L'Academia de la Llingua denuncia la vulneración de los derechos llingüísticos por parte'l Gobiernu asturianu

L'Academia de la Llingua Asturiana, en cumplimientu del so llabor tutelar de los derechos llingüísticos asturianos, fizo pública denuncia de les constantes violaciones d'esos derechos por parte'l Gobiernu del Principáu, a cuenta la situación xenerada alrodiu los casos de dellos ciudadanos, funcionarios y trabayadores de l'Alministración autonómica nes últimes selmanes (Faustino Zapico, Xurde Blanco, Xosé Nel Comba).

Al empar, la cimera Institución llingüística asturiana, fizo una propuesta encamentada a la Xunta Xeneral del Principáu d'Asturies, na so calidá d'órganu históricu de representación de los asturianos, pa que "encamiente al Gobiernu del Principáu que faiga vidable'l derechu de los ciudadanos al emplegu del asturianu nes sos rellaciones coles instituciones asturianes y, nel so momentu, coincidiendo cola reforma del Estatutu d'Autonomía d'Asturies, proponga una definitiva toma de determín con respeutu a les llendes xurídico-oficiales de la so consideración".

> La noticia, equí.

La Conseyería d'Educación refúga-y un escritu a un maestru por tar n’asturianu

El sindicatu d'enseñanza SUATEA denuncia que la Conseyería d'Educación refugó-y a un maestru la presentación d'una orde de comisión de servicios por tar redactada n'asturianu. El casu asocedió-y a Xosé Nel Comba Paz, maestru itinerante de llingua asturiana del Centru Rural Agrupáu "Cabu Peñes". El trabayador descubrió con sorpresa la devolución de la fueya de "itinerancies" (les dietes que se paguen a los maestros que, por motivos de la estructura de dellos centros, tienen que desplazase ente escueles) que presentara a la Conseyería. El maestru presentare l'escritu n'asturianu y recibiólu de vuelta refugáu ya incluso retocáu a bolígrafu en castellanu sobre'l testu orixinal polos funcionarios del Serviciu de Xestión Económica de la Conseyería d'Educación del Principáu. La organización sindical anuncia que va poner el casu en manes los sos servicios xurídicos y asegura que'l so afiliáu tien reconocíu'l derechu a presentar documentos a l'Alministración n'asturianu pola mor lo afitao na Llei d'Usu y Promoción del Asturianu. Pa SUATEA, esta situación ye un ataque que supón, de fechu, "l'afitamientu de la situación de discriminación reaccionaria, sistemática y caciquil de los usuarios d'asturianu" énte la propia Alministración asturiana.

El casu llevantó una rabasera de protestes dende entidaes comprometíes cola normalización del asturianu. La sida oficial pa refugar el documentu, foi que "nun se presentara nos impresos oficiales disponibles a estos efectos", una práctica que s'aveza muncho ente'l colectivu docente, ensin que nunca anantia surdieran problemes a la hora tramitar esa documentación. La Xunta pola Defensa de la Llingua Asturiana sorraya esti fechu, que califica de "broma de mal gustu", indicando lo "irregular que paez qu'un documentu que nun s'almite a tramitación se devuelva con correiciones a bolígrafu feches por tar el testu redautáu n'asturianu". Estes correiciones nel escritu, feches del asturianu al castellanu, "como si se tratare d'errores nún examen", llamen muncho bien l'atención de la Xunta pola Defensa de la Llingua, que denuncia qu'estos fechos "faen rescamplar el cinismu y la hipocresía d'unos responsables de gobiernu qu'afirmen énte la opinión pública'l so apoyu a la promoción y protección de la llingua asturiana, al tiempu qu'actuen sistemáticamente en sentíu contrariu". Pa la Xunta, actuaciones como esta demuestren que'l Gobiernu asturianu "anecia en xenerar un conflictu onde nun debería habelu y en demostrar, otra vuelta más, la so voluntá implacable d'acabar cola llingua asturiana pela vía de la prohibición y la marxinación". Tamién l'Asociación de Trabayadores de la Normalización Llingüística emitió un comunicáu de protesta en que denuncia la "falta de voluntá política y la violación de los derechos llingüísticos de los falantes d'asturianu" que representa la devolución del escritu, acusando al Conseyeru d'Educación José Luis Iglesias Riopedre de "volver a violar los derechos d'un trabayador por usar l'asturianu y practicar l'apartheid llingüísticu".

> La noticia, esbillada d'Asturies.com, equí y tamién equí.

Los Conceyos de Samartín del Rei Aurelio y Siero van debatir sendes mociones pidiendo a la Xunta Xeneral la oficialidá na reforma l'Estatutu

Tres de les declaraciones nel mesmu sen aprobaes polos Plenos de los Conceyos de Villaviciosa y L.lena, delles asociaciones cíviques de los Conceyos de Samartín del Rei Aurelio y Siero lleven agora a los sos respeutivos Plenos municipales d'esti xueves 29 de marzu, sendes mociones pidiéndo-yos a los sos Conceyos que-y soliciten a la Xunta Xeneral del Principáu d'Asturies la declaración de la oficialidá de la llingua asturiana na prósima reforma l'Estatutu d'Autonomía.

Nel casu de Samartín del Rei Aurelio, la moción vien avalada por más de 500 firmes de vecinos del Conceyu y ye promovida por ciudadanos a títulu individual y por delles asociaciones culturales entreguines, casu la tertulia lliteraria Reciella Mallory. Nel casu de Siero, la entidá que promueve la moción ye la Xunta Pola Defensa de la Llingua Asturiana.

> Les noticies, n'Asturies.com, equí y equí.

Presentación del "Dictame xurídicu sobre'l conflictu llingüísticu n'Asturies" en Xixón

AXA presenta en Xixón el día 2 d'abril, a les 20 hores, na sé la "Sodiedad Cultural Gijonesa" (cai Belmonte, 4), el so "Dictame sobre'l conflictu llingüísticu n'Asturies", nún actu públicu pal que cuntamos cola asistencia de cuantes persones quieran asistir.

> Dictame xurídicu sobre'l conflictu llingüísticu n'Asturies (AXA)

La Xunta Moza valora positivo la fuelga

La Xunta Moza calificó positivo l'alcance la fuelga convocada'l xueves 22 de marzu nos institutos de Secundaria d'Asturies, en defensa d'una situación digna pa la enseñanza l'asturianu, una fuelga que "consiguió implicar a la mocedá estudiante na defensa de la llingua asturiana y de los sos derechos llingüísticos y educativos". El grau de siguimientu la fuelga foi "mui altu en toa Asturies", mayor ente los estudiantes de 3u y 4u de la ESO qu'ente los de los primeros cursos.

Xunta Moza denuncia que "les direcciones de dellos centros ficieron lo posible por facer fracasar la fuelga, amenazando con apercibimientos, faciendo exámenes ya incluso en dellos casos unviando circulares a les families avisando de que nun se daríen por xustificaes les faltes d'asistencia". Los datos de siguimientu falen de más d'un 90% de paru en Llanes y Cangues d'Onís y d'un 85% en Llanera, el Valle'l Caudal, con mayor siguimientu en Turón y menos en Mieres o L.lena, onde s'anduvo pel 65%. N'Uviéu hebo institutos que pararon dafechu mientres que n'otros la convocatoria nun pasaría del 60% de rempuesta, llegándose al 80% n'IES como los de Candás o Lluanco.

> La noticia, equí.

L'Academia de la Llingua critica la situación del asturianu nel currículum de Secundaria

L'Academia de la Llingua Asturiana (ALLA) valora "mui negativamente" el tratamientu que se fai de l'asignatura d'asturianu na propuesta de Decretu de Currículum d'Educación Secundaria Obligatoria de la Conseyería d'Educación del Principáu. L'ALLA critica el calter d'optatividá de l'asignatura, dalgo que s'esfrona dafechu cola Llei d'Usu del Asturianu y que pon a l'asignatura d'asturianu a competir cola segunda llingua estranxera nos dos primeros cursos de la ESO, mientres que nel terceru entraría tamién en competencia cola cultura clásica, complicándose entovía más la situación en cuartu cursu, onde l'alumnáu d'asturianu va tener qu'escoyer ente una asignatura "d'iniciación profesional", otra "rellacionada cola empresa" o la "realización de proyectos de diversos ámbitos".

La Llei d'Usu del Asturianu afita que "la escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos". L'ALLA denuncia que les dos hores selmanales previstes pa l'asignatura de llingua asturiana son "insuficientes dafechu pa que se puean llevar alantre, con un mínimu de seriedá, los conteníos del currículum de llingua asturiana y lliteratura pa la ESO".

L'Academia reclama tamién que l'asturianu s'emplegue como llingua vehicular dientro la Educación Secundaria Obligatoria "nun porcentax mínimu que dea seguranza de la so capacidá de conceptualización pa otra clas de deprendizaxes" y critica que, n'asignatura de llingua castellana'l tratamientu que se-y da a la llingua asturiana sía "arrémente ambiguu", polo que la institución desixe que nel currículum d'esta materia s'esclarie qu'Asturies "ye una comunidá billingüe na que coesisten en desigualdá de condiciones xurídiques y sociales dos sistemes llingüísticos".

La másima Institución llingüística d'Asturies reclama una vuelta más la oficialidá, como única midida que va ser a "allugar correchamente l'asignatura nel ámbitu educativu".

> Noticia esbillada d'Asturies.com

Sindicatos y Xunta pola Defensa de la Llingua amenacen con movilizaciones si Educación nun se sienta a negociar sobre l’asignatura d’asturianu

Los sindicatos denseñanza mayoritarios n'Asturies, SUATEA, FETE-UXT y CC.OO, y tamién la Xunta pola Defensa de la Llingua Asturiana dieron anuncia del entamu d'una campaña de movilizaciones si la Conseyería d'Educación del Principáu nun atiende a la so petición de diálogu pa tratar el futuru de l'asignatura d'asturianu. Dempués de la última solicitú de diálogu, fecha'l pasau 16 de marzu, y que sigue ensin rempuesta, los sindicalistes denuncien qu'Educación "fai de menos" el papel de les organizaciones sindicales. D'otra manera, los representantes sindicales declaráronse indignaos poles declaraciones a dellos medios de prensa del Conseyeru d'Educación, José Luis Iglesias Riopedre, en que da por zarráu'l conflictu pol asturianu na enseñanza, asegurando que l'asturianu nun va tener que competir en primaria con otres materies curriculares. Estes declaraciones fain albidrar al representante de SUATEA, Llinu Álvarez, qu'Educación va permitir que cada centru escueya cuál va ser l'alternativa a la clase d'asturianu, de manera que dexa la "puerta abierta a que se meta cualquier cosa siempre que nun sea curricular, colo cual podríen entrar otres materies coles que los centros, sobremanera los que compiten por atropar alumnos nuna mesma zona, entraríen nuna dinámica de competencia".

Sobre la situación del asturianu na enseñanza Secundaria, Álvarez desplicó que nel proyeutu la Conseyería, l'asignatura pasa a ser optativa "en peores condiciones reales de les que taba". Los tres sindicatos mayoritarios, que representen al 70 por cientu del profesoráu, piden que nel curriculum se tengan en cuenta una serie de puntos mínimos que Xulio Casado, representante de la Xunta pola Defensa de la Llingua Asturiana, resumió en "invertir el procesu d'elección el asturianu pa que sían los padres los que manifiesten la voluntá de nun dar asturianu y un mayor reconocimientu y horariu pa l'asignatura". El documentu col que trabaya la Conseyería, va implicar que la necesidá de facer programes de refuerzu en delles asignatures, acabará sustituyendo la materia optativa pol programa de refuerzu, lo que "supón que l'alumnáu qu'entre nesos programes nun puea cursar l'asignatura d'asturianu". La catalogación de los puestos de trabayu de los maestros d'asturianu y la creación de la especialidá d'asturianu, son otres dos de les reivindicaciones de les organizaciones sindicales, qu'amenacen con entamar una riestra movilizaciones ente esti mes y el d'abril pa forzar la negociación.

> Noticia esbillada d'Asturies.com

Xunta Moza convoca una fuelga na enseñanza pal xueves 22 de marzu

La Xunta Moza, estaya de mocedá de la Xunta pola Defensa de la Llingua Asturiana, convoca una fuelga na enseñanza asturiana que tien fecha pal próximu xueves 22 de marzu, "en rempuesta a la nueva agresión que supón la propuesta de currículu de la Conseyería d'Educación pa secundaria, qu'afonda na situación yá marxinal de la llingua asturiana nel sistema educativu". Esta convocatoria de paru xeneral nos institutos de secundaria asturianos, va acompañada d'una concentración a les 12 del mediudía na Plaza d'España, énte les oficines de la Conseyería d'Educación. Con esta yá van tres fuelgues na secundaria asturiana en defensa d'una meyor situación de l'asignatura d'asturianu.

> La noticia, equí y tamién equí.

SUATEA denuncia la situación na que l'Alministración dexa a Xurde Blanco, mentantu CSI pide dimisiones

El sindicatu d'enseñanza SUATEA califica de "sangrante, aberrante, llamentable y patética" la situación del nuesu compañeru Xurde Blanco y llamenta que "a primeros del sieglu XXI y en sociedaes, supuestamente democrátiques pasen estes circunstancies", asegurando qu'ello "nun fai otro qu'avergonzase de les instituciones y de los sos rexidores". El sindicatu brinda-y a Xurde la so más fonda y sincera solidaridá, manifestando la so más enérxica repulsa énte esti nuevu ataque al usu de la llingua asturiana por parte l'Alministración escontra un ciudadanu asturianu. El sindicatu denuncia que'l casu fai rescamplar cómo la llei d'Usu del asturianu "queda curtia y escasa" y cómo "ye necesario, urxente y prioritario universalizar n'Asturies la equiparación de derechos que garantiza la oficialidá".

Pela so parte, la Corriente Sindical d'Izquierda (CSI) emitió una nota de prensa na que califica la negación de permisos y otres piticiones al funcionariáu de "práctica de represión", defendiendo'l "llexítimu exerciciu del derechu que-yos reconoz la Llei d'Usu del Asturianu y la Carta Europea de les Llingües Minorizaes" a usar l'asturianu nes sos comunicaciones cola alministración. Vistes les consecuencies y carauterístiques especiales que se dan nel casu de Xurde Blanco, el sindicatu pidió-y al presidente del Gobiernu asturianu'l "cese inmediatu de los responsables políticos d'esta persecución inalmisible". En concreto, CSI pide la dimisión de la Conseyera de la Presidencia, María José Ramos, como titular de la Conseyería na que se dieron los fechos "que, por continuaos y sistemáticos paez que respuenden a un plan premeditáu pa denigrar a la llingua asturiana y los sos falantes" y, en segundu llugar, pide tamién la dimisión del Direutor Xeneral del Serviciu Xurídicu, Cabaleiro Teijeiro, "como executor directu de los actos de represión del usu de la llingua". CSI denuncia lo que califica de "hipocresía y doble moral que carauteriza l'actuación del Gobiernu asturianu nel so conxuntu no tocante a la promoción y protección de la llingua asturiana", en cuantes que "mientres cola boca pequeña promete potenciar el so usu y facilitar el so empléu énte l'Alministración Pública, na práutica actúa colexadamente como brazu executor pa reprimir a quien llibremente quier exercer el so derechu a escribir y falar na so llingua".

> Noticies esbillaes d'Asturies.com, equí y equí.

La Conseyería la Presidencia del Principáu d'Asturies incumple de forma dolosa la Llei d'Usu y Promoción del Asturianu

Toles Conseyeríes del Gobiernu'l Principáu, sacantes la de la Presidencia, tramiten davezu y con normalidá escritos en llingua asturiana, tanto los fechos polos propios funcionarios como los de trabayadores llaborales o representantes sindicales. Esti sistemáticu y dolosu incumplimientu de la Llei d'Usu del Asturianu por parte la Conseyería la Presidencia, atenta escontra lo afitao nel so artículu 4.2, que tien «por válidu a tolos efeutos l'usu l'asturianu nes comunicaciones orales o escrites de los ciudadanos col Principáu d'Asturies».

> La noticia, equí.

A cuenta'l casu de Xurde Blanco: «La Llei nun fai distingos ente particulares y funcionarios»

El Catedralgu de Derechu Alministrativu de la Universidá d'Uviéu, Leopoldo Tolivar Alas, afirma que «l'Alministración, ensin esceiciones, ta dafecho sometida a la llei (artículu 103 de la Constitución)». Y, a cuenta'l casu del nuesu compañeru Xurde Blanco, diz que «la llei, nesti casu la llei 1/1998, de 23 de marzu, cuyu artículu 4.2 nun fai distingos ente particulares y funcionarios a la hora dar valir a los escritos presentaos n'asturianu énte'l Principáu».

Pa Tolivar, diba tener gracia que «una norma interna, amás de vulnerar la xerarquía normativa (la llei ta penriba de cualisquier reglamentu), ficiera de peor condición a los funcionarios pol so especial sometimientu a l'Alministración, cuando l'artículu 4.3 de la citada llei ordena'l fomentu la conocencia l'asturianu polos emplegaos públicos. Tampoco nun ye razonable, dada la personalidá xurídica única de l'Alministración rexonal y el mandatu llegal, qu'una Conseyería reconozca derechos formales qu'otra Conseyería niega».

> La noticia, equí.

AXA solicita'l cese la Conseyera de la Presidencia pola so actitú pa cola la llingua asturiana y los funcionarios que faen usu d'ella

Nel primer Aconceyamientu Presencial d'AXA celebráu esti xueves 15 de marzu, decidimos solicita-y al Conseyu de Gobiernu del principáu d'Asturies el «cese inmediatu» de la Conseyera de la Presidencia, María José Ramos, pola so «actitú fosca ya intolerante escontra la llingua asturiana y los funcionarios que faen emplegu d'ella» y por «consentir actos de represión», poniendo «vergoñoses torgues, como represalia por facer usu de la llingua materna».

Al empar, solicitamos el cese del Direutor Xeneral del Serviciu Xurídicu y del Xefe del Serviciu Xurídicu, adoptando asina «les midíes afayadices pa cortar pela freba con toa triba de fechos gubernamentales de calter discriminatoriu o represor».

L'escritu empobináu al Conseyu de Gobiernu, mandóse tamién a los tres grupos parlamentarios con representación na Xunta Xeneral: PSOE, PP ya Izquierda Xunida-Bloque por Asturies, encamentándo-yos el mirar pol cumplimientu los conteníos ya iniciatives incluyíes nel Plan de Normalización Social del Asturianu 2004-2007, robláu por toos ellos por unanimidá.

> La noticia, equí.

L’Academia de la Llingua Asturiana denuncia nún comunicáu'l casu de Xurde Blanco

L'Academia de la Llingua Asturiana (ALLA) denuncia "la gravedá que supón la negativa de la Conseyería de la Presidencia del Principáu d'Asturies a tramitar les solicitúes de permisu d'un funcionariu de los sos Servicios Xurídicos pa ser sometíu a pruebes médiques nel Hospital Central d'Asturies, poniendo como xida pa ello l'emplegu de la llingua asturiana na mentada solicitú".

L'Academia califica de "fechu inalmisible y vergoñosu" esta situación, na que "ta en xuegu la salú d'una persona". Una situación que, a xuiciu la másima institución llingüística asturiana, supón "un retrocesu ensin precedentes na reconocencia de los derechos llingüísticos de los ciudadanos". Esti proceder de l'Alministración, esfrónase dafechu col conteníu de la Llei d'Usu, "que recueye esplícitamente'l derechu de los ciudadanos a dirixise a l'Alministración del Principáu en llingua asturiana".

L'Academia manifiesta qu'esti casu espeya a les clares les llimitaciones de la Llei d'Usu, al empar que "la incapacidá de les persones culpables d'esta actuación pa ocupar cargos de responsabilidá política n'Asturies".

> Noticia esbillada d'Asturies.com

Organizaciones de defensa l'asturianu denuncien el casu de Xurde Blanco

El casu del Secratariu d'AXA y Lletráu del Serviciu Xurídicu del Principáu d'Asturies, Xurde Blanco Puente, al que l'Alministración-y denegó'l permisu pa poder operase por redactar la solicitú n'asturianu, recibió la solidaridá y simpatía de les organizaciones comprometíes col idioma. La Xunta Pola Defensa de la Llingua Asturiana y l'Asociación de Trabayadores de la Normalización Llingüística emitieron comunicaos de prensa solidarizándose cola situación del nuesu compañeru.

La Xunta Pola Defensa de la Llingua Asturiana, declara públicamente la so solidaridá con Xurde Blanco, denunciando lo que-y abulta un casu de represión llingüística y de los derechos llaborales. La organización calificó l'actitú del Gobiernu nesti casu como "hipócrita" y "antidemocrática" y asegura que tres d'ella trescala'l fechu de qu'al executivu asturianu "molésta-y la existencia de ciudadanos falantes d'asturianu".

Dende l'Asociación de Trabayadores de la Normalización Llingüística declararon que-yos abultaba "imposible" que nel sieglu XXI y n'Asturies un trabayador de l'Alministración del Principáu "tea discrimináu y nun tenga los mesmos derechos que los sos compañeros namás que por usar la llingua asturiana a la hora de solicitar los permisos a los que tien derechu como cualquier otru compañeru". La situación de Xurde Blanco, que yá presentare más escritos n'asturianu empobinaos a l'Alministración pala que trabaya, que mesmo se-y refugaron, califícase de "persecución política por cuenta l'idioma que s'utiliza". L'Asociación afirma que "esta decisión vuelve dexar claro qu'ensin la oficialidá de la llingua asturiana ye imposible facer una normalización en condiciones" y preocúpa-yos ver qu'existen "ciudadanos de primera y ciudadanos de segunda namás que pola llingua que deciden utilizar", calificando la situación de "apartheid llingüísticu nel que tolos ciudadanos tienen les mesmes obligaciones pero nun tienen los mesmos derechos si la llingua qu'escueyen ye l'asturianu".

> La noticia, esbillada d'Asturies.com

La Xunta Xeneral va reconocer oficialmente'l Derechu Tradicional Asturianu

Tres siete años de trabayu y cumpliendo col mandáu afitáu nel artículu 16 del Estatutu d'Autonomía, la Xunta Xeneral del Principáu d'Asturies tien yá rematáu'l llabor de compilación del Derechu Consuetudinariu Asturianu. El dictamen de la comisión especial pa facer estoyu de tol cuerpu de lleis y vezos tradicionales del país, va llevase al Plenu de la Xunta Xeneral el xueves día 15 de marzu pa la so aprobación, elevando asina el vezu a rangu de Llei.

La comisión especial encargada del llabor, contó a lo llargo de toos estos años cola collaboración d'un grupu de profesionales de la Universidá dÚviéu, la Maxistratura y de lletraos de la Xunta Xeneral. L'equipu d'investigación redautor del testu final, dirixíu pol Lletráu de la Xunta Xeneral, Ignacio Arias Díaz, analizó más de 40.000 sentencies, milenta protocolos notariales y dedicó abondes hores al trabayu de campu. La compilación espeya un total de 26 figures xurídiques tradicionales, qu'acrediten la esistencia d'un Derechu Consuetudinariu Asturianu.

> La noticia, equí.

L’Observatoriu de Política Llingüística asoleya'l so informe 2003-2007

L'Observatoriu de la Política Lingüística siñala nel so Informe sobre la política llingüística nel periodu 2003-2007, les abondes insuficiencies detectaes nes polítiques desendolcaes pol gobiernu asturianu relatives al fomentu l'usu de la llingua asturiana; sicasí, l'Observatoriu destaca tamién l'esfuerzu fechu dende la Oficina de Política Llingüística del Principáu nel so llabor d'impulsu la normalización social del asturianu.

> La noticia, equí.
> L'informe completu, equí.

La Conseyería la Presidencia'l Principáu refuga tramitar un permisu pa operar por tar redactáu n'asturianu

Xurde Blanco Puente, Secretariu d'AXA y Lletráu titular del Serviciu Xurídicu del Principáu, va sometese güei a una intervención cardiolóxica nel Hospital Central d'Asturies. Nos dos caberos años, Xurde sofriera dos infartos y un procesu d'ansiedá polos que tuvo dellos meses de baxa. La Conseyería la Presidencia negó-y apocayá la tramitación de dos permisos -ún pa sometese a les pruebes previes a la intervención quirúrxica y otru pa la propia operación-, al venir redautaes n'asturianu. El Secretariu la nuesa Asociación va dir al Hospital a operase ensin l'acreditación llaboral preceutiva.

Deseámos-y a Xurde una bona intervención y qu'alique dafecho lo más rápido posible.

> La noticia, equí.

El CAO recauda más de 13.000 euros na puya d’obres d’arte pola oficialidá

La puya d'obres d'arte pola oficialidá entamada pol Conceyu Abiertu pola Oficialidá (CAO) n'Uviéu, cerróse con 36 obres vendíes y 13.200 euros recaudaos, de los que cerca de 10.000 eur. van dedicase a la financiación de les actividaes del CAO, mientres que'l restu van dir a cubrir los gastos de la esposición y la parte que-yos correspuende a los artistes que collaboraron cola iniciativa. En viendo l'éxitu de les trés esposiciones d'esta mena que lleva feches el CAO (na de Xixón n'avientu de 2006 recaudáronse 4.465 euros), la organización nun descarta volver facer iniciatives asemeyaes.

> La noticia, equí.

El Tribunal Supremu almite a trámite'l recursu de casación escontra l'anulación de les Ordenances Municipales sobre Oficialidá de la Llingua de Nava

La Secretaria Xeneral d’Andecha Astur, Olaya García Rubiera, informa que-yos foi notificada una Providencia dictada pola Sala de lo Contencioso-Alministrativu del Tribunal Supremu (Seición Cuarta), na que s'almite a trámite'l recursu de casación interpuestu por Andecha Astur escontra l’anulación de les Ordenances Municipales sobre Oficialidá de la Llingua en Nava. Estes Ordenances aprobóles l'Ayuntamientu navetu en sesión plenaria el 8 de xunu de 2001, y más sero fueran anulaes por una sentencia de la Sala lo Contencioso-Alministrativu del Tribunal Superior de Xusticia d’Asturies, de fecha 3 de Xunu de 2005, qu’estimó favoratiblemente'l recursu interpuestu escontra esta norma pola Delegada'l Gobiernu n’Asturies, Mercedes Fernández (PP). Les Odenances de Nava fueron pioneres na reconocencia y regulación de los derechos llingüísticos asturianos por parte d'una Alministración Pública, asoleyándose nel BOPA nel mes d'ochobre de 2005. Los demás Conceyos asturianos que declararon la oficialidá de la llingua nos sos respeutivos ámbitos territoriales (declaraciones toes elles anulaes pol Tribunal Superior de Xusticia d'Asturies), ficiéronlo d’una manera muncho más xenérica, al traviés de declaraciones non tan específiques como la regulación naveta.

> La noticia, equí.