Los negocios de la esclusión social
Xabiel Álvarez Villa
Aconceyamientu de Xuristes pol Asturianu
Les
Noticies, 02-03-08. Pp. 14
Atrás PDF
Na primavera del añu 2006 una serie de reportaxes periodísticos dexaron al descubiertu que'l 73 por cientu de los centros de reforma de menores del Estáu español taben xestionaos por entidaes privaes. Amás, tolos servicios arreyaos a estos centros, como la llimpieza, l'alimentación o la seguridá, alcontrábense axudicaos a empreses que teníen equí una fonte bayurosa de negocios paralelos a la reinserción social de los menores. El datu daba respigu porque, d'un llau, contrastaba cola situación esistente nel añu 2001, nel qu'entró en vigor la Llei de Xusticia Xuvenil, onde tolos «reformatorios» yeren de titularidá y xestión públiques y, d'otru, porque espeyaba que la execución y el control de les midíes xudiciales de privación del derechu fundamental a la llibertá de los menores taba siendo abandonáu dafecho pola Alministración Pública nes manes d'asociaciones y empreses privaes, arrenunciando -ente otres coses perimportantes- a la escoyeta del personal educativu, sanitariu y de vixilancia de los centros y a la regulación de les sos condiciones de trabayu.
El cinismu y la inmoralidá que treslluz esta situación nun tien llendes. Si na cultura xurídica española dalquién plantease güei'l proyeutu de privatizar el sistema penitenciariu d'adultos, munches voces glayaríen sobre la indecencia de facer negocios cola privación de llibertá de los seres humanos, pero agora que se conoz qu'esti modelu mercantil yá ta implantáu nel Estáu español y furrulando a plenu rendimientu económicu cola población más feble y necesitada d'amparu, respetu y proteición, lo más de la xente nun va más p'allá de sorprendese al lleer la noticia nel periódicu, y pasar páxina.
El casu de los centros d'internamientu de menores ye ún más, magar que dramáticu, nun procesu de llargu percorríu pol que l'Estáu de Derechu vien delegando n'ONGs y entidaes asemeyaes la xestión de sectores asistenciales básicos, caros y problemáticos. ¿Cómo pudo llegase a esta dexeneración del Estáu Social?. Hai que remontase a los primeros años 70 del pasáu sieglu, onde empecipia la «crisis fiscal» del Estáu del Bienestar -recauda menos de lo que gasta- y tolos fenómenos apareyaos a la «globalización económica» (dende la desregulación financiera y la lliberalización de los monopolios públicos, hasta la posterior venta d'estos al capial priváu y la «esternalización» de la xestión de los servicios públicos) pa columbrar un revuelcu total al sistema social que taba vixente.
Si nel Estáu del Bienestar el control social de los individuos necesitaos facíase, fundamentalmente, pol mediu d'un trabayu asalariáu na fábrica, onde se producíen y reproducíen los valores de conformidá col sistema, nel Estáu Neolliberal les estratexes de control de los escluyíos, que yá nun son necesarios pal sistema productivu, realícense acutando a los grupos marxinales y xestionándolos con téuniques estremaes, pente elles, les de tipu represivu.
Afítase d'esta mena un cambéu de sentíu na práutica de les polítiques de asistencia o aición social: yá nun se trata de remover o correxir les deficiencies estructurales qu'orixinen los problemes de marxinalidá o falta de recursos pa llevar una vida digna, sinón, más bien, de manexar los anicios y les consecuencies abegoses, de xestionar y controlar a los grupos escluyíos pol sistema. El control social de los probes yá nun se fai agora dándo-yos un trabayu fitu que-yos permita inxerise na sociedá de consumu, sinón precarízalos dafechu con contratos míseres y paru crónicu y adormeciéndolos con educación y televisión basura. Como válvula de seguridá, queda siempre tirar de la represión ensin cuentu (nun sistema nel que la delincuencia común caltiénse constante, la disminución de les inversiones en gastos sociales ta en rellación inversa al aumentu esponencial de la seguridá privada y de la tasa de presos).
Espolleten asina los negocios de la «esclusión social», que son l'orixen de una gran cadarma empresarial, con esistencia, espansión y caltenimientu dependientes de la propia continuidá y ampliación de los problemes sociales.
Como na parábola atribuyida al comunitarista americanu Saul Alinski, los nuevos profesionales de la esclusión social lláncense una vegada y otra al agua pa socorrer a los que se tán afogando nel ríu, pero nun se-yos ocurre empobinase ríu arriba pa saber quién nun para de tirar xente al agua.
La espansión progresiva de la xestión privada nos servicios sociales alcuentra un campu abonáu nel llamáu «tercer seutor» o de les entidaes ensin ánimu de lucru, que resuciten la vieya beneficiencia privada del sieglu XIX con sayes nueves. Frente a lo qu'a primera vista pudiera paecer, esti seutor ta formáu nuna bona parte por asociaciones de profesionales con un furrulamientu y una estructura empresarial sosteníes con fondos públicos y distribuyíes por series de negocios solidarios: familia, infancia, mocedá, muyer, persones mayores, persones con discapacidá, presos y ex reclusos, minoríes étniques, toxicómanos, refuxaos y asilaos, emigrantes y inmigrantes, etc., sin perxuiciu de la esistencia de multinacionales con aparatos bien engrasaos capaces d'abordar una gran parte o la totalidá de los tipos posibles d'esclusión social.
La última memoria espublizada pol Ministeriu de Trabayu y Asuntos Sociales correspondiente al añu 2006 recueye la esistencia d'un total de 16.813 entidaes privaes de servicios sociales rexistraes nel conxuntu del Estáu -de les que 308 taben rexistraes n'Asturies- frente a sólo 3.559 de titularidá pública, lo que amuesa una dependencia manifiesta del sistema de servicios sociales de la xestión privada.
Nun ye infrecuente tampoco nestes organizaciones la reproducción de les peores práutiques de la xestión empresarial capitalista: élites dirixentes con altos salarios, trabayadores precarizaos con xornaes y retribuciones propios de un réxime d'esplotación llaboral, torgues al derechu de sindicación, etc. A too ello hai qu'amestar la dependencia financiera práuticamente total de los fondos públicos, formalizada al traviés de convenios de collaboración coles Alministraciones Públiques y subvenciones de concesión direuta, ensin llibre concurrencia, qu'afiten una espesa rede clientelar de fidelización política de grupos privaos.
Nun va muncho que n'Asturies una ONG de profesionales del ámbitu de la infancia, financiada pola Comunidá Autónoma, punxo na cai a cuatro trabayadores incómodos pa, a los pocos díes, reconocer que los despidos yeren improcedentes y apoquinar les indemnizaciones correspondientes. Como esta asociación furrula n'esclusiva con dineru públicu, resulta que nel sofitu de la so estratexa llaboral contribuyimos tolos ciudadanos na parte que mos toca.
Otru exemplu asitiáu nesti país ayudarámos a comprender el xacíu y algame de lo que tamos falando. Trátase d'un conveniu de collaboración ente'l Principáu d'Asturies, al traviés de la Conseyería de Salú y Servicios Sanitarios, el Conseyu Xeneral del Poder Xudicial, pente medies del Tribunal Superior de Xusticia d'Asturies y una asociación d'atención a les drogodependencies, asoleyáu nel Boletín Oficial del Principáu del 28 d'abril del añu 2004 (nesti casu, la publicidá del acuerdu ye un fechu esceicional que paer querer demostrar la enchipadura de tolos intervinientes por emburriar un proyeutu tan amañosu).
L'oxetu del conveniu de collaboración mentáu ye regular el desarrollu y furrulamientu d'un programa d'intervención en drogodependencies nos Xulgaos d'Uviéu y Xixón pa les persones con esta problemática que tuvieren implicaes en dilixencies xudiciales pola comisión de delitos rellacionaos cola so dependencia de les drogues y que s'alcuentren a la espera de xuiciu o sentencia, internaos nun centru penitenciariu o en llibertá provisional o condicional.
P'armar esti perimportante serviciu social, les Alministraciones que roblen el conveniu -incluyida la de Xusticia, representada por un vocal de procedencia asturiana- escueyen a deu a una asociación sin ánimu de lucru, con méritos y trayectoria de los que nada se diz nel conveniu, namás que tien ente los sos fines sociales -¡nun faltaba más!- la intervención nos Xulgaos pa contribuyir a la solución de la problemática que xenera la comisión de delitos rellacionaos col consumu de drogues, asina como que la mesma inició la so actividá nel añu 2003.
Nel entamu del conveniu de collaboración reconozse que nel documentu públicu del Gobiernu asturianu, denomáu «Plan sobre Drogues p'Asturies 2001-2003», yá se recoyía la «puesta en marcha d'un Serviciu d'Atención a Drogodependientes nos Xulgaos» y, nun actu de tracamundiu dignu de meyor causa, la Conseyería de Salú y el poder Xudicial encomiénden-y esi serviciu a una asociación privada pel democráticu mediu del dedazu.
Pa mayor risión, el Tribunal Superior de Xusticia d'Asturies comprométese a poner a disposición d'esta asociación un despachu na Audiencia Provincial d'Uviéu y otru na de Xixón, mientres que la ONG fai lo que pue con un equipu de trabayadores formáu por un psicólogu coordinador del serviciu, un trabayador social, un auxiliar alministrativu y un téunicu de llaboratoriu con xornada amenorgada. Pela so parte, la Conseyería de Salú apurre les perres pente medies d'una subvención a favor de l'asociación: 102.503 euros pal añu 2004, 132.487 euros pal añu 2005, 136.439 euros pal añu 2006 y 142.224 euros nel 2007... y pa siguir porque'l conveniu ye prorrogable per anualidaes ensin llende temporal nenguna.
Talantamos como de la mano d'un bon padrín y col envoltoriu afayadizu, pue llegar a xestionase un serviciu social públicu y, de pasu, asegurase la propia esistencia personal. Basta que l'Alministración Pública refugue los medios y el personal propios y atope una asociación sin ánimu de lucru de confianza a la que, como ye natural, nun-y preste competir col mercáu.