Atrás     PDF

Una vez  oyí una anécdota que se cuntaba d’un sabiu pescador un pocu desarregláu que solía caleyar peles cais d’una villa marinera, una villa asturiana como la que más, con tolos apareyos de trabayu suyos al llombu. Esti home, del que tampoco ye preciso dar más datos, parez qu’andaba un tantu farraperu con unos pantalones rotos poles rozadures que-y permitíen amuesar el culu dexándo-ylu a la vista del que per tala parte lu güeyara caminando.  Y a esti bon home averóse-y unu que lu paró nel so transitar p’avisalu de si se diera cuenta que llevaba’l pantalón tou rotu per detrás y que por ello se-y taba viendo’l culu, principalmente pola razón de que nun llevaba calzón algún.  Entós, el buenu del pescador retruco-y tou gayasperu que pa trabayar na mar el meyor traxe de faena ye’l más vieyu y darréu ufrio-y disculpes pol inxenu actu d’impudor suyu de la que s’afanaba por tapar el furacu impúdicu con un trapu suciu que llevaba en bolsu esti bon home.

El nuestru ufanu faenador tiró p’alantre nel camín cuando nun tardó muncho n’atopar con otru pasante de la mesma villa marinera que lu paró de nuevo p’alvertilu de que llevaba un pantalón tou rotu per detrás pel que-y se veíen unos calzones bien emporcaos. Asina que’l nuesu pescador escaeció la so elegancia per un momentu y fartu de tantu avisador quitose’l trapu que-y tapaba les carnes fríes y tou flamencu, perdón, tou farrucu, espetó:

- “¡ Pues que me vean toos el culu y se fastidien toos, coima!”

Asina ye la hestoria de los nuesos polítiquinos asturianinos. Nestos pasaos años hai della xente, políticos especialmente, que cuando falen de diversos asuntos y en concreto de la nuestra llingua asturiana, queden siempre col culu al aire. Estos políticos asturianos suelen ser siemrpe del PSOE, la mayoría o del PP. Primero dicen  tochaes insultantes sobre la nuesa llingua asturiana, incluso pal asturianu menos sensible en custiones sociollingúístiques, onde toos quedamos ablucaos pola so falta de cultura y respetu a dalgo que ye un bien común de toos como la llinbgua asturiana. Cuando non, lo que faen depués ye despreciar displicentemente a tolos usuarios del idioma asturianu, yá seyan falantes, llectores, escribientes, profesores o estudiantes. Actu seguíu vense obligaos a rectificar y a facer biecos pa tapar les sos vergüences con trapinos gochos en forma de suvenciones, beques, concursinos, dotaciones económiques y servicios mínimos d’asturianu pa la provisión de maestros, pa la edición de llibros o foyetos, o pa sufragar concursos de belleza poética o premios lliterarios  y a dar depués cuenta pública y presupuestaria de too ello nel Parlamentu Astur porque l’Estatutu d’Autonomía (ye un dicir) vixente garantiza’l fomentu y la promoción del asturianu con partides presupuestaries específiques pa ello. Pero esi mesmu Estatutu nun nos garantiza a lso ciudadanos nengún derechu pa usar efectivamente la llingua porque ésta, vaya por dios, dicen que pa ellos nun ye una llingua oficial. Disparates de llocos.

Otra xente d’esta parez amuesar unes posaderes un tantu más ridícules al atrevese a dicir que la cooficialidá llegará tarde o temprano pero que pel so llau fairá por retrasala lo más que pueda o que’l pueblu asturianu nun ta preparáu p’asumir lo que mayoritariamente vien reclamando nes encuestes y sí en cambiu pa resignase y aceptar les opiniones personales y les decisiones d’unos cuantos capitostes políticos sobre la llingua bable, esa dulce y melguera y milenaria llingua del país asturianu.

Yo atreveríame a recomendar a estos “padrinos” de la patria querida y futuros políticos aprendices qu’imitaren l’actitú del nuesu decidíu y sinceru pescador asturianu. Prefiero que se-yos siga viendo’l culu indecente enarboliando valientes la so bandera antiasturiana del antibablismu militante antes que velos tapase cobardemente les sos carencies culturales y polítiques con falsos calzones democráticos y autonomistes.

Y ello porque de toes maneres se-yos seguirá viendo claramente los sos impresentables zalegos, calzones y bragues. Y ye que la triste custión ye qu’ hai perhí demaisaos personaxes que yá lleven sentaos en poyu políticu traxinando arriba  y abaxo cola vaca roxa de la política venticinco añinos de paz ensin mudase nin siquiera los tristes, puercos y fediondos pantalones ideolóxicos suyos.