Atrás     PDF

D'equí a poco na Facultá de Filoloxía va volver debatise'l status del asturianu na estructura de les titulaciones de grau. El batifondu producíu pol resultáu inesperáu y frustrante de la xunta pasada, el desconocimientu de delles claves internes o la frivolidá cola que s'usen dellos términos vien propiciando una serie de discutinios que convenía esclariar col envís de que'l llector pueda formar críticamente el so propiu xuiciu, llibre de tracamundios y malicies. Veamos, entós, el mapa xeneral de situación.

La reforma de titulaciones implica un complexu procesu administrativu con una serie de fases que van acutando progresivamente'l marcu d'actuación hasta la definición postrera y precisa de los nuevos graos. La culminación de caúna d'estes fases establez un puntu de non torna nel que les posibilidaes refugaes de mano yá nun pueden volver plantegase, nun siendo qu'un determináu trámite sía impugnáu.

La primer fase del actual procesu venció na xunta de xunu pasáu, na que s'aprobó la propuesta del equipu decanal d'entós consistente en cinco títulos de grau (Llingua Española, Estudios Ingleses, Estudios Clásicos, Estudios Románicos y Llingües Modernes) y el repertoriu de maiores y minores. Na prósima xunta, van tener que dir perfilándose estes titulaciones dientro del esquema yá aprobáu, del que, como se conoz, escluyéronse los estudios asturianos.

La reintegración d'éstos a les titulaciones de Filoloxía foi, sicasí, el tema central del llabor desenvueltu dende'l branu na facultá y el propiu rectoráu, siendo'l problema decidir qué fórmula ye l'afayadiza. Según distintes postures conocíes estes últimes selmanes, postúlense varies:

1. Un Títulu de Grau en Filoloxía Asturiana, grosso modo una llicenciatura actual. Esta propuesta esixida por delles asociaciones ye agora inviable por una razón cenciella: porque nunca foi contemplada ente les propuestes de la Facultá. Nel actual procesu, entamáu pol anterior equipu decanal, nunca se propunxo un Grau en Filoloxía Asturiana y, poro, nun s'incluyó nel catálogu de títulos votáu en xunu, polo que yá nun llega a tiempu de considerase.

2. El maior ye'l bloque básicu de caúna de les titulaciones: un conxuntu de 120 creitos que se combina con un minor de llibre elección. Anque s'entamó dende lo primero un ciertu alderique (qu'entá sigue) ente les opciones de minor y maior pal asturianu, esti discutiniu ye irreal: como col títulu de grau, na actual reforma, dende'l so arranque col decanatu d'Ana Cano, nunca se propunxo un maior d'asturianu, polo que nunca se discutió la so incorporación al catálogu de maiores de Filoloxía, y vuelve llegar tarde pa ensertase na fase actual. Ye, entós, otra opción agora inviable.

3. La titulación Llingües Modernes constituise sobre un maior que, al tiempu, integra dos bloques independientes: una Llingua A (de 72 creitos) y una Llingua B (de 48). Les asignatures de la B esgácense del mesmu programa de la Llingua A y constituin tamién lo que se conoz como minor. D'ufiertase l'asturianu como Llingua A, tendría entós 12 asignatures y tamién combinable como Llingua B y como minor. Esta foi precisamente l'apuesta d'Ana Cano pa la integración del asturianu nes nueves titulaciones, al pie de llingües como alemán, portugués o italianu. Foi, coles mesmes, la opción valtada na votación de xunu. Como ésta nun foi impugnable, el so resultáu ye firme y fai inviable xurídicamente la so recuperación na actual fase del procesu.

4. El minor ye un bloque de 48 creitos (8 asignatures) combinable colos maior de les distintes titulaciones. Un minor d'asturianu podría entós estudiase opcionalmente dende Estudios Ingleses, Llingua Española, Estudios Románicos, ya inclusive Llingües Modernes, al nivel d'una Llingua B.

La opción del minor foi tamién parada na votación de xunu, pero como se fexo ensin estremalu dientro d'un mesmu paquete cola opción de Llingua A, sí ye posible recuperalu con una nueva votación. Esa ye precisamente la propuesta del nuevu equipu y, como se ve, na práctica, la única opción viable nesti momentu. Esto tien que quedar claro: independientemente de que preste más o menos, la dixuntiva que tenemos qu'encarar d'equí a unos díes na Facultá de Filoloxía ye simple y llanamente si aceptamos la presencia de 8 asignatures d'asturianu como minor o lo escluyimos dafecho de les nueves titulaciones. Y nun hai sitiu pa l'ambigüedá.

¿Ye abondo'l minor? Anque vien dándose-y una cierta mala fama nel mundu asturianista, como un agraviu y una especie de refugaya de los programes d'estudiu xenerales, naide d'esta sensibilidá reniega de palabra del minor que, en realidá, faía parte de la propuesta orixinal d'Ana Cano. El discutiniu céntrase más en si los 48 creitos son abondo pa delles finalidaes formatives, particularmente pal profesoráu de secundaria.

El valor del minor ye relativu a la comparanza que s'escueya. Oxetivamente, el minor nun algama los 120 créditos del maior d'inglés o español nin los 72 d'otres llingües modernes propuestes como Llingua A, que yera la primer opción prevista. Dende'l puntu de vista aritméticu, hai poco qu'apostar nesti puntu: baxamos de 12 a 8 asignatures al son de la propuesta rechazada en xunu. Pero hai otros análisis posibles: por casu, según ye la situación actual (con solo 3 asignatures disperses) el minor representa una meyora bultable dientro de la enseñanza reglada.

Con relación a la non reglada, la primer ventaxa ye evidente: el so propiu status académicu, homologable al restu de titulaciones, y la so perfecta integración nos nuevos graos (nos que ye accesible dende toles carreres), frente a los títulos propios de postgráu qu'impliquen una carga adicional de trabayu y costes a los estudiantes. En cuantes al conteníu lectivu, si'l referente ye l'actual títulu d'especialista, son varies les consideraciones. El títulu actual tien 56 créditos frente a 48 del minor. Sicasí, esta comparanza ye engañosa, cuidao que'l conceptu de creitu cambia cola reforma: si agora son 10 hores presenciales, el nuevu creitu ECTS supón 25, 10 presenciales y 15 amestaes pal llabor tuteláu del estudiante. Naturalmente, la conversión d'ún a otru modelu nun ye tan simple como echar ensin más una multiplicación coles hores d'unos y otros (que daría 560 hores nel títulu propiu actual frente a 1200 del minor): trátase d'un nuevu conceptu de docencia qu'enfrenta al profesor al retu de dar daqué más que doctrina y fotocopies a unos alumnos qu'apigacen nun aula, implicándose más nel trabayu y les orientaciones fora d'ella. Dicho otra manera: d'equí p'arriba, profesor y estudiante van tener que trabayar más per cada creitu y el potencial formativu de les asignatures ye mayor. Poro, ensin ser probablemente lo ideal, arriesgamos poco al afirmar qu'un minor bien plantegáu puede ameyorar bien d'ello la ufierta formativa actual del títulu d'especialista.

Como se ve, les posibilidaes teóriques son tales que siempre podrá buscase una qu'ameyore o empeore l'anterior. Evidentemente, nunca debe perdese la perspectiva afayadiza p'ameyorar les posibilidaes docentes del asturianu na Universidá que, otra manera, nin escosen na propia estructura de los graos nin consisten nun puru embalagamientu de creitos y asignatures, sinón más bien nun planteamientu estructural intelixente y realista. Toos tamos nesa perspectiva de meyora y diba ser miserable plantear el debate como una guerra cósmica ente bonos y malos, de les qu'ún yá va sabiendo más de lo que realmente-y prestaría. Sicasí, a eses espectatives de meyora nada contribui la desinformación. La opción minor igual nun ye l'ideal al que podíemos aspirar na actual reforma, pero, al son de les circunstancies conocíes, ye güei una apuesta obligada que, nuna mala, encarrila los estudios d'asturianu na enseñanza reglada y déxanos siguir teniendo posibilidaes de futuru. Que, naturalmente, tendremos que saber merecer por trabayu y capacidá.