Atrás PDF
L’autu del Tribunal Constitucional da un respiru a los sufríos defensores del bable –términu que’l TC parez consagrar y a mi nun me parez mal-. Toca felicitar a Xurde Blanco y a Xuristes pol Asturianu, y toca tamién pidir a los responsables del Principáu qu’actúen en consecuencia: que cesen a dalgún de los responsables d’esti esbariazu monumental, nún tema sensible qu’afecta a derechos fundamentales de les persones, y dexen de xiblar a les barbaes. Tou parez indicar que desde’l Gobiernu asturianu, a más de ñega-yos a los funcionarios la posibilidá d’usar la llingua, vulnerando de forma evidente la llei, afalóse a un xuez -¡adiós a Voltaire!- a presentar un recursu d’inconstitucionalidá contra una norma autonómica, la Llei d’Usu; que nun tien nenguna simpatía dientro del PSOE; dalgún dirixente, como Bernardo Fernández, yá dexó claro cuantayá la opinión que tien al respective.
Ye curiosu’l tratamientu informativu que se-y da a la noticia. Evítase citar la raíz del problema, y al actor principal d’esta opereta. Óbviase la cuestión de fondu, y incídese no que yá sabíemos: 1) Que n’Asturies hai una llingua diferente a la castellana. 2) Que la Llei d’Usu ye llegal, y 3) Que los ciudadanos pueden dirixise a l’alministración nel idioma propiu. Queda ñidio tamién que’l partíu gobernante inclínase más por poner pegues que por facilitar les coses, de magar que’l frenu afecte a una materia tan sensible como la llingüística. Tan patente como que nun almiten la evidencia, magar qu’ésta venga avalada pol TC.
En realidá la triple noticia, más qu’actual, parez de 1998. Lo que rescampla de la resolución del TC ye qu’esiste una premeditada resistencia al cumplimientu de la llei por quien debería precisamente velar pol so cumplimientu. Esta ye una derrota de la intolerancia y de les práctiques que promueven el cinismu políticu. “N’Asturies la xente nun quier imposiciones”; claro, nin en La Patagonia. Lo que nun quita pa que los ciudadanos s’apauten pa reglar lexítimamente la convivencia d’una forma coherente y respetuosa. A naide-y gusta que lu miren por rayos nel aeropuertu, pero hai que jodese.
El PSOE asturianu nun quier imposiciones como les qu’ocurren n’otres comunidaes nes que gobierna… ¿Quién gobierna en Cataluña? ¿Y en País Vascu? ¿Qué propugna’l PSOE gallegu? ¿Quién decidó ampliar la zona vascófona en Navarra?
Pero nun nos engañemos, el problema sigue vivu. La situación de la llingua nun se resuelve –solo- nos tribunales, con ser importante la vía del recursu xudicial, sinon na cai y nes instituciones, dos espacios inhóspitos pal asturianismu, atrincheráu nuna obsoleta Llinia Maginot, dende la que nun s’acolumbra a los ciudadanos en xeneral, a los amigos de la causa, y tampocu a los adversarios.