Atrás     PDF

La UNESCO encamienta a los Estaos del mundu'l respetu pola diversidá de llingües y pídi-ys que la promuevan con lleis xustes que favorezan la igualdá ente los ciudadanos y la so intelixencia. Asina, na carta que fixeron pública cola declaración del Día de la Llingua Materna, falen de la bondá intrínseca del plurillingüismu, conceptu que nun Estáu onde tantos individuos monollingües hai parez difícil d'entender. Dacuando dame la impresión de que Rajoy, y otros de la so cuerda españolista, son simplemente folgazanes mentales: con tal de nun deprender a dicir tres palabres siguíes del otru, son mui quien a dicir que l'otru nun existe o, simplemente, echalu ensin contemplaciones d'esa España sagrao y pétreo que guarda esencies de nun sabemos cuándo.

Métome con Rajoy, qu'ofrez nel so programa electoral la chorrada eso de garantizar la enseñanza del español en tolos rincones d'España, pero mui bien podría aplicar la tacha a los rapazonos de la FSA, qu'encasquillaron -y nun soi a entender cómo- nel más ranciu discursu franquista de la cultura con respecto a la llingua asturiana.

La nueva sensibilidá poles llingües (la sensibilidá poles llingües grandes y poles pequeñes) habrá llegar dacuando a Asturies de manera efectiva; ta tardando muncho, ye verdá, y ello tien que ver cola provincialización mental a la que tamos sometíos a esti llau del cordal. En Madrid nun entienden que l'asturianu nun sía oficial, y tampoco nun entienden cuando María Luisa Carcedo esgrime na cartera de méritos que nun lo sía. ¿Nun quedáramos que yera una riqueza?. ¿Por qué se tira iresponsablemente la riqueza pela ventana, creando amás desigualdaes sociales que rescamplen?.

La sensibilidá, dacuando, depréndese por vergüenza. Los socialistes catalanes y madrileños habíen enterase de la dexación de funciones que los sos compañeros asturianos fain con respecto de la llingua. Había que face-ys llegar un recáu continuáu, pelos medios que fosen, pa que pregunten por qué'l PSOE s'empeña en politizar la llingua asturiana y por qué escueye, nesti casu, una posición más propia del sieglu XIX que del XX.