Atrás PDF
¿Qué pensaríen si daquién aneciare n’algamar una perbona “Conocecencia del Mediu” inglés, por exemplu, ensin querer oyir falar de la so cultura, llingua y lliteratura?. Pues de xuru que lo mesmo que calletró’l gobiernu español cuando’l 30 de mayu de 1975 aprobaba’l Decretu 1433/1975 d’incorporación de les llingües rexonales al sistema d’enseñanza.
Dempués, cola democracia y el tiempu, l’Estáu foi aperiando un modelu común pa toles Comunidaes Autónomes plurillingües –quitando Asturies- col denominador común darréu:
a) La cultura, llingua y lliteratura rexonales va ser asignatura común y normal en Preescolar, Primaria, Formación Profesional de Primer Grau y Bachilleratu.
b) Los pás deciden en qué llingua, castellanu o rexonal materna, reciben la enseñanza los sos fíos.
c) El rangu de norma escoyíu ye’l de Real Decretu y el sofitu l’artículu 3.3 de la Constitución Española qu’obliga a los poderes públicos a protexer y respetar a toles llingües d’España.
Por embargu, p’Asturies la regulación fadráse a lo probetayón, pente medies d’una Resolución de la Direición Xeneral de Coordinación y Alta Inspección (al cambiu, municipal en Noreña, que diría Xilimbra) y el páxaru saldrá, acordies cola xaula, ñarru: nun da posibilidá de que los escolinos reciban denguna enseñanza na so llingua materna si esta ye l’asturinu, por más que lo pidan los pás, y no que cinca a l’asignatura de llingua y cultura asturiana nun ta presente nin en Preescolar nin na Formación Profesional; na Primaria y nel Bachiller namás se pue dar si s’axunten diez pa pidila, teniendo la condición de voluntaria en Primaria y d’Optativa (el que la escueye tien qu’arrenunciar a otres como inglés, francés, cultura clásica, comunicación audiovisual, alministración y xestión…) nel Bachiller.
La discriminación llegal de la llingua y de los ciudadanos asturianos respeutu a los navarros, vascos, gallegos, baleares, catalanes y valencianos, ye nidia ya inxustificada porque nesti casu nin tan siquiera puen apurrir el masuñáu argumentu de la “non oficialidá” ya que’l sofitu del procesu, l’artículu 3.3 de la Constitución, nun estrema pente llingües oficiales y non oficiales. Poro ye una discriminación inxusta y vergoñosa que la Constitución nun refuga (artículos 1.1, 9.1, 14 y 139) y la Carta Europea de les Llingües Rexonales o Minoritaries –conveniu ratificáu por España- conderga: “Les partes comprométense a desaniciar, si entá nun lo ficieron, too dintingu, esclusión, restricción o preferencia inxustificaes con respeutu al emplegu d’una llingua rexonal o minoritaria col oxetu de desalendar o poner en pelligru’l so caltenimientu o desendolcu” (artículu 7.2).
Y siendo como ye la cosa, inconstitucional, ilegal y grave, al señor Presidente del Principáu d’Asturies nun se-y ocurre más qu’enchipase pa glayar al altu la lleva que “ta argullosu” del estropiciu.