Atrás     PDF

Empieza'l trabayu pa la reforma estatutaria depués de tres años de dar vueltes a informes. A estes altures Asturies diba tar en disposición de contar con ún de los meyores Estatutos d'Autonomía del Estáu. Pero probablemente nun sía asina, al ser la voluntá de los partíos mayoritarios na Xunta Xeneral «solventar» pela vía rápida un tema que manifiestamente nun-yos interesa -«ésta nun ye una preocupación de la ciudadanía», insisten dende la FSA y el PP- y-yos incomoda. La razón d'esa incomodidá guapamente tea na fuerte visión subsidiaria que comparten les dos organizaciones, integraes por persones que fain de la política profesión y que saben perfectamente qu'a más autonomía, más trabayu. Nun se ta acusando equí a la mayor parte de la clase política de folgazana o dalgo asemeyao, sí quiciás de conservadora, d'agarrase a un marcu normativu que yá se conoz y col que ye fácil externalizar los problemes y achacar los déficits allá a la capital del Reinu.

Ún de los temes que más-yos esmuel a entrambes les dos organizaciones ye l'estatus qu'ha dase a la llingua asturiana y al gallego-asturianu, un estatus que yá ta inventáu y aplicáu de diferentes maneres en tol Estáu y col qu'Asturies podía construir el so propiu modelu: la cooficialidá. Minimizando la so importancia, esfuércense en presentar ésta como una cuestión menor, anque realmente sía de les poques que va dar pie a una discusión fonda y, sería deseable, seria.

La FSA anecia con condicionar los derechos a la cantidá de persones que sían suxetos d'ellos, con un discursu propiu d'un colonialismu paternalista teóricamente superáu. ¿Ye la oficialidá de la llingua de signos menos necesaria pol fechu de que les persones sordes sían minoría? ¿Ha ser l'atención a les persones con síndrome de Down menor porque sían poques nel sistema educativu? ¿Han dexar de reconocese la plenitú de los dereches a les muyeres cuando éstes son quien a saltar los milenta pilancos d'una sociedá machista? ¿Son excéntriques les persones homosexuales por querer acceder a los mesmos derechos que les heterosexuales? Toes estes preguntes sobraríen en cualquier organización socialista del Estáu, pero nun ta de más face-yles a la FSA, que quier más negar hasta'l nome de la llingua -recordando a aquello de que les muyeres nun tienen alma o que los negros nun son persones- y falar d'una «modalidá llingüística» pa evitar el problema que dan les llingües nel Estáu español onde, como diz la Constitución, han ser oficiales.

Nel casu del PP sí se producieron movimientos: l'apueste pol asturianu nes elecciones de Gabino de Lorenzo nun salió precisamente reforzáu polos resultaos, pero esi fechu había ser menor pa un partíu que se supón que defende unes idees y qu'éstes, si se consideren correctes, nun han tar supeditaes a la mayor o menor rentabilidá. Ello ye que yera bono que'l PP d'Asturies diera un pasu alantre y dexara d'escondese tres de la FSA exculpándose d'una responsabilidá que ye tanto d'ún como d'otru.

Sincerar discursos, non tracamundiar a la opinión pública con argumentos falsos, informase y informar de lo que ye la oficialidá habíen ser los pasos previos nesta reforma estatutaria. Hasta agora lo único que viemos foron evasives y  posicionamientos consciente o incoscientemente desinformaos. Ye'l momentu de dar la cara y explicar a la sociedá asturiana porqué se-y pretende negar un derechu, quién, por mui representante electu que sía, se considera con autoridá pa perpetuar y afondar na aniquilación d'una cultura y una llingua.