Atrás     PDF

Según el xuez de lo Contencioso-Alministrativu númberu 3, d'Uviéu don Miguel Ángel Carbajo Domingo, y acordies cola sentencia por él firmada de 23 de marzu de 2010, los funcionarios asturianos nun son ciudadanos. Asina de claro. El quedóse más anchu que llargu, y el común de los mortales plasmamos ante tala aseveración.

Pa la so Illustrísima un funcionariu asturianu nun puede mandase de la llingua asturiana pa pidir al so superior un permisu médicu; eso sólo ye pa los ciudadanos.

O tamos toos llocos o equí dalgún ta faciendo nun sé qué fuera la pota.

Y lo más grave de too ye que esa 'sentencia', (sic) carente de toa basa llegal y enllena de prexuicios pa cola llingua asturiana y los sos usuarios, dictase unos díes namái depués que'l Tribunal Constitucional casique por unanimidá, dixere xustamente lo contrario.

Nun puede ser que un derechu democráticu como ye'l llibre emplegu de la llingua materna, quede al albur o criteriu d'un xuez. L'asturianu tien de ser yá reconocíu oficialmente como llingua propia d'Asturies, y los derechos de los falantes deben ser yá reconocíos igualmente. Esa especie de llimbu xurídicu nel que dellos, mui minoritarios, quieren dexar que muerra l'asturianu ye intolerable una sociedá democráctica y moderna.

La llingua asturiana ye un patrimoniu inmaterial que pertenez a toos los asturianos, usuarios o no de ella, y el so emplegu ye un derechu que nun va contra naide. L'asturianu como llingua oficial tien de ser un puntu de xuntura de toos, pa que aquél que-y pete pueda empleaga llibremente, ensin imposiciones que naide nun quier, ensín ser castigáu nin discrimináu por ello.

Conculcar derechos nun paez el camín más afayaízu. Esti xuez enquivocóse y la so sentencia ye cenciellamente un despropósitu.

El Tribunal Constitucional reconoz que la Llei d'Usu del Asturianu, que mós avera a la oficialidá ya perfeutamente llegal, y los ciudadanos tienen derechu a emplegala y a ser atendíos pola Alministración. Y cuando fala de ciudadanos nun discrimina ente funcionarios, gaiteros, socios del Sporting o productores d'Afuega'l Pitu.

De l'actitú del Gobiernu asturianu val más nun falar. La so falta d'altura intelectual y cultural, cuando non la mala fé, ye ximuestra del so yá tradicional proceder siempre a la escontra de los derechos llingüísticos de los asturianos.