Atrás     PDF

Nel Estáu español, y como non n'Asturies, ta poniéndose últimamente de moda consultar les decisiones polítiques importantes a comisiones d'expertos o de xuristes, quien tres un profundu estudiu de les órdenes impartíes por quien los noma, terminen diciéndo-y a la xente, a la sociedá, lo que puede y lo que nun puede ser, y ello non porque lo diga'l gobiernu de turnu, sinón porque ye asina (expertos dixit). En fin, tendría que tar de más recordar que nel procesu lexislativu la función de los xuristes y consultores en xeneral había ser únicamente la d'articular técnicamente la voluntá popular previamente expresada, pero nunca condicionala nin intoxicala d'antemano con argumentos seudotécnicos. Esta forma de lexislar califica por sí sola tanto al gobiernu que la emplea como a los xuristes y consultores que se presten a ello, pero sobre tou pon de manifiestu una vez más la autosuficiencia corrupta d'una alministración como la del Principáu d'Asturies que si nunca llegó a contactar totalmente col ciudadanu, lleva camín de difuminase del tou pa volver a convertise en cenicienta, o sea en diputación. Y ye que'al nuestru Presidente Vicente, pa la reforma del Estatutu asturianu, nun sólo ye que nun-y interese la opinión de los asturianos, ye que trata d'acallala con dictámenes mercenarios como los aireaos estos díes atrás. El problema que los asturianos tenemos con Vicente Álvarez Areces y cola actual dirección de la FSA nun ye sólo que desprecien la llingua y cultura propies. El problema ye que tienen una visión totalitaria d'Asturies y de los asturianos onde por nun caber nun cabe nin la opinión d'éstos. Y esto que digo nun ye nin broma nin esaxeración, ye la realidá política na que vivimos. A partir d'equí, cadún ye llibre de poner cuernos y rabu a quien quiera. Yo téngolo mui claro.