Atrás     PDF

Depués del apueste del candidatu popular, gabino de Lorenzo, pola oficialidá muncha xente parez tar descolocao. Hai qu'entendelo; ye normal. Llevamos demasiaos años viendo natural lo que nun lo ye; demasiaes lexislatures achaplaos pol despreciu de los nuestros dirixentes al nuestru patrimoniu cultural y demasiaes reformes del nuestru Estatutu d'Autonomía ciarraes en falsu. Por eso, agora que la cosa empieza a normalizase -agora que los políticos empiecen a entender que nun se puede despreciar continuamente una xusta demanda cívica- nosotros, los ciudadanos, siguimos escépticos.

Y nun podemos siguir escépticos. Tenemos el derechu, y el deber, d'alegranos por esti pasu históricu. Ye un momentu importantísimu pasl asturianismu. Un cambiu pa meyor. Y ye que, visto en perspectiva, vamos ganando. Hai trenta años, de los cuatro grupos qu'algamaron representación institucional, nun había ún que defendiera al nuestru idioma como se merecía. Perdíemos cero cuatro. Cásique quince años depués, consiguimos colar na Xunta Xeneral un diputáu asturianista. Empezamos a remontar el partíu. Pero adulces, mui despacín; namás que ún pa cuatro. Al poco, cola desaparición del CDS y el cambiu d'opinión d'Izquierda Xunida, la proporción pasó a dos pa dos. Un empate. pero eso sí, un empate en falsu, porque en númberu d'escaños la desproporción siguía siendo bultable. Y asina llegamos a la última reforma del Estatutu onde los dos equipos minoritarios quedaron n'orsai; fuera de xuegu.

Depués, cola entrada y la salida de la URAS, el nuestru marcador particular volvió a quedar nun desesperante ún pa dos. Volvió achaplanos la desesperanza y asina taben les coses cuando se planteó esta viniente reforma del Estatutu. Por eso entiendo mui bien l'escepticismu. Pero por eso mesmo tenemos que saludar colos brazos abiertos esti cambiu de postura del PP. Nun sé si nos tamos decatando, pero, pola primer vuelta en trenta años, vamos ganando. Vamos ganando dos pa ún. Vamos ganando, señores.

Tamos tan poco avezaos a ganar, que nun sabemos nin cómo actuar. Eso sí, hai una cosa buena: polo menos nun tamos cayendo na sinsustancia. Nun nos dexamos embaucar pol primeru que llega. Y eso ye bueno. Pero cuidáu, porque d'ehí a ser unos desagradecíos hai un pasu. Pero insisto en que tenemos que recibir esto como se merez. El PP ta posicionándose a favor de la oficialidá; ye un pasu históricu y l'asturianismu tien que saber enseña-y tol so agradecimientu. Les palabres del Conceyu Abiertu pola Oficialidá saludando la midida fueron mui clares nesti sentíu y yo quiero sumame a elles. Ye más, quiero ser más esplícitu tovía y por eso digo públicamente: gracies PP; agora toca la FSA.