L'Observatoriu de Derechos Llingüísticos (ODLL), ye una iniciativa promovida pol Aconceyamientu de Xuristes pol Asturianu (AXA) que mira por:

• Encadarmar un Rexistru (RDLLA) actualizáu dafechu nel qu'atropar les agresiones y discriminaciones escontra los ciudadanos y ciudadanes falantes d'asturianu y de gallegu-asturianu tanto nel ámbitu públicu como nel priváu, endenantes que la memoria les entierre, como vergoñosu y permanente testimoniu de l’agresión llingüística escontra’l pueblu asturianu.

• Promover estudios y facer informes sobre la situación de respetu o conculcación de los derechos llingüísticos n'Asturies, afitándose nos datos recoyidos y anovaos de forma periódica nel RDLLA, presentándolos énte la sociedá asturiana y énte les instituciones o asociaciones locales ya internacionales de Derechos Humanos, cola fin de dar a conocer la situación de discriminación llingüística que carecen los asturianos, entamando modos de presión pa que los derechos fundamentales de los falantes seyan respetaos.

• Facer un llabor pedagóxicu no que cinca a la conocencia y espardimientu de los derechos llingüísticos que-yos correspuenden a los falantes, entendiéndolos como'l derechu fonderu que tienen los ciudadanos asturianos a mandase de la so propia llingua y a desendolcala con normalidá na so vida cotidiana.

• Trabayar de manera proactiva  pa que les empreses, asociaciones, organizaciones ya instituciones cimeres de la sociedá asturiana, se manden de la llingua propia, favoreciendo d'estamiente la so normalización social.