El camín d'una autonomía de «vía lenta»
Vanessa Gutiérrez
Les
Noticies, 30-03-08. Pp. 6-8
Atrás PDF
Recuperada la democracia, nel momentu en que toos buscaben consiguir la mayor autonomía posible, Asturies sorprendió a propios y estraños tirando pela fórmula de la «vía lenta» en cuenta de garrar l'artículu 151 de la Constitución pel que se podía facer col máximu techu competencial. Sicasí, equí mandó más la voluntá del consensu que l'ambición política, asina como la presión que nel momentu exercía Unión del Centru Democráticu (UCD) dende les instituciones de Madrid, posibilitándo-y remanar dende'l Congresu lo que na Comisión asturiana nun foi a pactar. Anguaño, depués de delles reformes, l'Estatutu d'Autonomía asturianu sigue mirando pa España dende «un tercer y más baxu escalón».
«El misteriu del momentu yera quién diba desarrollar el primeru'l Títulu VIII de la Constitución, y producióse una disputa realmente extraordinaria ente los ellaboradores del Estatutu de Guernica y los ellaboradores del Estatutu de Sau», comenta'l que hasta hai poco foi presidente del Congresu de los Diputaos, el socialista Manuel Marín. Contrastando l'anécdota colos archivos de la época, Marín recurda cómo l'históricu Tarradellas «cometió l'error» de querer llevar personalmente l'Estatutu de Cataluña usando la ponte aérea hasta Madrid, cola fin de ser los primeros n'algamar la so propia autonomía. Sicasí, lo que nun cuntaba Tarradellas yera cola pericia del Rector de la Universidá del País Vascu y diputáu d'Unión de Centru Democráticu (UCD), Echevarría, qu'alquiló un avión priváu nel aeropuertu de Biarritz llegando asina primero'l Parlamentu vascu a rexistrar nel Conresu de los Diputaos el so Estatutu d'Autonomía. Cuando Tarradellas apareció finalmente en Madrid, dirixóse hasta'l Congresu, depués d'instalase nel hotel Palace, llevando'l gran sofocón de la so vida cuando vio que yá se rexistrare l'Estatutu de Guernica, de tal manera que decidió volver al hotel ensin facer la inscripción. Cabriáu, Tarradellas anotó entós nel marxe del textu una perreta que diba quedar pa la posteridá: «Entregáu pol oficial de Correos al día siguiente». Poco detrás, fuera d'anécdotes y pisando coles dees de los pies sobre los escalones de la Constitución, llegaba l'Estatutu d'Autonomía d'Asturies quien, según Marín, sorprendió a propios y estraños al ser el primeru en tirar pola fórmula del artículu 143: la llamada «vía lenta». Galicia, tres del País Vasco y Cataluña, tamién esixere'l máximu techu competencial.
Sicasí, n'Asturies, unos meses enantes, el 12 d'abril de 1980, l'Asamblea de Parlamentarios y Diputaos provinciales encargada d'ellaborar el Proyectu d'Estatutu d'Autonomía terminaba los sos trabayos, remitiéndolos diez díes más tarde a la Comisión Constitucional del Congresu, quien lu aprobaría na so versión definitiva'l 15 d'avientu de 1981. Con too y con ello, la Llei Orgánica 7/1981, d'Estatutu d'Autonomía p'Asturies que se publicaba nel Boletín Oficial del estáu'l 30 d'avientu de 1981, pa ser modificada depués, foi'l frutu d'una difícil negociación. Tal y como anguaño parez que se presenta la reforma última, que socialistes y populares quieren abordar con rapidez -pa terminar enantes del branu- a cuenta de «ningunear», según se traduz nos comentarios de les partes, a la tercer fuerza parlamentaria, la coalición formada por Izquierda Xunida, el Bloque por Asturies y Los Verdes.
L'Asturies preautonómica.
Tres de pasar cuarenta años de dictadura franquista, el réxime preautonómicu instauróse n'Asturies pol Decretu Llei 29/1978, de 27 de setiembre, qu'instituyó'l Conseyu rexonal d'Asturies «como órganu de gobiernu y alministración de la Rexón» (artículu 2), presidíu pol históricu socialista Rafael Fernández. Pa con ello, y con razón de propone-y al Gobiernu los alcuerdos sobre les tresferencies de la xestión de funciones, actividaes y servicios de la competencia de l'Alministración del Estáu, creóse una Comisión Mixta de representantes de l'Alministración del Estáu y del Conseyu d'Asturies, nun momentu nel que la fuerza impulsora componíenla los partíos acabante legalizar que tuvieron representación tres de les primeres elecciones democrátiques de xunu de 1977: Unión de Centru Democráticu (UCD), Partíu Socialista Obreru Español (PSOE), Partíu Comunista d'Asturies (PCA) y Alianza Popular (AP). D'esta forma, l'1 de xunu de 1979, estos partíos políticos con representación parlamentaria na Diputación d'Uviéu decidieron formalizar l'iniciu del procesu autonómicu, formando pa ello la llamada «Comisión de los 24» (compuesta por seis representantes de cada partíu: UCD, FSA-PSOE, PCA y AP) qu'a la vez seleccionó un grupu de trabayu cola fin de redactar un Anteproyectu d'Estatutu: la «Comisión de los 8».
L'entusiasmu primeru por algamar una autonomía de competencies máximes empezó llueu a aplacar, según apunta'l profesor de Derechu Constitucional de la Universidá d'Uviéu Francisco J. Bastida, nel so artículu «Asturias. 20 años de autonomía»: «PSOE y PCA, que yeren mayoría na Comisión Redactora del Proyectu d'Estatutu, queríen siguir la vía complexa marcada pol artículu 151 de la Constitución p'algamar aquella autonomía plena, pero atoparon cola oposición d'UCD que tenía la mayoría nes instituciones estatales. AP, sorprendentemente, tamién apoyaba la vía del artículu 151 pesie a tar la dirección d'esi partíu, presidida por Manuel Fraga Iribarne, en contra del Títulu VIII de la Constitución. El PSOE nun tardó en plegar a les tesis d'UCD, respondiendo a un solapáu conciertu nacional ente les direcciones nacionales de los dos partíos. El PCA, al quedar en franca minoría, declinó seguir reivindicando l'autonomía plena, prefirió mantener la política de consensu y firmó con eses dos formaciones polítiques un alcuerdu pa llevar l'autonomía pela vía lenta del artículu 143. AP, sorprendió otra vez, desvinculándose del consensu y insistiendo na reivindicación de la vía del 151. Pa entós, ochobre de 1979, yá se tirare por constituir Asturies nuna Comunidá Auntónoma uniprovincial, na que s'acutare mesmo l'ente preautonómicu, el Conseyu Rexonal, como l'órganu provincial, la Diputación d'Uviéu. Quedaba descartada, asina, la idea d'asociar Asturies y Llión, propuesta por AP, tresformada al poco nun grupu políticu nuevu, Coalición Democrática (CD)», esplica Bastida quien asegura que la elección de la vía del 143 «marcó'l devenir de la autonomía asturiana».
Ellaboración del Estatutu.
La ellaboración del Estatutu tuvo dos fases definíes mesmo dende'l puntu de vista políticu como l'institucional: l'asturiana y la estatal. Na primera, qu'abarca dende la redacción del anteproyectu hasta l'aprobación del Proyectu d'Estatutu, intervinieron el Conseyu Rexonal y la Diputación Provincial d'Uviéu, asina como la ciudadanía al traviés de la presentación d'alegaciones nel periodu d'información pública. Tal y como apunta Bastida, la «llixera mayoría del conciertu ente PSOE y PCA impúnxose n'asuntos capitales como'l sistema electoral pa les primeres elecciones o en delles materies competenciales relacionaes col sector públicu de la economía». D'esta forma, «pesie a les formes habíes y manteníes, conservóse'l consensu na votación de la totalidá del Proyectu, que tuvo 41 votos a favor y sólo 2 en contra (CD)».
Pela so parte, la fase estatal consistió na conversión del proyectu d'Estatutu en llei orgánica, pero con dellos cambios sustanciales llograos pola mayoría que tenía UCD nes Cortes. D'esta forma, afirma Bastida, «lo que nun consiguió n'Asturies, impúnxolo en Madrid». Cambios ente los que destacó'l sistema electoral pa les primeres elecciones, quitando'l que diba nel Proyectu y implantándose'l qu'UCD y CD propunxeren p'Asturies, que se caracterizaba pola división en tres circunscripciones. A la fin, el PSOE nun tiró más pol sistema que propunxere naquel primer borrador «porque l'implantáu por voluntá d'UCD y CD siempre lu beneficia en relación con PCA-IU», esplica Bastida.
Reformes del textu.
Nel so estudiu, Francisco J. Bastida explica cómo la inicial voluntá autonomista de les fuerces polítiques n'Asturies empezó pronto a desaparecer: UCD, pela so parte, amosare'l so deséu de parar el procesu descentralizador y el PSOE viró hacia esi mesmu sentíu tres de sellar un pactu con esti partíu políticu depués del frustráu golpe d'Estáu del 23 de febreru de 1981. Al tiempu, CD, con Francisco Álvarez Cascos a la cabeza, abandonaba tamién la so reivindicación de máxima autonomía p'Asturies, quedando solu'l PCA nes sos propuestes de reforma estatatutaria que más tarde diba apoyar el Partíu Asturianista (PAS).
Mentestanto, al ser xestionáu pol artículu 143.1 de la Constitución, l'Estatutu d'Autonomía nun tardó en facer notar la so necesidá de ser modificáu, presentándose les primeres propuestes en 1988 y 1989, anque nun s'abordare la primer modificación hasta l'añu 1991, cuando se fixo una pequeña corrección respective de la sincronización del calandariu electoral col del Congresu de los Diputaos. La segunda modificación llega en 1994 con un pactu autonómicu de PSOE y Partíu Popular (PP), esta vez de cinco artículos pa incorporar les competencies tresferíes a les Comunidaes Autónomes, cosa que nun cristalizó directamente na redacción del Estatutu, sinón a traviés de la Llei Orgánica 9/1992. Finalmente, la gran reforma llegó en 1999, cola que se diz qu'Asturies equiparó les sos competencies a les comunidaes que se formaron al traviés del artículu 151, cambiando tamién nesi momentu'l títulu del Estatutu, llamándose primero «p'Asturies» y a partir d'entós «del Principau d'Asturies». Ye entós cuando se creen la Sindicatura de Cuentes y el Conseyu Consultivu, y cuando'l Gobiernu alcanza una mayor capacidá d'autoorganización al tiempu qu'en materia competencial s'inclui la xestión de la Sanidá procedente del INSALUD. Con too y con ello, pesie la posibilidá que prevé la Constitución de reformar l'Estatutu pa poder algamar el techu competencial máximu, el fechu de que nun se fixere efectiva hasta pasaos trece años (reforma de 1994) y sólo pasaos cinco más (reforma de 1999) pa una aproximación (que non igualación, como matiza'l profesor Bastida) institucional y competencial en relación con Cataluña, País Vasco, Galicia y Andalucía, Asturies nun tuvo mayores competencies al traviés de lleis orgániques de tresferencies, como pasó con Valencia y Canarias, polo que la so autonomía quedó hasta güei, en palabres d'esti constitucionalista, «nun tercer y más baxu escalón».
L'asturianu: un idioma «protexíu» siempre pero difícil d'oficializar.
L'asturianu figuró dende'l primer momentu nel Estatutu d'Autonomía, según Francisco J. Bastida. Y la evolución de la so regulación ye de sobra conocida: arrañando meyores progresives pero nun algamando nunca'l carácter d'oficial. D'esta manera, el constitucionalista explica que yá cuando se debatió'l proyectu d'Estatutu foi oxetu de discusión los términos nos qu'había de mencionase esti idioma, «nun apostando nengún grupu de l'Asamblea redactora pola so cooficialidá, pero unos con mayor entusiasmu (PCA y en menor midida'l PSOE) y otres con menos (UCD, AP) queríen qu'apareciere nos artículos preliminares del Estatutu y non sólo como oxetu de protección cultural dientro del elencu de competencies autonómiques». A la fin, cuayó l'artículu 4 («El bable gozará de protección...») y l'artículu 10.1, de «Fomentu y protección del bable nes sos diverses variantes que, como modalidaes llingüístiques, s'usen nel Principáu d'Asturies», pel que se dictaron delles normes como la creación de l'Academia de la Llingua, la Comisión asesora pa la normalización llingüística, o el Rexistru Xeneral de capacitación en llingua asturiana y gallego-asturiano. Too venceyao al campu cultural hasta qu'en 1998, enantes de la última reforma del Estatutu, s'aprueba la Llei 1/1998 d'Usu y Promoción del Bable/Asturiano.
Diendo más allá de la conservación, esta llei, según comenta Bastida, reconoz determinaos derechos: l'usu del asturianu nes comunicaciones orales o escrites col Principáu; la posible valoración del so conocimientu n'oposiciones y concursos convocaos pola Alministración; la posibilidá de redactar nesti idioma les publicaciones oficiales, y la so proyección na enseñanza, ente otros. «Dalgunos autores consideren que la llei aprobóse ensin el suficiente aval estatutariu, porque foi na reforma de 1999 cuando s'añedió al artículu 4 un apartáu 2 que diz "una Llei del Principáu va regular la protección, usu y promoción del bable", explica'l profesor de Constitucional, quien tamién expón que la mayor crítica ye que, con independencia d'esta reforma, la llei sigue siendo duldosamente constitucional, yá que vien a establecer de manera encubierta una cooficialidá balnda. dende'l puntu de vista políticu la crítica que se puede facer ye qu'una llei de tanta trescendencia s'aprobare ensin consensu parlamentariu y como simple momeda de cambiu del goiernu autonómicu del PP en pagu al PAS (con un diputáu) pol so apoyu a la llei de presupuestos pa 1998», remata Bastida. Con too y con ello, tamién afirma que la reivindicación parlamantaria d'IX-Bloque-LV «nun ye pa desdeñar» anguaño, cuando «oponese a la promoción y usu oficial del asturianu ye políticamente incorrecto».