Atrás     PDF

Nun podía tardar muncho. Y ya nun va tardar más.

Hasta esti momentu, cada vegada que dende la FSA o dende’l PP se nomaba la oficialidá yera pa dicir les munches perres que nos diba costar ser un país billingüe. Dende esti domingu 12 de xunetu de 2009 ya sabemos que tener una llingua propia estremada del castellán pue danos de comer a tolos asturianos. Porque un 5% más de financiación cada añu son munchos, pero que munchos millones d’euros que nun poemos despreciar, a menos que nos volviéremos llocos dafechu, lo cualo tampocu nun se pue descartar.

Esti domingu sabíemos que’l Gobiernu facía cuimplir el so compromisu de dar financiación extra a les comunidaes con llingua propia. Persabíemos que pa Galicia calculábase una financiación de 632 millones d’euros (¿por qué nun sabiémos les cifres d’Asturies? probablemente polo mesmo que’l diariu El País falaba de la financiación de Cantabria pero nun-y dedicaba nin media llinia a la d’Asturies… nun pintamos un res).

Esti domingu, sabíemos que la financiación yera pa Galicia cásique un 5% más de la que-y correspondía sólo por tener lo mesmo que nós, una llingua propia.

Asturies va perder, nun momentu de crísis fonda, una inyeición de dineru importantísima: cásique 50 veces lo que destina l’Ayuntamientu de Xixón a polítiques sociales. Y anque namái se dedicaren esos fondos a crear puestos de trabayu pa los que falen asturianu (como critiquen falazmente y ensin xacíu los más recalcitrantes centralistes de tolos partíos que se tan oponiendu dafechu a la oficialidá) sedríen más de mil puestos de trabayu de baldre que salvaríen les cifres d’emplegu d’Asturies nel momentu de mayor perda de puestos de trabayu de los caberos venti años de la historia d’España.

Nun hai nada más que dicir. Si los partíos mayoritarios nos faen perder a los asturianos una cantidá tan bultable de fondos nel contestu de la crisis más fonda dende la gran depresión y los empresarios, los estudiantes, los trabayadores y los paraos nun dicen un res, habrá que pensar en dir colando d’equí, porque na prósima seronda habrá uin suicidiu coleutivu. Y quien firma, tien-y ciertu apreciu a la vida…