Estatutos del Aconceyamientu de Xuristes pol Asturianu (AXA)
CAPÍTULU I
Denominación, duración, finalidá, actividaes, domiciliu y ámbitu territorial
Artículu 1.- Al amparu la Llei Orgánica 1/2002, de 22 de marzu, reguladora del drechu d'asociación, constitúise, por tiempu indefiníu y con capacidá xurídica y d'obrar, la nomada ACONCEYAMIENTU DE XURISTES POL ASTURIANU (AXA), con domiciliu provisional n'Uviéu (33007), cai Pérez de la Sala, númberu 22, séptimu pisu, lletra D.
Artículu 2.- Tien como finalidá'l contribuyir, desinteresadamente, al desaniciu dafechu de les torgues qu'apilanquen l'emplegu de la llingua asturiana na actividá profesional de los xuristes.
Pa ello desarrollará actividaes informatives, formatives y vindicatives, asina como cualesquiera delles otres afayadices col so oxetivu.
Artículu 3.- L'Ámbitu de la so actuación ye, principalmente, el que correspuende al territoriu de la Comunidá Autónoma del Principáu d'Asturies, ensin perxuiciu d'enanchalu al de tol dominiu llinguísticu astur.
CAPÍTULU II
De los socios
Artículu 4.- Podrá ser miembru de l'asociación cualquier xurista, con capacidá d'obrar, interesáu nel llogru de los fines sociales. Algamaráse la condición d'asociáu cola resolución d'almisión que la Xunta Direutiva dictará en cuantes compruebe que'l candidatu cumple coles condiciones requeríes.
Artículu 5.- Tolos socios tienen el drechu a participar nes actividaes sociales y a ser eleutores y elexibles na constitución de los muérganos de gobiernu, y les obligaciones de cumplir los estatutos y alcuerdos llícitos del Conceyu Xeneral y Xunta Direutiva y desendolcar con procuru de los cargos qu'ocupen.
CAPÍTULU III
Del Conceyu Xeneral
Artículu 6.- El Conceyu Xeneral, muérganu supremu de gobiernu de l'Asociación integráu por tolos socios, tien les facultaes darréu:
1ª. Xulgar la xestión de la Xunta Direutiva.
2ª. Da-y el preste a les cuentes y presupuestos añales.
3ª. Apautar el plan xeneral d'actución de l'Asociación.
4ª. Determinar cuotes ordinaries y estraordinaries.
5ª. Nomar y cesar a los miembros de la Xunta Direutiva.
6ª. Modificar los estatutos sociales.
7ª. Desaniciar l'Asociación.
8ª. Espulsar los socios.
9ª. Constituyir federaciones o integrase nelles.
Artículu 7.- Obligatoriamente, el Conceyu Xeneral tien de convocase, en sesión ordinaria, una vegada al añu y dientro del so primer trimestre, col envís d'apautar el plan xeneral d'actuación, xulgar la xestión de la Xunta Direutiva, y da-y el preste, si ye'l casu, les cuentes del añu pasáu y los presupuestos del entrante.
El Presidente convocará el Conceyu Xeneral a sesión estraordinaria cuando, al so entender, les circunstancies lo pidan, o a propuesta de la Xunta Direutiva o, por escritu, d'una décima parte de los asociaos.
Artículu 8.- La llamada a Conceyu Xeneral, seya ordinariu o estraordinariu, fadráse por escritu nel que s'espresará llugar, día y hora del aconceyamientu y temes a tratar. Tendrán de permediar un mínimu de quince díes pente'l de la convocatoria y el señaláu pa la so celebración.
El Conceyu Xeneral quedará válidamente constituyíu si a primera llamada aporten, por sí o representaos, un terciu de los asociaos con derechu a votu. A la segunda llamada constituyiráse cualaquiera que seya´l númberu de concurrentes.
Los alcuerdos tómense pola mayoría de les persones presentes o representaes, quitando'l relativu al desaniciu de l'Asociación que desixe el votu la mayoría de dos tercios los asociaos.
CAPÍTULU IV
De la Xunta Direutiva
Artículu 9.- La representación y xestión de l'Asociación cuerre a cargu de la so Xunta Direutiva, formada por un Presidente, un Vicepresidente, un Secretariu, un Vocal-Tesoreru y un Vocal, cargos toos ellos dafechamente desinteresaos.
Los sos miembros designalos y revocalos el Conceyu Xeneral, con mandatu pa cuatru años, magar puedan ser reelexíos indefinidamente.
Agotáu'l plazu de duración d'una Xunta Direutiva o pal supuestu casu de renuncia voluntaria de dalgún de los sos componentes, los afeutaos siguirán exerciendo la responsabilidá correspondiente fasta la formalización de la sustitución polos nuevos xestores.
Artículu 10.- La Xunta Direutiva aconceyaráse cuantes vegaes lo determine'l so Presidente o Vicepresidente, a iniciativa propia o por petición de tres de los sos miembros, constituyéndose cuando asista, polo menos, la metá más ún d'ellos.
N'ausencia'l Presidente, presidirála'l Vicepresidente o el Secretariu, nesi orde.
Los alcuerdos adoptaránse por mayoría. Pal casu d'empate sedrá de calidá'l votu del que la presida.
El Secretariu llevantará l'acta nel llibru al efeutu.
Artículu 11.- Son facultaes de la Xunta Direutiva:
1. Con calter xeneral, abarca a tolos actos propios de los fines sociales, quitando aquellos pa los que llegal o estatutariamente se pida autorización espresa del Conceyu Xeneral.
2. En particular, son facultaes de la Xunta Direutiva:
a) Dirixir les actividaes sociales y la xestión alministrativa y económica de l'Asociación.
b) Executar los alcuerdos del Conceyu Xeneral.
c) Presentar y someter al Conceyu Xeneral les cuentes anuales.
d) Resolver sobro l'almisión de nuevos asociaos.
e) Interpretar los preceutos conteníos nos estatutos, mesmamente completándolos no que-yos faltare, pa un casu de necesidá y siempres con sometimientu dafechu a la llegalidá vixente en materia d'asociaciones y ensin perxuiciu de la so ratificación pol Conseyu Xeneral.
f) Cualesquier otra facultá que nun tea acutada pal Conceyu Xeneral.
Artículu 12.- 1. El Presidente la Xunta Direutiva, que sedrá'l de l'Asociación, exerce les competencies vinientes:
a) La so representación llegal.
b) Convocar, presidir, dirixir l'alderique y llevantar les sesiones del Conceyu Xeneral y de la Xunta Direutiva.
c) Ordenar pagos y autorizar cola so firma documentos, actes y correspondencia.
d) Acordar midíes d'urxencia de les que dará cuenta de secute a la Xunta Direutiva.
2. El Vicepresidente, cuando sustituye al Presidente ausente por enfermedá o delles otres causes, exerce les mesmes competencies qu'aquelli.
3. El Secretariu tien al so cargu los trabayos alministrativos; lleva los llibros y ficheros; custodia la documentación; y comunica a los Rexistros competentes los nomamientos de la Xunta Direutiva y otros pautos asentables.
4. El Tesoreru dirixe la contabilidá; recauda y custodia los fondos de l'Asociación; cumple les órdenes de pagu daes pol Presidente; y formaliza el presupuestu añal y el pieslle de les cuentes de que tienen de presentase al Conceyu Xeneral.
5. El Vocal asumirá les delegaciones o comisiones que-y encomiende la Xunta Direutiva.
CAPÍTULU V
Réxime económicu, contabilidá y documentación
Artículu 13.- Los recursos económicos pal desarrollu de les sos actividaes procederán de les cuotes de los asociaos, sovenciones, legaos o donaciones recibíes, los productos que xeneren los bienes y drechos propiedá de l'Asociación y los ingresos poles actividaes qu'exercite.
Artículu 14.- El patrimoniu d'aniciu ye de 100 euros.
Artículu 15.- L'exerciciu asociativu y económicu sedrá anual y zarraráse al día 31 d'avientu.
Llevaráse una contabilidá d'acordies cola normativa aplicable y tala qu'espeye dafechu la imaxe real del patrimoniu, situación financiera y actividaes realizaes.
Pa ello, arriendes de los llibros de contabilidá, iguaráse una rellación actualizada de socios, un inventariu de bienes y el llibru d'actes de los muérganos de representación y gobiernu.
Artículu 16.- Nel casu de disolución nomaráse una comisión de remate, que se fadrá cargu de los fondos qu'hebia y pagará les deldes. El sobrante, si lu hubiere, destinarálu a fines desinteresaos y rellacionaos cola defensa de la llingua asturiana.
Disposición complementaria
En tolo non previstu nestos Estatutos, aplicaráse la vixente Llei Orgánica 1/2002, de 22 de marzu, reguladora del drechu d'Asociación, y les sos normes suplementaries y de desarrollu.
Arriba PDF