A
LA CONSEYERA DE LA PRESIDENCIA DEL PRINCIPÁU D’ASTURIES
D./Dª.
(...), con DNI númberu (...), no so condición de Presidente del Aconceyamientu
de Xuristes pol Asturianu (AXA), asitiáu a efeutos de notificaciones nel séptimu
pisu, del númberu 22, cai Pérez de la Sala, d'Uviéu, preséntase y DIZ:
1.- L'Asociación que presido
ñació cola finalidá de contribuyir al desaniciu de les torgues que se-y ponen
davezu al emplegu de la llingua asturiana n'actividá profesional de los
xuristes y, siendo asina, que la Conseyería de la que vusté ye cabezalera,
vien espublizando los pliegos de cláusules alministratives polos que se rixen
los concursos de contratación, conteniendo los modelos impuestos polos artículos
79.1 del Real Decretu Llexisllativu 2/2000, de 16 de xunu, pol que s'aprueba el
testu refundíu de la Llei de Contratos de les Alministraciones Públiques, y 80
del so Reglamentu, escritos namás en castellán, torgando asina a los
ciudadanos, pente ellos los miembros de l'asociación que represento, la
posibilidá d'exercitar un drechu que-yos reconoz l'artículu 4 de la Lley 1/98,
de 23 de marzu, d'usu y promoción del bable/asturianu, en relación col artículo
36.2 de la Lley 30/92, de 26 de payares, de Réxime Xurídicu de les
Alministraciones Publiques y del Procedimientu Alministrativu Común y los artículos
4 y 10.1.21 del Estatutu d'Autonomía d'Asturies.
2.- La cuestión ye nidia,
porque nidia ye la redaición imperativa del mentáu artículu 79.1 de la Llei
de Contratos de les Alministraciones Públiques ("...las proposiciones... se ajustarán al modelo que se establezca
en el pliego de cláusulas administrativas particulares..."); grave,
porque lleva al ciudadán a la necesidá de tener que dirixise a l'Alministración
en castellán -quiéralo o non- si quier concursar; y manifiestamente inxusta,
porque tolos alministraos tienen el drechu, reconocíu nel artículu 4 de la
Llei 1/98, a dirixise n'asturianu a esa Conseyería.
Tan ye asina que toles otres
Conseyeríes asoleyen los modelos conteníos nos pliegos de cláusules
alministratives nes dos llingües.
3.- D'otra miente, nun abulta que comportamientu talu seya la forma afayadiza de cumplir llealmente colos compromisos (pacta sunt servanda) del Plan pa la Normalización Social del Asturianu.
Poro,
ENCAMIÉNTO-Y:
Que dea les órdenes afayadices pa que nos venideros pliegos de cláusules
alministratives s'inxera, xunto
colos castellanos, otros modelos de proposición redautaos en llingua asturiana,
col envís de que l'alministráu pueda escoyer los que más-y presten y
exercitar asina'l drechu que tien reconocíu a dirixise a l'Alministración nuna
u otra llingua.
Ye
xusto.
N'Uviéu, a (...)