Atrás PDF
Asistimos estos díes a ún de los fechos más escandalosos de la vida cultural asturiana: la negación de la Universidá d´Uviéu a que los estudiantes que llibremente lo escueyan puedan cursar estudios de Filoloxía Asturiana. Y ello, xustamente, cuando entama´l mandáu d´un Rector que prometiere a lo llargo de la campaña electoral asitiar estos estudios dignamente nos planes académicos, agora en revisión pola mor de la necesidá d´adautación al Espaciu Européu d´Educación Superior (EEES).
Tenemos que dicir, nesti sen y en primer llugar, que la decisión de la Facultá de Filoloxía de facer desapaecer toa mención a la llingua asturiana na propuesta de planes d´estudiu ye dafechu nula por illegal, darréu que va a la escontra del espíritu y la lletra del artículu 17 de la Llei 1/98 de 23 de marzu d´Usu del Asturianu. Y ye que, como ye sabío, pue haber decisiones democrátiques pero atentatories escontra l´orde llegal y, como nel casu que nos ocupa, escontra otros principios tan básicos como nos calteníos na Declaración Universal de los Derechos Humanos (1948) y na Declaración Universal de los Derechos Llingüísticos (1996).
Pero ye qu´amás la decisión de la Facultá vien acompañada d´unes reacciones y d´una llinia argumental que la fain inda más insoportable y dañible. Asina, Ana Rosa Migoya, la portavoz del Gobiernu d´Asturies -que habría respir polos derechos de los ciudadanos asturianos nesti terrén- fala de "respetar la decisión democrática de la Universidá", escaeciendo que´l Principáu enxamás movió un deu pa respetar y poner en práutica, a lo llargo de venti años, la decisión anterior, tamién democrática, de pidir una especialidá de Filoloxía Asturiana.
El Rector, pel llau de so y nun exerciciu intelectual de difícil comprensión, culpa a los autores de la propuesta, ye dicir al Equipu Decanal y de mou especial a la Decana, que dimite xustamente a causa de la votación negativa de la Xunta de Facultá, del resultáu final del procesu. Desconoz, a lo que paez el señor Rector, los descomanaos esfuerzos qu´Ana Cano vieno llevando alantre a lo llargo los años a favor, non solo de la Filoloxía Asturiana, sinón de tolos estudios filolóxicos presentes na Universidá d´Uviéu. Ye llibre´l señor Rector d´amosar nestos murnios momentos la más fonda insensibilidá y el despreciu al llabor d´ Ana Cano a lo llargo de tantos años de xestión universitaria, pero los que la conocemos enxamás dexaremos d´emponderar la so dedicación ensin llendes a la Facultá de Filoloxía y el so insobornable compromisu personal cola llingua y la cultura d´Asturies.
Nun son almisibles, dende llueu, nuna sociedá democrática y tolerante, dalgunes reacciones aisllaes como l´apaición de cartelos insultantes dirixíos al profesor Félix Fernández de Castro, promotor de la enmienda a los planes d´estudiu que recoyíen la presencia de les asignatures d´asturianu, y muncho menos la entrada violenta de siniestros matones nel so despachu universitariu. Agora bien, si refugamos con puxu estes conductes tamién tenemos que refugar dafechu l´argumentariu, esplícitu o implícitu, del profesor: nin l´Equipu Decanal quería facer del asturianu una "llingua nacional" n´Asturies, nin los que defendemos con convicción la recuperación cultural d´Asturies y l´exerciciu de los nuesos derechos llingüísticos somos "terroristes". La llibertá d´espresión ye "sagrada" y más en cuestiones como de les que falamos equí, pero convendría llevala a la práutica cola prudencia esixida nun tema que xenera tantes implicaciones emotives. O ye que vamos tornar otra vuelta al miserable eslógan que tanto espardió nel so momentu´l sector más anti-asturianu de la filoloxía asturiana y que caltenía que (sic) "detrás del bable están las metralletas"? Del conflictu derívense tamién otres manifestaciones carauterizaes pol so ensañamientu, irracional ya irresponsable, con Ana Cano, non tanto por ser Decana de la Facultá de Filoloxía como por ser Presidenta de l´Academia de la Llingua Asturiana. L´intentu, a lo que paez ye aprovechar la ocasión pa "desestabilizar" a la institución llingüística. Nun ye difícil, nesti sen, conocer l´orixe y la estratexa de los actores que la protagonicen. Llamentablemente pa les sos intenciones, l´entamu, como n´otres ocasiones, fracasará dafechu desque l´Academia de la Llingua Asturiana ta y tará siempres al llau de la so Presidenta, Ana Cano.
Hai que dicir, a lo cabero, que la responsabilidá cimera nuna solución xusta pa la presencia de la Filoloxía Asturiana na Universidá d´Uviéu tienla l´Equipu Rectoral y el Gobiernu del Principáu d´Asturies. No que cinca al primeru, D. Vicente Gotor tien una perbona oportunidá pa facer efeutives les sos promeses electorales, incluyendo, por cierto´l valir llegal de los escritos que se-y presenten a la Universidá n´asturianu y que güei mesmo ta incumpliendo de mou consciente. No que cinca al segundu, el Gobiernu tien la responsabilidá de curiar que la llexislación s´asitie na Universidá y que, darréu d´ello, la llingua asturiana algame l´emplegu y l´estatus docente y d´investigación que recueye la Llei d´Usu del Asturianu de 1998 y los mesmos Estatutos de la Universidá d´Uviéu de 2003.