Al Sr. Conseyeru d'Educación del Principáu d'Asturies
Xunta DireutivaAtrás PDF
Sr. Conseyeru d'Educación del Principáu d'Asturies:
La Conseyería que vusté dirixe ta acabante d'axudicar a una empresa privada l’espardimientu de la Campaña de Matriculación d'escolinos n'asturianu y gallego– asturianu nos centros d'enseñanza oficiales d'Asturies, col envís de cumplir coles obligaciones llegales impuestes a l'Alministración del Principáu d'Asturies pela llexislación vixente na materia.
Asina, per un llau, la Carta Europea de les Llingues Rexonales o Minoritaries, tratáu internacional robláu por España nel añu 1.992, obliga a les Alministraciones públiques competentes –pente elles, l'asturiana– a garantizar que la enseñanza de les llingues rexionales correspondientes s'atope en tolos planes de estudios de toles estayes y niveles educativos.
D'otra miente, la Llei 1/1998, de 23 de marzu, d'Usu y promoción del bable/asturianu, impón al Principáu d'Asturies dellos deberes llegales p'afitar la enseñanza del asturianu y promover el so usu dientro del sistema educativu.
Nesti sen, dende esta asociación encamentámos-y, como responsable cimeru de la política educativa n'Asturies, que ponga’l másimu procuru pa que la mentada Campaña seya efeutiva y s’esparda lleal y bonalmente en tolos centros educativos. Esa Conseyería tien los medios afayadizos a la so disposición pa torgar y sancionar, de pasu, sabotaxes vergoñosos, amás d'illegales, como los que asocedieron en delles escueles d'Asturies nos caberos años, de los que vusté tien conocencia dafechu poles denuncies apurríes por pás y mas de rapacinos y rapacines, enraxonaos poles conductes foínes d'algunos responsables educativos amparaos pola mesma Alministración.
Trátase con ello de torgar que se discrimine impunemente a los ciudadanos y ciudadanes qu’esixen que s'aplique la llegalidá vixente, asegurando la enseñanza de la llingua del país nes escueles. De pasu, evitaremos tamién que les perres de la Facienda del Principáu, que son les de tolos asturianos y asturianes, se gasten sólo en campañes–tapadera al serviciu esclusivu de la propaganda del gobiernu.
Taremos sollertes a lo que pase nel próximu mes de mayu nes escueles d'Asturies. Un saludu. Pol Aconceyamientu de Xuristes pol Asturianu,
Xabiel Álvarez Villa y Xilbertu Maire Fernández.