Los límites históricos d'Asturies y los límites alministrativos

Xaviel Vilareyo y Villamil
Aconceyamientu de Xuristes pol Asturianu

Atrás     PDF

Asturies ye unu de los territorios históricos que tien los sos límites espaciales tradicionales más claramente finxaos y delimitaos. L’ámbitu históricu d’Asturies nun pue ser más precisu y afitáu: Les Asturies son la tierra comprendía ente’l cursu enteru del ríu Eo hasta’l ríu Miera y dende los puertos de montaña divisorios de vertiente d’agües hasta la mar atlántica.

Esti territoriu históricu de lo que ye Asturies sodivídese  asinamesmo en dos: l’Asturia d’Uviéu y l’Asturia de Santillana, l’Asturies occidental y la oriental de les qu’el ríu Deva fai xuntura más que separtación. Del Eo al Miera, del Picu Miravalles al Puertu Piedrasluengas hai una llinia trazada pola historia milenaria d’un territoriu que se noma a si mesmu como Asturies.

Sin embargo los límites históricos de les Asturies van alterase y recortase minorizando darréu’l so ámbitu cultural mediante una dixebra alministrativa frutu de la reorganización racionalista y centralista llevada alntre pol Estáu lliberal hespañol emerxente a partir del constitucionalismu de 1812 qu’aspiraba a camudar dafechu tola estructura y organización territorial de la vieya monarquía hispana pero que por vaivenes políticos nun pudo materializase hasta 1834 cuando se creen les nueves provincies d’Uviéu y de Santander. Los límites orixinarios d’estes dos provincies sufrieron un cambiu debío a les constantes y series protestes de dellos conceyos allugaos nel valle del Deva, como foi el casu de Tresviso, Ribadedeva y Peñamellera, que reclamaben con insistencia el so deséu de pertenecer a la provincia d’Uviéu, a pesar de la so mayor prosimidá xeográfica cola ciudá santanderina, elexida nueva capital provincial en detrimentu de Laredo, capital histórica que reclamaba pel so llau los derechos de capitalidá y el tamién nome oficial de la provincia. Asina, los conceyos más occidentales de les Asturies de Santillana sentíense más vinculaos por afinidá cola provincia ovetense que cola nueva provincia santanderina que terminó por axuntar territorios enantes  pertenecientes a Palencia y Burgos pa poder facer asina una provincia mayor y de más estensión y pesu económicu. Les protestes poles nueves divisiones provinciales dieron como resultáu que los conceyos de Ribadedeva y Peñamellera pasaren pa la provincia d’Uviéu por un Real Decretu.

Les llendes alministratives tanto civiles como relixoses vienen acutando a lo llargo la historia diversos marcos territoriales más o menos estables o precisos y dixebrando sobre'l papel mesmo a valles que poblaciones.

Los dominios de los señoríos medievales, eclesiásticos y civiles, foron desllendando y marcando si cabe los ámbitos del ethnos, obligando a la población a enraigonase na tierra, a desplazase a unu o otru centru o capital si quería pleitear o tratar cola Alministración y creando la so hestoria alredor d'unes llendes marcaes polos espacios del dominiu y de la influencia señorial sobre los  valles asturianos, acutaos especialmente pola orografía y pola mar, verdaderos marcadores de fronteres nel pasáu, especialmente nos duros meses d’iviernu.

Asina conocíense polo tanto a Les Asturies: había una Asturies d'Uviéu (del ríu Eo al Deva) y una Asturies de Santillana (del ríu Deva al Miera), dixebrada tan sólo polos dominios de la propiedá monástica y por títulos de propiedá y tamién polos  pleitos de llendes episcopales ganaos o perdíos por unu o otru obispáu, pero non por ello el pueblu resultó dixebráu continuando si cabe cola so hestoria común, xeografía compartida, mitoloxía, costumes, vezos, llingua o ethnos común: l'ethnos de Les Asturies, l’asturianidá en definitiva. Tanto los d’Uviéu, los de la mitra ovetensis, como los de Santillana  considerábense asturianos y como asturianos se dicíen.

Col tiempu l'ambitu del ethnos asturianu, l’ámbitu espacial de l’asturianidá, va perdiéndo terrén pel Este debío a influencies tanto sureñes como orientales pero inda güei caltiénse esti marcu obxetivu  y tamién si cabe subxetivu, especialmente nos valles del Deva y Nansa.

Na Alta Edá Media les divisiones alministratives de la corona yeren enforma arbitraries y nun van responder a realidaes xeográfiques o hestóriques consolidaes sinón a conveniencies de tou tipu. Asina les Asturies d'Uviéu formaben una sola unidá alministrativa (nomada en términos oficiales condáu o merindá) llueu d'esgayase de la merindá de Lleón en 1369. Pol contrario, territorios como La Llébana y Pernía (güei norte de Palencia) formaron una sola merindá alministrativa. Otru exemplu de la irracionalidá de les llendes alministratives ye la de la merindá o provincia de Toro que hasta 1803 taba formada por dellos territorios discontinuos y alloñaos ente sí. La organización eclesiástica del territoriu sobreponíase y yera diferente a la civil y tampoco siguía unos parámetros d'estremadures culturales, climátiques o llingüístiques.

Uviéu foi arzobispáu, penriba los obispaos de Lleón  y Astorga, recuperando con ello una lexítima aspiración y la so superioridá hestórica debío al antigu Reinu como sede primada y metropolitana . Les llendes orientales del obispáu d’Uviéu llegaben hasta San Vicente de la Barquera, nel territoriu  de les Asturies de Santillana, pero per otru llau, La Llébana que pertenecía xeográficamente a esti teritoriu hestóricu anque col derechu de merindá propia debío al so peculiar aisllamientu orográficu, formó parte de la diócesis de Lleón y del arcedinazgu de Saldaña, mentantu que Santander, hasta que llogró un obispáu propiu dependió como territoriu  del obispáu de Burgos dende los pleitos ganaos al d’Uviéu nel sieglu XII.

Nesti sentíu los límites políticos, alministrativos y eclesiásticos foron cambiando col tiempu nun sentíu o notru pero nun hai que confundir estos límites col ámbitu propiu del ethnos que ye’l qu’intentamos desplicar equí, anque sí que puen llegar a condicionalu nun tienen por qué ser equivalentes. Quier ello dicir qu'el fechu de que fuera'l ríu Deva la llende ente les dos Asturies débese a necesidaes referenciales y a los fechos y datos continxentes, como son los títulos de derechos de propiedá monásticos sobre la tierra o la vieya sentencia nel pleitu de la mitra d'Uviéu contra Burgos, y non a fechos dixebradores de la realidá obxetiva y cultural del ethnos. Sólo un mui llargu procesu temporal y una educación o adistramientu de la población pue alterar l'ethnos camudando estos finxos delimitadores orixinariamente arbitrarios y utilitarios en nueves señes d'identidá diferenciada, en fronteres,  o incluso en compartimentos estancos dientro del mesmu ethnos que torguen el so desenrollu evolutivu en pareyo.

La propia delimitación del ríu Deva como llinia divisoria imaxinaria de les dos Asturies nun dexa de ser un exemplu de que la historia de los pueblos dibuxa ámbitos utilitarios de referencia espacial pero tamién que la hestoria de los Estaos modernos nun se va establecer precisamente por mediu d’estos marcos míticos, románticos o lliterarios sinón por llinies divisories de departamentos o provincies que a la llarga van dixebrar a los individuos como suxetos alministraos, empobinaos pa dientro d’una o d’otra demarcación territorial milimétricamente prefixada nun mapa.  Cualquier visitante que conoza el valle  del Deva decataráse qu’esti  sonsoneru cursu d’agua pue  facer tou tipu d’usos menos el de frontera, puesto qu’esti valle asturianu y llebaniegu ye en si mesmu una unidá indixebrable físicamente. D’ello derívase polo tanto que l’afirmación repetida de qu’Asturies termina nel ríu Deva nun pue ser cierta, ye una media verdá según lo qu’entendamos por Asturies o en tou casu nun ye más qu’una convención imaxinaria yá que nel valle llebaniegu nun s’estremen les orielles o riberes sinón que son más bien los cordales los que marquen les distancies y en tou casu la pertenencia al ámbitu del ethnos asturianu ye clara. Nel casu del territoriu de la Llébana, xugaron más otros factores a la hora de l’adscripción de tol valle a la provincia santanderina como’l factor d’equilibriu o equiparación territorial coles importantes provincies ovetense y bizacína, pa lo que se debió amestar a esta nueva provincia intermedia tierres esgayaes de Burgos, y ello a pesar de la durísima oposición surdida dende l’ámbitu burgalés. Asina foi cómo se creó la provincia de Santander, unes tierres que dende vieyo llucharon siempre por separtase del dominiu de Burgos, por diferenciase de Castiella y tamién hai que reconocelo siempre ficieron por reclamar una equiparación competencial y una mayor entidá que pudiera equiparales a los privilexos y poderes qu’esfrutaben los sos vecinos territorios del Principáu y de Bizcaya qu’hestóricamente gociaben de fueros y privilexos de Xuntes y goviernos propios. Frutu d’esta tendencia d’esgayase de Burgos foi l’intentu de creación en 1778 d’una provincia de Los Nueve Valles de Asturias de Santillana. Esta provincia d’Asturies de Santillana qu’axuntaba los nueve valles tradicionales del Deva al Miera surdió nun intentu de defender los intereses comunes d’estes tierres amás d’otros de tipu fiscal y social como la persecución del bandolerismu y la delincuencia. Esta agrupación asturiana pretendía reproducir no posible el modelu políticu de les sos poderoses vecines: el Principáu y Bizcaya, qu’esfrutaben dende vieyo d’importantes fueros, ordenances especiales, privilexos fiscales ya instituciones d’autogobiernu a través de les sos Xuntes Xenerales propies. El crecimientu de la ciudá de Santander, la meyora del so puertu col derechu de comerciar con América foron un importante factor tanto pa quita-y a Laredo la capitalidá política como pal surdimientu d’una provincia nueva santanderina. Asina, Santander consiguió llueu un obispáu segregáu del de Burgos y en 1799 el Ministeriu de Facienda crea la provincia marítima de Santander axuntando l’antigu correximientu de les Cuatru Villes y la xurisdicción de Montes de Pas. Esti esgayamientu foi durísimamente retrucáu por Burgos pero tamién por Laredo que reclamaba tanto la capitalidá histórica como’l nome de la provincia. Ello llevó a la supresión de la provincia marítima de Santander en 1805. Otra importante reforma ilustrada foi la surpesión en 1803 de la governación de Toro que supunxo la incorporación a Palencia de Reinosa y de tol Alto Campoo.

El Principáu d’Asturies cunta dende’l sieglu XIV cola Xunta Xeneral y con importantes fueros, con unes Ordenances o Estatutu propiu, con un goviernu y asamblea representativa y popular,  agrupando a los conceyos llibres y a los potentes dominios feudales presentes nel territoriu o merindá de les Asturies d'Uviéu, convertíes honoríficamente en "principáu" por decisión del rei Xuan I de Castiella. La corona castiellana trató siempre d'amenorgar el poder de los estaos feudales o señoriales asturianos lo que orixinó constantes guerres nobiliaries y lluches civiles contra la corona. Pa contrarrestar el gran poder de la nobleza feudal asturiana los reis trataron per un llau de favorecer a la Ilesia y per otru tamién facíen por promover la desvinculación de los valles asturianos de los sos respectivos dominios señoriales mediante la creación de conceyos independientes del dominiu de la nobleza asturiana. Frutu d'esta política real ye la creación del principáu intentando asina solucionar los conflictos y guerres feudales que marcaron la historia medieval de Les Asturies.

La política centralista y castellanizante n’Asturies afóndase colos Reis Católicos qu'escomiencen un uniformismu políticu y un estatismu relixosu, que se continúa y aumenta colos habsburgu y colos borbones. El Principáu d’Uviéu cuntaba amás dende 1717 con una Real Audiencia d’Asturies, importante institución guvernativa creada ex novo, quizabes nun intentu centralista de suplantar o amenorgar los grandes poderes de la centenaria Xunta Xeneral que yera más bien vista pol absolutismu borbónicu como un parlamentu cuasi democráticu del qu’el poder monárquicu yera recelosu especialmente a partir de los años revolucionarios en Francia. Esti dualismu ente la Xunta y l’Audiencia llegó a  xenerar importantes conflicos ente les dos instituciones. Sin embargo, a pesar d’esta importante entidá política que tenía el Principáu, Asturies d’Uviéu nun foi oficialmente considerada legalmente como provincia ministerial hasta 1799 yá qu’anteriormente dependía de la intendencia de Lleón y ello porque hestóricamente Asturies nun podía tener representación nes Cortes de Castiella por tener Xunta Xeneral autónoma, y por ello la ciudá de Lleón  yera de fechu la que representaba como avogada d’Asturies los intereses d’esta nes Cortes castiellanes. La subdelegación ministerial de rentes asturiana tuvo el rangu d’intendencia en 1811 si bien les subdelegaciones formaes en 1799 nes nomaes “provincies marítimes” yeren equivalentes de fechu al restu d’intendencies de Facienda. Con too, la personalidá xurídica diferenciada de les Astureis d’Uviéu siempre tuvo perfectamente estremada y definida. Amás de la Xunta, Uviéu cuntaba con un solu correximientu, amás de tener Real Audiencia propia, muérganu instaláu sólo nos principales territorios hestóricos, vieyos reinos y virreinatos. Asturies tenía tamién un tratamientu censal diferenciáu lo que-y permitió disponer d’una base legal pa tener representación directa nes primeres Cortes o Parlamentos hespañoles. El Bierzu yera naquella época otru correximientu o provincia (igual qu’Asturies d’Uviéu) dependiente de la intendencia de Lleón.

Col tiempu, poco a poco va dir asumiéndose la idea de que Les Asturies d'Uviéu (el "principáu") son simplemente Asturies  mentantu que Les Asturies de Santillana van quedando relegaes y esborriaes nun marcu indefiníu que les asocia bien a Castiella y a la so cabeza burgalesa (el “puertu de Castiella” por ser esta tierra perteneciente a la governación de Burgos) , a la realidá física del cordal (La montaña), o como parte del territoriu de la so capital oficial (La provincia de Santander).

La Ilesia de San Salvador d'Uviéu, yera propietaria dende la época de la Monarquía Asturiana de grandes posesiones per Galicia y pal sur rexía los arcedianatos en Babia, Coyanza, Gordón, Benavente y la Ribera del Bernesga. Citaremos por exemplu a otros monasterios asturianos como'l de Santa María de la Vega que poseía la Poladura de la Tercia y Valdescorriel y otres poblaciones alrodiu Benavente. Depués de la conquista de Toledo y restaurada l'antigua sede episcopal, ésta reclamó tolos obispaos surdíos tres la invasión árabe como heredera de l'anterior primada toledana, a lo que s'opusieron les sedes d'Uviéu y Lleón que se consideraben sedes primades del reinu. So la base d'esto, la Ilesia metropolitana d'Uviéu, la mitra ovetensis, llevó alantre contenciosos hestóricos sobre llendes territoriales colos obispaos de Lugo y Burgos, pleitos que llegó a perder a favor d'éstos. Asina foi cómo Les Asturies de Santillana pasaron a depender del obispáu de Burgos dende l'añu 1184, en perdiendo la mitra ovetense los sos derechos sobre'l monasteriu de Santillana y l'alministración civil tamién tendió a amestar a estes Asturies baxo tribunales y funcionarios burgaleses, entamándose asina la dixebra alministrativa de Les Asturies, anque non la cultural y llinguística pues esti territoriu siguió non sólo calteniendo el so nome sinón que continuó calteniendo en bona midida el nexu de xuntura enraigonáu col  ethnos de Les Asturies. Mentantu pel occidente, anque perdíes otres posesiones creaes o restauraes pola mitra ovetense como Tui, Iria o Braga, la diócesis d'Uviéu tien la propiedá de tol territoriu hestóricu asturiense ente los ríos Eo y Navia, As Entrambasauguas, colos grandes arcedianatos de Grandas, Burón y Suarna. Tamién monasterios como'l de Santa María de Vilanova d'Ozcos poseíen en propiedá les sos tierres de Fonsagrada y San Tiso d'Abres.

La documentación medieval asturiana a partir del sieglu X vien axetivando los diversos territorios, valles o villes con alfoz como territorio asturiense , territorio Asturias o como territorio Asturiensium y nel XIII aparecen como terra asturiense, terra de Asturias o Asturias de Oveto. Les definiciones de les llendes oriental y occidental de los territorios, veigas o valles son abondo imprecisos mentantu que la llende sur de los mesmos preséntase claramente desllendada pola llinia dixebradora d'agues y llinies de cumes o cimbros.

Asina, pertenecen a les Asturies occidentales ente otros, la Ripa de Eube, territorio Ripa de Ove, (esto ye, la ría del Eo y el territoriu o valle oriental de la ría del Eo), el territorio Navie (el valle enteru del ríu Navia), el territorio Gandaras o Terra Sancti Salvatoris de Gandras, la Terra de Tinegio de Lectaregos usque in illa aqua de Navia. Nel oriente (y perdíos pola mitra d'Uviéu los territorios de Santillana), los documentos medievales mencionen a Cabrales, ensin concretar más los términos d'esta tierra. Notros documentos asturianos son frecuentes les menciones a otros territorios al sur de la Cordalera Asturiana como por exemplu Babia, L.laciana, Lluna, Oumaña, Alba, Gordón, Argüellos, Valdeparedes, Bierzu, zones d'importantes dominios asturianos tanto eclesiásticos como nobiliarios.

L'ámbitu  de l'alministración eclesiástica de la Diócesis d'Uviéu, el territoriu de la mitra ovetensis, incluyía los grandes arciprestazgos de Burón, Navia de Suarna, Grandas de Salime (valle medio del Navia-Eo, tierras de Fonsagrada y Negueira) que poseyó hasta l'añu 1945 perdiendo dalgunos territorios dende esta fecha. Foron precisamente los ámbitos eclesiásticos los qu'inspiraron en gran parte les futures divisiones alministratives civiles, como foi el casu de Les Asturies de Santillana qu'eclesiásticamente dexaron de pertenecer a Uviéu pa depender de la mitra burgalesa, pero que en creándose l'obispáu de Santander volvió ésti a depender del Arzobispáu d'Uviéu, xunto colos de Lleón y Astorga.

Hai que remembrar que nel Conceyu cellebráu n'Uviéu en 1115, baxo la presidencia del obispu Pelayu, consideráu como una de les primeres xuntes xenerales d'Asturies, asistieron ente otros representantes de los territorios asturianos de Gordón, Argüello, Alba, L.laciana, Babia, Lluna, Oumaña, Lleón, Astorga, Asturies de Santillana, Camargu, Trasmiera ya Iguña. Uviéu foi capital eclesiástica durante tol períodu del reinu asturlleonés hasta la conquista de Toledo que reclamó l'antigua capitalidá visigótica, orixen dende entós de sucesivos pleitos territoriales.

La cartografía de la costa asturiana tuvo siempre bastante bien afitada asina como les llendes costeres del territoriu de les Asturies yá que la cartografía marítima por norma yera la más fácilmente estudiable y más conocida por elementales necesidaes del tráficu marinu y de la defensa naval mentantu que pel interior la imprecisión a la hora d’allugar les poblaciones ye mayor. La cartografía va meyorando col tiempu y faciéndose cada vez más científica, pero una vez más hai que recordar una constante histórica repetida y afitada nos mapes: el límite ente Asturies y Galicia ye siempre el cursu enteru del ríu Eo y el límite asturianu con Castiella son los puertos que dixebren les agües al norte y la Meseta. Como quedó reseñao, nun podemos falar de determinismu ente les llendes alministratives y les llendes del ethnos pero sí de ciertu influxu, especialmente cuando les primeres se caltienen durante un llongu periodu de tiempu onde los ámbitos políticos o alministrativos asimilaos puen xugar un rol significativu na consolidación del propiu ethnos. Esto ye, un individu que nun perteneza al ethnos nel que ta inscritu pue llegar a pertenecer a él, non yá alministrativamente sinón col pasu del tiempu mediante procesos d'asimilación gradual.

Les víes de comunicación tamién xueguen modernamente un papel perimportante nos vínculos de pertenencia grupal, axuntando o separtando voluntaes. Asina suel dicise güei qu'el deséu de vinculación al ethnos asturianu (en sentíu subxetivu) de la población de Sayambre ye mayor qu'el de la población de Valdeón pol simple fechu de la esitencia o non d'una carretera d'accesu al valle baxu. Modernamente, la radio y la televisión cumplen funciones societaries de vinculación grupal tan fuertes o más que les víes de comunicación terrestre (carreteres o ferrocarriles).

De mano, la organización alministrativa civil del territoriu peninsular de la corona hespañola nun respondía a criterios de racionalidá organizativa. Los límites alministrativos sirvíen simplemente p'acutar les competencies de cada Audiencia o tribunal, y especialmente p’acutar el campu de trabayu de los recaldadores del ministeriu de Facienda. Pero en pareyo esistíen llendes históriques ente los vieyos reinos y ente ámbitos de cultura condicionaos pola orografía y poles vertientes de  ríos y valles como llendes físiques y naturales.

La implantación n’Hespaña del nuevu estáu constitucionalista d’inspiración francesa, llueu de guerres contra los defensores del sistema anterior absolutista, va traer la necesidá de refacer tol mapa alministrativu, intentando terminar col modelu d’estáu propiu del antigu réxime. Asina, la Constitución hespañola de 1812 suprime amás de la Inquisición, les xurisdicciones señoriales y eclesiástiques que paez ser que distorsionaben la racionalidá igualitaria de los mapes al atopase escesivamente descompensaos n’estensión y nalgunos casos relativamente dispersos y de pasu poder acabar con dellos privilexos de nobleza y cleru.

El trunfu del estáu lliberal centralista hespañol llueu de les guerres carlistes va organizar uniformemente l'alministración del territoriu imitando el modelu republicanu francés: dividirá el territoriu en 50 unidaes territoriales equivalentes (nomaes nun principiu governaciones o provincies) en sentíu departamental ya igualitarista, esto ye, toles provincies habríen tener el mesmu rangu y les mesmes atribuciones ya instituciones, subordinaes igualmente al poder central y a ser posible cuntando toes elles con una asemeyada estensión y pesu económicu.

Dende la idea de crear les provincies marítimes a principios del XIX, esgayando territorios de costa respecto a la dependencia del interior y potenciar asina les poblaciones portuaries costeres que xeneraben importantes ingresos d’aduana, hasta la definitiva creación del mapa alministrativu del estáu, hai un constante procesu de reformes y contrarreformes que  van concretase en 1834 nun  mapa provincial. Les nueves provincies, creaes por real decretu en 1833 , llevaríen el nome de la so ciudá capital onde l'estáu axuntaría de manera centralizada  les sos oficines o delegaciones ministeriales y otros servicios públicos: un tribunal, un gobernador civil, un sudelegáu de Fomentu y una Diputación provincial. Sin embargo, la división alministrativa del nuevu estáu lliberal hespañol foi el resultáu d’un llargu y dilatáu procesu d’ensayos y d’esperimentos de reordenación territorial que duró unos 24 años, debío tamién a la constante inestabilidá institucional y al imprevisible vaivén políticu motiváu poles lluches ente partidarios y detractores d’un o d’otru modelu d’estáu pa Hespaña:

• En 1778 , nel antigu réxime, surde una agrupación nos nueve valles asturianos del Deva al Miera como “provincia d’Asturies de Santillana” pa reivindicar intereses comunes.

• En 1799 créase la subdelegación de rentes del Ministeriu de Facienda nes nomaes “provincies marítimes” d’Alicante, Asturies d’Uviéu, Cádiz, Cartaxena, Málaga y Santander.

• En 1805 suprímese la provincia marítima de Santander pola oposición de Laredo y Burgos.

• En 1810 el goviernu usurpador y títere de Xosé Bonaparte decreta una nomada “división prefectural” diseñada pol matemáticu José de Lanz. Les nueves “prefectures” facíen tabla rasa o dameru a la manera napoleónica francesa suprimiendo les divisiones hestóriques del antigu réxime por otros departamentos o “prefectures” que llevaríen nomes d’accidentes xeográficos, ríos o cabos y suprimiendo los nomes hestóricos de los territorios. Asturies d’Uviéu camúdase asina en “Prefectura de Cabo de Peñas” (sic) y llega hasta Navia, onde entama la “Prefectura de Alto Miño” (sic) que por tener menos costa toma asina parte de la d’Asturies pa compensar. Astorga ponse como capital de “Prefectura de Esla”, ciudá un tanto alloñada d’esti ríu. Inténtase asina borrar del mapa por decretu a los nomes hestóricos d’Asturies, de Galicia y del teritoriu de Lleón.

• En 1811 la subdelegación asturiana de Facienda adquier el rangu d’intendencia esgayándose oficialmente de la de Lleón.

• En 1812, la nueva Constitución de Cádiz establez que se fairá una división más conveniente del territoriu cuando les circunstancies lo permitan. Define a Asturies y a Galicia como provincies constitucionales con derechu asina a representación parlamentaria propia. Burgos algama tol territoriu d’Asturies de Santillana yá que l’esgayamientu santanderín nun va llegar hasta la segunda etapa constitucional.

L’artículu 11 d’esta Constitución establecía que se fairá una división más conveniente del territoriu hespañol por una llei constitucional. Prohibía toles relixones menos la Católica a la que consideraba la única verdadera y oficial. Los artículos 30 al 33 establecíen lso requisitos poblacionales pa elexir diputaos a Cortes y esto va ser perimportante pa facer los posteriores recortes y separtaciones provinciales:

“Art. 30.

Para el cómputo de la población de los dominios europeos servirá el último censo del año 1797, hasta que pueda hacerse otro nuevo; y se formará el correspondiente para el cómputo de la población de los de Ultramar, sirviendo entre tanto los censos más auténticos entre los últimamente formados.

Art. 31.

Por cada 70.000 almas de la población, compuesta como queda dicho en el art. 29, habrá un Diputado de Cortes.

Art. 32.

Distribuida la población por las diferentes provincias, si resultase en alguna el exceso de más de 35.000 almas, se elegirá un Diputado más, como si el número llegase a 70.000, y si el sobrante no excediere de 35.000, no se contará con él.”

Dixebráu’l nuevu estáu en provincies, caúna d’elles taría gobernada por un xefe superior, una especie de gobernador civil, nomáu directamente pol rei.  Subordinaos a esti xefe provincial habría una diputación con un mínimu de siete diputaos. Asina lo establecíen los artículos de la Constitución de Cádiz:

“Art. 324.

El gobierno político de las provincias residirá en el jefe superior, nombrado por el Rey en cada una de ellas.

Art. 325.

En cada provincia habrá una Diputación llamada provincial, para promover su prosperidad, presidida por el jefe superior.

Art. 326.

Se compondrá esta Diputación del presidente, el intendente y de siete individuos elegidos en la forma que se dirá, sin perjuicio de que las Cortes, en lo sucesivo, varíen este número como lo crean conveniente, o lo exijan las circunstancias, hecha que sea la nueva división de provincias de que trata el art. 11.”

• En 1813 encárgase al marinu Felip Bauzá el diseñu provincial. Propón dos tipos de provincies o governaciones, superiores y subalternes, de manera xerárquica. (Les subalternes tendríen sólo xefe políticu y les superiores Diputación y representación parlamentaria). Astorga ye provincia subalterna y Lleón amplíase hacia l’este como provincia superior. Reinosa y Alto Campoo pertenecen a Burgos. Esti proyectu nun llegó a discutise nes Cortes debío a la involución absolutista de Fernando VII.

• En 1821 vuelve discutise un nuevu proyectu de Felip Bauzá y José Larramendi basáu nel anterior. Una comisión parlamentaria vuelve revisar el proyectu. Ésti tampoco respeta los límites hestóricos d’Asturies, a pesar qu’incluye na provincia d’Asturias los territorios hasta la mesma oriella o ribera del ríu Deva onde según diz el proyectu “parez que la naturaleza terminó el principado” (sic), lo cierto ye qu’estos conceyos del Deva solicitaron con reiteración non pertenecer a la provincia de Santander y sí a la provincia asturiana. Pel otru llau, el proyectu Bauzá-Larramendi segrega los territorios del interior al Este del Eo y valle altu del Navia (Fonsagrada, Suarna) pa la provincia de Lugo inventando d’esmenu una nueva frontera non hestórica y dando asina contentu al espansionismu sobre Asturies de dalgunos diputaos gallegos qu’aspiraben a esgaya-y al Principáu más tierra asturiano. Otra de les noveades del plan Bauzá-Larramendi ye la creación de la provincia d’El Bierzu a la que pertenez Valdeorras. L’esgayamientu de les tierres de Burón y del Altu Navia de la so hestórica pertenencia asturiana motivó una notable confrontación ente diputaos gallegos y asturianos. La idea subyacente de les divisiones reflexa un intentu de facer un equilibriu ente les provincies evitando no posible facer  provincies demasiao grandes como  escesívamente reducíes  n’estensión y en población, afitando una idea de  la provincia como demarcación electoral pa facilitar asina l’asignación igualitaria de diputaos pa cada una d’elles. D’ehí el procuru en facer divisiones asemeyaes n’estensión per un llau y tamién les compensaciones o estiramientos d’unes provincies frente al territoriu d’otres pa llograr esi equilibriu. Exemplu d’esta concepción electoral de la provincia son los proyectos fallidos de la provincia d’El Bierzu y los esgayamientos de territoriu asturianu y burgalés que pasaron pa otres provincies inicialmente de más reducíu ámbitu. Recordemos qu’el territoriu lucense yá yera daquella unu de los menos poblaos especialmente frente a los sos territorios vecinos como Asturies, que cuntaben con una muncho mayor población. L’influyente Conde de Torenu presentó daquella una proposición favorable al caltenimientu de la raya divisoria hestórica nel cursu enteru del ríu Eo y diez diputaos gallegos retrucaron la so propuesta, el Conde alegó que los habitantes d’esta zona habríen atravesar montañes intransitables pa desplazase a Lugo y que la segregación d’estes tierres yera contraria al sentir popular. Juan Osorio, diputáu gallegu propuso una solución salomónica,  transaccional y de repartu del ríu: respetaríase la llinia divisoria tradicional del ríu Eo sólo hasta’l conceyu d’Abres, pasando’l restu del cursu del ríu, con too Burón y La Pobra de Navia de Suarna pa la provincia de Lugo, alegando “una mayor relación comercial d’estos pueblos cola ciudá de Lugo que cola d’Uviéu”(sic). El xixonés Juan Fernández San Miguel rechazó esti repartu intermediu afirmando que la frontera sólo podía ser el ríu yá que nestes Entrambasagües asturianes  nun había más división natural qu’el ríu, siendo por ello ineficaz dixebrar los valles en sentíu trasversal y calificando como artificial  esta propuesta de división provincial intermedia. Esta división transaccional foi l’aprobada poles Cortes en xineru de 1822: Fonsagrada, Negueira y Suarna pasen asina pa la provincia de Lugo. Lo que nun pudo salvar Asturies siquiera foi el so propiu nome hestóricu, a pesar de les quexes de los diputaos asturianos y del propiu Juan Fernández San Miguel la nueva unidá alministrativa llevaría el nome de “Provincia de Oviedo” (sic).

• En 1823 Fernando VII deroga tola obra constitucional tornando l’Estáu al antigu réxime absolutista. La función de les provincies como demarcaciones electorales queda asina suprimía y tol ordenamientu derogáu. Pero yá en 1825 volvió trabayase nuna reforma más ambiciosa qu’esta vegada dividía l’Estáu en cuatro niveles alministrativos: audiencies, provincies, partíos xudiciales y municipios. Na nueva comisión figuraben Larramendi y Fernández Navarrete. El proyectu suprimía la provincia d’El Bierzu debío a lo reducío de la so estensión. Nesti casu la división provincial yera un instrumentu al serviciu básicamente de l’alministración de xusticia y de la competencia territorial de los tribunales. Esíxense polo tanto unos requisitos mínimos de población pa los partíos xudiciales, repartiendo asina igualitariamente el trabayu de  xueces y funcionarios. Los trabayos de delimitar tolos nuevos partíos xudiciales y municipios llevaron munchu tiempu y xera y nun se terminaron hasta depués de la muerte del rei. N’algamando el lleonés Javier de Burgos el Ministeriu de Fomentu yá los trabayos taben terminaos asina que la nueva planta provincial aprobóse por decretu el 30 de Payares de 1834. Les modificaciones esta vegada foron la incorporación de Peñamellera y Ribadedeva a la provincia ovetense tal y como se venía baraxando años atrás poles demandes nesti sentíu pero non los teritorios de Tresviso o Llébana que pasaron a ser de Santander. L’Audiencia d’Uviéu tamién reivindicó estes incorporaciones. Tampoco esta vegada  respetóse el nome d’Asturies: el goviernu de Madrid nun atendió a los constantes encamientos y reclamaciones formales feches pola Xunta Xeneral del Principáu nel sentíu de que se caltuviera el nome d’Asturies no que se considera foi l’últimu actu heróicu y desesperáu como cabeiru actu de voluntá d’esta centanaria institución asturiana d’autogobiernu soberanu que veía el fin de los sos díes, suprimida y suplantada mediante decretu por un ente alminstrativu que se dio como nome “Excelentísima Diputación Provincial de Oviedo” que escomenzó la so esistencia un 8 d’Avientu de 1835.

• En 1842 vuelve formase un nuevu plan de división territorial ultimáu por Fermín Caballero nel que vuelve aparecer la provincia d’El Bierzu incluyendo nella a Valdeorras. Otres novedaes son la quinta provincia gallega de Santiago, esgayada de Coruña y parte de la de Pontevedra y la retrocesión de Reinosa-Alto Campoo pa la provincia de Pisuerga (Palencia). Propónse amestar a la provincia de Montaña los conceyos asturianos del Deva anteriormente agregaos a Uviéu  que se prevee cambie esti nome pol de provincia de Nalón. El norte de Burgos améstase a la provincia de Montaña. El Bierzu y Lleón formaríen parte de l’Audiencia y del distritu militar d’Asturies (esta vez sí yera esta la denominación). Suprimíense los obispaos de Mondoñéu y Astorga y fairíase por coincidir no posible los obispaos coles provincies, sometiendo asina el poder eclesial al orde civil. El términu “Cantabria” aplícase al territoriu de l’Audiencia de Pamplona formada por Navarra, Vascongaes y Logroño (recordemos que nun esistía entós el términu “Euscadi”). Nesti sentíu yá había constancia anterior de qu’el términu “Cantabria” designaba a Vascongaes y  les montañes de Burgos. L’accesu al poder de los moderaos impidió l’aplicación d’esti plan de 1842.

Asina foi cómo la división provincial de 1834 fecha en tiempos del ministru Javier de Burgos foi la que pervivió hasta los tiempos actuales. Nel casu d’Asturies, les élites polítiques y sociales del momentu llucharon tanto por reconocer la personalidá y el nome d’Asturies como por caltener por tolos medios posibles al so alcance tol terrotriu históricu completu del País Asturianu dende’l ríu Eo al valle del Deva contra tou tipu de proyectos antihistóricos y artificiales que trataben de recortar el so ámbitu lexítimu y tradicional. La organización provincial del Estáu, anguañu superada pola organización autonómica del mesmu, foi resultáu tanto de les tendencies racionalistes y uniformadores del Estáu lliberal centralista como de la voluntá d’afirmación hestórica de les sociedaes perifériques.

Destamiente surde el 8 d'Avientu de 1835 la nueva Diputación Provincial d’Oviedo non ensin gran polémica y protestes de la centenaria Xunta Xeneral d'Asturies qu'exercía les funciones representatives y de goviernu autónomu nel país, quedando suprimida ésta dende esi momentu y arrincáu el so hestóricu llabor. El 8 d'Avientu de 1835, Asturies pierde los sos Fueros y Derechos hestóricos.

L'Estatutu d'Autonomía p'Asturies de 1981 continúa cola dixebra provincial isabelina y establecerá que les llendes de la nueva Comunidá Autónoma se  correspuenderán coles mesmes del territoriu alministrativu de l'anterior provincia d'Uviéu dibuxada en 1833. La Xunta Xeneral aprueba años depués una llei que permite el cambiu del nome de la provincia qu’oficialmente se nomará d’Asturies y yá non más d’Uviéu.

Arriba     Atrás    PDF