mediu pan nun pagar l`impuestu.

Tamién ye verdá, que nun hai sitiu pa la sorpresa porque, si un pais que ye quien a dexar arruinase los edificios mas importantes del arte asturianu, qué nun será capaz de facer con los horros.

Na llinia de la calamidà na que nos tamos convirtiendo, la UNESCO asitia l`asturianu nel so Atles de les llingües en peligru del mundu.

Vistu`l panorama, puede ser un bon momento pa que- y apliquemos al casu la mesma política que pal "minor" en Filoloxia.

Esto ye, ser mas razonables y menos repunantes, y alcordar, por exemplu, que vaigan pa lleña namás la metá los horros, que se conserve bien Santa Maria del Naranco, y que nos dexen dar clases d`asturianu nel aparcaderu de Maxisteriu.