Atrás     PDF

Cuatro acontecimientos recientes referentes a la llingua asturiana son finxos cimeros de la cabera ofensiva del más ranciu, reaccionariu y escluyente nacionalismu españolista nel nuestru país. Ellos son, cronolóxicamente: a) el llamáu «Manifiesto por la lengua común»; b) la oposición a les enseñances d'asturianu na Facultá de Filoloxía; c) l'alcuerdu PSOE-PP p'aprobar un nuevu Estatutu d'Autonomía qu'incumple la Constitución; y d) los alcuerdos del congresu de la FSA-PSOE qu'echen pa casa col rau ente les pates a los que creyíen nel «talante» democráticu del socialismu asturianu.

Ensin espaciu nin vagar pa tratar amodo caún d'estos asuntos, cabe intentar facer un breve esbozu a vuelapluma, apuntando delles idees al respective:

Del «Manifiesto por la lengua común».

Díbemos d'escursión un grupu xente per un camín de cabres cuando, de repente, un paisanu mayor qu'andaba ente los d'alantre escomenzó a dar voces diciendo: «¡Cuidáu con estes formigues que crucen el camín, que son de les que piquen!». Y darréu, púnxose a estrapallar formigues coles botes con estraordinariu enfotu, xera a la que s'axuntaron otros cuantos escursionistes que veníen detrás. Atalantando qu'aquel home nun taba bien de la sesera (y los que lu secundaben na matanza non muncho meyor), entrugué-y a un compañeru de caminata, psiquiatra de profesión, qué triba de trastornu afectaría a aquella xente. El psiquiatra desplicóme qu'aquella conducta yera típicamente paranoica; ilustrándome, darréu, con más detalles sobre la enfermedá.

Pos resulta que la conducta del vieyu paranoicu, afalando a toa una tropa d'escursionistes domingueros p'achuquinar les formigues que cruzaben el camín, compara bien pa cola actitú d'esos «intelectuales» qu'intenten engafentar al conxuntu la sociedá española escontra'l supuestu peligru que pa la llingua castellana representen les polítiques valientes y efectives que traten de restituir, esclusivamente nos territorios propios, les otres llingües; por cierto, tan dignes y españoles como'l castellanu.

Queda asina de sobra comentáu el talu manifiestu; pero la clave psiquiátrico-paranoica ye útil p'atalantar el siguiente asuntu de los que citaba enriba.

De la enmienda del profesor Fernández de Castro.

L'episodiu fue de sobra descritu y publicáu na prensa, polo que nun hai menester facelo otra vuelta. Interesa, sicasí, resaltar dalgunos detalles importantes:

En primer llugar, el profesor Fernández de Castro manifestó públicamente (La Nueva España del 6 de xunetu) que considera que la pretensión de criar una titulación universitaria d'asturianu ta arreyada a la oficialidá de la llingua. Y añadía: «opóngome radicalmente a la oficialidá del asturianu».

Ocurre que la Constitución española en vigor ye clarísima na so lletra y nel so espíritu cuando, nel Preámbulu, diz que «la nación española proclama la so voluntá de protexer a tolos españoles y puebles d'España nel exerciciu de los derechos humanos, les sos cultures y tradiciones, llingües y instituciones». Y, acordies con esta proclamada voluntá, nel art. 3, dempués d'aupar al castellanu al rangu de llingua oficial del Estáu y d'imponer la obligatoriedá del so deprendimientu a tolos españoles (quieran o non), afita que «les demás llingües españoles van ser tamién oficiales nes respectives Comunidaes Autónomes».

Por si fuere poco, l'artículu 14 diz que «los españoles son iguales énte la llei, ensin que pueda prevalecer discriminación nenguna por razón de raza, sexu relixón, opinión o cualquier otra condición o circunstancia personal o social».

Pos bien, puesto que'l profesor Fernández de Castro ye radicalmente contrariu a la oficialidá del asturianu, ta bien claro que s'opón radicalmente a que los asturianos disfrutemos d'unos drechos llingüísticos que consagra la Constitución española y que disfruten va bien d'años tolos demás españoles. Y asina, el señor Fernández de Castro, y tolos que participen del so discursu, sofita'l caltenimientu d'un réxime d'«apartheid» pa los asturianos; convirtiendo, de pasu, a los defensores d'esta llingua nel chivu espiatoriu del so odiu paranoicu.

Porque, bien mirao ¿qué otra cosa que la pura paranoya, proyectada n'odiu irracional escontra los asturianistes, desplica unes declaraciones nes que se califica de «matones» y coses mucho más graves a los tres estudiantes qu'entraron nel despachu del mentáu profesor pa espetá-y a la cara una simple entruga?.

Si esos estudiantes son unos «matones» por facer eso, ¿qué yeren los maestros que mos frayaron a insultos, coscorrones, tortazos y palos nos deos, a lo llargo de décades, a los que llegábemos a les escueles falando n'asturianu, que yera la nuestra llingua materna, familiar y ambiental; la única llingua, por tanto, que sabíemos y podíemos falar?. ¿Cómo calificar, entós, a aquellos fieles servidores del Estáu español qu'impunxeron el castellanu, con violencia física y psíquica, a millones d'inocentes neños españoles (asturianos, gallegos, vascos, aragoneses, catalanes, baleares) munches décades y xeneraciones y, mui especialmente, na dictadura franquista?. Y, por último, ¿nun son los Fernández de Castro y asemeyaos los auténticos y actuales sucesores d'aquellos (¿matones?, ¿fascistes?, ¿terroristes d'estáu?, ¿cómo los llamamos?) que mos machacaron a palos, a insultos y a burlles demientres yéremos escolinos, y aínda dempués, por falar la nuestra llingua materna, l'asturianu, la llingua propia de los asturianos dende va más de mil años?.

Ta claro que la defensa de les llingües minorizaes ta siendo políticamente utilizada como chivu espiatoriu sobre'l que proyectar l'odiu paranoicu d'una parte la población.

Ya ven: el problema d'España y d'Asturies nun ye la corrupción institucionalizada, nin la creciente descomposición social, nin l'esbarrumbe del sistema económicu que mos vien enriba y que, como escribió Xosefa Xovellanos va doscientos años «echa pel mundu a probes y señores». Non, el problema d'España y d'Asturies semos los que vindicamos el nuestru derechu a vivir n'asturianu na nuestra tierra...

Y quieren pisamos como a les formigues y acabar con nosotros porque según ellos, semos peligrosos. Y nun tenemos que dexanos pisar; porque una actitú pasiva, sumisa y comprensiva por parte del maltratáu nun fai otro qu'incentivar l'impulsu sádicu del maltratador.

¡Nada de recular!: reclamamos un derechu civil básicu reconocíu pola Constitución y la llexislación internacional soscrita pol Estáu español y, polo tanto, nun podemos dexanos apoderar pola violencia paranoica de los maltratadores que se faen pasar por víctimes argumentando (con un cinismu ablucante) que-yos queremos «imponer» l'asturianu; como si nosotros realmente quixéremos facer nel futuru cola nuestra llingua lo qu'ellos sí ficieron (y siguen faciendo) cola d'ellos.

Del pactu PSOE-PP pa la reforma l'Estatutu.

Lo dicho nes embelgues anteriores ye d'aplicación a esi avergoñante apañu ente les dos fuerces polítiques que representen el tardofranquismu n'Asturies. Pero nun ye eso tolo que se pue dicir: aparte la miseria argumental de los voceros oficiales d'estos partíos, llama l'atención la so escasa formación intelectual y política; lo que rescampla nuna redacción chapucera, sacada de dos decertos de 1975 del caducu réxime franquista (como oportunamente punxo de manifiestu'l Colectivu de Xuristes pol Asturianu) y qu'incurre nun descomanáu tracamundiu conceptual cuando, na propuesta de redacción del art. 4 afiten que «l'asturianu ye un patrimoniu del "Principado de Asturias"».

Vamos ser xente serio y mínimamente rigoroso: el «Principado de Asturias» nun ye otro qu'una institución d'autogobiernu d'un territoriu o comunidá autónoma del Estáu español llamáu Asturies. Y asina, el «Principado de Asturias» nun ye Asturies, sinón una pura entidá xurídica; y como entidá xurídica pue tener y de fechu tien patrimoniu: perres, edificios, terrenos que-y son propios, etc. ¿Pretendes estos políticos incorporar a esi patrimoniu la llingua asturiana?. ¿Quedrán cobramos después por utilizala?.

Inorantes y chapuceros hasta la llende del ridículu, cobardes y antiasturianos hasta la llende del vómitu, habrá que recorda-yos a estos diputaos que profanen la honorable historia de la Xunta Xeneral, que la llingua asturiana namás ye patrimoniu de la xente que la quier y la utiliza; y, por estensión, patrimoniu del conxuntu del pueblu asturianu y patrimoniu inmaterial de la humanidá.

Y del Congresu del PSOE.

Dempués de lo escrito enriba, yá nun queda muncho que dicir a propósitu del principal bastión del españolismu tardofranquista n'Asturies: la FSA-PSOE. Si acasu, entruga-yos a los que, por interés o inxenuidá, espardieron la idea de que podíen cambiar les coses nel PSOE tocantes a la llingua: ¿qué nuevu discursu vais inventar agora pa seguir adormeciendo conciencies febles y evitar mirar entientes la cruda realidá?. Y a esos militantes de basa del PSOE que dicen ser partidarios de la oficialidá, entruga-yos tamién: ¿Vais seguir militando nel PSOE y, darréu, collaborando activamente pa que'l PSOE siga gobernando n'Asturies y, fiel a les sos resoluciones congresuales, siga impidiendo una y otra vuelta'l reconocimientu d'un derechu civil fundamental?. Y si nun abandonáis el PSOE, ¿con qué cara vais siguir asistiendo a les manifestaciones y actos cívicos pacíficos en favor de la oficialidá?.

¡Acabáronse los cuentos y les medies tintes!: o tais a esti llau de la barricada, onde tamos los que reclamamos un derechu civil irrenunciable y básicu, o tais al otru llau de la barricada, onde planifiquen l'esterminiu d'un idioma milenariu los que taríen dispuestos a estrapallar colos tanques, si fuere'l casu, a los que lu amamos, lu falamos, lu escribimos y lu vindicamos, lluchando pola so pervivencia.