Atrás PDF
¡Uf!, menos mal que yá pasó!. El Día de les Lletres, la Selmana de les Lletres, la manifestación de la Xunta pola Defensa de la Llingua, el ceremoniosu (como tien que ser) actu de l'Academia de la Llingua Cuando menos asina dexará de cayer agua como si nun hubiere más en tol mundu, porque cualquiera sabe que les celebraciones-reivindicaciones de les lletres déxennos siempre pingando y, n'acabando, escampla darréu. Otru añu más la mesma quexa y la mesma pitición. Otru añu más la quexa pol 'apartheid llingüísticu' de los asturianos, y otru añu más la pitición, hasta amorosiega dacuando, pa que 'los políticos' (asina, en xenérico) faigan llegal lo que ye normal.
Tres manifestaciones públiques s'axunten, al tiempu, nestos díes de mayu tolos años. Tres maneres de ver l'asuntu del asturianu que conviven n'actos que nun se toquen siquiera, como si fueren espresión de sentires tan desemeyaos que tarrecieren contaminase unos con otros. Pal ciudadanu corriente estes diferencies nun esisten, pero pal futuru de los nuestros derechos son capitales; el ciudadanu corriente asiste (poco, porque vense poco) a estes manifestaciones ayenu, como cosa que nun va con él. Si eses tres manifestaciones nun aporten, dalgún día, a un llugar común (por más que nun seya'l que nos pete a caún) l'idioma morrerá sigún vaigan morriendo los sos falantes, por más poetes que seyan, académicos que seyan, trabayadores del metal que seyan o diputaos que seyan. La primera manifestación d'estos díes ye la de l'Academia de la Llingua y el so actu institucional. Únicu casu nel mundu conocíu ésti d'una institución encargada de curiar la sencia d'un idioma que recibió esti mandáu por una carambola histórica y que, dende l'intre mesmu de la so fundación, convertióse nun entueyu pal Gobiernu que la creaba y los vinientes, anque la mesma Academia seya una institución pública. ¿Qué más-y podemos pidir a l'Academia de la Llingua?. Que siga necia y testerona enseñando les virtudes d'un idioma cultu, qu'esparda esa idea espresada pola so más recién académica, Berta Piñán, de que les llingües valen pa «saber quiénes somos» y caminar «con pasu firme hacia'l futuru». Que siga asoleyando instrumentos técnicos p'axeitar una llingua vieya a los tiempos del sieglu XXI y defendiendo los derechos llingüísticos de los asturianos como derechos humanos que son. Y, especialmente, que siga acoyendo a escritores d'altor y fondura, con independencia de que-y presten o non les sos opiniones y acciones, pa que l'Academia seya la casa auténtica de les nuestres lletres.
La segunda manifestación ye la de los ciudadanos, convocaos pola Xunta pola Defensa de la Llingua en procesión penitente y piticionaria peles cais de la capital, col lema: «Na reforma del Estatutu: l'asturianu llingua oficial». Penitente por conseñar añu tres añu cuántos son los desfilantes, cuántos queden d'otres dómines y cuántos nuevos s'arimaron a la causa del asturianu y qué poques coses camudaron en más de dos décades. Piticionaria porque sigue desixendo, a los que nun lo quieren facer, que reconozan la realidá llingüística asturiana por fuerza d'una opinión qu'ella encarna una vez al añu. ¿Qué más-y podemos pidir a la Xunta pola Defensa de la Llingua?. Primero tendríemos que da-y les gracies por tantos años de trabayu y depués encamentala a que dexe de glamiar a la lluna de "los políticos" y a que llame a los ciudadanos propietarios del idioma. Si la metá namás de los que fueron a les 'grandes' manifestaciones entamaes pola Xunta llega a votar a partíos claramente favoratibles a la oficialidá del asturianu, ye posible que nun tuviéramos nesta llamuerga.
La tercera manifestación d'estos díes ye la gubernamental. La rabasera d'aire llevantada pola Academia de la Llingua nos primeros años y pola reivindicación cívica depués fizo que'l poder entamara actos, homenaxes y programaciones. Con aciertu desigual, los gobiernos sucesivos dedicaron dineru públicu a rescatar figures lliteraries serondes o más nueves, a glosar los llogros d'una lliteratura tovía adolescente, a enseñar los pocos frutos, más bien guaños, de la so política llingüística. ¿Qué más-y podemos pidir al Gobiernu asturianu correspondiente?. Dexando a un llau'l tema principal, y considerando al Gobiernu más como la máquina alministrativa de funcionarios y técnicos, prestaría que dexaren de creer que la Selmana de les Lletres sirve pa daqué que nun seya la xustificación del que fai pa que nun rescample que nun fai nada. Los homenaxes, alcuentros, ediciones y alderiques sedrán perimportantes pa otres coses, pero nun son ferramientes de la política llingüística.
¿Cómo pueden llegar a coincidir estes tres manifestaciones de les lletres nun sitiu común y civilizáu?. ¿Qué tienen que ver cola lliteratura del pasáu y del presente caún d'ellos?. ¿Lletres?. ¿Qué lletres?.